သိန်းတစ်သောင်းခွဲ သူဌေးလောင်းအိပ်မက်

ဓာတ်ပုံ - မိုးကျော်လွင်

အခွန်တိုးရမည့် အစီအစဉ်သစ်တစ်ရပ်ကို အစိုးရ စတင်တော့မည်ဖြစ်သည်။

ယခုနှစ်ဖေဖော်ဝါရီလတွင် တစ်ထောင်တန် ထီလက်မှတ်ကို စတင်ရောင်းချရန်စီစဉ်ထားခြင်း ဖြစ်သည်။

တစ်ထောင်တန်ထီလက်မှတ်သည် အမြင့်ဆုံးကျပ်သိန်းတစ်သောင်းခွဲအထိ ဆုကြေးအဖြစ် သတ်မှတ်ထားသည်။ ငါးရာတန်ထီလက်မှတ်ဆုကြေးထက် ထက်ဝက်ပိုရမည် ဖြစ်သည်။

တိုင်းပြည်စီးပွားရေးကျဆင်းမှု၊ တရွေ့ရွေ့တက်နေသည့် အခြေခံကုန်ဈေးနှုန်းများကြောင့် အကျပ်အတည်းဆိုက်နေသည့် အခြေခံလူတန်းစားများသူဌေးလောင်း အိပ်မက်မက်နိုင်ရန် အစိုးကတစ်ထောင်တန်ထီလက်မှတ်ကို မတ်လ တစ်ရက်နေ့တွင် စတင်ဖွင့်လှစ်မည်ဖြစ်သည်။

ကျပ်ငါးရာတန်ထီလက်မှတ်ရောင်းချပြီး ၂ နှစ်ခန့်အကြာတွင် တစ်ထောင်တန်ထီရောင်းချရန် အစိုးရက မည်သည့် အကြောင်းအရင်းကြောင့် စီစဉ်ရခြင်း ဖြစ်ပါသနည်း။

တစ်ထောင်တန်ထီလက်မှတ်တွင် ဆုကြေးကလည်း ပိုမြင့်လာပြီး ဆုအရေအတွက်မှာလည်း ပိုများလာမည်ဖြစ်သည်။

ဆုကြေးကျပ်သိန်းတစ်သောင်းခွဲအထိ အမြင့်ဆုံးရရှိမည်ဖြစ်ပြီး ကျပ်သိန်းငါးထောင်၊ သုံးထောင်နှင့် တစ်ထောင်ဆုများ အပါအဝင် အခြားဆုများကိုလည်း ထည့်သွင်းပေးထားကြောင်း ပြည်တွင်း အခွန်များဦးစီးဌာနမှ ညွှန်ကြားရေးမှူးချုပ်ဦးမင်းထွဋ်က ပြောကြားသည်။

အနိမ့်ဆုံးဆုကျပ်ငါးသောင်းအထိ ပါဝင်မည်ဖြစ်သည်။ အဆိုပါဆုကြေးများသည် ထီထိုးသူများအတွက် မက်လုံးများ ဖြစ်လာမည်လော။

တစ်ထောင်တန်ထီလက်မှတ်၌ အက္ခရာတစ်လုံးတွင် ထီလက်မှတ်အစောင်ရေ ကိုးသိန်းကျော်အထိ ထုတ်ထားပြီး အက္ခရာစာလုံးရေ ၄၀ အထိ ရိုက်နှိပ်မည် ဖြစ်ကြောင်း၊ ထို့ကြောင့် ထီလက်မှတ် အစောင်ရေ သန်း ၄၀ နီးပါးရှိမည်ဖြစ်ကြောင်း ဦးမင်းထွဋ်က ပြောဆိုသည်။

တစ်ထောင်တန်ထီလက်မှတ်သည် ငါးရာတန်ထီလက်မှတ်ထက် ဆုအရေအတွက် ပိုမိုထည့်သွင်းပေးထားကြောင်း၊ လက်ရှိ ငါးရာတန်ထီလက်မှတ်ကို ဆုမဲတစ်သိန်းခွဲအထိ ထုတ်ပေးနေပြီး တစ်ထောင်တန် ထီလက်မှတ်တွင် ဆုမဲနှစ်သိန်းကျော် ပါဝင်မည်ဖြစ်ကြောင်း ပြည်တွင်းအခွန်များဦးစီးဌာနထံမှ သိရသည်။

“ပြည်သူတွေ ပိုက်ဆံပိုပေးပြီး ထိုးရတဲ့အတွက် ဆုမဲတွေကိုလည်း တိုးပေးထားပါတယ်။ ဆုမဲတွေများတော့ ပြည်သူတွေ ပိုပေါက်တာပေါ့”ဟု ဦးမင်းထွဋ်က ပြောဆိုသည်။

ထီလက်မှတ်ရောင်းရငွေ၏ ၆၀ ရာခိုင်နှုန်းကို ဆုကြေးအဖြစ် ပြန်လည်ထုတ်ပေးခြင်းဖြစ်ပြီး ဆုမဲများ ပုံမှန်မရှိဘဲ မိုးတွင်းကာလ ထီအရောင်းနည်းသည့် အချိန်များတွင် ဆုမဲများကို လျှော့ထုတ်ကြောင်း အဆိုပါဦးစီးဌာနထံမှ သိရသည်။

အဆိုပါ တစ်ထောင်တန်ထီလက်မှတ်သာ ပုံမှန်ရောင်းအားဖြစ်လာပါ က နိုင်ငံတော်အခွန်ငွေမှာလည်း ကျပ်ငါးရာတန်ထီလက်မှတ်ထက် နှစ်ဆတိုးလာမည်ဖြစ်သည်။ ယခုနှစ်အတွက် ထီ လက်မှတ်ရောင်းရသည့် အခွန်ငွေသည် ကျပ် ၉၃ ဘီလီယံအထိရရှိကြောင်း ပြည်တွင်းအခွန်များဦးစီးဌာနထံမှ သိရသည်။

တစ်ထောင်တန်ထီလက်မှတ်သာ ပုံမှန်ရောင်းရပါက နိုင်ငံတော်အခွန်ငွေ ကျပ်ဘီလီယံ ၂၀၀ ခန့်အထိ ရရှိနိုင်ကြောင်း ဦးမင်းထွဋ်က ပြောဆိုသည်။

“နိုင်ငံတော်အခွန်ပိုရတာလည်း တစ်ပိုင်းပါတာပေါ့”ဟု ၎င်းက ရှင်းပြသည်။

တစ်ထောင်တန်ထီလက်မှတ်ထုတ်လိုက်ခြင်းကြောင့် ရောင်းချသူများအနေဖြင့် ထီလက်မှတ်ကို နိုင်ငံတော်က သတ်မှတ်ထားသည့် ဈေးနှုန်းအတိုင်းရောင်းပါက ၁၁ စောင်ပါ ထီတစ်အုပ်ကုန်လျှင် ကျပ်တစ်ထောင် အမြတ်ရမည်ဖြစ်ကြောင်း ပြည်တွင်းအခွန်များဦးစီးဌာနထံမှ သိရသည်။

“အပြင်မှာ ဈေးတင်ရောင်းနေတာကို ထိန်းချုပ်ဖို့ လုပ်တာပါ။ ထီထိုးတဲ့ သူတွေ ရောင်းတဲ့ ဈေးနှုန်းအတိုင်း ထိုးနိုင်အောင် လုပ်ပေးတာပါ”ဟု ဦးမင်းထွဋ်က ဆိုသည်။

ယခင်က နှစ်ရာတန်ထီလက်မှတ်များကို ကျပ် ၃၅၀ အထိ ဈေးတင်ကာ ရောင်းချမှုများရှိခဲ့ပြီး ၇၅ ရာခိုင်နှုန်း ပိုပေးခဲ့ရကြောင်း၊ ၅၀၀ တန် ထီလက်မှတ်ရောင်းချရာတွင် ကျပ် ၆၅၀၊ ၇၀၀ ပေးရသည့် အတွက် ၄၀ ရာခိုင်နှုန်းခန့်သာ ပိုပေးရတော့ကြောင်း ၎င်းက ရှင်းပြသည်။

တစ်ထောင်တန်ထီလက်မှတ်ကို ၁၂၀၀ အထိ ရောင်းချသည့်တိုင် ၂၀ ရာခိုင်နှုန်းခန့်သာ ပိုပေးရသည့်အတွက် ငွေကြေးပိုပေးရသည့် ရာခိုင်နှုန်းလျော့နည်းသွားနိုင်ကြောင်း ၎င်းက ပြောဆိုသည်။

“အဲဒီတော့ ပိုပေးရတာ နည်းလာတယ်။ ဆုကလည်း ပိုမြင့်သွားတော့ ထီပေါက်ပြီဆိုရင် အေးဆေးဖြစ်သွားပြီ။ နိုင်ငံတော်က ရောင်းတဲ့ဈေးအတိုင်း အပြင်မှာ ဝယ်လို့ရအောင် လုပ်တာပါ”ဟု ဦးမင်းထွဋ်က ပြောဆိုသည်။

ထီလက်မှတ်များကို ရောင်းချရာတွင် နိုင်ငံတော်ကချပေးသည့် ထီလက်မှတ်တန်ဖိုးထက် ပိုရောင်းနေသူများရှိနေပြီး တစ်ထောင်တန်ထီလက်မှတ်သည် ထီလက်မှတ်ခ ပိုပေးရသည့် ရာခိုင်နှုန်းနည်းသွားနိုင်ကြောင်း ပြည်တွင်းအခွန်များ  ဦးစီးဌာနထံမှ သိရသည်။

ဈေးကွက်အတွင်း ထီဈေးမြှင့်တင်ရောင်းချမှုကို လျှော့ချနိုင်ရန်အတွက် ကျပ် ၅၀၀ တန်ထီနှင့်အတူ ကျပ်တစ်ထောင်  တန်ထီကိုပါ ထုတ်လုပ်ရောင်းချရခြင်းဖြစ်ပြီး ကျပ်တစ်ထောင်တန်ထီ ထွက်လာပါက လက်လီရောင်းချသူများအနေနှင့် ပိုမိုအဆင်ပြေနိုင်ကြောင်း ပြည်တွင်းအခွန်များဦးစီးဌာနထံမှ သိရသည်။

၅၀၀ တန်ထီလက်မှတ်များ စတင်ရောင်းချရသည့်အချိန်တွင် ထီထိုးသူများ ဝယ်လိုအားနည်းသွားမည်ကို စိုးရိမ်ခဲ့သော်လည်း နောက်ပိုင်းတွင် အဆင်ပြေသွားကြောင်း ပန်းဘဲတန်းမြို့နယ်တွင် ထီလက်လီရောင်းနေသည့် ကိုမြင့်မောင်(အမည်လွှဲ)က ပြောဆိုသည်။

“အစကတော့ ထီထိုးသူနည်းသွားမယ်ထင်တာ။ ခပ်လန့်လန့်နဲ့ ရောင်းရတာပေါ့။ မကုန်မှာ စိုးလို့။ နောက်ပိုင်းတော့လည်း ထီထိုးသူက ပုံမှန်ထိုးနေတော့ ရောင်းရတာပါပဲ။ အရမ်း မကွာသွားပါဘူး”ဟု ၎င်းက ဆိုသည်။

တစ်ထောင်တန်ထီလက်မှတ် ထွက်လာပါက မည်သည့်ဈေးနှုန်းဖြင့် ရောင်းချရမည်ကို မသိသေးကြောင်း ၎င်းက ဆက်လက်ပြောကြားသည်။

၂၀၁၇ ခုနှစ် မတ်လ ၁ ရက်နေ့မှ စတင်ကာတစ်စောင်လျှင် ကျပ်ငါးရာတန် ထီလက်မှတ် စတင်ရောင်းချခဲ့သည်။ ဧပြီလ ၁ ရက်နေ့တွင် ဆုမဲစဖွင့်ခဲ့ခြင်းဖြစ်သည်။ ယင်းကဲ့သို့ ငါးရာတန်ထီလက်မှတ်များကို ရောင်းချနေသော်လည်း နှစ်ရာတန် ထီလက်မှတ်ကို ဆက်လက်ရောင်းချခဲ့သည်။

လက်ရှိ ကျပ်တစ်ထောင်တန်ထီ လက်မှတ်ထွက်လာပါကလည်း ၅၀၀ တန်ထီလက်မှတ်ကို ဆက်လက်ရောင်းချပေးသွားမည်ဖြစ်ကြောင်း ပြည်တွင်းအခွန်များဦးစီးဌာနထံမှ သိရသည်။

ကျပ်ငါးရာတန် တန်ထီလက်မှတ်ကို နိုင်ငံတော်က သတ်မှတ်သည့်နှုန်းဖြင့် မရောင်းသူများလည်း ရှိသည်။

လက်ရှိအချိန်တွင် ငါးရာတန်ထီလက်မှတ်တစ်စောင်ကို ငွေကျပ် ၆၅၀၊ ကျပ် ၇၀၀ ဖြင့် ရောင်းချနေသူများရှိကြောင်း ထီထိုးသူများထံမှ သိရသည်။ အချို့ပင်ရင်းထီဆိုင်ကြီးများတွင်လည်း ထီလက်မှတ် တစ်စောင်ကို ၅၅၀ ဖြင့် လက်ကားရောင်း ချနေမှုများလည်း ရှိသည်။

“အဓိကတော့ ရောင်းတဲ့အခါမှာ အခြေခံစားဝတ်နေရေးစရိတ်ကြောင့် ပိုရောင်းနေတာတွေရှိတယ်။ အခုက ငါးရာတန် ထီတစ်အုပ်ရောင်းရင် တစ်အုပ်လုံးရောင်းရမ ငါးရာပဲ မြတ်တယ်။ ထီနှစ်အုပ်ရောင်းရမှ တစ်ထောင်ပဲ မြတ်မယ်။ အဲဒါကြောင့် ဈေးတင်ရောင်းကြတယ်”ဟု ဦးမင်းထွဋ်က ပြောဆိုသည်။

ထီလုပ်ငန်းရှင်များအနေနှင့်လည်း နိုင်ငံတော်က ပေးသည့် ၁၀ ရာခိုင်နှုန်းကို မလုံလောက်ပါက ရာခိုင်နှုန်းပိုရရန် နိုင်ငံတော်နှင့် ညှိနှိုင်းသင့်ပြီး ပြည်သူများက သတ်မှတ်ထားသည့် ထီလက်မှတ်တန်ဖိုးထက် ဈေးကြီးပေးဝယ်နေရခြင်းသည် နည်းလမ်းမကျကြောင်း ရန်ကုန်တိုင်းမဲဆန္ဒနယ် (၂) မှ အမျိုးသားလွှတ်တော်ကိုယ်စားလှယ် ဦးဌေးဦးက ဒီဇင်ဘာလက အမျိုးသားလွှတ်တော်တွင် ပြောကြားထားသည်။

ပြည်သူများသည် နိုင်ငံတော်က ရောင်းချသည့် ဈေးနှုန်းအတိုင်း ဝယ်နိုင်ရန်တစ်ထောင်တန်ထီလက်မှတ်ကို ထုတ်လုပ် ခြင်းဖြစ်ပြီး ထီရောင်းသူများကို နိုင်ငံတော်က ၁၀ ရာခိုင်နှုန်း အမြတ်ပေးထားကြောင်း ဦးမင်းထွဋ်က ဆိုသည်။

ကျပ်ငါးရာတန်ထီလက်မှတ် ရောင်းချရာတွင် ပင်ရင်းထီဆိုင်ကြီးများအနေနှင့် နိုင်ငံတော်က ၁၁ စောင်ပါထီတစ်အုပ်လျှင် ငါးထောင်ကျပ်ဖြင့် ရောင်းချပေးနေခြင်းဖြစ်ပြီး ထီတစ်အုပ်ရောင်းရပါက ငါးရာကျပ်မြတ်နေခြင်းဖြစ်ကြောင်း ပြည်တွင်း အခွန်များဦးစီးဌာနထံမှ သိရသည်။

ထီလက်လီရောင်းချသူများသည် ကျပ်ငါးရာတန် ထီလက်မှတ် ၁၁ စောင်ပါထီတစ်အုပ်ကို ထီလက်မှတ် တစ်စောင် ၇၀၀ ဖြင့် ရောင်းပါက ထီတစ်အုပ်ကုန်လျှင် ငွေကျပ် ၂၇၀၀ အထိ မြတ်နိုင်ပြီး တစ်နေ့ထီလေးအုပ်ခန့် ရောင်းရပါက တစ်ရက်လျှင် ကျပ်တစ်သောင်းအထိ ဝင်ငွေရှိနေသည်။

တစ်ထောင်တန် ထီလက်မှတ်ကို လက်လီ လက်ကား မည်သည့်ဈေးနှုန်းဖြင့် ရောင်းချမည်ကို မသိရသေးပေ။

ငါးရာတန်ထီလက်မှတ်ကလည်း ထွက်နေဦးမည်ဖြစ်သည့်အတွက် ပြည်သူများအနေနှင့်လည်း မိမိကြိုက်နှစ်သက်သည့် ထီလက်မှတ်ကို ရွေးထိုးနိုင်မည့် အခြေအနေပင်။

အောင်ဘာလေထီဖွင့်လှစ်ခြင်းသည် နိုင်ငံတော်အခွန်ဘဏ္ဍာငွေရရှိခြင်း သာမက ပြည်သူများ၏ ငွေကြေးလိုအပ်ချက် အခက်အခဲကို တစ်ဖက်တစ်လမ်းက ပံ့ပိုးဖြည့်ဆည်းပေးရန်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီးဦးမောင်မောင်ဝင်းက ဒီဇင်ဘာလက မီဒီယာများကို ပြောကြားထားသည်။

တစ်ထောင်တန်ထီလက်မှတ် ရောင်းချမည်ကို မလုပ်သင့်ကြောင်း ဝေဖန် ထောက်ပြသူများလည်း ရှိသည်။

ငါးရာတန်ထီလက်မှတ်ကို အက္ခရာပိုထုတ်ရန် လုပ်သင့်သည်ကို တစ်ထောင်တန်ထီလက်မှတ်ထုတ်ရန် လုပ်နေခြင်းဖြစ်ကြောင်း ဦးဌေးဦးက ဝေဖန်သည်။

ငါးရာတန်ထီလက်မှတ်တွင် သိန်း တစ်သောင်းပေးထားပြီး တစ်ထောင်တန်ထီလက်မှတ်ဆုကြေးမှာ သိန်းနှစ်သောင်းမဖြစ်ဘဲ သိန်းတစ်သောင်းခွဲဖြစ်နေသဖြင့် ဆုကြေးနည်းနေကြောင်းလည်း ရန်ကုန်တိုင်းလွှတ်တော်ကိုယ်စားလှယ် ဦးကျော်ဇေယျက ပြောဆိုသည်။

ငါးရာတန်ထီလက်မှတ်ရောင်းချရာတွင်လည်း သတ်မှတ်ဈေးနှုန်းထက်ပိုပေးဝယ်နေရပြီး တစ်ထောင်တန်ထီလက်မှတ် ထွက်လာပါကလည်း သတ်မှတ်ဈေးနှုန်းထက်ပိုပေးဝယ်ရလျှင် ပြည်သူများအတွက်အခက်အခဲဖြစ်နိုင်ကြောင်း ၎င်းက ဆိုသည်။

ထို့အပြင် ဈေးတင်ရောင်းလျှင် ထီလုပ်ငန်းရှင်များသာ ပိုမိုအကျိုးဖြစ်ထွန်းလာနိုင်ကြောင်း ဦးကျော်ဇေယျက မှတ်ချက်ပြုသည်။

စီမံကိန်းနှင့် ဘဏ္ဍာရေးဝန်ကြီးဟောင်းဦးကျော်ဝင်းကလည်း ထီလုပ်ရှင်များကို သတ်မှတ်ဈေးနှုန်းအတိုင်း မရောင်းနိုင်လျှင် ထွက်သွားရန် ၎င်း ဝန်ကြီးအဖြစ် တာဝန်ယူစဉ်က ပြောဆိုထားသည်။

ထီကိုယ်စားလှယ်များသည် ကျပ်တစ်ထောင်တန်ထီလက်မှတ်ဝယ်ယူပါကလည်း ကျပ်ငါးရာတန်ထီလက်မှတ်ကဲ့သို့ပင် စပေါ်ငွေများတင်၍ စာချုပ်ချုပ်ရမည်ဖြစ်ပြီးစာချုပ်စည်းကမ်းများဖောက်ဖျက်ပါက စပေါ်ငွေအသိမ်းခံရမည်ဖြစ်ကြောင်း ဦးမင်းထွဋ်က ပြောဆိုသည်။

ထီလက်မှတ်များကို သတ်မှတ်ဈေးနှုန်းထက်ပိုရောင်းပါက စပေါ်ငွေများကို သိမ်းမည်ဟု ပြည်တွင်းအခွန်များဦးစီးဌာနက ပြောဆိုထားသော်လည်း အရေးယူခြင်းမရှိကြောင်း အမျိုးသားလွှတ်တော်ကိုယ်စားလှယ်ဦးဌေးဦးက ဒီဇင်ဘာလက အမျိုးသားလွတ်တော်တွင် မေးခွန်းမေးမြန်းရာ၌ ထည့်သွင်းပြောဆိုထားသည်။

“ညွှန်ချုပ်ကလည်း သတ်မှတ်ဈေးနှုန်းထက် ပိုရောင်းရင် စပေါ်ငွေကို သိမ်းပစ်မယ်ဆိုပြီး ဆင်ဖမ်းမယ်၊ ကျားဖမ်းမယ် ဆိုပြီးတော့ အခုကျတော့ ၆၅၀၊ ၇၀၀ (ထီရောင်းချငွေ) ဖြစ်နေတာတောင် ဘာ တစ်ခုမှ အရေးယူတာ မရှိခဲ့ပါဘူး”ဟု ဦးဌေးဦးက ဆိုသည်။

စီးပွားရေးမူဝါဒပညာရှင် ဒေါက်တာအောင်ကိုကိုကမူ တစ်ထောင်တန်ထီ လက်မှတ်ထွက် လာခြင်းသည် နိုင်ငံတော်အခွန်ငွေများ ပိုမိုရလာနိုင်ခြင်းနှင့် ပြည်သူများအတွက် ဆုကြေးပိုမိုမြင့်မားလာသည့်အတွက် ကောင်းမွန်ကြောင်း ပြောကြားသည်။

“ပြည်သူတွေအတွက် အကျိုးရှိတာပေါ့။ နိုင်ငံအတွင်းမှာက တခြား တရားမဝင် နှစ်လုံး သုံးလုံးတွေတောင် ထိုးနေကြသေးတာပဲ။ သိန်းတစ်သောင်းခွဲဆိုတော့ ပြည်သူအတွက် ပိုကောင်းတာပေါ့။ အခုခေတ်မှာလည်း တစ်ထောင်ဆိုတာက ဘာမှ မဟုတ်တော့ဘူးလေ”ဟု ၎င်းက မှတ်ချက်ပေးသည်။

တစ်ထောင်တန်ထီလက်မှတ် ထွက်လာပါကလည်း မည့်သည့်ဈေးနှုန်းဖြင့် ထီဝယ်ထိုးရမည်ကို မသိသေးကြောင်း လစဉ်ထီထိုးနေသူ ပုဂ္ဂလိကဝန်ထမ်း ကိုကျော်ကြီးက ပြောဆိုသည်။

ကိုကျော်ကြီးသည် တစ်လလျှင် ဝင်ငွေသုံးသိန်းကျပ်ရရှိနေပြီး နှစ်ရာတန်ထီလက်မှတ်ရောင်းချစဉ်က တစ်လလျှင် ထီတစ်အုပ်ကို ငွေကျပ် ၃၅၀၀ ဖြင့် ထိုးနိုင်သော်လည်း ငါးရာတန်ထီလက်မှတ်ထွက်လာချိန်တွင် ထီငါးစောင်တွဲသာ ထိုးနိုင်ကြောင်း ပြောဆိုသည်။

“တစ်ထောင်တန်ထီလက်မှတ်ထွက်လာရင် ငါးစောင်ထိုးဖို့တောင်  တော်တော်စဉ်းစားရမယ်။ သုံးစောင်လောက်တော့ ထိုးမှာပါ”ဟု ၎င်းက ဆိုသည်။

တစ်ထောင်တန်ထီလက်မှတ်ထွက်ပေါ်လာချိန်တွင် ကျပ် ၁၂၀၀ ခန့်ဖြင့် ရောင်းချနိုင်ကြောင်းလည်း ၎င်းက ပြောဆိုသည်။

“အခုတောင်တစ်စောင်ကို ၇၀၀ ပေးထိုးနေရတာ။ တစ်ထောင်တန်ထွက် လျှင်ရင်လည်း ၁၂၀၀ လောက်တော့ ရောင်းကြမှာပဲ”ဟု ၎င်းက ယူဆသည်။

ကျပ်သိန်းတစ်သောင်း အမြင့်ဆုံးဆုကြေးကို မျှော်လင့်ခွင့်ရမည့် ငါးရာတန် ထီပြီးနောက် ကျပ်သိန်းတစ်သောင်းခွဲအထိ မျှော်လင့်နိုင်သည့် တစ်ထောင်တန် ထီလာတော့မည် ဖြစ်သည်။ ကျပ်တစ်သိန်းတစ်သောင်းခွဲဆုကြေးမှာ အခြေခံလူတန်းစားတို့၏ ဘ၀ကို အပြောင်းအလဲဖြစ်နိုင်မှုနှင့်ပတ်သက်၍ စီးပွားရေးမူဝါဒပညာရှင်ဒေါက်တာအောင်ကိုကိုက အောက်ပါအတိုင်း မှတ်ချက်ပေးသည်။

“သိန်းတစ်သောင်းခွဲပေါက်သွားရင်တော့ အေးအေးဆေးဆေးဖြစ်သွားပြီပေါ့။ မှန်မှန်ကန်ကန်သာသုံးမယ်ဆိုရင် လုပ်ငန်းရှင် တစ်ယောက်လည်း ဖြစ်သွားနိုင်တယ်။ လူတစ်ယောက်ရဲ့ဘ၀ကို ပြောင်းလဲသွားစေနိုင်တယ်”

အောင်ဖြိုးဦး

You may also like...

Leave a Reply

Your email address will not be published. Required fields are marked *