ခွင့်ပြုမြေ ဧကနှစ်သန်းကျော်မှ တစ်သန်းကျော်ပြန်သိမ်းထားဟုဆို

နေပြည်တော်၊ ဒီဇင်ဘာ ၇

နိုင်ငံအတွင်း မြေလွတ်၊ မြေလပ်နှင့်မြေရိုင်းများကို စိုက်ပျိုးရေး၊ မွေးမြူရေး၊  ဓာတ်သတ္တုထုတ်လုပ်ခြင်းနှင့် အခြားသော လုပ်ငန်းများအတွက် လုပ်ပိုင်ခွင့်ချထားပေးသည့် မြေဧက ၂,၃၄၂,၆၀၀ ဒသမ ၈၂၄ ဧကမှ သတ်မှတ်ကာလ လေးနှစ်ပြည့်မြောက်သည်အထိ လုပ်ကိုင်ခွင့်မရှိသော မြေဧက ၁,၃၆၇,၀၆၅ ဒသမ ၅၂ ဧကကို ပြန်လည်သိမ်းယူထားကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ဒုတိယဝန်ကြီးဦးလှကျော်က ပြောဆိုသည်။

ယနေ့ကျင်းပသည့် ပြည်သူ့လွှတ်တော်အစည်းအဝေးတွင် လယ်ဝေးမဲဆန္ဒနယ်မှ ဦးမျိုးဇော်ဦးက နိုင်ငံတစ်ဝန်း လုံးတွင် နှစ်(၃၀) အငှားဖြင့် ချထားပေးသော မြေလွတ်၊ မြေလပ်နှင့် မြေရိုင်းဧကပေါင်း မည်မျှရှိသနည်း၊ ဥပဒေနှင့်အညီ ပြန်လည်သိမ်းယူခဲ့သော မြေဧကပေါင်း မည်မျှရှိပါသနည်း၊ ပြန်လည်သိမ်းယူပြီးသော မြေဧကများကို ဒေသခံပြည်သူများနှင့် မြေယာမဲ့တောင်သူများအတွက် မည်သို့ခွဲဝေချထားပေးမည်တို့ကို သိလိုကြောင်း မေးမြန်းချက်ကို ၎င်းက အထက်ပါအတိုင်း ထည့်သွင်းဖြေကြားခြင်းဖြစ်သည်။

အဆိုပါ ပြန်လည်သိမ်းယူထားသော မြေများကို လုပ်ကိုင်လိုသူများရှိပါက မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးနည်းဥပဒေ၊ လုပ်ထုံးလုပ်နည်း၊ ညွှန်ကြားချက်များနှင့်အညီ လျှောက်ထားနိုင်ကြောင်း ဒုဝန်ကြီးက ရှင်းပြသည်။

၂၀၁၈ ခုနှစ်တွင် ပြင်ဆင်ထားသော အဆိုပါဥပဒေအရ စိုက်ပျိုးရေးအတွက် ၃၀၀ ဧကအထိလည်းကောင်း၊ မွေးမြူရေး လုပ်ကိုင်မည်ဆိုပါက ၅၀ ဧကအထိ လည်းကောင်း တိုင်းဒေသကြီးနှင့် ပြည်နယ်အဆင့်များတွင် လျှောက်ထားနိုင်ပြီး ယင်းထက်ပိုမိုသော မြေကိုလျှောက်ထားလိုပါက ဗဟိုကော်မတီသို့ တင်ပြလျှောက်ထားနိုင်ကြောင်း ၎င်းက ဆိုသည်။

ပြန်လည်သိမ်းယူထားသော မြေလွတ်၊ မြေလပ်နှင့် မြေရိုင်းများကို ဒေသခံပြည်သူများ ရယူလုပ်ကိုင်လိုခြင်း သို့မဟုတ် တိုင်းနှင့် ပြည်နယ်အစိုးရအဖွဲ့များအနေနှင့် မြေမဲ့၊ ယာမဲ့များကို ခွဲဝေချထားပေးမည်ဆိုပါက နည်းဥပဒေ၊ လုပ်ထုံးလုပ်နည်းနှင့်အညီ လျှောက်ထားနိုင်ပြီး စိစစ်ခွင့်ပြုပေးသွားမည်ဖြစ်ကြောင်း ၎င်းက ထပ်လောင်းပြောကြားသည်။

You may also like...

Leave a Reply

Your email address will not be published. Required fields are marked *