တိုင်းပြုပြည်ပြုပုဂ္ဂိုလ်

“နိုင်ငံရေးသမားသည် နောက်လာမည့် ရွေးကောက်ပွဲကို ကြည့်သည်။ တိုင်းပြုပြည်ပြုပုဂ္ဂိုလ်သည် နောက်လာမည့်မျိုးဆက်ကို ကြည့်သည်” ဟူသော နာမည်ကြီးစကားကို ကြားဖူးကြလိမ့်မည်။ မျက်တောင်မွှေးတစ်ဆုံးသာကြည့်သူနှင့် တိုင်းပြည်၏ ရေရှည်အကျိုးကိုကြည့်သူဟု ခွဲထားခြင်းဖြစ်သည်။

စင်စစ် မြန်မာနိုင်ငံတွင် နိုင်ငံရေးသမားတို့ လွတ်လွတ်လပ်လပ်လှုပ်ရှားခွင့်ရလာသည်မှာ မကြာသေးသဖြင့် နိုင်ငံရေးသမားကိုယ်တိုင်ပင် ရှားပါးနေသေးသော်လည်း ထိုရှားပါးသည့် နိုင်ငံရေးသမားတို့အထဲမှပင် နိုင်ငံ့ရေရှည်အရေး၊ မျိုးဆက်သစ်များအရေးကို အမြင်ကျယ်ကျယ်ဖြင့် ကြည့်သူတို့ အလွန်လိုအပ်နေသည်။ နိုင်ငံရေးသမားသည် နောက်လာမည့် ရွေးကောက်ပွဲကို ကြည့်သည်ဆိုသော်လည်း ထိုသို့ကြည့်ခွင့်ရလာသည်မှာပင် မကြာသေးဘဲ နောက်ရွေးကောက်ပွဲကို ကြည့်ခွင့်ရရန်ပင် မယုံမရဲ ရှိနေရသေးသည်။

ရွေးကောက်ပွဲများကိုသာ ဂရုစိုက်မည့် နိုင်ငံရေးသမားများအတွက် ထိုရွေးကောက်ပွဲများ ပုံမှန်ဆက်လက်ကျင်းပနိုင်အောင် ဒီမိုကရေစီစနစ်ကို တည်ဆောက်ပေးမည်၊ နိုင်ငံကို အခြေခိုင်အောင်တည်ဆောက်ပေးမည်မှာ တိုင်းပြုပြည်ပြုပုဂ္ဂိုလ်များပင်ဖြစ်သည်။

၂၀၂၀တွင် ရွေးကောက်ပွဲများ ကျင်းပတော့မည်ဖြစ်ပြီး အာဏာရပါတီရော၊ အာဏာမရသည့်ပါတီရော အခြားနိုင်ငံရေးသမားများသည် ရွေးကောက်ပွဲကို စိတ်စောနေသည့်အတွက် လက်ရှိသူတို့လုပ်ကိုင်နေသည့် အရေးကြီးတာဝန်များကို မေ့နေလျှင်၊ ပေါ့လျော့နေလျှင် နိုင်ငံအတွက် အလွန်နစ်နာမည်ဖြစ်သည်။

ရွေးကောက်ပွဲ အနိုင်ရလိုဇောနှင့် ဘာသာရေး လူမျိုးရေးအကြောင်းပြ ဗိုလ်ဝင်ခံကြမည်ကိုလည်းကောင်း၊ နိုင်ငံအတွက် ရေရှည်နစ်နာမည်ဖြစ်သော်လည်း လတ်တလော လူပြိန်းကြိုက်သည့် မူဝါဒများကို ရွေးကောက်ပွဲဇောကပ်ကာ မျက်စိမှိတ်ကျင့်သုံးမည်ကိုလည်းကောင်း အခြားနိုင်ငံများ သင်ခန်းစာအရ The Voice Journal က စိုးရိမ်မိပါသည်။

မဖြစ်နိုင်မှန်းသိသော်လည်း မြန်မာ့နိုင်ငံရေးသမားအားလုံးကို တိုင်းပြုပြည်ပြုပုဂ္ဂိုလ်များသာ ဖြစ်စေလိုသည်။ နိုင်ငံအတွက် အရေးကြီးသည့်အတွက် ဖြစ်သည်။ 

 

အယ်ဒီတာ
၃၁.၁.၂၀၁၉

You may also like...

Leave a Reply

Your email address will not be published. Required fields are marked *