တစ်ပတ်တာ လွှတ်တော်အနှစ်ချုပ်

ဓာတ်ပုံ - မိုးကျော်လွင်

၂၀၁၅ ခုနှစ် ရွေးကောက်ပွဲအပြီးတွင် ပေါ်ပေါက်လာသည့် ဒုတိယအကြိမ် ပြည်ထောင်စုလွှတ်တော်သက်တမ်းတွင် ယခုဆိုလျှင် ပုံမှန်အစည်းအဝေး ဆယ့်တစ်ကြိမ်တိုင်လာခဲ့ပြီဖြစ်သည်။ ဆယ့်တစ်ကြိမ်မြောက်ပုံမှန်အစည်းအဝေးကို ဆက်လက်၍ ဖေဖော်ဝါရီလ ၄ ရက်နေ့မှ ၈ ရက်နေ့အထိ ကျင်းပသည်။ ယခုတစ်ပတ် ငါးရက်တာအတွင်း  ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော်တို့က ပြုလုပ်ခဲ့သည့် အစည်းအဝေးများထဲမှ ကောင်းနိုးရာရာသတင်းများကို ကောက်နုတ်ဖော်ပြခြင်းဖြစ်သည်။

ဖွဲ့စည်းပုံပြင်ရေး ပူးပေါင်းကော်မတီဖွဲ့ရန် လွှတ်တော်ဆုံးဖြတ်

၂၀၀၈ခုနှစ်အခြေခံဥပဒေကို ဆောလျှင်စွာ ပြင်ဆင်နိုင်ရေးအတွက် ပူးပေါင်းကော်မတီတစ်ရပ်ဖွဲ့စည်းရန် အမျိုးသားဒီမိုကရေစီ အဖွဲ့ချုပ် (NLD) ပါတီကအဆိုတင်သွင်းထားမှုကို ပြည်ထောင်စုလွှတ်တော်က အတည်ပြုလိုက်သည်။

ဖေဖော်ဝါရီလ ၅ ရက်နေ့က ပြုလုပ်သည့် အစည်းအဝေးတွင် တပ်မတော်သားကိုယ်စားလှယ်များအပါအဝင် NLD နှင့် အတိုက်အခံပါတီတို့မှ ကိုယ်စားလှယ် ၃၀ ဦးက အပြိုင်အဆိုင်ဆွေးနွေးခဲ့ကြပြီးနောက် တစ်ရက်တွင် မဲခွဲဆုံးဖြတ်ရာတွင် ထောက်ခံသူအများဖြင့် လွှတ်တော်က အတည်ပြုလိုက်သည်။ အဆိုပါကော်မတီကို အမျိုးသားလွှတ်တော်မှ ၂၂ ဦး၊ ပြည်သူ့လွှတ်တော်မှ ၂၂ ဦးနှင့် ဥက္ကဋ္ဌတစ်ဦး၊ စုစုပေါင်းကိုယ်စားလှယ် ၄၅ ဦးဖြင့် ဖွဲ့စည်းရန် ဖေဖော်ဝါရီလ ၈ ရက်နေ့တွင် ပြည်ထောင်စုလွှတ်တော်နာယကက ပြောဆိုသည်။

တရားမဝင်ငွေလွှဲမှုထိန်းချုပ်ရေး ယခုနှစ်စတင်မည်

တရားမဝင်ငွေလွှဲဝန်ဆောင်မှုလုပ်ငန်း (Hondi) တို့ကို ထိန်းချုပ်နိုင်ရန်စီစဉ်လျက်ရှိပြီး ယခုနှစ်အတွင်း စတင်နိုင်မည်ဖြစ်ကြောင်း မြန်မာနိုင်ငံဗဟိုဘဏ်ဒုတိယဥက္ကဋ္ဌဦးဘိုဘိုငယ်က ဆိုသည်။

ငွေလွှဲပို့လုပ်ငန်းများကို လုပ်ကိုင်နိုင်ရန်အတွက် ထိန်းကျောင်းမည့်အစီအစဉ်တစ်ခုကို ယခု ၂၀၁၉ ခုနှစ် ဇန်နဝါရီတွင် အပြီးသတ်ရေးဆွဲထားပြီး ပြည်ထောင်စုရှေ့နေချုပ်ရုံး၏ သဘောထားမှတ်ချက်နှင့် အစိုးရအဖွဲ့၏ အတည်ပြုချက်ရယူကာ ယခုနှစ်အတွင်း ပြီးစီးအောင်ဆောင်ရွက်သွားမည်ဖြစ်သည်ဟု ၎င်းက ဆိုသည်။

တစ်ချိန်တည်းမှာပင် နိုင်ငံခြားငွေကြေးစီမံခန့်ခွဲမှုဥပဒေ (Foreign Exchange Management Law) ကိုလည်း ပြင်ဆင်ရန်အတွက် ကော်မတီဖွဲ့ထားပြီးကြောင်း ဗဟိုဘဏ်ဒုတိယဥက္ကဋ္ဌက ဖေဖော်ဝါရီလ ၄ ရက်နေ့ကပြုလုပ်သည့် ပြည်သူ့လွှတ်တော်အစည်းအဝေးတွင် ပြောဆိုခဲ့သည်။ လက်ရှိတွင် မြန်မာနိုင်ငံအနေနှင့် နိုင်ငံပိုင်ဘဏ်သုံးဘဏ်၊ ပြည်တွင်းပုဂ္ဂလိကဘဏ် ၁၉ ဘဏ်၊ နိုင်ငံခြားဘဏ်များ၏ ဘဏ်ခွဲ ၁၃ ဘဏ် စုစုပေါင်း ၃၅ ဘဏ်တို့ကို ပြည်ပသို့ ငွေလွှဲလုပ်ငန်း လုပ်ကိုင်ခွင့်ပြုထားသည်။

ရန်ကုန်တွင် ဆိုင်ကယ်စီးနင်းခွင့်ပြုရေး လွှတ်တော်လက်မခံ

ရန်ကုန်တိုင်းဒေသကြီးအတွင်း မြို့နယ်ခြောက်ခုတွင် နယ်နိမိတ် ပိုင်းခြားသတ်မှတ်၍ မော်တော်ဆိုင်ကယ်စီးနင်းခွင့်ပြုရန် အစိုးရကို တိုက်တွန်းသည့်အဆိုကို ပြည်သူ့လွှတ်တော်က လက်မခံခဲ့ပေ။

ဒဂုံမြို့သစ် (တောင်ပိုင်း) မြို့နယ်မှ ဦးအေးနိုင်က ဖေဖော်ဝါရီလ ၄ ရက်နေ့က ပြုလုပ်သည့် အစည်းအဝေးတွင် မော်တော်ဆိုင်ကယ်များကို တရားဝင်မှတ်ပုံတင်စေပြီး ဒဂုံမြို့သစ်လေးမြို့နယ်၊ လှိုင်သာယာနှင့် ရွှေပြည်သာမြို့နယ်တို့တွင် စီးနင်းခွင့်ပြုရန်တင်သွင်းခဲ့ခြင်း ဖြစ်သည်။ အဆိုကို မဲခွဲဆုံးဖြတ်ရာတွင် ကန့်ကွက်သူများသဖြင့် လွှတ်တော်က လက်မခံခဲ့ခြင်းဖြစ်သည်။

ထီဈေးပိုရောင်းချမှု အဖြေရှာ

အောင်ဘာလေထီကို အစိုးရသတ်မှတ်ဈေးထက် ဈေးနှုန်းပိုမိုရောင်းချလျက်ရှိနေခြင်းများနှင့် ပတ်သက်၍ အဖြေရှာလျက်ရှိသည်ဟု စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီးက ပြောဆိုလိုက်သည်။

ဈေးနှုန်း ပိုမိုရောင်းချခြင်းမပြုစေရန် ထီလက်မှတ်ဝယ်ယူခွင့်ရရှိထားသည့် ကိုယ်စားလှယ်များကို စည်းမျဉ်းစည်းကမ်းများသတ်မှတ်ထားရှိထားပြီး ကျပ် ၁၀၀၀ တန်ထီကိုလည်း ယခုလတွင် စတင်ရောင်းချလျက်ရှိရာ ယင်းသည် ဈေးနှုန်းကြီးမြင့်မှုတို့ကို ကာကွယ်ရာရောက်ကြောင်း ဒုတိယဝန်ကြီးဦးမောင်မောင်ဝင်းက ဆိုသည်။

လက်ရှိတွင် ကျပ် ၅၀၀ တန်ထီလက်မှတ် ၁၁ စောင်ပါရှိသည့် ထီတစ်အုပ်ကို အစိုးရက ကျပ်ငါးထောင်ဖြင့် ရောင်းချပေးပြီး ကိုယ်စားလှယ်များ၊ ထီဆိုင်များအနေနှင့် ကျပ်ငါးရာအမြတ်ရရှိမည့် အနေအထားမှ ကျပ် ၁၀၀၀ တန်ထီတွင် ထီတစ်အုပ်ရောင်းချရပါက အမြတ်ငွေ ကျပ်တစ်ထောင်ရရှိမည်ဖြစ်ရာ ဆိုင်များက အမြတ်တင်လွန်းခြင်းကို လျှော့ချနိုင်လိမ့်မည်ဟု ၎င်းက ဖေဖော်ဝါရီလ ၇ ရက်နေ့တွင် ပြုလုပ်သည့် ပြည်သူ့လွှတ်တော်အစည်းအဝေးတွင် ပြောဆိုခဲ့သည်။

နိုင်ငံပိုင်မြေယာနှင့် အဆောက်အုံများကိစ္စ ပြန်စိစစ်ရေး အဆို လွှတ်တော်လက်ခံ

နိုင်ငံတော်ပိုင်မြေယာများ၊ အဆောက်အအုံများ၊ လုပ်ငန်းများကို ပုဂ္ဂလိကစီးပွားရေးရင်း လုပ်ပိုင်ခွင့်ပြုထားရာတွင် ကတိကဝတ်နှင့်အညီ ဆောင်ရွက်ခြင်းရှိ၊ မရှိ အပါအဝင် နိုင်ငံသားများ၊ ဒေသခံများ၊ လုပ်ငန်းရှင်များအတွက် အကျိုးရှိစေရေးအတွက်စီမံဆောင်ရွက်ပေးရန် အစိုးရကို တိုက်တွန်းသည့်အဆိုကို ဖေဖော်ဝါရီလ ၇ ရက်နေ့က ပြုလုပ်သည့် ပြည်သူ့လွှတ်တော်အစည်းအဝေးက လက်ခံလိုက်သည်။

အစိုးရအနေနှင့် ခွင့်ပြုထားသည့် လုပ်ငန်းများကို စစ်ဆေးခြင်း၊ ကတိကဝတ်နှင့်မညီသည့် လုပ်ငန်းများကို အရေးယူခြင်း၊ လုပ်ငန်းရုပ်သိမ်းခြင်းစသည်တို့ ဆောင်ရွက်ရန်အပြင် နိုင်ငံပိုင်အရင်းအမြစ်များကို အကျိုးရှိရှိအသုံးချနိုင်ရေးတို့ ပါဝင်သည်။

အဆိုကို စစ်ကိုင်းတိုင်းဒေသကြီး ပုလဲမဲဆန္ဒနယ်မှ ဒေါ်ခင်စန်းလှိုင်က တင်သွင်းခဲ့ခြင်းဖြစ်ပြီး လာမည့် အစည်းအဝေးများတွင် အဆိုနှင့် ပတ်သက်၍ ဆွေးနွေးကြမည်ဖြစ်သည်။

အသက် ၁၈ နှစ်ပြည့်မှ လက်ထပ်နိုင်ရန် တပ်မတော်သားများ ဆွေးနွေး

အမျိုးသား၊ အမျိုးသမီးများအနေနှင့် အသက် ၁၈ နှစ်ပြည့်မှာသာ လက်ထပ်နိုင်သည့် အချက်ကို ဥပဒေတွင် ထည့်သွင်းရန် တပ်မတော်သားကိုယ်စားလှယ်များက လွှတ်တော်တွင် ဆွေးနွေးခဲ့ကြသည်။

အမျိုးသားလွှတ်တော်တွင် ဆွေးနွေးလျက်ရှိသည့် ကလေးသူငယ် အခွင့်အရေးဆိုင်ရာ ဥပဒေကြမ်းနှင့်ပတ်သက်၍ ဖေဖော်ဝါရီလ ၄ ရက်နေ့ကပြုလုပ်သည့် အစည်းအဝေးတွင် တပ်မတော်သားကိုယ်စားလှယ်ငါးဦးက ဆွေးနွေးခဲ့ရာ အဆိုပါအချက်ကို ထည့်သွင်းဆွေးနွေးခဲ့ကြခြင်းဖြစ်သည်။

လက်ရှိတွင် လက်ထပ်ခြင်းနှင့်ပတ်သက်၍ တည်ဆဲဓလေ့ထုံးတမ်း ဥပဒေများရှိနေပြီး အဆိုပါ ဓလေ့ထုံးတမ်းဥပဒေများအရဆိုလျှင် အသက် ၁၈ နှစ်မပြည့်ဘဲလည်း လက်ထပ်နိုင်မည်ဖြစ်သည်။ ယခုရေးဆွဲပြဋ္ဌာန်းရန် ဆွေးနွေးလျက်ရှိသည့် ကလေးသူငယ်အခွင့်အရေးဆိုင်ရာဥပဒေကြမ်းတွင် ၁၈ နှစ်ပြည့်မှ လက်ထပ်ခွင့်ရှိရန် အချက်နှင့်ပတ်သက်၍ ထည့်သွင်း ပြဋ္ဌာန်းလိုသူများရှိနေပြီး အခြားတစ်ဖက်တွင် ဓလေ့ထုံးတမ်းဥပဒေများနှင့် ကွဲလွဲနေမည့် အရေးကြောင့် ယင်းအချက်ကို မထည့်သွင်းရန် လိုလားသူများလည်း ရှိနေသည်။

တကောင်းနီကယ်ထုတ်လုပ်ရေး မူလစာချုပ်ကို ပြန်သုံးသပ်မည်

စစ်ကိုင်းတိုင်းဒေကြီး၊ ထီးချိုင့်မြို့နယ်ရှိ တကောင်းနီကယ် ထုတ်လုပ်ရေးစီမံကိန်းနှင့် ပတ်သက်၍ အကျိုးတူစာချုပ်ချုပ်ဆိုထားသည့်  Myanmar CNMC Nickel ကုမ္ပဏီနှင့် စာချုပ်ကို ပြန်လည်ဆန်းစစ်သုံးသပ်သွားမည်ဟု သယံဇာတနှင့်သဘာဝန်ပတ်ဝန်းကျင်ထိန်းသိမ်းရေး  ဝန်ကြီးဌာနဒုတိယဝန်ကြီးက ပြောဆိုလိုက်သည်။

အရှုံးပေါ်နေသည့် တကောင်းနီကယ်သတ္တုသိုက် တူးဖော်ထုတ်လုပ်မှုနှင့်ပတ်သက်၍ စက်ရုံကို ရပ်ဆိုင်းရန် အစီအစဉ်ရှိ၊ မရှိကို ကရင်ပြည်နယ်၊ မဲဆန္ဒနယ်အမှတ် (၁) ကိုယ်စားလှယ် ဦးစောမိုးမြင့် (ခ) ဆင်မြူရယ်က မေးမြန်းခဲ့မှုကို ဒုတိယဝန်ကြီးက ဖေဖော်ဝါရီလ၇ ရက်နေ့က ပြန်လည်ဖြေဆိုရာတွင် ထည့်သွင်းပြောဆိုခဲ့ခြင်းဖြစ်သည်။

လတ်တလောတွင်မူ စက်ရုံကို ဆက်လက်လည်ပတ်ကာ ထုတ်လုပ်မှုကုန်ကျစရိတ်၊ နှစ်စဉ်တူးဖော်ရရှိသည့် သတ္တုရိုင်းပမာဏစသည့် အချက်အလက်များကို စိစစ်ကာ ကုမ္ပဏီနှင့် ပေါင်းစပ်ဆွေးနွေး၍ စာချုပ်ကို ပြန်လည်သုံးသပ်သွားမည်ဟု ဆိုသည်။

တရားသူကြီးများ ကျမ်းကျိန်ရတော့မည်

တရားခွင်အမှုအခင်းများကို အဆုံးအဖြတ်ပေးကြရသည့် တရား သူကြီးများအနေနှင့်လည်း အမှုသည်များနည်းတူ ကျမ်းသစ္စာကျိန်ဆိုရမည့် အဆိုကို အမျိုးသားလွှတ်တော်က အတည်ပြုလိုက်ပြီဖြစ်သည်။

တရားသူများကျမ်းသစ္စာကျိန်ဆိုရေးနှင့် ပတ်သက်၍ ဧရာဝတီတိုင်း ဒေသကြီး၊ မဲဆန္ဒနယ် အမှတ် (၁) ကိုယ်စားလှယ် ဦးစိုးမိုးက ပြီးခဲ့သည့် ဇန်နဝါရီလအတွင်းက အဆိုတင်သွင်းခဲ့ခြင်းဖြစ်ပြီး ဖေဖော်ဝါရီလ ၈ ရက်နေ့က ပြုလုပ်သည့်အစည်းအဝေးတွင် ဆွေးနွေးမှုများပြီးပြတ်ခဲ့ရာ လွှတ်တော်က မဲခွဲဆုံးဖြတ်ရာ ထောက်ခံသူအများဖြင့် အတည်ပြုလိုက်ခြင်းဖြစ်သည်။

ယခုကိစ္စသည် ပြည်သူများယုံကြည်ကိုးစား၊ အားထားပြီး ဖြောင့်မတ်မှန်ကန်မျှတသည့် တရားစီရင်ရေး ဖြစ်ထွန်းစေရန်အတွက် ဖြစ်သည်ဟု အဆိုရှင်က ဆိုသည်။

လျှပ်စစ်ကိစ္စ ပြည်သူများဝန်ထုပ်ဝန်ပိုးလျှော့ချရေးအဆို လွှတ်တော်လက်ခံ

လျှပ်စစ်ဓာတ်အားသွယ်တန်းရာတွင် ပြည်သူများအနေနှင့် လျှပ်စစ် မီးလင်းရေးကော်မတီများသို့ ရင်းနှီးငွေထည့်ဝင်နေရသည်တို့မှ ရှောင်ဖယ်ရန် အဆိုက ဖေဖော်ဝါရီလ ၈ ရက်နေ့တွင် ပြုလုပ်သည့် ပြည်သူ့လွှတ်တော် အစည်းအဝေးက လက်ခံလိုက်သည်။

ယင်းအဆိုကို မွန်ပြည်နယ်၊ သံဖြူဇရပ်မဲဆန္ဒနယ်မှ ကိုယ်စားလှယ်ဦးဉာဏ်ဟိန်းက တင်သွင်းခဲ့ခြင်းဖြစ်ပြီး အစိုးရအနေနှင့် နောင်လာမည့် လျှပ်စစ်ဖြန့်ဖြူးရေးများတွင် သင့်တင့်သည့် ဈေးနှုန်းသက်မှတ်ပေးကာ အများပိုင်ကုမ္ပဏီများ၏ ရင်းနှီးမြှုပ်နှံမှုဖြင့် ဖြန့်ဖြူးသည့် စနစ်ကို အသုံးပြုရန် အဆိုက တိုက်တွန်းထားခြင်းဖြစ်သည်။ အဆိုနှင့် ပတ်သက်၍ လာမည့်  အစည်းအဝေးများတွင် ဆွေးနွေးကြမည်ဖြစ်သည်။

You may also like...

Leave a Reply

Your email address will not be published. Required fields are marked *