ဒီမိုကရေစီအပွင့် တိုင်းရင်းသား တင်းမာခြင်းအမြင့်

တိုင်းရင်းသားလူမျိုးစုံ ပေါင်းစည်းနေထိုင်ကြပြီး အာဏာရှင်စနစ်ဖြင့် ဆယ်စုနှစ်များစွာ အုပ်ချုပ်ခံရသော နိုင်ငံအများတွင် ဒီမိုကရက်တစ် အပြောင်းအလဲများပြုလုပ်သည့်အခါတွင် တိုင်းရင်းသားများအကြား တင်းမာမှု မြင့်မားလာတတ်သည်။

နှစ်ပေါင်းကြာရှည် အတူတွဲနေထိုင်ခဲ့သည့် မိသားစုဝင်များဖြစ်သည်နှင့်အညီ ရှိကိုရှိမည်ဖြစ်သည့် အနာဟောင်းများသည် လွတ်လပ်သွားသည့်အခါ ပြန်ရုန်းကြွလာပြီး အကိုင်အတွယ်မတတ်လျှင် သွေးစိမ်းရှင်ရှင်ပန်းထွက်သည့် အနာသစ်များအဖြစ် ပေါ်ထွက်လာမည်။

မြန်မာနိုင်ငံတွင် nation-state ခေါ် ယနေ့ခေတ်ပေါ်နိုင်ငံများကာလမရောက်ခင် လွန်ခဲ့သော နှစ်ရာပေါင်းများစွာအတွင်း ပဒေသရာဇ် အချင်းချင်းဖြစ်ခဲ့ကြသည့် အနာဟောင်းများအပြင် ကိုလိုနီစနစ်အောက်တွင် သွေးခွဲအုပ်ချုပ်ခံရသည့် အနာဟောင်းများ၊ လွတ်လပ်ရေးရပြီး ခေတ်အဆက်ဆက် အစိုးရများအောက်မှအနာများ ပေါင်းလိုက်လျှင် တစ်ကိုယ်လုံးတွင် မည်သည့်နေရာမှမဆို သွေးစိမ်းရှင်ရှင် ပန်းထွက်လာနိုင်ကြောင်း အားလုံးအသိပင် ဖြစ်သည်။

သွေးထွက်လျှင်ပင်ရှိသည့် ပြည်တွင်းလက်နက်ကိုင်ပဋိပက္ခမှ အနာများ၊ ကိုယ်ကောင်းကြောင်း သူမကောင်းကြောင်း တရားဝင်စည်းရုံးပြီး သူနိုင်ကိုယ်နိုင် အပြိုင်ကြဲရသည့် ရွေးကောက်ပွဲ၊ လွတ်လပ်စွာပြောဆိုရေးသားနိုင်ခွင့်၊ လွတ်လပ်စွာပြောဆိုရေးသားခွင့်ကို အဆမရေမတွက်နိုင်အောင်မြှင့်ပေးလိုက်သည့် Facebook၊ လူမျိုးဘာသာအသံပေးလျှင် သွေးဆူလွယ်သည့် စရိုက်နှင့် မြန်မာတွင် မနည်းလှသည့် အစွန်းရောက်သမားတို့ ပေါင်းလိုက်လျှင် မြန်မာနိုင်ငံ၏ လက်ရှိအခြေအနေမှာ အလွန်စိုးရိမ်စရာကောင်းသည်။

ဒီမိုကရေစီရေချိန်နှင့်အတူ တိုင်းရင်းသားတင်းမာမှုမြင့်တက်လာခြင်းကို ဒီမိုကရေစီအစိုးရသည် သပ်သပ်ရပ်ရပ်ဖြေလျှော့ရန် လိုသည်။ ဆေးအတွက် မလေးစေလို။ 

 

အယ်ဒီတာ
၁၀.၁.၂၀၁၉

You may also like...

Leave a Reply

Your email address will not be published. Required fields are marked *