ရွေးကောက်ပွဲ အကြိုနှစ် နိုင်ငံရေး

၂၀၂၀ ရွေးကောက်ပွဲ၏ အကြိုနှစ်ဖြစ်သည့်အတွက် နိုင်ငံရေးလှုပ်ရှားမှုများ အသွင်အမျိုးမျိုးဖြင့် ပြင်းထန်မည့်နှစ်ဖြစ်သည်။ ၂၀၂၀ အတွက် လူရွေးကြ၊ လူစုကြ၊ မဟာမိတ်ဖွဲ့ကြ၊ ပြင်ဆင်ကြမည့်နှစ်ဖြစ်သည်။ ဒီမိုကရေစီအခြေခိုင်ပြီး နိုင်ငံကြီးများတွင်ပင် ရွေးကောက်ပွဲနီးလျှင် ပါတီ၊ ဂိုဏ်းဂဏစွဲများ ပြင်းထန်လာပြီး နှစ်ခြမ်းသုံးခြမ်းကွဲတတ်သည့်အတွက် မြန်မာနိုင်ငံတွင် ပိုဆိုးမည်။

၂၀၁၉ နှစ်စ လွတ်လပ်ရေးနေ့တွင် AA ရခိုင်လက်နက်ကိုင်အဖွဲ့က ဘင်္ဂလားဒေ့ရှ် နယ်စပ် ရဲကင်းများကို တိုက်လိုက်ခြင်းသည် ၂၀၁၉ နိုင်ငံရေး၏ သွင်ပြင်လက္ခဏာကို ထင်ဟပ်သည်။

ဒီမိုကရေစီပြုပြင်ပြောင်းလဲရေး စတင်ကတည်းက အားကောင်းလာသည့် လူမျိုးစွဲ အမျိုးသားရေး Ethnic Nationalism  ၂၀၁၉ တွင် ပိုမိုအားကောင်းလာမည်။ ထိုအားကောင်းလာသည့် လှိုင်းကို နိုင်ငံရေးအုပ်စုများစွာက တက်စီးကြမည်။

လက်ရှိနိုင်ငံရေးပါတီများသည် ၂၀၂၀ အတွက် မဟာဗျူဟာ၊ နည်းဗျူဟာများ ရေးဆွဲကြသည့်အတွက် ပါတီတွင်းလှုပ်ရှားမှုများ များပြားမည်။ ၂၀၂၀ ရွေးကောက်ပွဲသည် ပါတီကိုသာမကဘဲ လူကိုပါ အတန်အသင့်ကြည့်မည့် ရွေးကောက်ပွဲဖြစ်မည့်အတွက် လွှတ်တော်ကိုယ်စားလှယ်လောင်းများ၏ မှတ်တမ်းနှင့် စွမ်းဆောင်ရည်ကပါ စကားပြောလာမည်ဖြစ်ရာ မဲရရန် အခြေအနေကောင်းသည့် ရပ်မိရပ်ဖ၊ ပညာတတ်များကို ချဉ်းကပ်စည်းရုံးကြမည်။

ရွေးကောက်ပွဲဝင်မည့် နိုင်ငံရေးပါတီသစ်များ ထပ်မံပေါ်ပေါက်လာနိုင်သော်လည်း လောက်လောက်လားလား ပါတီသစ်များ ပေါ်ပေါက်ရန် ခဲယဉ်းသည်။

ရခိုင်အရေးကို အခြေခံသည့် အနောက်နိုင်ငံများ၏ ဖိအားပေးမှုများကို တန်ပြန်မည့် နိုင်ငံရေးလှုပ်ရှားမှုများ တွေ့ရမည်။ ထိုလှုပ်ရှားမှုများသည် ၂၀၂၀ ပြည့်နှစ်အထိကူးပြီး ရွေးကောက်ပွဲနှင့်ပါ ဆက်သွားလိမ့်မည်။

လက်နက်ကိုင်အဖွဲ့များသည် ၂၀၂၀ ရွေးကောက်ပွဲအတွက် သွယ်ဝိုက်ပြင်ဆင်ကြလိမ့်မည်။ လက်နက်ကိုင်အဖွဲ့များ အခြေစိုက်ရာဒေသများတွင်သာမက ဩဇာသက်ရောက်မှုရှိသော ဒေသများရှိ နိုင်ငံရေးပါတီများသည် သက်ဆိုင်ရာလက်နက်ကိုင်အဖွဲ့များနှင့် လက်ချင်းချိတ်ရန် ကြိုးစားကြလိမ့်မည်။ အင်အားနှင့် အစဉ်အလာတို့အပေါ် မူတည်ပြီး လက်နက်ကိုင်က ဦးဆောင်မှုနေရာယူခြင်းနှင့် နိုင်ငံရေးပါတီက ဦးဆောင်မှုနေရာယူခြင်းတို့သာ ကွာမည်။ တိုင်းရင်းသားအမျိုးအစားချင်းတူညီသော်လည်း လက်နက်ကိုင်အဖွဲ့ချင်း မတူညီသောဒေသများတွင် တိုင်းရင်းသားလက်နက်ကိုင်များ နေရာလု မဲလုတိုက်ပွဲများသည် မြေပေါ်တွင်လည်းကောင်း၊ တောတွင်းတွင်လည်းကောင်း ပိုဖြစ်ပွားနိုင်မည်။

လက်ရှိနိုင်ငံရေးပါတီများသည် အခြားပါတီများ၊ အင်အားစုများနှင့် ပူးပေါင်းရန်၊ ယာယီမဟာမိတ်ပြုရန် အမျိုးမျိုးလှုပ်ရှားကြမည်။ ၂၀၁၉ သည် ရွေးကောက်ပွဲအကြိုကာလသာဖြစ်သော်လည်း ၂၀၁၉ နိုင်ငံရေးမဟာမိတ်ဖွဲ့ခြင်းသည် ၂၀၂၀ ရွေးကောက်ပွဲ၏ ရလဒ်များကို ခန့်မှန်းပြီး ဖွဲ့ကြမည့်အတွက် ၂၀၁၉ နိုင်ငံရေးသည် ၂၀၂၀ နိုင်ငံရေးကို ကြိုတင်ပြီး သက်ရောက်မည်။

နိုင်ငံရေးကို နိုင်ငံရေးနယ်ပယ်တစ်ခုတွင်းတွင်သာမက အခြားနယ်ပယ်များတွင်လည်း အသွင်အမျိုးမျိုးဖြင့် မြင်တွေ့ရလိမ့်မည်။ နိုင်ငံရေးနှင့် အစဉ်အလာအားဖြင့် ပတ်သက်သည့် အရေးများတွင်သာမက လူစိတ်ဝင်စားမည့် မည်သည့်အရေးတွင်မဆို နိုင်ငံရေးအရ ဝင်ရောက်ဖျာခင်းကြသည့်အတွက် အရေးအားလုံးသည် နိုင်ငံရေးဖြစ်လာမည်။

Facebook နိုင်ငံရေးသည် အောက်ခြေဆင်းလက်တွေ့နိုင်ငံရေးထက် လုပ်ရလွယ်သည့်အတွက် Facebook ပေါ်တွင် နိုင်ငံရေးလှုပ်ရှားမှုများ ပိုပြင်းထန်လာမည်။ လူမျိုးစွဲနိုင်ငံရေးကြောင့် လူမျိုးရေးအမုန်းတရားများ မပွားစီးအောင် Facebook ၏ ထိန်းကျောင်းနိုင်စွမ်းက စကားပြောမည်။

၂၀၁၉ ခုနှစ်သည် နိုင်ငံရေးတွက်ကိန်းများ၊ နိုင်ငံရေးလှုပ်ရှားမှုများ ပြည့်နှက်နေသော နိုင်ငံရေးနှစ်ဖြစ်သည်။

You may also like...

Leave a Reply

Your email address will not be published. Required fields are marked *