မြန်မာ့အာမခံလုပ်ငန်း ပြည်တွင်း၊ ပြည်ပအာမခံကုမ္ပဏီများနှင့် ဖက်စပ်လုပ်ကိုင်ရန်စီစဉ်

ရန်ကုန်၊ ဒီဇင်ဘာ ၇

ပုဂ္ဂလိက စီးပွားရေးအဖွဲ့အစည်းများကဲ့သို့ ဆောင်ရွက်ရန် မြန်မာ့အာမခံလုပ်ငန်းကို ပြည်တွင်း၊ ပြည်ပအာမခံ ကုမ္ပဏီများနှင့် ဖက်စပ်လုပ်ကိုင်မည်ဖြစ်ကြောင်း မြန်မာ့အာမခံလုပ်ငန်းဦးဆောင်ညွှန်ကြားရေးမှူးဒေါက်တာဒေါ်စန္ဒာဦးက ပြောကြားသည်။

မြန်မာအာမခံလုပ်ငန်းသည် နိုင်ငံတော်ပိုင်စီးပွားရေးလုပ်ငန်းတစ်ခုဖြစ်ပြီး ပုဂ္ဂလိကကုမ္ပဏီများနှင့် ပူးပေါင်းနိုင်ရန် မြန်မာ့အာမခံဥပဒေကို ပြင်ဆင်နေကြောင်း ၎င်းက ဆိုသည်။

“မြန်မာအာမခံလုပ်ငန်းသည် နိုင်ငံခြားအာမခံကုမ္ပဏီများ၊ ပြည်တွင်းအာမခံကုမ္ပဏီများနဲ့ JV (Join Venture) သော်လည်းကောင်း၊ Join Operation အဖြစ် MPT က KDDI နဲ့ လုပ်သလိုမျိုး ပူးပေါင်း၍ ဆောင်ရွက်နိုင်သည်ဟု (မြန်မာ့အာမခံဥပဒေမှာ) ကျွန်မတို့ ပြင်ထားပါပြီ။ လွှတ်တော်ကို ကျွန်မတို့ တင်ပါတော့မယ်”ဟု ၎င်းက ဆိုသည်။

ဥပဒေပြင်ဆင်ပြီး လုပ်ငန်းဆောင်ရွက်ခွင့်ရပါက ပုဂ္ဂလိကစီးပွားရေးကော်ပို ရေးရှင်းတစ်ခုကဲ့သို့ လည်ပတ်မည်ဖြစ်ပြီး ရရှိသည့် အကျိုးအမြတ်ကို နိုင်ငံတော်အခွန်ဘဏ္ဍာသို့ ထည့်ဝင်မည်ဖြစ်ကြောင်း ၎င်းက ဆိုသည်။

လက်ရှိတွင်လည်း မြန်မာ့အာမခံလုပ်ငန်းမှ ရရှိသော ဝင်ငွေကို နိုင်ငံတော်ဘဏ္ဍာသို့ ထည့်ဝင်နေပြီး ၂၀၁၆ – ၁၇ဘဏ္ဍာနှစ်တွင် ငွေကျပ် ၅၆ ဘီလီယံ၊ ၂၀၁၇ – ၁၈ ဘဏ္ဍာနှစ်တွင် ငွေကျပ် ၆၁ ဘီလီယံ၊ ခြောက်လဘဏ္ဍာနှစ်တွင် ငွေကျပ် ၃၈ ဘီလီယံ ထည့်ဝင်ခဲ့ကြောင်း မြန်မာ့အာမခံလုပ်ငန်းထံမှ သိရသည်။

သက်တမ်း ၆၆ နှစ်ရှိပြီဖြစ်သည့် မြန်မာ့အာမခံလုပ်ငန်းသည် အသက်အာမခံ၊ မီးအာမခံ၊ အထွေထွေအာမခံ၊ ရေကြောင်းအာမခံ၊ လေကြောင်းအာမခံ၊ ခရီးသွားအာမခံ၊ ရေနံနှင့် သဘာဝဓာတ်ငွေ့အာမခံ၊ သူတပါးထိခိုက်မှုအာမခံ၊ မော်တော်ယာဉ်အလုံးစုံ အာမခံ၊ တစ်ဆင့် အာမခံလုပ်ငန်းများတို့ကို အဓိကလုပ်ကိုင်လျက်ရှိသည်။

၂၀၁၃ ခုနှစ် ဇွန်လမှ စတင်ပြီး ပြည်တွင်းပုဂ္ဂလိက အာမခံဈေးကွက်အတွင်းသို့ ပြည်တွင်းပုဂ္ဂလိကအာမခံ ကုမ္ပဏီ ၁၂ ခု လည်ပတ်နေပြီး နိုင်ငံခြားအာမခံကုမ္ပဏီများကို လုပ်ကိုင်ခွင့်ပြုရန်စီစဉ်နေကြောင်း အာမခံလုပ်ငန်းများထံမှ သိရသည်။

You may also like...

Leave a Reply

Your email address will not be published. Required fields are marked *