အပြစ်မသိရဘဲ အနီကတ်ထိသည့် ဝန်ကြီးများ

photo by KSCO

NLD အစိုးရလက်ထက် ထုတ်ပယ်ခံရသည့်ဝန်ကြီးတစ်ဦး ထပ်ပေါ်လာပြန်သည်။

ကချင်ပြည်နယ်ဝန်ကြီးချုပ်က ပြည်နယ်ဝန်ကြီးသုံးဦးကို နုတ်ထွက်ခိုင်းရာ စိုက်ပျိုးမွေးမြူရေးနှင့် ဆည်မြောင်းဝန်ကြီး ဦးမြသိန်းနှင့် လူမှုရေးဝန်ကြီးဒေါက်တာသင်းလွင်တို့က လက်ခံပြီး သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦးHလအောင်ကမူ နုတ်ထွက်ခိုင်းသည့် အကြောင်းအရင်းကို မသိရသဖြင့် ငြင်းပယ်ခဲ့သည်။

ထို့ကြောင့် နိုင်ငံတော်သမ္မတက ဝန်ကြီး ဦးHလအောင်ကို တာဝန်မှ ရပ်စဲလိုက်ရသည်။ NLD အစိုးရလက်ထက်တွင် ရာထူးမှဖယ်ရှားခံရသည့် ပြည်နယ်ဝန်ကြီးနှစ်ဦးနှင့် ပြည်ထောင်စုအဆင့်က  ဒုတိယဝန်ကြီးတစ်ဦး စုစုပေါင်းသုံးဦးရှိလာပြီ ဖြစ်သည်။

ယင်းအနက် သမ္မတဦးဝင်းမြင့် တာဝန်ယူပြီးနောက် ပထမဆုံးအကြိမ် ရာထူးကဖယ်ရှားခံရသူမှာ ဦးH လအောင်  ဖြစ်လာသည်။ ကချင်ပြည်နယ်ဝန်ကြီးနှစ်ဦးကို ရာထူးမှနုတ်ထွက်ခြင်းပြုပြီး တစ်ဦးကို ရာထူးမှ ဖယ်ရှားလိုက်သော်လည်း ယင်းသို့ လုပ်ဆောင်ရသည့်  အကြောင်းအရင်းကို ပြည်ထောင်စုနှင့် ပြည်နယ်အစိုးရတို့က ထုတ်ဖော်ပြောဆို ရှင်းလင်းခြင်းမရှိခဲ့ပေ။

အကြောင်းပြချက်မပေးဘဲ နုတ်ထွက်ခိုင်းသည့်အပေါ် ဝေဖန်သံများစွာ ထွက်ပေါ်နေသည်။

“တကယ်လို့ ကျွန်တ်ာအပြစ်ရှိရင် အဲဒီအပြစ်ကို ဖော်ပြပါ။ ကျွန်တော့်ကိုလည်း ထုချေပိုင်ခွင့်တော့ ပေးသင့်ပါတယ်” ဟု ဝန်ကြီး ဦးHလအောင်က  ပြောဆိုသည်။ ဝန်ကြီးချုပ်က ၎င်း၏ရုံးခန်းသို့ခေါ်ကာ နုတ်ထွက်စာတွင် လက်မှတ်ထိုးခိုင်းမှုအပြီး သတင်းမီဒီယာများနှင့်တွေ့ဆုံစဉ် ယင်းသို့ပြောဆိုခြင်း ဖြစ်သည်။

နုတ်ထွက်ခိုင်းခြင်း

ကချင်ပြည်နယ်ဝန်ကြီးချုပ်က အဆိုပါဝန်ကြီးသုံးဦးကို ခေါ်ယူကာ  နုတ်ထွက်ရန် ကနဦးတွင် နိုင်ငံတော်၏  အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က ဖုန်းဖြင့်ညွှန်ကြားသည်ဟု ပြောဆိုကြောင်း အဆိုပါဝန်ကြီးများက ပြောကြားသည်။

ဝန်ကြီး ဦးHလအောင် နုတ်ထွက်စာတွင် လက်မှတ်ရေးထိုးပေးရန် ငြင်းပယ်သဖြင့် အထက်အမိန်ဖြင့် လုပ်ရခြင်းဟု ပြောဆိုပြီး အထက်အမိန့်ဆိုသည်မှာ မည်သူ့ကို ရည်ညွှန်းခြင်းဖြစ်သနည်းဟု မေးမြန်းရာ သမ္မတဦးဝင်းမြင့် စောင့်ဆိုင်းနေပြီး ယနေ့ (ဇန်နဝါရီ ၂၁) ဖက်စ်ထိုးပေးရမည်ဟု ဝန်ကြီးချုပ်က ပြောဆိုကြောင်း ဦးHလအောင်က ရှင်းပြသည်။

နုတ်ထွက်စာ၌ လက်မှတ်ရေးထိုးရာတွင်လည်း ကျန်းမာရေးအကြောင်းပြချက်ဖြင့်တင်ပြရန် ဝန်ကြီးချုပ်က အကြံပေးသေးကြောင်း၊ မည်သည့်ကိစ္စကြောင့် လက်မှတ်ထိုးရမည်နည်းဟု မေးမြန်းရာ သမ္မတထံ ဖုန်းခေါ်ကာ မေးမြန်းပေးရမည်လောဟုဆိုကာ ဝန်ကြီးချုပ်က သမ္မတထံ ဖုန်းဆက်ကြောင်း ၎င်းက ဆိုသည်။

ယင်းနောက် သမ္မတက အမြန်ဆုံးလက်မှတ်ရေးထိုးရန် လမ်းညွှန်ချက်ပေးပြီး ယနေ့ည အဖြေမရ၍ မဖြစ်ဟုလည်း  ပြောဆိုသည်ဟု ဝန်ကြီးချုပ်က ပြန်လည်ပြောဆိုကြောင်း ဦးHလအောင်က  ရှင်းပြသည်။

နိုင်ငံတော်အဆင့်ဖြစ်လာသည့် အမှုတွင် စာရွက်စာတမ်းများဖြင့် စနစ်တကျ ညွှန်ကြားချက်ထုတ်ပြန်ကာ  လုပ်ဆောင်ခြင်းမဟုတ်ဘဲ ဖုန်းဖြင့် ဆက်သွယ်ကာ တိုးတိုးတိတ်တိတ်လုပ်ဆောင်သည့်လုပ်ရပ်မှာ NLD ပုံရိပ်ကို ထိခိုက်စေပြီး ဝန်ကြီးများ၏ ဂုဏ်သိက္ခာလည်း ကျဆင်းစေကြောင်း ၎င်းက ဆိုသည်။

“အထက်အမိန့်နဲ့ Sign ထိုးပါ ဆိုတော့လည်း ကျွန်တော်မထိုးဘူး။   ဘာကြောင့်မထိုးလဲဆိုတော့ ဘာကို ထုချေရမယ်မှန်း မသိဘူး။ ဘာမှန်းမသိတဲ့ကိစ္စကို ထိုးပါဆိုတော့လည်း စဉ်းစားကြည့်ပေါ့ဗျာ”

ကချင်ပြည်နယ်ဝန်ကြီးချုပ် ဒေါက်တာခက်အောင်ကမူ အုပ်ချုပ်ရေးအဖွဲ့အစည်းဖြစ်သဖြင့် အဆင့်ဆင့်ကွပ်ကဲ  ညွှန်ကြားမှုဖြင့် လုပ်ရိုးလုပ်စဉ်အတိုင်း  လုပ်ဆောင်ခြင်းသာဖြစ်ကြောင်း တုံ့ပြန်ထားသည်။ ယင်းအပြင် သတင်းမီဒီယာများက နိုင်ငံတော်၏အတိုင်ပင်ခံပုဂ္ဂိုလ်ကိုယ်တိုင်ညွှန်ကြားသလောဟု မေးမြန်းမှု  အပေါ်လည်း “အထက်ဆိုတာ အကုန်ပါပြီပေါ့” ဟု ဖြေကြားထားသည်။

ဒီမိုကရေစီနည်းလမ်းကျပါ၏လော

ခိုင်လုံသည့် အကြောင်းပြချက်မပေးဘဲ နုတ်ထွက်ခိုင်းခြင်းအပေါ် ဒီမိုကရေစီနည်းလမ်းကျပါ၏လောဟု ဝေဖန်သံများ ထွက်ပေါ်လာသည်။ ဝန်ကြီးများ နုတ်ထွက်ခိုင်းခြင်းမှာ သုံးသပ်ရမည့် အပိုင်းနှစ်ခုရှိသည်။ ဥပဒေနှင့် ညီညွတ်မှု ရှိ မရှိ၊ တရားမျှတမှု ရှိ မရှိဆိုသည့် အချက်နှစ်ချက် ဖြစ်သည်။

ဖွဲ့စည်းပုံအခြေခံဥပဒေ ပုဒ်မ ၂၆၄ ပုဒ်မခွဲ (က) ပုဒ်မခွဲငယ် (၂) တွင် နိုင်ငံတော်သမ္မတသည် လုပ်ငန်းတာဝန်ကို ကျေပွန်စွာ မထမ်းဆောင်နိုင်သော တိုင်း သို့မဟုတ်    ပြည်နယ်ဝန်ကြီးချုပ် သို့မဟုတ် ဝန်ကြီးကို ရာထူးက နုတ်ထွက်ရန် ညွှန်ကြားနိုင်ပြီး မလိုက်နာလျှင် တာဝန်မှ ရပ်စဲရမည်ဟု ပြဋ္ဌာန်းထားသည်။

ယင်းသို့ဆိုသော်လည်း သမ္မတ၏ ညွှန်ကြားချက်မရဘဲ ဝန်ကြီးချုပ်က အထက်အမိန့်အရဟုဆိုကာ လက်မှတ်ထိုးရန် ခိုင်းစေခဲ့ခြင်းဖြစ်သည်ဟု ကာယကံရှင်ဝန်ကြီးသုံးဦးက ပြောဆိုထားသည်။

ဝန်ကြီးများကို နုတ်ထွက်ခိုင်းရာတွင် နိုင်ငံတော်၏ အတိုင်ပင်ခံပုဂ္ဂိုလ်က  ညွှန်ကြားသည်ဆိုခြင်းမှာ ဖွဲ့စည်းပုံအခြေခံဥပဒေနှင့် ညီညွတ်မှုမရှိကြောင်း ဝေဖန်သံများ ထွက်ပေါ်ခဲ့သေးသည်။ ယင်းလုပ်ရပ်မှာ သမ္မတကသာ လုပ်ပိုင်ခွင့်ရှိသောကြောင့်ဖြစ်သည်။ ယင်းနောက် အဆိုပါဝန်ကြီးများနှင့်ပတ်သက်၍ နုတ်ထွက်ခြင်းပြုခြင်း၊ တာဝန်မှ ရပ်စဲခြင်းတို့ကို သမ္မတက ဇန်နဝါရီလ ၂၁ ရက်နေ့တွင် အမိန့်ထုတ်ပြန်လိုက်သည်။

သမ္မတ၏ လုပ်ဆောင်ချက်သည် ဖွဲ့စည်းပုံအခြေခံဥပဒေပါ ပြဋ္ဌာန်းချက်နှင့် အညီ လုပ်ကိုင်ခြင်းဖြစ်သဖြင့် ဥပဒေနှင့် အညီလုပ်ကိုင်ခြင်းဟု ပြောဆိုနိုင်သော်လည်း တရားမျှတမှုနှင့်ပတ်သက်၍ မေးခွန်းထုတ်ဖွယ်ရာ ဖြစ်နေကြောင်း ဥပဒေအကြံပေးဦးခင်မောင်မြင့်က မှတ်ချက်ပေးသည်။

ဒီမိုကရေစီစနစ်သို့ ချီတက်နေခြင်းဖြစ်သဖြင့် ပြည်ထောင်စုအဆင့်ဖြစ်စေ၊ တိုင်းနှင့် ပြည်နယ်အဆင့်ဖြစ်စေ အုပ်ချုပ်ရေးအဖွဲ့အစည်းဝင် ဝန်ကြီးများကို စွပ်စွဲအရေးယူမည်ဆိုလျှင် စွပ်စွဲခံရသူများ၏ ရပိုင်ခွင့်ဖြစ်သည့် ထုချေရှင်းလင်းခွင့်ကို အပြည့်အဝပေးကာ ကြားနာရန် လိုအပ်ကြောင်း  ၎င်းက ထောက်ပြသည်။

ဖွဲ့စည်းပုံအခြေခံဥပဒေတွင် အမှု များတွင် ဥပဒေအရ ခုခံချေပခွင့်နှင့် အယူခံပိုင်ခွင့်ရရှိရေး ပြဋ္ဌာန်းချက်ပါဝင်ပြီး  ပြည်ထောင်စုတရားစီရင်ရေးဥပဒေတွင်လည်း ယင်းသို့အလားတူ ပြဋ္ဌာန်းထားသည်။

ဆိုလိုသည်မှာ လူတစ်ဦးကို အရေးယူမည်ဆိုလျှင် အရေးယူခံရမည့်သူ၏  ရှင်းလင်းထုချေခွင့်ကို အပြည့်အဝ ပေးရမည်ဟု ပြဋ္ဌာန်းထားခြင်းဖြစ်ကြောင်း၊  ဝန်ထမ်းစည်းမျဉ်းစည်းကမ်းဥပဒေအရ ရာထူးတာဝန်က ဖယ်ရှားလိုက်ခြင်းမှာ အကြီးမားဆုံး ပြစ်ဒဏ်ပေးလိုက်ခြင်းဖြစ်ကြောင်း ဦးခင်မောင်မြင့်က ပြောဆိုသည်။

“ဘယ်အကြောင်းကြောင့်ဆိုတဲ့ တိကျတဲ့အကြောင်းအချက် ဖော်ပြပေးဖို့ လိုသလို၊ အဲဒီအကြောင်းအချက်တွေ မဟုတ်မမှန်ဘူး၊ သူ မကျုးလွန်ဘူးဆိုတဲ့ သူရဲ့  ရှင်းလင်းချက်ကိုလည်း ကြားနာဖို့ လိုသေးတယ်။ အဲဒီလို ကြားနာပြီးအချိန်ကျမှ  ရှင်းရှင်းလင်းလင်းဖြစ်ပြီဆိုတဲ့အခါကျမှ ဒီပြစ်ဒဏ်ပေးခွင့် ရှိတယ်လို့ မြင်ပါတယ်။  တရားမျှတမှု သဘောအရပေါ့”

ထို့ကြောင့် ဖွဲ့စည်းပုံအခြေခံဥပဒေအရ သမ္မတက ဆောင်ရွက်သည်ဆိုသော်လည်း ဥပဒေ၏ အနှစ်သာရဖြစ်သည့် တရားမျှတမှု သဘောအရ သုံးသပ်လျှင် တရားမျှတမှုမရှိဟု ရှုမြင်ကြောင်း ဦးခင်မောင်မြင့်က ပြောဆိုသည်။ ယင်းအပြင် ဒီမိုကရေစီကျင့်ထုံးကျင့်စဉ်များ မကိုက်ညီဘဲ ဥပဒေကို အသုံးပြုကာ တစ်ဖက်သတ်စီရင်သည့် ပုံစံမျိုးဖြစ်နေကြောင်း ၎င်းက ဝေဖန်သည်။

“တစ်နည်းအားဖြင့် လွယ်လွယ်ပြောရင် အာဏာရှင်စနစ်ပုံစံမျိုး သက်ရောက်နေတဲ့အတွက် ကျွန်တော် တစ်ဦးထဲအနေနဲ့ ပြောရရင်တော့ ဒီဆောင်ရွက်ပုံကို  မနှစ်သက်ပါဘူး”

ယင်းကဲ့သို့ အလေ့အထမျိုး အစိုးရအဖွဲ့အစည်း၊ ဌာနဆိုင်ရာအဖွဲ့အစည်းများတွင် ကျယ်ပြန့်လာကာ အစဉ်အလာအဖြစ် ထွန်းကားလာမည်ကို စိုးရိမ်ကြောင်း ထောက်ပြသူများလည်းရှိသည်။ ဝန်ကြီးများကို နုတ်ထွက်ခွင့်ပြုခြင်း၊ တာဝန်မှ ရပ်စဲခြင်းတို့မှာ ဥပဒေနှင့်ညီသည်ဆိုသော်လည်း အရေးယူရသည့် အကြောင်းပြချက်မပေးခြင်း၊ ပြည်သူကို ရှင်းလင်းမှုမရှိခြင်းတို့မှာ နည်းလမ်းမကျဟုလည်း  ဝေဖန်မှုများ ရှိသည်။

မရသေးသည့် အဖြေ

ကချင်ပြည်နယ်ဝန်ကြီးများကို  နုတ်ထွက်ခြင်းအပေါ် အစိုးရက တိကျသည့်အဖြေမပေးသေးပေ။

နုတ်ထွက်ရမည့် အကြောင်းအရင်းကို စာရွက်စာတမ်းဖြင့် စနစ်တကျ  ညွှန်ကြားခြင်းမဟုတ်ဘဲ အထက်က  ညွှန်ကြားသည်ဟုဆိုကာ ဝန်ကြီးချုပ်က လက်မှတ်ထိုးခိုင်းခြင်းဖြစ်သဖြင့် လက်မခံခြင်းဖြစ်ကြောင်း ဦးHလအောင်က ပြောဆိုသည်။

အကြောင်းအရင်းမသိရဘဲ၊ တစ်စုံတစ်ရာ ထုချေခွင့်မရဘဲ အတင်းအကျပ်ဖိအားပေးကာ နုတ်ထွက်ခိုင်းခြင်းမှာ    မလုပ်သင့်သည့်လုပ်ရပ်ဟု ဝန်ကြီးချုပ်ကို ပြောဆိုခဲ့ကြောင်း၊ အပြန်အလှန်ထိန်းကျောင်းမှုရှိသင့်ပြီး ဒီမိုကရေစီ နိုင်ငံတော်ကို သွားနေသည့်အချိန်တွင် အစိုးရအဖွဲ့အနေနှင့်လည်း စံပြအဖြစ် ပြည်သူတွေကို  လုပ်ပြရမည်အချိန် ဖြစ်ကြောင်း ၎င်းက  ထောက်ပြသည်။

“ကျွန်တော်မှားရင်လည်း မှားတယ်လို့ ပွင့်ပွင့်လင်းလင်း ဝန်ခံမယ်။ ဘာမှ  ကြောက်စရာမလိုဘူး။ အဲဒီလိုမျိုး ဖိအားပေးတယ်ဆိုတာကတော့ မဖြစ်စေချင်ပါဘူး”ဟု ဦးHလအောင်က ပြောဆိုသည်။

ပြည်သူလူထုက တိုင်ကြားလာသဖြင့် အပြစ်ရှိသည်ဟုတွေ့ရှိလျှင် နုတ်ထွက်ရန် လက်နှေးနေမည် မဟုတ်ကြောင်း၊  အာဏာသုံးကာ လုပ်ဆောင်သည့်  လုပ်ရပ်မျိုး အစဉ်အလာဖြစ်လာမည်ကို မလိုလားကြောင်း ဝန်ကြီးက ဆက်လက် ပြောဆိုသည်။

လမ်းညွှန်ချက်မှန်ကန်လျှင် ငြင်းပယ်မည်မဟုတ်သော်လည်း စနစ်တကျမဟုတ်ဘဲ ပါးစပ်ဖြင့် လမ်းညွှန်ခြင်းမျိုးမှာ အတုအယောင်လမ်းညွှန်ခြင်းသာဖြစ်ကြောင်း၊  နိုင်ငံတော်အဆင့်လုပ်ဆောင်သည့် လုပ် ရပ်ဖြစ်သဖြင့် လမ်းညွှန်ချက်မှာလည်း နိုင်ငံတော်အဆင့်သာ ဖြစ်သင့်ကြောင်း  ၎င်းက ဆိုသည်။

“ဒီလိုနိုင်ငံတော်အဆင့်အမှုကြီးကို  စာမပါဘူး။ ဘာမှမပါဘူးဆိုရင် ကျွန်တော် တို့ရဲ့ Image က မကောင်းတော့ဘူး။  ကျွန်တော်တို့ သိက္ခာကို ဘာနဲ့မှ မလဲနိုင်ဘူး”ဟု ၎င်းက ဆိုသည်။

ရာထူးက နုတ်ထွက်လိုက်ရသည့်  ဝန်ကြီးဦးမြသိန်းကမူ လမ်းလုပ်ငန်းများ လုပ်ဆောင်ရာတွင် တင်ဒါလုပ်ထုံး လုပ်နည်းများနှင့် မကိုက်ညီသဖြင့် အဂတိလိုက်စားမှု တိုက်ဖျက်ရေးကော်မရှင်ကို တိုင်ကြားခံထားရမှုကို ရှောင်လိုသဖြင့် နုတ်ထွက်ခိုင်းခြင်းဖြစ်နိုင်သည်ဟု မီဒီယာအချို့ကို ပြောဆိုထားသည်။

ယင်းကိစ္စတွင် ဝန်ကြီးချုပ်ပါ ပါဝင်ပတ်သက်သည့် သဘောသက်ရောက်နေသဖြင့် မသက်ဆိုင်သူများကို ထိုးချပြီး အပြစ်ရှိသူများကို ကာကွယ်ရန်လုပ်ဆောင်ခြင်း ဖြစ်နိုင်ကြောင်း မီဒီယာအချို့ကို ဖြေကြားထားသည်။ ယင်းအပြင် ပါတီထဲတွင် နေရာရလိုသူ၊ လွှတ်တော်ကိုယ်စားလှယ်များတွင်လည်း ဝန်ကြီးရာထူးရယူလိုသူများ ရှိနေကြောင်း ကချင်ပြည်နယ် NLD  ပါတီဥက္ကဋ္ဌလည်းဖြစ်သူ ၎င်းက ပြောဆိုထားသည်။

ဝန်ကြီး ဦးမြသိန်းကို The Voice Journal က ဖုန်းဖြင့် သီးခြားဆက်သွယ်မေးမြန်းရန် ကြိုးပမ်းခဲ့သော်လည်း မအားလပ်ဟုသာ ဖြေကြားခဲ့သည်။

NLD ပါတီ၏ ပြောရေးဆိုခွင့်ရှိသူ  ဒေါက်တာ မျိုးညွန့်ကမူ အဆိုပါဝန်ကြီး သုံးဦးကို နုတ်ထွက်ခိုင်းရသည့် အကြောင်းအရင်းကို မသိရကြောင်း ပြောဆိုသည်။

“အခုလောလောဆယ်အထိကတော့ တာဝန်က ရပ်ဆိုင်းတယ်။ ထုတ်ပယ်တယ်ဆိုတာ အုပ်ချုပ်ရေးဆိုင်ရာ တာဝန်တွေ ချို့ယွင်းတယ်၊ လစ်ဟင်းတယ်ဆိုတဲ့ အကြောင်းရှိမှာပါ။ ဒါကိုတော့ ကျွန်တော်တို့ တိတိကျကျ မသိပါဘူး” ဟု ၎င်းက ဖြေကြားသည်။

ယင်းအပြင် အကြောင်းပြချက်မရှိဘဲ လုပ်ဆောင်ခြင်းမှာလည်း မဖြစ်နိုင်ကြောင်း၊ လက်ရှိလုပ်ဆောင်ချက်မှာ  ဖွဲ့စည်းပုံအခြေခံဥပဒေနှင့်အညီ လုပ်ဆောင်ခြင်းသာဖြစ်ကြောင်း ဒေါက်တာမျိုးညွန့်က ဆိုသည်။

“ဒီနေ့ ဒီအချိန်မှာတော့ တရားဥပဒေနဲ့အညီ လုပ်ဆောင်တာဖြစ်ပါတယ်။ အုပ်ချုပ်ရေးပိုင်းကို ပါတီက သွားစစ်ဆေးလို့ မရဘူး။ ဘာကြောင့်နုတ်ထွက်ရလဲဆိုတာ မေးလို့မရဘူး”ဟု ၎င်းက  ဆက်လက်ပြောဆိုသည်။

ဝန်ကြီးသုံးဦးကို သမ္မတက နုတ်ထွက်ခွင့်ပြုခြင်း၊ တာဝန်မှရပ်စဲခြင်းလုပ်ခဲ့သော်လည်း အဓိကလက်သည်မှာ ဝန်ကြီးချုပ်သာ ဖြစ်နိုင်ကြောင်း သုံးသပ်ချက်များလည်းရှိသည်။ လုပ်ထုံးလုပ်နည်းအရ  သမ္မတက လက်မှတ်ရေးထိုးကာ ထုတ်ပြန်ပေးမှသာ အတည်ဖြစ်သောကြောင့်  သမ္မတက ဆောင်ရွက်ပေးရခြင်း ဖြစ်နိုင်ကြောင်း ထောက်ပြမှုများလည်းရှိသည်။

ဝန်ကြီးချုပ်သည် အစိုးရအဖွဲ့ဝင်အချင်းချင်း မျက်နှာမနာစေလိုသဖြင့် အထက်က ညွှန်ကြားသည်ဟု အကြောင်းပြခြင်းဖြစ်နိုင်သည်ဟုလည်း ဝေဖန်မှုများ ရှိသည်။

“အခြေခံအကြောင်းတရားတွေ ကတော့ သက်ဆိုင်ရာ ပြည်နယ်ဝန်ကြီးချုပ်ဆီက တက်လာတယ်လို့ သုံးသပ်ပါတယ်။ ဝန်ကြီးချုပ်ရဲ့ တင်ပြချက်အပေါ်မှာပဲ သမ္မတနဲ့ အစိုးရအဖွဲ့ကနေ အရေးယူလိုက်ရတဲ့ သဘောရှိတယ်” ဟု ဥပဒေအကြံပေးဦးခင်မောင်မြင့်က မှတ်ချက်ပေးသည်။

လူစားလဲခြင်း

NLD အစိုးရလက်ထက်တွင်  နုတ်ထွက်ရသူ၊ တာဝန်မှ ရပ်စဲခံရသူ ၁၅ ဦး  ရှိပြီဖြစ်သည်။ ယင်းအပြင် သမ္မတ  ဦးထင်ကျော်လည်း နုတ်ထွက်သွားသေးသည်။

ပြည်ထောင်စုဝန်ကြီး ဦးကျော်ဝင်းနှင့် ဦးဖေဇင်ထွန်းတို့ကို ရာထူးက နုတ်ထွက်ခွင့်ပြုခဲ့ပြီး ဒုတိယဝန်ကြီး  ဒေါက်တာထွန်းဝင်းကို တာဝန်မှ ရပ်စဲခဲ့သည်။ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ဒုတိယဝန်ကြီးဒေါက်တာ ထွန်းဝင်းမှာ NLD အစိုးရလက်ထက် ရာထူးက ဖယ်ရှားခံရသည့် ပထမဆုံးပုဂ္ဂိုလ် ဖြစ်သည်။ တာဝန်ယူပြီး ခုနစ်လကျော်အကြာတွင် ရာထူးက ထုတ်ပယ်ခံရခြင်းဖြစ်သည်။

ပြည်နယ်အဆင့်တွင် မွန်ပြည်နယ်ဝန်ကြီးချုပ် ဦးမင်းမင်းဦး၊ ဧရာဝတီတိုင်းဝန်ကြီးချုပ် မန်းဂျော်နီနှင့် ပြည်နယ်ဝန်ကြီးရှစ်ဦးတို့ကို နုတ်ထွက်ခွင့်ပြုခဲ့ပြီး ရခိုင်ပြည်နယ် စည်ပင်သာယာရေးဝန်ကြီး  ဦးမင်းအောင်နှင့် ကချင်ပြည်နယ်ဝန်ကြီး ဦးHလအောင်တို့ကို တာဝန်မှရပ်စဲခဲ့သည်။

ဦးမင်းအောင်ကို ရခိုင်ပြည်နယ်လွှတ်တော်က စွပ်စွဲပြစ်တင်ဖြုတ်ချခဲ့သဖြင့် သမ္မတက အဆိုပါဝန်ကြီးကို တာဝန်မှ ရပ်စဲပေးခဲ့ရခြင်းဖြစ်သည်။ မွန်ပြည်နယ်ဝန်ကြီးချုပ် ဦးမင်းမင်းဦးမှာ NLD အစိုးရ လက်ထက် နုတ်ထွက်ရသည့် ပထမဆုံးဝန်ကြီးချုပ်ဖြစ်သည်။ ဦးမင်းမင်းဦးနှင့် ဒေါက်တာထွန်းဝင်းတို့ကိစ္စတွင်လည်း အစိုးရက ပြည်သူကို ရှင်းလင်းခြင်း မရှိ ခဲ့ပေ။

လက်ရှိလူစားလဲခံရသည့် ဝန်ကြီးသုံးဦးအနက် လူထုထောက်ခံမှုရှိသည့်  ဝန်ကြီး ဦးHလအောင် ပါဝင်နေခြင်း အပေါ် မေးခွန်းများရှိသည်။ ဝန်ကြီးသုံးဦးကို အတင်းအကျပ် နုတ်ထွက်စေခြင်းအပေါ် လွန်စွာထိတ်လန့်အံ့ဩမိကြောင်း ကချင်ပြည်နယ်ရှိ အရပ်ဘက်အဖွဲ့အစည်း ၃၇ ဖွဲ့က စုပေါင်းထုတ်ပြန်ထားသည်။

ဦးHလအောင်သည် သဘာဝသယံဇာတနှင့် ပတ်ဝန်းကျင်ထိန်းသိမ်းရေးဆိုင်ရာတွင် ကျွမ်းကျင်စွာ စီမံခန့်ခွဲနိုင်သူဖြစ်ပြီး မည်သည့်အကြောင်းအရင်းကြောင့် နုတ်ထွက်ခိုင်းသည်ကို သိရှိလိုကြောင်း ယင်းအဖွဲ့များက ပြည်နယ်ဝန်ကြီးချုပ်ထံ  မေးခွန်းထုတ်ထားသည်။

ယင်းဝန်ကြီးသည် ဖားကန့်ဒေသတွင် အကြီးစားတူးဖော်ရေးလုပ်ငန်းများကို အားမပေးဘဲ ဒေသခံများ တစ်နိုင်တစ်ပိုင် တူးဖော်နိုင်သည့် လုပ်ငန်းများကို  အားပေးခဲ့ပြီး အဓိကအားဖြင့် သဘာဝပတ်ဝန်းကျင် ရေရှည်တည်တံ့အောင်၊  ဒေသခံများ အကျိုးအမြတ်ရအောင်လုပ်ဆောင်သဖြင့် လူထုထောက်ခံမှုရကြောင်း  ကချင်ပြည်နယ် ပတ်ဝန်းကျင်ထိန်းသိမ်းရေးကွန်ရက်၏ Program Manager ဦးဘရန်အောင်က ပြောဆိုသည်။

ယင်းအပြင် သစ်တောကြိုးဝိုင်း အတွင်း ငှက်ပျောစိုက်ရာတွင် ကွင်းဆင်း  စစ်ဆေးကာ သစ်တောမပြုန်းတီးရေး  ကြိုးပမ်းခဲ့ပြီး မြစ်ဆုံအရေးတွင် ပြည်သူနှင့်အတူ ရပ်တည်မည်ဟု ပြောဆိုထားသူလည်းဖြစ်ကြောင်း ၎င်းက ဆိုသည်။

သဘာဝပတ်ဝန်းကျင်ထိန်းသိမ်းရေး တွင် စနစ်တကျကျွမ်းကျင်စွာလုပ်ဆောင်တတ်သူဖြစ်ပြီး သက်ဆိုင်ရာ အရပ်ဘက်အဖွဲ့များနှင့် ပူးပေါင်းဆောင်ရွက်သူဖြစ်ကြောင်း၊ ယင်းသို့ လူမှန် နေရာမှန်ဖြစ်သူကို ဖယ်ရှားလိုက်သဖြင့် စိုးရိမ်မှုရှိကြောင်း ဦးဘရန်အောင်က ပြောဆိုသည်။

“ကချင်ပြည်နယ် သဘာဝပတ်ဝန်းကျင်ကိစ္စ၊ သတ္တုကိစ္စတွေမှာ ဘယ်လိုဖြစ်လာမလဲဆိုတာ တော်တော်ကို စိုးရိမ်ပါတယ်”ဟု ၎င်းက မှတ်ချက်ပေးသည်။

ပြည်နယ်ဝန်ကြီးသုံးဦးနှင့် ပတ်သက်၍ သမ္မတအမိန့်ထွက်ပေါ်လာပြီး လေးရက်ခန့်ကြာသည်အထိ အစိုးရက ယင်းသို့ လုပ်ဆောင်ရသည့် အကြောင်းအရင်းကို ရှင်းလင်းခြင်းမရှိသေးပေ။ NLD အစိုးရ သက်တမ်းသုံးနှစ်အတွင်း ကစားကွက်နှင့် အံမဝင်သူများကို အပြောင်းအလဲလုပ်ခဲ့ပြီ ဖြစ်သည်။  ယခုတစ်ကြိမ်တွင်လည်း အံမဝင်၍လော ဆိုသည်ကိုမူ မသိရသေးပေ။

ကချင်ပြည်နယ် ဖားကန့်ဒေသဖြစ် သည့် မဲဆန္ဒနယ်အမှတ် (၉) မှ NLD ပါတီ၏ အမျိုးသားလွှတ်တော်ကိုယ်စားလှယ် ဦးခင်မောင်မြင့်ကမူ အောက်ပါအတိုင်း မှတ်ချက်ပေးသည်။

“ဒီမိုကရေစီခေတ်ဆိုတော့ အဓိကဖြစ်စေချင်တာကတော့ ဘာဖြစ်ဖြစ် ပွင့်လင်း မင်သာမှု ဖြစ်စေချင်တာပေါ့။ လုပ်သွားတဲ့ အရာတွေက လူထုကို Heart ထိစေချင်တာပေါ့။ Heart မထိတဲ့အချိန်ကျတော့  ကျွန်တော်တို့လည်း Image ကျတာပေါ့။  ဒါပါပဲ”

အောင်မြင့်ထွန်း

You may also like...

Leave a Reply

Your email address will not be published. Required fields are marked *