အရှေ့နှင့် အနောက်မျှကြည့်ရမည့် နိုင်ငံတကာဆက်ဆံရေး

၂၀၁၉ ခုနှစ် မြန်မာ့နိုင်ငံတကာဆက်ဆံရေးကို ရခိုင်အရေး၊ ဥရောပသမဂ္ဂနှင့် ဆက်ဆံရေး၊ တရုတ်နှင့် ဆက်ဆံရေးတို့က လွှမ်းမိုးထားမည်။ အရှေ့နှင့် အနောက် မျှကြည့်ရမည့် ကာလဖြစ်သည်။ နိုင်ငံတကာဆက်ဆံရေးတွင် ရခိုင်အရေး အရိပ်မည်းအောက်မှလွတ်အောင် ဆက်လက်ကြိုးစားရဦးမည့်နှစ် ဖြစ်သည်။

ဘင်္ဂလားဒေ့ရှ်-မြန်မာဆက်ဆံရေးသည် ရခိုင်အရေးနှင့် တိုက်ရိုက်ဆက်စပ်သဖြင့် ဂရုစိုက်ပျိုးထောင်ရမည့် ဆက်ဆံရေးဖြစ်သည်။ ဘင်္ဂလားဒေ့ရ်ှရွေးကောက်ပွဲတွင် လက်ရှိဝန်ကြီးချုပ် ရှိတ်ဟာဆီနာပင် အနိုင်ရသည့်အတွက် မြန်မာ-ဘင်္ဂလားဒေ့ရ်ှဆက်ဆံရေးသည် ထူးထူးခြားခြား ပြောင်းလဲမည်မဟုတ်။ ရခိုင်တွင် ရခိုင်လက်နက်ကိုင်အဖွဲ့ AA လှုပ်ရှားမှု ပြင်းထန်လာလျှင် ဘင်္ဂလားဒေ့ရ်ှနှင့် ဆက်ဆံရေးကို ၂၀၁၉ အတွင်း ပိုပြီးသတိထားရမည်။

အာဆီယံ၏ ဥက္ကဋ္ဌနေရာကို လက်ရှိ စင်ကာပူနေရာတွင် ထိုင်းနိုင်ငံက လွှဲပြောင်းရယူမည်ဖြစ်သည့်အတွက် အာဆီယံနှင့် မြန်မာ ဆက်ဆံရေး နဂိုအတိုင်းပင် ရှိနေမည်။ အရှေ့ တောင်အာရှနိုင်ငံများအသင်း ( အာဆီယံ) သည် ရခိုင်အရေးကို ကြားဝင်ဖြေရှင်းရန် ဆက်လက်ကြိုးပမ်းကြမည်။

အထူးကုန်သွယ်မှု အခွင့်အရေး ရုပ်သိမ်းနိုင်ခြေရှိသော်လည်း မြန်မာသည် ဥရောပသမဂ္ဂကို လိုအပ်သဖြင့် ဥရောပသမဂ္ဂနှင့် မြန်မာဆက်ဆံရေးသည် ဆက်လက်ခိုင်မာနေမည်။ ဥရောပသမဂ္ဂအနေနှင့် မြန်မာနိုင်ငံတွင် သူတို့၏ ရည်မှန်းချက်များ အတော်အသင့် အောင်မြင်နေပြီဖြစ်ရာ လမ်းကြောင်းပြောင်းပြန်သွားလျှင် မည်သူ့အတွက်မျှ အကျိုးရှိမည်မဟုတ်ကြောင်း ဥရောပသမဂ္ဂမှ ပုဂ္ဂိုလ်များကို ရှင်းပြနိုင်မှသာ ရမည်။ အပြီးသတ်အဆုံးအဖြတ်သည် ဥရောပသမဂ္ဂမှ လက်တစ်ဆုပ်စာ လူများအပေါ်တွင်သာ မူတည်မည်။

အမေရိကန်-မြန်မာဆက်ဆံရေးသည် ထူးထူးခြားခြား ပြောင်းလဲမည်မဟုတ်။ ၂၀၁၈ ကဲ့သို့ပင် ဆက်ရှိနေမည်။ အမေရိကန်ပြည်ထောင်စုသည် အစဉ်အလာ အာရှပစိဖိတ်ဒေသအယူအဆမှသည် တရုတ်အင်အားကြီးထွားမလာအောင်ထိန်းသည့် အင်ဒိုပစိဖိတ်ဒေသအယူအဆဘက်သို့ ကူးလာသည်။ ထိုဒေသဖော်ဆောင်ရာတွင် မြန်မာနိုင်ငံ၏ အခန်းကဏ္ဍကို အမေရိကန်ပြည်ထောင်စု၏ အလေးထားရှိမှုသည် အမေရိကန်-မြန်မာ ဆက်ဆံရေးကို မောင်းနှင်အားတစ်ရပ်ဖြစ်သည်။ နိုင်ငံခြားရေး အတွေ့အကြုံမရှိသလောက် ကိုယ်ထင်ရာကိုယ်လုပ်တတ်သည့် အမေရိကန်သမ္မတ Donald Trump က မြန်မာနိုင်ငံကို စိတ်မဝင်စားခြင်းသည် မြန်မာအတွက် ကံကောင်းသည်ဟုဆိုရမည်။

မြန်မာ တရုတ် စီးပွားရေးစင်္ကြံ အကောင်အထည်ဖော်မည်ဖြစ်သဖြင့် တရုတ် မြန်မာ ဆက်ဆံရေးများ ပိုမိုမြင့်မားလာမည်။ တစ်ဖက် ရေရှည်ယုံကြည်မှုရရှိရန်မှာ ငြိမ်းချမ်းရေးတွင် တရုတ်၏ အခန်းကဏ္ဍပေါ် မူတည်သည်။ ဘင်္ဂလားဒေ့ရ်ှနယ်စပ်ရှိ ရဲကင်းစခန်းများကို ရခိုင်လက်နက်ကိုင်တပ်ဖွဲ့ AA က တိုက်ခိုက်မှုကို တရုတ်သံရုံးက ပြင်းပြင်းထန်ထန် ပြစ်တင်ခဲ့သည်။

 

မြန်မာနိုင်ငံ၏ နိုင်ငံခြားရင်းနှီးမြှုပ်နှံမှု ဆွဲဆောင်မည့် ရေရှည်မဟာဗျူဟာနှင့် အရှေ့ဘက်မှ ကမ္ဘာလှည့်ခရီးသွားတို့ကို မက်လုံးပေးသည့် အစီအစဉ်တို့ကိုကြည့်လျှင် Look East အရှေ့မျှော်ဝါဒကို ထင်ထင်ရှားရှားမြင်ရပြီး ထိုမူသည် ၂၀၁၉ တွင် အရှိန်ရလာမည်။ တရုတ်သည် အရှေ့တွင် ထိပ်ဆုံးမှ ပါဝင်သည့် နိုင်ငံဖြစ်လျှင် ဂျပန်သည် ဒုတိယလိုက်သည်။ အိန္ဒိယသည် အရွယ်အစားကြီးမားသည့် ဒေသတွင်း အင်အားကြီးနိုင်ငံဖြစ်သည့် အတွက် အိန္ဒိယနှင့် ၂၀၁၉ တွင် ဆက်ဆံရေး တိုးမြှင့်နိုင်လျှင် မှားမည်မဟုတ်ပါ။ အထူးသဖြင့် ရခိုင်အရေးနှင့် ဆင်တူသောအရေးများတွင် အိန္ဒိယသည် အတွေ့အကြုံရင့်ကျက်သည့်နိုင်ငံဖြစ်သည်။

အရှေ့ဘက်သို့ အခြေအနေအရ ခြေဦးလှည့်နေရသော်လည်း မြန်မာ့ဒီမိုကရေစီပြုပြင်ပြောင်းလဲရေးတွင် ဒီမိုကရေစီနိုင်ငံကြီးများ၏ အကူအညီကိုယူပြီး ကမ္ဘာ့မိသားစုအတွင်းသို့ ပြန်လည်ဝင်ရောက်ခဲ့ရခြင်း၊ ယနေ့ကမ္ဘာ၏ လှုပ်ရှားလည်ပတ်ခြင်းကို အနောက်နိုင်ငံကြီး များက ဒီဇိုင်းရေးဆွဲလည်ပတ်နေခြင်း၊ အရည်အသွေးမြင့် ဈေးကွက်များသည် အနောက်ကမ္ဘာတွင် ကြီးမားစွာတည်ရှိနေခြင်းတို့ ကြောင့် မြန်မာသည် အနောက်နိုင်ငံကြီးများနှင့် ဆက်ဆံရေးကို ထိန်းသိမ်းထားရမည်ဖြစ်သည်။ ၂၀၁၂ နောက်ပိုင်းတွင် အနောက်နိုင်ငံကြီးများနှင့် ဆက်ဆံရေးတိုးတက်လာသည်နှင့်အမျှ မြန်မာ့ဒီမိုကရေစီသည် မြင့်တက်လာခဲ့သလို မြန်မာ့ရုပ်သွင်သည် ကမ္ဘာတွင် ထွန်းတောက်လာသည့်အတွက် အနောက်သည် မြန်မာအတွက် မရှိမဖြစ် အရေးပါနေဦးမည်။ အနောက်မျှော်ဝါဒ Look West ကို ၂၀၁၉ တွင် မြန်မာက ဆက်လက်ကျင့်သုံးလိမ့်မည်။

၂၀၁၉ မြန်မာ့နိုင်ငံတကာဆက်ဆံရေးသည် ၂၀၁၇ မြန်မာ့နိုင်ငံတကာဆက်ဆံရေးလောက် ခက်ခဲမည်မဟုတ်သော်လည်း ယခုထက်ဆိုးမသွားအောင် အစွမ်းကုန်ကြိုးစားရမည့်နှစ်ဖြစ်သည်။

You may also like...

Leave a Reply

Your email address will not be published. Required fields are marked *