နိုင်ငံခြားအာမခံကုမ္ပဏီများနှင့် ယှဉ်ပြိုင်နိုင်ရန် ပြည်တွင်း အာမခံကုမ္ပဏီများကို အကာအကွယ်ပေးထားဟုဆို

ရန်ကုန်၊ ဇန်နဝါရီ ၄

နည်းပညာနှင့် ငွေကြေးအရင်းအနှီး တောင့်တင်းသော နိုင်ငံခြားအာမခံကုမ္ပဏီများနှင့် ယှဉ်ပြိုင်နိုင်ရန် ပြည်တွင်းအာမခံကုမ္ပဏီများကို အကာအကွယ်ပေးထားကြောင်း စီမံကိန်းနှင့် ဘဏ္ဍာရေးဝန်ကြီးဌာန၊ အာမခံလုပ်ငန်းကြီးကြပ်စစ်ဆေးရေးဌာနခွဲညွှန်ကြားရေးမှူး ဦးသန့်ဇင်က ပြောကြားသည်။

၂၀၁၉ ခုနှစ် ဇန်နဝါရီလ ၂ ရက်တွင် နိုင်ငံခြားအာမခံကုမ္ပဏီများကို မြန်မာနိုင်ငံတွင် လုပ်ကိုင်ခွင့်ပြုလိုက်သော်လည်း ရွေးချယ်ခွင့်သုံးမျိုးအကန့်အသတ်ဖြင့် ခွင့်ပြုထားပြီး ယင်းအချက်များသည် ပြည်တွင်းကုမ္ပဏီကို အကာအကွယ်ပေးခြင်းဖြစ်ကြောင်း ၎င်းကဆိုသည်။

“ကြေညာချက်ထဲမှာ ပါပါတယ်။ Option တွေကို သေချာကြည့်ရင် သူတို့ကို (ပြည်တွင်းအာမခံကုမ္ပဏီတွေ) အကာအကွယ်ပေးထားတာ။ ရွေးချယ်ခွင့်တွေမှာ အကာအကွယ်ပေးထားတယ်။ အသက်အာမခံလုပ်ငန်းကို အများဆုံး လိုင်စင်သုံးခုပဲ နိုင်ငံခြားအသက်အာမခံကုမ္ပဏီတွေကို တစ်ရာရာနှုန်းပြည့်ခွင့်ပြုထားတယ်” ဟု ၎င်းကဆိုသည်။

ဈေးကွက်လိုအပ်ချက်အရ နိုင်ငံခြားအသက်အာမခံကုမ္ပဏီသုံးခုသာ ခွင့်ပြုမည်ဖြစ်ပြီး အထွေထွေအာမခံကို မြန်မာနိုင်ငံတွင် ကိုယ်စားလှယ်ရုံးဖွင့်လှစ်ထားသော နိုင်ငံခြားကုမ္ပဏီများကိုသာ ပြည်တွင်းကုမ္ပဏီများနှင့် ဖက်စပ်ပူးပေါင်းလုပ်ကိုင်ခွင့်ပြုမည်ဖြစ်ကြောင်း ၎င်းကဆိုသည်။

၂၀၁၃ ခုနှစ်မှစတင်ကာ မြန်မာ့အာမခံဈေးကွက်တွင် ပြည်တွင်းပုဂ္ဂလိကအာမခံ ၁၁ ခု ကို လုပ်ပိုင်ခွင့်ပြုခဲ့ပြီး နိုင်ငံစီးပွားရေးဖွံ့ဖြိုးရန်လိုအပ်သော ငွေကြေးအရင်းနှီးများရရှိရန်၊ ဘဏ်မဟုတ်သော ငွေရေးကြေးရေးကဏ္ဍ ဖွံ့ဖြိုးလာရန် နိုင်ငံခြားအာမခံကုမ္ပဏီများကို လုပ်ကိုင်ခွင့် ပြုလိုက်ခြင်းဖြစ်ကြောင်း အာမခံလုပ်ငန်း ကြီးကြပ်စစ်ဆေးရေးဌာနခွဲထံမှ သိရသည်။

နိုင်ငံခြားအာမခံကုမ္ပဏီများကို လုပ်ကိုင်ခွင့်ပြုခြင်းကြောင့် အခွန်ငွေရရှိ ခြင်း၊ အာမခံလုပ်ငန်းကြီးကြပ်ရေးလုပ်ငန်းများ ပိုမိုအားကောင်းနိုင်ခြင်း၊ ဖက်စပ်လိုက်ကိုင်ခွင့်ရရှိခြင်းကြောင့် နိုင်ငံခြားအာမခံကုမ္ပဏီများထံမှ ကျွမ်းကျင်မှုနှင့် နည်းပညာများရနိုင်ကြောင်း မြန်မာ့အာမခံလုပ်ငန်းရှင်များက ဆိုသည်။

“ဒီ Liberalization (ဖြေလျှော့ မှုက) အကောင်းနဲ့ ဆိုးတာဆိုရင် ကောင်းတာဘက်ကို ပိုများတယ်လို့ ပြောချင်ပါတယ်။ အဓိက တိုင်းပြည်အတွက်လည်း ကောင်းမယ်။ ပြည်သူတွေအတွက်လည်း ကောင်းမယ်။ ဒါပေမဲ့ ကုမ္ပဏီတစ်ခုချင်းအနေနဲ့ပြောရရင်တော့ နည်းနည်းလေး အားနည်းတဲ့ ကုမ္ပဏီတွေက နောက်ကျပြီး ကျန်ရစ်နိုင်တယ်” ဟု မြန်မာနိုင်ငံအာမခံအသင်း အထွေထွေအတွင်းရေးမှူး ဦးသောင်းဟန်က ဆိုသည်။

လက်ရှိ မြန်မာနိုင်ငံတွင် အာမခံလုပ်ငန်းလုပ်ကိုင်ခွင့်ရရန် ကိုယ်စားလှယ်ရုံးဖွင့်လှစ် စောင့်ဆိုင်းနေသည့် နိုင်ငံခြားအာမခံကုမ္ပဏီပေါင်း ၃၂ ခုရှိပြီး မကြာမီ မြန်မာ့အာမခံဈေးကွက်တွင် ဝင်ရောက်လာဖွယ်ရှိသည်။ 

You may also like...

Leave a Reply

Your email address will not be published. Required fields are marked *