ဝလုံးနှင့် ကျော်စိုးဦး

တရားစီရင်ရေးမဏ္ဍိုင် ဖြောင့်မတ်ပါ၏လော၊ သတင်းမီဒီယာ လွတ်လပ်ပါ၏လောဟု မေးခွန်းများကျယ်လောင်စွာ ထွက်ပေါ်လာစေခဲ့ သည့်အပြင် အမျိုးသားရေးတာဝန်နှင့် ပရော်ဖက်ရှင်နယ်သတင်းလုပ်ငန်းအကြားရှိနေသည့် စည်းဘောင်၊ အဓိပ္ပာယ်ဖွင့်ဆိုချက်၊ လက်ခံနားလည်မှုဆိုင်ရာ အငြင်းပွားဆွေးနွေးမှုများ ကျယ်ပြန့်သွားခဲ့စေခဲ့သော ရိုက်တာသတင်းထောက်နှစ်ဦးဖြစ်သူ ၀လုံး (သက်ဦးမောင်) နှင့် ကိုကျော်စိုးဦးတို့ကို ၂၀၁၈ ခုနှစ် သတင်းမီဒီယာလောက၏ ထူးခြားထင်ရှားသူများအဖြစ် ရွေးချယ်လိုက်ပါသည်။

သတင်းဖော်ထုတ်ရန် ကြိုးပမ်းသည့် မြန်မာနိုင်ငံသား ရိုက်တာသတင်းထောက်နှစ်ဦးကို ဖမ်းဆီးထောင်ချမှုမှာ မဏ္ဍိုင်ကြီးနှစ်ခုအပေါ် ကြီးကြီးမားမား ဂယက်ရိုက်သွားခဲ့သည်။ ပြစ်ဒဏ်မချမှတ်ခင်ကပင် နိုင်ငံတကာဖိအားများခဲ့သည့် ယင်းအမှုကို ထောင်ဒဏ်ခုနစ်နှစ် ချမှတ်လိုက်ခြင်းမှာ နိုင်ငံတကာဖိအားကိုလည်း ဖိတ်ခေါ်ရာ ရောက်ခဲ့သည်။ ပြန်လွှတ်ပေးရန် လူ့အခွင့်အရေးအဖွဲ့များအပြင် နိုင်ငံတကာ အသိုင်းအဝိုင်းက ဖိအားပေးတောင်းဆိုခဲ့ကြသည်။

မြန်မာအစိုးရအကြီးအကဲများ ပြည်ပသွားချိန်၊ နိုင်ငံတကာကအကြီးအကဲများ မြန်မာနိုင်ငံသို့ လာရောက်လည်ပတ်စဉ် ရခိုင်ဒေသ ပြဿနာနှင့်ဆက်စပ်၍ မေးမြန်းဖိအားပေးကြရာတွင် ရိုက်တာသတင်းထောက်နှစ်ဦးအရေးမှာလည်း မပါမပြီးဖြစ်သည်။ ထင်းရှားသည့် ဖြစ်ရပ်မှာ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် အာဆီယံထိပ်သီးဆွေးနွေးပွဲတွင် နှစ်ဦးချင်းတွေ့ဆုံစဉ် အမေရိကန် ဒုတိယသမ္မတ မိုက်ပန့်စ်က သန်းနှင့်ချီသော အမေရိကန်ပြည်သူများ စိတ်ထိခိုက်ရသည်ဟု ဝေဖန်ခဲ့ခြင်းဖြစ်သည်။

ရိုက်တာသတင်းသမားနှစ်ဦးသည် မောင်တောမြို့နယ်တောင်ပိုင်း အင်းဒင်ကျေးရွာတွင်ဖြစ်ပွားခဲ့သည့် လူသတ်မှုကိုဖော်ထုတ်ရန် ကြိုးပမ်းပြီးနောက် ဖမ်းဆီးခံရခြင်းဖြစ်သည်။ ရခိုင်မြောက်ပိုင်းတွင် တာဝန်ထမ်းဆောင်ပြီး ရန်ကုန်တွင် စုဖွဲ့နေသည့် ရဲတပ်ဖွဲ့ဝင်များထံမှ စာရွက်စာတမ်းများ ရယူသည်ဟုဆိုကာ ဖမ်းဆီးပြီး မြန်မာနိုင်ငံ လျှို့ဝှက်ချက်များအက်ဥပဒေအရ တရားစွဲခံရခြင်းဖြစ်သည်။ သို့သော်လည်း ပြစ်ဒဏ်ချရာတွင် ယင်းစွပ်စွဲချက်ဖြင့် မဟုတ်တော့ပေ။ ထို့အပြင် ၎င်းတို့အား ဖမ်းဆီးရာတွင် ပါဝင်ခဲ့သည့် ဒုရဲအုပ် မိုးရန်နိုင်က ၎င်းတို့အား ထောင်ချောက်ဆင် ဖမ်းဆီးခြင်းဖြစ်ကြောင်း တရားရုံးတွင် သက်သေထွက်ဆိုသွားခဲ့သော်လည်း ယင်းထွက်ဆိုချက်ကို တရားရုံးက အလေးမမူခဲ့ပေ။

တိုင်းတစ်ပါးအဖွဲ့အစည်းအတွက် သူလျှိုလုပ်ပြီး နိုင်ငံအပေါ် သစ္စာဖောက်သည်ဆိုသည့် အဆိုပါအက်ဥပဒေ ပုဒ်မ ၃ ပုဒ်မခွဲ ၁ (ဂ) ဖြင့် စွပ်စွဲသော်လည်း အပြစ်ရှိကြောင်း ထင်ထင်ရှားရှားသက်သေမပြနိုင်ဘဲ ထောင်ဒဏ်ခုနစ်နှစ်ချမှတ်လိုက်သဖြင့် ကြိုတင်ဆုံးဖြတ်ထားသည့်အမိန့်ဟု ဝေဖန်သံများ ညံခဲ့သေးသည်။

ရိုက်တာသတင်းထောက်နှစ်ဦးကို ပြန်လွှတ်ပေးရန် နိုင်ငံတကာဖိအားမြင့်တက်နေသကဲ့သို့ ၎င်းတို့နှစ်ဦး ဖော်ထုတ်ရေးသားခဲ့သည့် ဘင်္ဂါလီလူမျိုး ၁၀ ဦးကို လုံခြုံရေးတပ်ဖွဲ့ဝင်များနှင့် ဒေသခံအချို့က သတ်ဖြတ်သည်ဆိုသော သတင်းကြောင့်လည်း မြန်မာအပေါ် နိုင်ငံ တကာဖိအား မြင့်တက်သွားစေခဲ့သည်။

ရိုက်တာက ဖော်ထုတ်ပြီး အများပြည်သူထံသို့ မတင်ဆက်ခင် တပ်မတော်က စုံစမ်းစစ်ဆေးကာ သတင်းများထုတ်ပြန်ခဲ့ပြီး ပြစ်မှုကျူးလွန်သူများကိုလည်း အရေးယူခဲ့သည်။

ရိုက်တာသတင်းထောက်နှစ်ဦးကို တရားစွဲဆို အပြစ်ဒဏ်ချမှတ်ခြင်းသည် သတင်းမီဒီယာအမှောင်ခေတ်သို့ ဦးတည်စေပြီး ဒီမိုကရေစီ အစိုးရလက်ထက်တွင် သတင်းမီဒီယာလွတ်လပ်ခွင့် ကျဆင်းနေကြောင်း မီးမှောင်းထိုးပြလိုက်ခြင်းဟု ပြည်တွင်း၊ ပြည်ပအခြေစိုက် လူ့အခွင့်အရေးအခြေပြုအဖွဲ့အစည်းများ၊ သတင်းမီဒီယာများက မှတ်ချက်ပြုကြသည်။ အထူးသဖြင့် တပ်မတော်နှင့်ပတ်သက်၍ ဖော်ထုတ်ရေးသားမှုများအတွက် ပြင်းထန်စွာ သတိပေးလိုက်သည့်သဘောဟုလည်း ကောက်ချက်ချကြသည်။

ပြည်တွင်းတွင်လည်း ရိုက်တာသတင်းထောက်နှစ်ဦးသည် သတင်းမီဒီယာတာဝန်ကို ကျေပွန်စွာထမ်းဆောင်သူများဟု ရှုမြင်ကာ ဂုဏ်ပြုအားပေးကြသလို မြန်မာနိုင်ငံအပေါ် နိုင်ငံတကာဖိအားပိုကြီးစေသူများအဖြစ် အပြစ်တင်သူများလည်းရှိသည်။ နိုင်ငံတကာအသိုင်းအဝိုင်းကမူ ၎င်းတို့နှစ်ဦးကို ချီးမွမ်းဂုဏ်ပြုကာ ဆုများလည်း ချီးမြှင့်ထားကြသည်။

တရားရေးမဏ္ဍိုင်၊ အုပ်ချုပ်ရေးမဏ္ဍိုင်တို့၏ ဖြောင့်မှန်၊ မျှတမှုအပေါ် သံသယဖြစ်သွားစေခြင်း၊ နိုင်ငံတကာဖိအားများ တိုးမြင့်လာနိုင်သည်ကိုသိပါလျက်နှင့် မိမိကိုယ်ကိုယ် လွန်ကဲစွာကာကွယ်လိုသော ကိုယ်ကျိုးအတ္တများ ထူးကဲစွာ ပေါ်လွင်သွားခြင်း၊ အမျိုးသားရေးစိတ်ဓာတ်နှင့် ပရော်ဖက်ရှင်နယ်သတင်းမီဒီယာတာဝန်အကြား အကောက်အယူဆိုင်ရာ အငြင်းပွားမှုများပေါ်ပေါက်စေခြင်း၊ ပုဂ္ဂလိကသတင်းမီဒီယာလောကနှင့် သတင်းမီဒီယာသမားများအပေါ် ကိုယ်ကျိုးအတွက် နိုင်ငံတော်အား သစ္စာဖောက်ကာ တိုင်းပြည်ကို ရောင်းစားနေကြသူများသဖွယ် ချိုးနှိမ်၊ ဖိနှိပ်သော စကားလုံးများဖြင့် စွပ်စွဲပုတ်ခတ်မှုများ အထူးမြင့်တက်လာခြင်း၊ သတင်းမီဒီယာများ၏ လုပ်ငန်းတာဝန်အဆင့်ဆင့်၊ သတင်းမီဒီယာများ၏ အခန်းကဏ္ဍတို့နှင့်ပတ်သက်၍ အစိုးရနှင့် ပြည်သူတို့၏ သိမြင်နားလည်မှုရေချိန်ကို မီးမောင်းထိုးပြလိုက်ခြင်းတို့ကြောင့် ၀လုံးနှင့် ကျော်စိုးဦးတို့ကို ၂၀၁၈ ခုနှစ် သတင်းမီဒီယာလောက၏ ထူးခြားထင်ရှားသူများအဖြစ် ရွေးချယ်လိုက်ရခြင်းဖြစ်ပါသည်။

You may also like...

Leave a Reply

Your email address will not be published. Required fields are marked *