မန္တလေးစည်ပင်က ဒေးဗစ်ကော်ပါဖီးလ်

မန္တလေးတွင် လမ်းနှင့်မလွတ်သည့်အတွက် နေအိမ်များဖျက်ပေးနေမှုက မျက်လှည့်ပြကွက်တစ်ခုလို အံ့ဩစရာပင်။

နှစ်ပေါင်း ဆယ်နှင့်ချီ၍ ကျူးကျော်နေထိုင်ခဲ့သည့် နေအိမ်များကို ဖျက်သိမ်းရန်၊ ရွှေ့ပြောင်းရန် ပြောဆိုရသည့်ကိစ္စမှာ လွယ်ကူသည်တော့မဟုတ်။ ဥပဒေကိုမသုံးဘဲ ကာယကံရှင်များ၏ သဘောဆန္ဒအတိုင်း ဖျက်သိမ်းရန်အတွက်မှာ ပို၍ပင် ခက်ခဲသေးသည်။

သို့သော် မန္တလေးမြို့တော် စည်ပင်သာယာရေးကော်မတီမှ ဒေးဗစ်ကော်ပါဖီးလ်ကတော့ ဆောင်ရွက်နိုင်ခဲ့သည်။

ကမ္ဘာကျော် မျက်လှည့်ပညာရှင် ဒေးဗစ်ကော်ပါဖီးလ်၏ မျက်လှည့်ပြကွက်များအတိုင်း ဟာကနဲ၊ ဟင်ကနဲ မင်သက်မိစေသကဲ့သို့ လူအများ အံ့ဩသွားအောင် မန္တလေးက ဒေးဗစ်ကော်ပါဖီးလ်က ဆောင်ရွက်နိုင်ခဲ့ခြင်း ဖြစ်သည်။

“အလွယ်တကူတော့ မဟုတ်ပါဘူး။ အခက်အခဲတွေနဲ့ ရင်ဆိုင်ခဲ့ရပါတယ်” ဟုဆိုသူက ဦးကျော်ဇောအောင် ဖြစ်သည်။

မန္တလေးမြို့၏ အချို့နေရာများသည် လမ်းမပေါက်သည့်အတွက် နီးရက်နှင့် ဝေးနေရသည်များရှိသည်။ လမ်းမပေါက်ခြင်းမှာ မဖောက်လုပ်ရသည်လည်းရှိသည်။ ယခင်လမ်းရှိပြီးသားကို ကျူးကျော်နေထိုင်သူများကြောင့် ပိတ်ဆို့သွားသည်လည်း ရှိသည်။

ယင်းနေရာများကို စည်ပင်က ပြန်လည်ဖော်ထုတ်နေရာတွင် ယခင်ခေတ်ကလို ဥပဒေဖြင့် မဖျက်မနေရမဟုတ်ဘဲ ပိုင်ရှင်တို့ ဆန္ဒအရ ဖျက်ပေးချင်အောင် ပြောဆိုစည်းရုံးရသည်။ ယင်းကို အဓိကဦးဆောင်သူက ဦးကျော်ဇောအောင်။

“ကျွန်တော်တို့က ဒီနေရာမှာနေလာတာ နှစ်ပေါင်း လေးဆယ်လောက်ရှိပြီ။ ယောက္ခမအမွေပေါ့။ စုစုပေါင်းဆို နှစ် ရှစ်ဆယ်လောက်ရှိပြီ” ဟု ဆိုသူက ၄၁ လမ်း (၇၉ နှင့် ၈၀) ကြားတွင် နေထိုင်သည့် ဦးမြင့်ဘို ဖြစ်သည်။

သူ့အိမ်က ၄၁ လမ်းပေါ်တွင် လုံးလုံးလျားလျားရောက်ရှိနေပြီး လမ်း ၈၀ ဘက်မှဝင်လျှင် လမ်းပိတ်ထားသည့် နေအိမ်လည်းဖြစ်သည်။ အိမ်ဝင်းတစ်ခုလုံးဆိုလျှင် ပေ ၂၀ × ၄၀ ခန့်ရှိသည်။ ယခု စည်ပင်က လမ်းများ ပြန်လည်ဖော်ထုတ်ချိန်တွင် ရွှေ့ပြောင်းရန်အတွက် သတ်မှတ်ခံထားရသည်။

ယင်းအတွက် နစ်နာကြေးသဘောမျိုး တောင်းဆိုခဲ့သော်လည်း မရ။ သို့သော် မြို့သစ်ဘက်ရှိ အိမ်ရာတစ်ခုတွင် နေစရာတိုက်ခန်းတစ်ခန်းကို ဘဏ်တိုးအရစ်ကျစနစ်ဖြင့် ဝယ်နိုင်ရန်အတွက်တော့ စည်ပင်က ထောက်ခံကူညီပေးခဲ့သည်။

“လောလောဆယ်တော့ လက်ရှိဘ၀ကနေ လက်မဲ့ဘ၀ ရောက်သွားရတာပေါ့” ဟု ခြေထောက်တစ်ဖက် ရထားကြိတ်ခံရပြီး အလုပ်ကြမ်း မလုပ်နိုင်သဖြင့် ဆိုင်ကယ်ကယ်ရီဆွဲနေရသည့် ဦးမြင့်ဘိုက ပြောသည်။

သို့သော် မြို့ဖွံ့ဖြိုးရေးအတွက် ဖယ်ရှားပေးမည်ဟု သူ ဆုံးဖြတ်ခဲ့သည်။ မိသားစုလေးဦးရှိပြီး သမီးဖြစ်သူမှာ ရှေ့နေအလုပ် လုပ်ကိုင်သဖြင့် သားအဖနှစ်ဦးပေါင်းလျှင် လစဉ် တိုက်ခန်းကြေးပေးရမည့်ငွေကို မဖြစ်ဖြစ်အာင် ကြံဖန်ရမည်လည်း ဖြစ်သည်။

“ကျွန်တော်တို့အနေနဲ့က လမ်းပေါက်ဖို့အတွက် မြေလှူတာဖြစ်ဖြစ်၊ ကျူးကျော်ထားတာကို ပြန်ဖယ်ရှားပေးတာဖြစ်ဖြစ် အစားပြန်ပေးဖို့၊ ဒီဟာအတွက် ဒါပြန်ပေးတယ်ဆိုတာမျိုး မရှိဘူး။ ပေးစရာလည်း မရှိဘူး။ ဒါမျိုးပေးမယ်ဆိုရင် (ဒါလုပ်လို့ ဒါပြန်ပေးမယ်ဆိုရင်) အရင်ခေတ်နဲ့ မထူးတော့ဘူးလေ” ဟု ဦးကျော်ဇောအောင်က ပြောသည်။

၄၁ လမ်း (၇၈ နှင့် ၈၀) သည် ယခင်က လမ်းအဖြစ် အသုံးပြုခဲ့သော်လည်း တာဝန်ရှိသူများ၏ ပေါ့လျော့မှုကြောင့် ကျူးကျော်နေထိုင်သူများရှိလာခဲ့ ပြီး လမ်းမပေါက်တော့သည့်အခြေအနေထိ ရောက်လာခဲ့သည်။ လမ်းကို ပိတ်၍ ဆောက်လုပ်ထားသည့် ဦးမြင့်ဘိုတို့၏ နေအိမ်က သက်သေပင်။

“လမ်းဖောက်တယ်ဆိုတာ စည်ပင်သာယာရေးလုပ်ငန်းထဲမှာလည်း ပါတယ်။ လမ်းဖောက်ခြင်းအားဖြင့် မြို့ရဲ့ ဖွံ့ဖြိုးမှု၊ မီးရေးထင်းရေး၊ အမှိုက်သိမ်းဆည်းဖို့ ဒါတွေအကုန် အဆင်ပြေသွားမယ်။ မီးတိုင်တွေ၊ ရေမြောင်းတွေ၊ ရေစီးရေလာကောင်းဖို့အတွက်တွေ” ဟု ဦးကျော်ဇောအောင်က ဆိုသည်။

ချောင်း၊ မြောင်းကိုပိတ်၍ ကျူးကျော်ဆောက်လုပ်ထားသည့် နေအိမ်များ၊ လမ်းကိုပိတ်၍ ကျူးကျော်ဆောက်လုပ်ထားသည့် နေအိမ်များကြောင့် ရေကြီးရေလျှံရခြင်းများရှိနေပြီး လမ်းများပြန်လည်ဖော်ထုတ်ခြင်းဖြင့် ယင်းပြဿနာကို ပြေလည်စေမည်လည်း ဖြစ်သည်။

ဦးကျော်ဇောအောင်အနေနှင့် စည်ပင်သာယာရေးကော်မတီဝင်အဖြစ် ရွေးကောက်ခံရပြီး သုံးလအကြာတွင် မဟာမြိုင်ရပ်ကွက်အတွင်းရှိ ခုနစ်အိမ်တန်းလမ်းနေရာရှိ ကျူးကျော်များကို စတင်ဖျက်ခဲ့သည်။ ယင်းလမ်းသည် ယခင်က တည်ရှိခဲ့သော်လည်း ကျူးကျော်သူများကို ခေတ်အဆက်ဆက် အရေးမယူခဲ့သဖြင့် ကိုယ်ပိုင်မြေအဖြစ် ခြံဝင်းများအတွင်း ထည့်ထားလိုက်ကြသည်။

ထို့ကြောင့် လမ်းပြန်လည်ဖော်ထုတ်ရန်အတွက် အိမ်ပိုင်ရှင်များကို ခေါ်ယူတွေ့ဆုံဆွေးနွေးသည်။ လမ်းပိတ်နေသည့်အတွက် ကွေ့ဝိုက်သွားလာနေရသည်။ မီးဘေးအန္တရာယ်ဖြစ်ပေါ်လျှင် အချိန်မီ မရောက်နိုင်သည့် အနေအထားမျိုး ရှိသည် စသည်ဖြင့် ပြောဆိုသည့်အခါ ၎င်းတို့ ယူထားသည့်မြေများအားလုံး ပြန်လည်ပေးအပ်လာခဲ့ကြောင်း ဦးကျော်ဇောအောင်က ရှင်းပြသည်။

မိသားစုပုံစံဖြင့် နွေးနွေးထွေးထွေး ပြောဆိုရှင်းပြသည့်အခါ အဆင်ပြေသွားသဖြင့် ပေ ၁၀၀ ခန့်အရှည်ရှိသည့် ယင်းလမ်းက မန်းစည်ပင်အတွက် ပထမဆုံး အောင်မြင်သည့်လမ်း ဖြစ်ခဲ့သည်။

ပထမဆုံးအလုပ် အောင်မြင်သည့်အခါ နောက်ထပ်တစ်ဆင့်တက်သည်။ ၄၁ လမ်း (၅၈ × ၆၀ ကြား) ကို ကျူးထားသည့် နေရာပြန်လည်ရရှိအောင် လုပ်ဆောင်ခြင်းဖြစ်သည်။ ယင်းနေရာသည် ရဲမွန်တောင်ရပ်ကွက်နှင့် မဟာမြိုင်ရပ်ကွက်တို့ ကူးနိုင်သည့်နေရာဖြစ်ပြီး ကျူးကျော်နေသည့် နေအိမ်ပိုင်ရှင်နှင့် ပြောဆိုဆွေးနွေးသည့်အခါတွင် ကာလပေါက်ဈေး သိန်းထောင်ဂဏန်းရှိသည့် မြေကွက်နှစ်ကွက်ကို လမ်းဖောက်လုပ်ရန်အတွက် ပိုင်ရှင်က လှူဒါန်းခဲ့လေသည်။

“ဒါပေမဲ့ သူ့ကို ဒီချိန်ထိ ဘာအခွင့် အရေးမှ မပေးခဲ့ဘူး။ အစကတည်းက သူ့ကို ဘာမှပေးစရာမရှိဘူးလို့ ပြောထားပြီးသား။ ပိုင်ရှင်က စေတနာသန့်သန့်နဲ့ လှူတာကို ဂုဏ်ပြုလက်မှတ်ပဲ ပေးနိုင်ခဲ့တယ်” ဟု ဦးကျော်ဇောအောင်က ရှင်းပြသည်။

ယင်းလမ်းများအပြင် ချောင်းမြေကို ကျူးထားသည်များ၊ အခြားလမ်းမြေကျူးများကိုပါ ပြောဆိုစည်းရုံးသည့်နည်းဖြင့် ဖယ်ရှားပေးရန် ဆောင်ရွက်ခဲ့သည်။ ယင်းသို့ဆောင်ရွက်သည်အခါတွင် အချို့ က ဘိုးဘွားပိုင်ဂရန်ပေါက်မြေများကိုပင် လမ်းအတွက် လှူဒါန်းသည်များ ရှိလာသည်။

အထူးသဖြင့် တိုက်တာများ အခိုင်အမာ တည်ဆောက်ထားသည့် သင်္ဂဇာချောင်းအနောက်ဘက် ၃၅ လမ်းမှ ၄၁ လမ်းအထိ ဖောက်လုပ်ပေးနိုင်မှုသည် မန္တလေးအနောက်ခြမ်းအတွက် သွားလာရ ပိုမိုအဆင်ပြေစေမည် ဖြစ်သည်။

သွားလာဆက်သွယ်ရေး လွယ်ကူစေရန် ဦးစားပေးပြီး လမ်းများပြန်လည်ဖော်ထုတ်သည့်အခါ နေအိမ်၊ ခြံဝင်းများ ရွှေ့ပြောင်းဖျက်သိမ်းပေးရခြင်းအပြင် ရပ်ကွက်ရုံး၊ မီးသတ်ရုံးနှင့် ဘုန်းတော်ကြီး ကျောင်းများကိုပင် ထိခိုက်ခြင်းတို့ ရှိသည်။ သို့သော် အားလုံးကသဘောတူစွာ နေရာများ ဖယ်ရှားပေးခဲ့သည်ဟု မန္တလေးမြို့တော် စည်ပင်သာယာရေးကော်မတီမှ သိရသည်။

လက်ရှိ ဆောင်ရွက်နေသည့် ၆၅ × ၆၆ ကြား၊ သိပ္ပံလမ်းနှင့် ငုရွှေဝါလမ်းကြားရှိ မိုးဆမ်းပန်းလမ်းနေရာသည်လည်း သူဌေးကျူးတို့၏ ဒဏ်ကို နှစ်ပေါင်းများစွာ ခံခဲ့ရသည်။ ပိုက်ဆံမရှိ၍ ကျူးကျော်ခြင်းမဟုတ်ဘဲ ငွေရှိသူများ၏ ကျူးကျော်ခြင်းဖြစ်၍ အဂတိမကင်းသူများ အာဏာရှိစဉ်က ဖယ်ရှားရန် ခက်ခဲခဲ့သည်။

ယခုမူ အကျယ် ပေ ၄၀၊ အရှည် ပေ ၄၄၀၀ ခန့်ရှိမည့် လမ်းပေါ်ပေါက်လာစေရန်အတွက် လွှတ်တော်၊ စည်ပင်ပူးပေါင်းဆောင်ရွက်သည့်အခါ နေအိမ်ပိုင်ရှင်များက လိုလားစွာပင် ကျူးကျော်ထားသည်များကို ဖျက်ပေးလာကြသည်။

“စည်ပင်သာယာရဲ့ လုပ်ထုံးလုပ်နည်း ဥပဒေအရဆိုရင် စာတွေထုတ်ရမယ်။ ပြီးရင် တရားစွဲမယ်။ အိမ်ကိုဝင်ဖျက်မယ်။ အရေးယူမယ်။ ကျွန်တော်က ဒါမျိုးတွေ မလုပ်ချင်ဘူး။ ပြည်သူကိုယ်တိုင်က ဖျက်ပေးချင်တဲ့အနေအထားအထိ၊ သူကိုယ်တိုင်ကဖျက်ပါ ကျေနပ်တယ်၊ ဖျက်ပါ့မယ်ဆိုတာမျိုးကိုပဲ လိုချင်တာ” ဟု ဦးကျော်ဇောအောင် က သူသုံးစွဲခဲ့သည့်နည်းကို ပြောပြသည်။

သို့သော်လည်း အခိုင်အမာနေထိုင်နေသည့်နေရာကို ဖျက်ဆီးပေးရန်၊ ဖယ်ရှားပေးရန် ပြောဆိုစည်းရုံးရခြင်းသည်မှာ မလွယ်ကူပါ။ တယ်လီဖုန်းဆက်၍ ဆဲဆိုခြိမ်းခြောက်ခြင်း၊ လူမှုကွန်ရက် (Messenger) မှတစ်ဆင့် ခြိမ်းခြောက်ခြင်း၊ မော်တော်ကားကို ခြေထောက်ဖြင့် လာရောက်ကန်ကျောက်ခြင်းများဖြင့် မကျေနပ်မှုများ ပြသခြင်းခံခဲ့ရသည်ဟု ဦးကျော်ဇောအောင် က ဆိုသည်။

ထိုမျှမကသေး၊ ဓာတ်ဆီပုလင်းဖြင့် နေအိမ်ကို လှမ်းပစ်ခြင်းပါ ခံခဲ့ရသေးကြောင်း သူက ပြောပြသည်။

“အစ်ကိုက လမ်းတွေ တအားဖောက်တော့ အခုထိကတော့ အဆဲက မလွတ်သေးဘူး။ အပြောကတော့ ခံနေရတုန်းပေါ့။ အရေတော့ ထူသွားပါပြီ” ဟု ဦးကျော်ဇောအောင်က ပြုံး၍ ပြောသည်။

လမ်းမပေါက်ခင်က အမြင်မကြည်လင်သူများရှိသော်လည်း အလုပ်ဖြင့် သက်သေပြပြီး လမ်းပြီးစီးအောင်၊ မြို့ပြ ဖွံ့ဖြိုးတိုးတက်အောင် လုပ်ဆောင်ပေးသည့်အခါတွင် နားလည်လာကြသူများရှိပြီး ချီးကျူးကြသူတို့၏ ပီတိကိုသာ ခံယူနေရကြောင်း ၎င်းကဆိုသည်။

လက်ရှိ ဆောင်ရွက်နေသည့် ၄၁ လမ်းသည် မန္တလေးမြို့အတွက် အရေးပါသည့် လမ်းတစ်ခုဖြစ်သည်။ မန္တလေး၏ အရှေ့ထိပ်နှင့် အနောက်ထိပ်ကို ပေါက်သည့် လမ်းမကြီးများတွင် ၁၂ လမ်း၊ ၂၆ လမ်း၊ ၃၅ လမ်း စသည်တို့သာရှိပြီး ၄၁ လမ်းကိုလည်း ယင်းကဲ့သို့ သွားလာနိုင်ရန် စည်ပင်က လုပ်ဆောင်နေခြင်း ဖြစ်သည်။

ထို့ကြောင့် ၄၁ လမ်းဟောင်းရှိ လမ်းနယ်နှင့် မလွတ်သည့်နေရာများကို မဖြစ်မနေဖယ်ရှားရခြင်းဖြစ်သည်။ ယင်းလမ်းကို ဖေဖော်ဝါရီလအတွင်း စတင်ခင်းမည်ဖြစ်ပြီး ပြီးစီးပါက မန္တလေး၏ အရှေ့ထိပ်နှင့် အနောက်ထိပ်သို့ တောက်လျှောက်သွားလာနိုင်မည်လည်း ဖြစ်သည်။

မြို့တော်ဖွံ့ဖြိုးရေးကိစ္စများသည် စည်ပင်နှင့်သက်ဆိုင်သည်ဆိုသော်လည်း ပြည်သူမပါလျှင် မည်သည့်အရာမှဆောင်ရွက်၍မရနိုင်ချေ။ အထူးသဖြင့် မြေတန်ဖိုးကြီးမားသည့်နေရာများတွင် တစ်ပေ၊ နှစ်ပေ ရရှိရန် ခက်ခဲလှသည်။

လက်ရှိအချိန်ထိ ၁၀ လမ်းခန့် ပြန်လည်ဖော်ထုတ်နိုင်ကာ လိုလိုချင်ချင်ဖြင့် ဖယ်ပေးအောင် စည်းရုံးခဲ့ရပြီး ရွှေ့ပြောင်းပေးရန် ပြောဆိုစဉ် ဆဲဆိုသူများရှိသော်လည်း ဆဲဆိုခြင်းပြီးဆုံးအောင် နားထောင်ကာ ရှင်းပြရကြောင်း၊ ဥပဒေကိုမသုံးဘဲ ပြည်သူများ နားလည်အောင်ဆောင်ရွက်သဖြင့် ကူညီပေးလာကြကြောင်း ဦးကျော်ဇောအောင်က ဆိုသည်။

“တစ်ခါတလေလာခဲ့၊ ကျုပ်စောင့်နေတယ်။ တုတ်နဲ့ ရိုက်မယ်ဆိုရင် ကြောက်ရင်တော့ မသွားဘူးပေါ့။ ဒါပေမဲ့ အစ်ကိုသွားပါတယ်။ သူတို့ကလည်း စိတ်ထဲမှာ မလာလောက်ဘူး မှတ်နေတာ။ လာတော့ အံ့ဩသွားတာ။ ရိုက်ချင်လည်း ရိုက်ပါ။ ကျွန်တော်က အစ်ကို့အိမ်ကို ထိခိုက်ဖို့ မဟုတ်ဘူး။ အစ်ကိုတို့ လမ်းတွေကောင်းသွားဖို့အတွက် လုပ်တာပါ။ စိတ်ရှည်ရတာပေါ့။ အဓိကကတော့ မြို့ကိုချစ်တဲ့ စိတ်ပေါ့” ဟု ၎င်းက အတွေ့အကြုံကို ပြောပြသည်။

မန္တလေးမြို့သူ မြို့သားတို့၏ မြို့ကိုချစ်သောစိတ်သည် ကောင်းသောအပြောင်းအလဲများဆီ တွန်းပို့နိုင်ခဲ့ပြီဖြစ်သည်။

စည်ပင်ကော်မတီအဖြစ် မဆောင်ရွက်ခင်က ကျောက်လောကသားဖြစ်ခဲ့သည့် ဦးကျော်ဇောအောင်သည် မန္တလေးကျောက်ဝိုင်း မပြောင်းရွှေ့ရေးကော်မတီတွင် အတွင်းရေးမှူးအဖြစ် ဆောင်ရွက်ခဲ့ပြီး သဘောထားတစ်ခုတည်းဖြစ်စေရန် ကျောက်လောကသားများကို ပြောဆို စည်းရုံးခဲ့သည်။

ပုံစံနှင့် အယူအဆကွဲပြားသည့် ကျောက်သမားများစွာကို စိတ်ရှည်လက်ရှည် ပြောဆိုစည်းရုံးခဲ့ရသည့် အတွေ့အကြုံက ယခု စည်ပင်ကော်မတီဝင်ဘ၀တွင် အသုံးကျလာသည်။

ကျောက်သမားအတွေ့အကြုံများကိုအသုံးချ၍ မန္တလေးမြို့တော် ဖွံ့ဖြိုး တိုးတက်ရေးအတွက် ဆောင်ရွက်နိုင်သည်ဟု သူက ဆိုလေသည်။

မန္တလေးတစ်မြို့လုံး လမ်းများပြန်လည်ဖော်ထုတ်ရာတွင် ကံဆိုးသူ မောင်ရှင်ဖြစ်ရသူမှာ ဦးမြင့်ဘိုတို့ မိသားစု ဖြစ်သည်။ လမ်းနယ်နိမိတ်နှင့် မလွတ်သူအချို့သည် နေအိမ်ခြံဝင်းဖျက်ပေးရခြင်း၊ အိမ်တစ်ခြမ်းမလွတ်ခြင်း စသည်တို့ကိုသာ ကြုံတွေ့ရသော်လည်း ဦးမြင့်ဘို၏ ခြံဝင်းမှာ တစ်ဝင်းလုံးက လမ်းနယ်နိမိတ်ထဲ ကျူးနေခဲ့သည်။

လမ်း ၈၀ နှင့် နီးသဖြင့် မြို့လယ်ကောင်တွင်ရှိသည်ဟု ဆိုနိုင်သည့် နေအိမ်ဝင်းသည် ကျဉ်းမြောင်းသော်လည်း စီးပွားရေးအကွက်အကွင်းကမူ ကောင်းသည်။ ထို့ကြောင့် ယမန်နှစ်က သူ့ခြံဝင်းကို ကျပ်သိန်း ၂၂၀ ဖြင့် လာဝယ်သူ ရှိခဲ့သည်။

“ဒါပေမဲ့ မရောင်းလိုက်ဘူး။ အခုကျတော့ တစ်ပြားမှ မရဘဲနဲ့ ဖယ်ပေးရတော့မှာ” ဟု ဦးမြင့်ဘိုက နောင်တရဟန်ဖြင့် ပြောလေသည်။

ထို့အတူ မြို့ကိုချစ်သော အပြောင်းအလဲများကို အင်တိုက်အားတိုက်လုပ် ဆောင်နိုင်သော ဦးကျော်ဇောအောင်လို ဒေးဗစ်ကော်ပါဖီးလ်များလည်း ထပ်မံပေါ်ထွက်လာရန် လိုအပ်နေသေးသည်။ 

 

မြတ် (ကလေး)

You may also like...

Leave a Reply

Your email address will not be published. Required fields are marked *