တရုတ်ပါဝါအချက်ပြ ရန်ကုန်မြို့သစ်စီမံကိန်း

ရန်ကုန်မြို့သစ် စီမံကိန်းတွင်ပါဝင်မည့် တရုတ်ကုမ္ပဏီ China Communications Construction Company Ltd. (CCCC) ၏ နောက်တွင် တရုတ် အစိုးရက လူလုံးထွက်ပြလိုက်ခြင်းသည် တစ်နည်းအားဖြင့် ရန်ကုန်မြို့သစ်စီမံကိန်းကို တရုတ်နိုင်ငံက ထောက်ခံကြောင်း ဖော်ပြလိုက်ခြင်းပင်ဖြစ်သည်။

နိုဝင်ဘာလ ၂၄ ရက်မှ နိုဝင်ဘာလ ၂၇ အထိ မြန်မာနိုင်ငံသို့ လာရောက်ခဲ့သော တရုတ်ပြည်သူ့သမ္မတနိုင်ငံ အမျိုးသား ဖွံ့ဖြိုးတိုးတက်ရေးနှင့် ပြုပြင်ပြောင်းလဲရေးကော်မရှင်ဒုတိယ ဥက္ကဋ္ဌ Mr. Ning  Jizhe သည် နိုဝင်ဘာလ ၂၅ ရက်တွင် ရန်ကုန်တိုင်းဝန်ကြီးချုပ် ဦးဖြိုးမင်းသိန်း ဦးဆောင်သော အစိုးရအဖွဲ့နှင့် တွေ့ဆုံခဲ့သည်။

ယင်းတွေ့ဆုံမှုမတိုင်မီရက်တွင် ဒုတိယဥက္ကဋ္ဌ Mr. Ning  Jizhe သည် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ စီမံဘဏ္ဍာဝန်ကြီး ဦးစိုးဝင်းတို့နှင့်လည်း တွေ့ဆုံခဲ့သည်။

ဒုတိယဥက္ကဌ Mr. Ning  Jizhe နှင့် ရန်ကုန်တိုင်းဝန်ကြီးချုပ် တွေ့ဆုံမှုတွင် ရန်ကုန်မြို့သစ်တည်ဆောက်ရေး ပူးပေါင်းဆောင်ရွက်ရမည့်ကိစ္စများကို ဆွေးနွေးခဲ့ကြသည်ဟု ရန်ကုန်တိုင်းဒေသကြီးအစိုးရ က သတင်းထုတ်ပြန်ခဲ့သည်။

ဒုတိယဥက္ကဋ္ဌ၏ ခရီးစဉ်အတွင်း တရုတ်-မြန်မာစင်္ကြံလမ်းတည်ဆောက်ရေးနှင့် ရန်ကုန်မြို့သစ်စီမံကိန်းအတွက် ‘နက်နက်ရှိုင်းရှိုင်း ဆွေးနွေးခဲ့ပြီး သဘောတူညီမှုများ ကျယ်ကျယ်ပြန့်ပြန့်’ ရရှိခဲ့သည်ဟု တရုတ်သံရုံးကလည်း နိုဝင်ဘာ လ ၂၈ ရက်တွင် တရားဝင်သတင်းထုတ်ပြန်ခဲ့သည်။

တရုတ်ပါဝါ

ရန်ကုန်မြို့သစ်စီမံကိန်းကို ကြည့်မြင်တိုင်တစ်ဖက်ကမ်းရှိ မြေဧက ၂၀,၀၀၀ ပေါ်တွင် အကောင်အထည်ဖော်ရန် စီစဉ်နေလျက်ရှိပြီး စီမံကိန်းတစ်ခုလုံး၏ ကုန်ကျစရိတ်သည် အမေရိကန်ဒေါ်လာ ၁ ဒသမ ၅ ဘီလီယံကျော်ကုန်ကျမည်ဟု ခန့်မှန်းထားကြသည်။

ရန်ကုန်မြို့သစ်စီမံကိန်းအတွက် ရန်ကုန်တိုင်းအစိုးရက ငွေကျပ် ၁၀ ဘီလီယံ မတည်၍ ရန်ကုန်မြို့သစ် ဖွံ့ဖြိုးတိုးတက်ရေးကုမ္ပဏီ (NYDC) ကို ဆောင်ရွက်လျက်ရှိပြီး စီမံကိန်းပထမအဆင့်ကို ၂၀၂၀ ပြည့်နှစ်တွင် ပြီးစီးရန်ရည်မှန်းထားပြီး အလုပ်အကိုင် နှစ်သန်းပေးနိုင်မည်ဟု မျှော်လင့်လျက်ရှိသည်။

အဆိုပါစီမံကိန်းသည် လွှတ်တော်ကိုယ်စားလှယ်များ၏ ဝေဖန်မှုအပြင် စီးပွားရေးနယ်ပယ်မှ လုပ်ငန်းရှင်များ၏ ဝေဖန်မှုကိုလည်း ခံနေရသည်။ အစိုးရက NYDC အများပိုင်ကုမ္ပဏီဖွဲ့၍ စီးပွားရေးလုပ်ကိုင်ခြင်း၊ မြို့သစ်တည်ရန် လို မလို အငြင်းပွားမှုများရှိခြင်း၊ ပထမအကြိမ် လွှတ်တော်၏ ခွင့်ပြုချက် ရထားသည်ဆိုသော်လည်း ဒုတိယအကြိမ်လွှတ်တော်၏ ခွင့်ပြုချက်မရခြင်းနှင့် ပွင့်လင်းမြင်သာမှုဆိုင်ရာ အငြင်းပွားမှု အစရှိသည်တို့သည် ပြည်သူများအကြား ဒွိဟဖြစ်စရာကိစ္စများ ဖြစ်သည်။

“၁၉၉၈ နောက်ပိုင်းတည်တဲ့ ဆင်ခြေဖုံးတွေကို မြို့ပြအင်္ဂါရပ်နဲ့ညီအောင် အရင်ဆုံး ပြန်တည်ဆောက်ရမယ်ဗျ။ ပြီးတော့မှ လူဦးရေပေါက်ကွဲမှုများလို့ မြို့သစ်တည်တာကို မကန့်ကွက်လိုပါဘူး လက်ခံပေးပါတယ်” ဟု ရွှေပြည်သာ မဲဆန္ဒနယ်မှ ရန်ကုန်တိုင်းဒေသကြီး လွှတ်တော်ကိုယ်စားလှယ် ဦးရန်အောင်မင်း က ထောက်ပြသည်။

ဤသို့သောဝိရောဓိများဖြစ်နေချိန်တွင် ရန်ကုန်မြို့သစ်စီမံကိန်းကို တရုတ်အစိုးရက အာရုံစိုက်၍ ပူးပေါင်းဆောင်ရွက်မည်ဖြစ်ကြောင်း ဖော်ပြလိုက်ခြင်းသည် တရုတ်၏ပါဝါကို ပြလိုက်ခြင်းဟု ယူဆကြောင်း ရန်ကုန်စောင့်ကြည့်အဖွဲ့တည်ထောင်သူ ဒေါက်တာညိုညိုသင်းက ဆိုသည်။

“တရုတ်နိုင်ငံက လွှတ်တော်အပေါ်မှာ Pressure (ဖိအား) တစ်ခုပေးလိုက်တာလည်း ဖြစ်ချင်ဖြစ်မှာပေါ့နော်။ တရုတ်အစိုးရက တို့ကတော့ ဒီကိစ္စမှာ ရန်ကုန်အစိုးရဘက်က ရပ်တယ်ဟေ့၊ လွှတ်တော်က ဆန့်ကျင်တယ်ဆိုရင် မင်းတို့ ငါတို့ကိုပါ ဆန့်ကျင်တဲ့သဘောဆိုပြီး ပြလိုက်တဲ့ သဘောပေါ့” ဟု ၎င်းကဆိုသည်။

ဒေါက်တာညိုညိုသင်းသည် ပထမအကြိမ် ရန်ကုန်တိုင်းလွှတ်တော်ကိုယ်စားလှယ်ဟောင်းလည်းဖြစ်သည်။

စီမံကိန်းများနှင့်ပတ်သက်၍ သံရုံးများ၏ ဝန်ထမ်းများက ပြောရဲဆိုရဲသည့် လွှတ်တော်ကိုယ်စားလှယ်များကို ပုဂ္ဂိုလ်ရေးအရ ချဉ်းကပ်စည်းရုံးခြင်းများသည် ယခင်ကရှိခဲ့ဖူးကြောင်း သူ့အတွေ့အကြုံကို အခြေခံ၍ ဒေါက်တာညိုညိုသင်းက ရှင်းပြသည်။

“ရန်ကုန်တိုင်းလွှတ်တော်မှာတုန်းက အန်တီက အစိုးရကို ထောက်ပြဝေဖန်တဲ့အခါမှာ တချို့နိုင်ငံခြားသံတမန်တွေက ခဏခဏတွေ့ဆုံပြီးတော့ သူတို့အစိုးရတွေက လုပ်ချင်တဲ့ကိစ္စတွေဆိုရင် အန်တီသဘောထားကို တီးခေါက်တာတို့ ဘာတို့ပေါ့နော် ရှိခဲ့တယ်။ အခုလိုမျိုး ဒီလိုမျိုးကြီး တရားဝင်ထုတ်ပြန်တာမျိုးကတော့ မကြံဖူးဘူးပေါ့နော်” ဟု ၎င်းကဆိုသည်။

ဒေါက်တာညိုညိုသင်းဆိုခဲ့သလိုပင် မြန်မာနိုင်ငံသို့ လာရောက်ခဲ့သည့် ဒုတိယ ဥက္ကဋ္ဌ Mr. Ning Jizhe သည်လည်း ၎င်း၏ခရီးစဉ်အတွင်း ရန်ကုန်တိုင်းလွှတ်တော်ဥက္ကဋ္ဌ ဦးတင်မောင်ဝင်းအပါအဝင် လွှတ်တော်ကိုယ်စားလှယ်အချို့နှင့်လည်း တွေ့ဆုံခဲ့သေးသည်။

“တစ်ရက်ထဲမှာပဲတွေ့တာ။ အစိုးရအဖွဲ့ကို အရင်တွေ့ပြီးမှ လွှတ်တော်အဖွဲ့နဲ့ တွေ့တာ။ CCCC ကုမ္ပဏီက လွှတ်တော်အတည်မပြုဘဲ လုံးဝမလုပ်ဘူး။ အတည်ပြုပြီးပြီးလို့ အန်ကယ်တို့ကိုပြောတယ်” ဟု အဆိုပါဆွေးနွေးပွဲသို့ တက်ရောက်သည့် ရန်ကုန်တိုင်းလွှတ်တော်ကိုယ်စားလှယ် ဦးကျော်ဇေယျက ဆိုသည်။

“လွှတ်တော်ဥက္ကဋ္ဌ (ဦးတင်မောင်ဝင်း) က အကြီးဆုံးဆိုတော့ အန်ကယ်တို့ သူတို့ပြောတာပဲ နားထောင်လိုက်တယ်။ ထင်မြင်ချက်မပြောလိုက်ဘူး” ဟု ဆွေးနွေးပွဲအကြောင်း ၎င်းကပြန်လည်ပြောပြသည်။

ဒုတိယဥက္ကဋ္ဌ Mr. Ning Jizhe ခရီးစဉ်အတွင်း မြန်မာနိုင်ငံတွင် လုပ်ငန်းများဆောင်ရွက်နေသည့် တရုတ်ကုမ္ပဏီများဖြစ်သည့် CITIC Group ၊ China  Communications Construction  Company Limited (CCCC)၊  China Railway Group Limited   (CRG)၊Yunnan Provincial  Energy Investment Group Co.,  Ltd. (YEIG) တို့၏ လုပ်ငန်းခွင်များသို့ သွားရောက်ကြည့်ရှုခဲ့ကြောင်း တရုတ်သံရုံး၏ထုတ်ပြန်ချက်တွင် ပါဝင်လာခဲ့သည်။

မြန်မာနိုင်ငံသည် ကုလသမဂ္ဂနှင့် ဥရောပသမဂ္ဂအပါအဝင် နိုင်ငံတကာဖိအားများကို ခံနေရချိန်တွင် တရုတ်နိုင်ငံက မြန်မာဘက်မှ ရပ်တည်ပေးခဲ့ပြီး ယင်းအချက်သည် မြန်မာနိုင်ငံတွင် တရုတ်စီမံကိန်းများအတွက် ပိုမိုအားကောင်းမှုများ ဖြစ်ပေါ်စေသည်ဟု ဒေါက်တာညိုညိုသင်း က ထောက်ပြသည်။

မြန်မာအပေါ် အနောက်ကမ္ဘာ၏ ဖိအားများ သက်ရောက်လာချိန်တွင် အရှေ့မျှော်ရင်းနှီးမြှုပ်နှံမှုများ အားကောင်းရန် အတိုင်ပင်ခံပုဂ္ဂိုလ် ကိုယ်တိုင်ကလည်း မျှော်လင့်ဟန်ရှိရာ ရန်ကုန်မြို့သစ်စီမံကိန်းသည် ယင်းကွက်လပ်ကိုဖြည့်ဆည်းနိုင်ခြေရှိသည်ဟုလည်း စီးပွားရေးလုပ်ငန်းရှင်အချို့က မှတ်ချက်ပြုကြသည်။

NYDC ၏ မြို့သစ်ခြေလှမ်း

ဝိရောဓိများရှိလင့်ကစား NYDC သည် မြို့သစ်စီမံကိန်းအတွက် အရှိန်အဟုန်ဖြင့် စတင်လျက်ရှိပြီဖြစ်သည်။ Key Player ဖြစ်သူ ဦးသိမ်းဝေသည် နာမည်ကျော် စီးပွားရေးလုပ်ငန်းရှင်ဖြစ်ရာ ရန်ကုန်မြို့သစ် အကောင်အထည်ဖော်ရေး ခြေလှမ်းများမှာ တဖြည်းဖြည်းရုပ်လုံးပေါ်လာသည်က အမှန်ပင်ဖြစ်သည်။

NYDC သည် စီမံကိန်းအကြို အဆိုပြုလွှာ Pre-Project Documents  (PPD) ကို ရေးဆွဲပြီးဖြစ်ကာ နောက်တစ်ဆင့်တွင် အဆိုပါရေးဆွဲပြီးမူကြမ်းကို ရန်ကုန်တိုင်းဒေသကြီး အစိုးရအဖွဲ့နှင့် ရန်ကုန်တိုင်းဒေသကြီး ရှေ့နေချုပ်ရုံးသို့ တင်ပြသွားမည်ဖြစ်ကြောင်း အဆိုပါ ကုမ္ပဏီက ကြေညာထားသည်။

“သက်ဆိုင်ရာအာဏာပိုင်တွေထံက ခွင့်ပြုချက်ရရှိပြီးရင် PPD ကို ကြေညာသွားမှာဖြစ်ပြီး NYDC Challenge တင်ဒါလည်း စတင်သွားမှာ ဖြစ်ပါတယ်” ဟု NYDC ဒုတိယဥက္ကဋ္ဌ နှင့် အမှုဆောင်အရာရှိချုပ် ဦးသိမ်းဝေက ဆိုသည်။

ရန်ကုန်မြို့သစ်စီမံကိန်း ပထမအသုတ် ရင်းနှီးမြှုပ်နှံမှုကို လာမည့်ရက်ပေါင်း ၆၀ အတွင်း စတင်မည်ဟု ရန်ကုန်မြို့သစ် ဖွံ့ဖြိုးရေးကုမ္ပဏီလီမီတက်၏ ဒုတိယဥက္ကဋ္ဌ ဦးသိမ်းဝေ (Serge Pun) က ပြောကြားကြောင်း Financial  Times သတင်းတွင် ဖော်ပြထားသည်။

“နောက်လာမယ့် ရက်ပေါင်း ၆၀ အတွင်း ပထမအသုတ် ရင်းနှီးမြှုပ်နှံမှု စတင်မှာပါ” ဟု ဒု-ဥက္ကဋ္ဌက ဦးသိမ်းဝေ (Serge Pun) က ပြောကြားခဲ့ကြောင်း နိုဝင်ဘာလ ၁၃ ရက်နေ့ နေ့စွဲဖြင့် ဖော်ပြထားသည့် Financial  Times သတင်းစာ၌ ရေးသားထားသည်။

ရန်ကုန်မြို့သစ်စီမံကိန်းသည် တရုတ်နိုင်ငံ ဟောင်ကောင်ကိုယ်ပိုင်အုပ်ချုပ်ခွင့်ရဒေသ မြောက်ဘက်ရှိ ကွမ်တုံပြည်နယ်၏ မြို့တော်ရှင်းကျန်းမြို့နှင့် တူကြောင်းကို ဦးသိမ်းဝေကဆိုသည်။

လမ်း၊ တံတားနှင့် အခြေခံအဆောက်အဦများစွာပါဝင်ပြီး စက်မှုဇုန်များလည်း ပါဝင်မည့် ရန်ကုန်မြို့သစ်စီမံကိန်းသည် တရုတ်နှင့် အခြားကုမ္ပဏီများကို ဆွဲဆောင်ရန် ရည်ရွယ်ထားခြင်းဖြစ်သည်။

ပြီးခဲ့သည့် နိုဝင်ဘာလအတွင်းကပင် ဟောင်ကောင်ကုန်သွယ်မှု ဖွံ့ဖြိုးတိုးတက်ရေးကောင်စီ (Hong Kong Trade Development Council) ဦးဆောင်သော အဖွဲ့ဝင် ၃၇ ဦးပါ ကိုယ်စားလှယ်များသည် ရန်ကုန်မြို့သို့ ရောက်ရှိလာခဲ့ပြီး အဆိုပါပုဂ္ဂိုလ်များအနက် ရန်ကုန်မြို့သစ်စီမံကိန်းတွင် ရင်းနှီးမြှုပ်နှံရန် စိတ်ဝင်စားသူများလည်း ပါဝင်လာကြောင်း NYDC ၏ ဒီဇင်ဘာလ ၅ ရက် ထုတ်ပြန်ချက်တွင် ဖော်ပြထားသည်။

“ကုန်ထုတ်လုပ်တဲ့ စက်ရုံတွေကို တရုတ်နိုင်ငံကနေ မြန်မာနိုင်ငံကိုပြောင်းရွှေ့လာဖို့ စိတ်အားထက်သန်တဲ့ လုပ်ငန်းရှင်တွေလည်း ပါဝင်ပါတယ်” ဟု NYDC ဒုတိယဥက္ကဋ္ဌနှင့် အမှုဆောင်အရာရှိချုပ်ဖြစ်သူ ဦးသိမ်းဝေက ဆိုသည်။

အဆိုပါအဖွဲ့နှင့် NYDC သည် နိုဝင်ဘာလ ၂၈ ရက်တွင် တွေ့ဆုံဆွေးနွေးခဲ့ကြသည်။

ဝိရောဓိများ

မြန်မာ့ရေရှည်ဖွံ့ဖြိုးတိုးတက်ရေး မဟာဗျူဟာ (Myanmar Sustainable  Development Plan-MSDP) ကို NLD အစိုးရလက်ထက်တွင် ထုတ်ပြန်ခဲ့ပြီးဖြစ်သည်။

ရန်ကုန်မြို့သစ်စီမံကိန်းကဲ့သို့ သက်ရောက်မှုကြီးမားသော စီမံကိန်းကြီးများသည် အဆိုပါ မြန်မာ့ရေရှည်ဖွံ့ဖြိုးတိုးတက်ရေး မဟာဗျူဟာနှင့် ချိတ်ဆက်ဆောင်ရွက်ရန်လိုသည်ဟု Mandalay  Technology ကုမ္ပဏီ အုပ်ချုပ်မှုဒါရိုက်တာ ဦးဇော်နိုင်ကဆိုသည်။

“ဒီတော့ CCCC နဲ့ပဲလုပ်လုပ်၊ တခြားဟာနဲ့ပဲ လုပ်လုပ် အဲဒီ MSDP ရဲ့ Project bank ထဲမှာ ဝင်ဖို့လိုတယ်။ နောက်ဘယ်သူနဲ့လုပ်မယ်၊ ဘယ်လိုလုပ်မယ်ဆိုတဲ့ ပွင့်လင်းမြင်သာတဲ့ စည်းကမ်း နည်းလမ်းတွေနဲ့ သွားဖို့လည်းလိုလိမ့်မယ်” ဟု ၎င်းကဆိုသည်။

NYDC ကမူ ရန်ကုန်မြို့သစ်စီမံကိန်း Master Plan ရေးဆွဲမှု ပထမအဆင့်ပြီးမြောက်သောကြောင့် နိုဝင်ဘာ လ ၇ ရက်တွင် အလုပ်ရုံဆွေးနွေးပွဲလုပ်မည်ဟုဆိုသည်။

တိုင်းဒေသကြီးတာဝန်ရှိသူများ၊ သက်ဆိုင်ရာဌာနတာဝန်ရှိသူများ၊ မြန်မာနိုင်ငံ အင်ဂျင်နီယာအသင်းနှင့် မြန်မာနိုင်ငံဗိသုကာပညာရှင်များအသင်းမှ ပညာရှင်များနှင့် အခြားသက်ဆိုင်သူများကို ဖိတ်ခေါ်၍ အကြံဉာဏ်ရယူသွားမည်ဟု ဆိုထားသည်။

Master Plan ရေးဆွဲမှု ဒုတိယအဆင့်ပြီးမြောက်ပြီး ဇန်နဝါရီလ ပထမပတ်တွင်မူ ပိုမိုကျယ်ပြန့်သည့် ဆွေးနွေးပွဲလုပ်မည်ဟု ကြေညာထားသည်။

ထို့အတူ ရန်ကုန်တိုင်းလွှတ်တော်သည်လည်း ဇန်နဝါရီလဆန်းပိုင်းတွင် ပြန်လည်စတင်မည်ဖြစ်ရာ ရန်ကုန်မြို့သစ်စီမံကိန်းကိစ္စတင်ပြမည်ဟု ရန်ကုန်တိုင်းလွှတ်တော်ကိုယ်စားလှယ် ဦးကျော်ဇေယျ က ပြောကြားသည်။

“ဇန်နဝါရီလဆန်းပိုင်မှာလုပ်မယ့် လွှတ်တော်မှာ မြို့သစ်စီမံကိန်းနဲ့ ပတ်သက်ပြီး လှုပ်ရှားမှုတစ်ခုတော့လုပ်မှာပါ။ လုပ်သင့်လုပ်ထိုက်တာကိုလေ ဥပဒေနဲ့ အညီပေါ့” ဟု ဦးကျော်ဇေယျက ဆိုသည်။

တရုတ်အစိုးရ ကိုယ်ထင်ပြလာခြင်း၊ ပြည်သူများအကြား သံသယနှင့် ဝိရောဓိ ရောယှက်နေသေးခြင်း၊ လွှတ်တော် အတည်ပြုမပြု မရှင်းလင်းသေးခြင်း၊ ပွင့်လင်းမြင်သာမှုအားနည်းသည်ဟု ဝေဖန်ခံနေရခြင်းများအကြား ရန်ကုန်မြို့သစ်စီမံကိန်းအတွက် လမ်းစတစ်ခုကို ရန်ကုန်စောင့်ကြည့်အဖွဲ့တည်ထောင်သူ ဒေါက်တာညိုညိုသင်းက ယခုလိုဆိုသည်။

“အားလုံးက သူ့အလုပ်ကို သူ လုပ်ကြတာပဲလေ။ မြန်မာနိုင်ငံက တင်မြှောက်ထားတဲ့ နိုင်ငံရေးသမားတွေကလည်း ပြည်သူလူထုအကျိုးစီးပွားအတွက် လုပ်လိမ့်မယ်လို့ အန်တီက မျှော်လင့်ထားတယ်” 

 

ရဲနိုင်ဦး၊ ပို့ပို့

You may also like...

Leave a Reply

Your email address will not be published. Required fields are marked *