လက်နက်ကိုင်တို့အတွက် Facebook ပြစ်ဒဏ်

ယခုတစ်ကြိမ်တွင် တိုင်းရင်းသားလက်နက်ကိုင်အဖွဲ့ လေးဖွဲ့ကို Facebook က ဒဏ်ခတ်လိုက်သည်။

မြန်မာ့တပ်မတော်နှင့် သက်ဆိုင်သည့် Facebook စာမျက်နှာများ၊ အမျိုးသားရေး ဝါဒီများ၏ Facebook အကောင့်များကို အမေရိကန်အခြေစိုက် လူမှုကွန်ရက်ကုမ္ပဏီဖြစ်သည့် Facebook က ဖယ်ရှားပြီးနောက် တိုင်းရင်းသားလက်နက်ကိုင်များ၏ အလှည့်ရောက်လာခြင်းဖြစ်သည်။

မြန်မာပြည်မြောက်ပိုင်း မဟာမိတ်အဖွဲ့ဝင် တိုင်းရင်းသားလက်နက်ကိုင်လေးဖွဲ့ဖြစ်သည့် ရခိုင်လက်နက်ကိုင်အဖွဲ့ AA၊ ကချင်လက်နက်ကိုင်အဖွဲ့ KIA၊ တအန်းလက်နက်ကိုင်အဖွဲ့ TNLA နှင့် ကိုးကန့်လက်နက်ကိုင်အဖွဲ့ MNDAA တို့အား ဖယ်ရှားလိုက်ကြောင်းကို ဖေဖော်ဝါရီလ ၅ ရက်တွင် ကြေညာလိုက်ခြင်းလည်းဖြစ်သည်။

ယင်းအဖွဲ့များသည် အန္တရာယ်ရှိသောအဖွဲ့အစည်းများဖြစ်နေပြီး အရပ်သားများအပေါ် တိုက်ခိုက်မှုများအတွက် တာဝန်ရှိသောကြောင့် ဖယ်ရှားရခြင်းဖြစ်ကြောင်း Facebook က ကြေညာထားသည်။

ယင်းသို့ ဖယ်ရှားလိုက်ခြင်းအပေါ် ဖယ်ရှားခံရသည့် လက်နက်ကိုင်အဖွဲ့က တရားမျှတမှုမရှိဟု ပြောဆိုထားပြီး လွတ်လပ်စွာ ထုတ်ဖော်ပြောဆိုခွင့် တက်ကြွလှုပ်ရှားသူအချို့ကလည်း လုပ်နည်းလုပ်ဟန်လွဲမှားနေကြောင်း ဝေဖန်ထားကြသည်။

တပ်မတော်နှင့် တိုင်းရင်းသားလက်နက်ကိုင်များ၏ Facebook အကောင့်နှင့် စာမျက်နှာများကို ပိတ်လိုက်ခြင်းမှာ အခြားတစ်ဖက်တွင် ပြည်သူများအတွက် သတင်းအချက်အလက်သိပိုင်ခွင့် ဆုံးရှုံးကြောင်း ရှုမြင်သူများရှိပြီး ယင်းသို့ ပိတ်လိုက်ခြင်းဖြင့် အမုန်းစကားများ ရပ်တန့်မည်မဟုတ်ဟုလည်း ရှုမြင်သူများရှိသည်။

“တပ် ဘာလုပ်နေလဲ၊ တိုင်းရင်းသားလက်နက်ကိုင်တွေ ဘာလုပ်နေလဲဆိုတာတွေ ပြည်သူက မသိနိုင်တော့ဘူး။ တစ်ဖက်မှာလည်း အမုန်းစကားကိုတားဆီးရင်းနဲ့ လွတ်လပ်စွာထုတ်ဖော်ပြောဆိုခွင့်တွေ၊ သတင်းအချက်အလက် ရယူပိုင်ခွင့်တွေ ထိခိုက်လာနိုင်တာတော့ မြင်သာတယ်” ဟု လွတ်လပ်စွာ ထုတ်ဖော်ပြောဆိုခွင့် တက်ကြွလှုပ်ရှားသည့် အသံအဖွဲ့၏ အမှုဆောင်ဒါရိုက်တာ ကဗျာဆရာ မောင်ဆောင်းခက ပြောဆိုသည်။

အကောင့်များ ဖယ်ရှားခံရခြင်း

Facebook က မြန်မာနိုင်ငံက အကောင့်နှင့် စာမျက်နှာများ ပိတ်ပင်ခြင်းကို ပြီးခဲ့သည့်နှစ်လယ်ပိုင်းမှ စတင်ကာ ဆက်တိုက်ဆိုသလို ဆောင်ရွက်လာခြင်းလည်းဖြစ်သည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်၏ Facebook စာမျက်နှာအပါအဝင် တပ်မတော်နှင့် သက်ဆိုင်သည့် စာမျက်နှာများ၊ ဦးဝီရသူနှင့် အမျိုးသားရေး တက်ကြွလှုပ်ရှားသူအချို့၏ အကောင့်နှင့် စာမျက်နှာများကို Facebook ကုမ္ပဏီက ၂၀၁၈ ခုနှစ် ဩဂုတ်လတွင် ဖယ်ရှားခဲ့သေးသည်။

တပ်မတော်နှင့် ဆက်စပ်သည့် အကောင့်များဖယ်ရှားမှုမှာ ဘင်္ဂလားဒေ့ရ်ှနိုင်ငံဘက်သို့ ထွက်ပြေးသွားသည့် ဘင်္ဂါလီဒုက္ခသည်အကျပ်အတည်းနှင့် သက်ဆိုင်ပြီး ဘင်္ဂါလီများအပေါ် ကျူးလွန်သည့် ရာဇဝတ်မှုများအတွက် တာဝန်ရှိသည်ဟု ဆိုကာ ဖယ်ရှားလိုက်ခြင်းဖြစ်သည်။

Facebook ပေးသည့်အပြစ်ဒဏ်အတွက် ယခုအလှည့်ကျလာသူများမှာ မြောက်ပိုင်းမဟာမိတ်လက်နက်ကိုင်အဖွဲ့များဖြစ်သည်။

ဖယ်ရှားခံရသော စာမျက်နှာများတွင် လက်နက်ကိုင်လေးဖွဲ့၏ စာမျက်နှာများအပြင် ‘ဝ’ လက်နက်ကိုင်အဖွဲ့ (UWSA) ပါဝင်သော မြောက်ပိုင်းလက်နက်ကိုင်အဖွဲ့များကို ကိုယ်စားပြုကာ နိုင်ငံရေးဆွေးနွေးမည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) ၏ စာမျက်နှာလည်း ပါဝင်သွားသည်။

ပိတ်ပင်ခံရသောအကောင့်နှင့် စာမျက်နှာများကို ထောက်ခံအားပေးသူများ၏ အကောင့်များကိုလည်း ပိတ်ပင်သွားမည်ဖြစ်ကြောင်း Facebook က ကြေညာထားသည်။

မြန်မာနိုင်ငံတွင် လူမျိုးစုအခြေခံကာ ဖြစ်ပွားနေသော ပဋိပက္ခများသည် တုန်လှုပ်ဖွယ်ရာဖြစ်ပြီး အမုန်းစကားဖြန့်ခြင်း၊ အကြမ်းဖက်ရန် လှုံ့ဆော်ခြင်းနှင့် မြေပြင်အခြေအနေတင်းမာစေရန် ဆောင်ရွက်ခြင်းများအတွက် Facebook ကို အသုံးချနေမှုများကို လက်မခံနိုင်ကြောင်း Facebook ၏ထုတ်ပြန်ချက်အရ သိရသည်။

သို့သော် Facebook ၏ထုတ်ပြန်ချက်တွင် မြောက်ပိုင်းလက်နက်ကိုင်လေးဖွဲ့နှင့် ဆက်စပ်သောအကောင့်နှင့် စာမျက်နှာများကို မည်ကဲ့သို့သော ဖြစ်ရပ်များကြောင့် ပိတ်ပင်ရသည်ဟူသော တိကျသည့်အကြောင်းပြချက်များ မပါဝင်ပေ။

ရခိုင်လက်နက်ကိုင်အဖွဲ့ (AA) ၏ ပြောရေးဆိုခွင့်ရှိသူ ဦးခိုင်သုခကမူ Facebook ၏ လုပ်ရပ်သည် ပြည်သူများကို ဖိနှိပ်သော အစိုးရ၏လုပ်ဆောင်ချက်ကို အထောက်အပံ့ပေးလိုက်ခြင်းပင်ဖြစ်ကြောင်း The Voice Journal သို့ ပြောကြားသည်။

“သူတို့ရဲ့သုံးသပ်ချက်ကတော့ အန္တရာယ်ရှိတဲ့အဖွဲ့အစည်းတွေ အဲဒီလိုရေးထားတာတွေ့တယ်။ သူတို့ ဘယ်အပေါ်မှာ အခြေခံပြီးပြောထားသလဲဆိုတာကတော့ ကျွန်တော်တို့လည်း နားမလည်ဘူး” ဟု ၎င်းက ဆိုသည်။

တိုင်းရင်သားလက်နက်ကိုင်အဖွဲ့များ၏ Facebook စာမျက်နှာနှင့် အကောင့်များသည် အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်ရရှိရေးအတွက် လှုပ်ရှားနေသော ဆောင်ရွက်ချက်များကို အများပြည်သူသိရှိစေရန် ဖွင့်ထားခြင်းဖြစ်ပြီး အမုန်းစကားဖြန့်နေခြင်း မဟုတ်ကြောင်း ဦးခိုင်သုခက တုံ့ပြန်သည်။

သတင်းသိပိုင်ခွင့် ဆုံးရှုံးစေသလော

အကောင့်တုများဖြင့် အမုန်းစကားများ ကျယ်ကျယ်ပြန့်ပြန့် ဖြန့်ဝေနေကြချိန် အဖွဲ့အစည်းအမည်ဖြင့် ဖွင့်ထားသည့် စာမျက်နှာများ ပိတ်ခံရခြင်းအပေါ် ဝေဖန်မှုများရှိသည်။ ထိုအဖွဲ့များနှင့် သက်ဆိုင်သည့် သတင်းအချက်အလက်ကို ပြည်သူများ မရတော့မည်ကို စိုးရိမ်ကြခြင်းဖြစ်သည်။

Facebook သုံးစွဲသူ သန်း ၂၀ ကျော်ရှိသည့် မြန်မာနိုင်ငံတွင် Facebook ပေါ်၌ ပဋိပက္ခဖြစ်စေသော အမုန်းစကားပြောဆိုမှုများ ကျယ်ကျယ်ပြန့်ပြန့်ရှိနေကြောင်း ကဗျာဆရာမောင်ဆောင်းခက ပြောဆိုသည်။

Facebook တွင် ပြောဆိုနေသည့် အမုန်းစကားများသည် မတူညီသောအုပ်စုများအသီးသီးမှ ပြောဆိုဖြန့်ချိနေကြခြင်းဖြစ်ပြီး အကောင့်များကို ပယ်ဖျက်ခံရသော်လည်း အကောင့်အသစ်ပြန်ဖွင့်ကာ ပြောဆိုနေမှုများလည်း ရှိနေကြောင်း ၎င်းက ဆိုသည်။

အမုန်းတရား ပြန့်ပွားစေသည်ဟုဆိုကာ တပ်မတော်၊ တိုင်းရင်းသားလက်နက်ကိုင်အဖွဲ့ကဲ့သို့ အဖွဲ့အစည်းအမည်ဖြင့် ဖွင့်လှစ်ထားသည့်အကောင့်နှင့် စာမျက်နှာများအား လုံးဝပိတ်သိမ်းလိုက်ခြင်းကို သဘောမတူကြောင်း ကဗျာဆရာ မောင်ဆောင်းခက ပြောဆိုသည်။

အကောင့်နှင့် စာမျက်နှာများကို လုံးဝပိတ်သိမ်းလိုက်ခြင်းထက် မည်သည့်အရေးအသားပြောဆိုမှုသည် အမုန်းစကားပြန့်ပွားစေသည်ဟု သက်သေပြကာ သတိပေးခြင်း၊ ပိုစ့်တစ်ခုချင်းစီကိုဖယ်ရှားခြင်းများသာ လုပ်သင့်ကြောင်း ကဗျာဆရာ မောင်ဆောင်းခက ပြောသည်။

ထိုသို့ဆောင်ရွက်ပေးရန်လည်း ၂၀၁၈ ခုနှစ်အတွင်း Facebook ကုမ္ပဏီကိုယ်စားလှယ်များနှင့် ရန်ကုန်မြို့၌ တွေ့ဆုံချိန်တွင် တိုက်တွန်းပြောဆိုခဲ့ဖူးကြောင်း ၎င်းက ဆိုသည်။

“အဲဒီတုန်းကတော့ သူတို့က ပြောသမျှနားထောင်တာပဲ။ ပြီးမှသာ သူတို့လုပ်ချင်သလို လုပ်ကြတာ။ တကယ်လို့ ပိတ်မယ်ဆိုလည်း ဘယ်ပို့စ်၊ ဘယ်အကြောင်းကြောင့်ပိတ်တယ်ဆိုတာကို ပိုပြီးရှင်းရှင်းလင်းလင်း ဖြစ်စေချင်တယ်” ဟု ကဗျာဆရာမောင်ဆောင်းခက မှတ်ချက်ပေးသည်။

လွတ်လပ်စွာထုတ်ဖော်ပြောဆိုခွင့် တက်ကြွလှုပ်ရှားသည့် ညီမျှခြင်းမြန်မာ၏ အမှုဆောင်ဒါရိုက်တာဖြစ်သူ ဦးအောင်မျိုးမင်းကလည်း ပဋိပက္ခဖြစ်စေသည့် အမုန်းစကားများဖြစ်ပေါ်နေမှုကို တားဆီးရန် အကောင့်များဖယ်ရှားခြင်းကို ထောက်ခံသော်လည်း သတင်းသိပိုင်ခွင့်အပေါ် ပိတ်ပင်မှုကို လက်မခံကြောင်း ပြောဆိုသည်။

“မုန်းတီးမှုကို တားတယ်ဆိုပြီး သတင်းတွေကိုတားတာတော့ ဘယ်လိုမှ မဖြစ်သင့်ဘူး။ တစ်ခုကို ကာကွယ်ပြီး တခြားအခြေခံအခွင့်အရေးတစ်ခုကို ထိခိုက်တာဖြစ်တဲ့အတွက် အထူးသတိထားသင့်ပါတယ်” ဟု ၎င်းက မှတ်ချက်ပေးသည်။

Facebook ၏ အကောင့်များနှင့် စာမျက်နှာများဖယ်ရှားမှုသည် အမုန်းစကားများကို အခြေခံကာ ပဋိပက္ခဖြစ်ပေါ်စေရန် အားထုတ်မှုကို တားဆီးနေသည်ဟု အကြောင်းပြထားသော်လည်း အခြားတစ်ဖက်တွင် လွတ်လပ်စွာထုတ်ဖော်ပြောဆိုခွင့်ကို ကန့်သတ်ရာရောက်နေကြောင်း ၎င်းက ဆက်လက်ပြောဆိုသည်။

စစ်ရေးလေ့လာသုံးသပ်သည့် သေနင်္ဂမဟာဗျူဟာလေ့လာရေးအဖွဲ့ အမှုဆောင်ဒါရိုက်တာဖြစ်သူ ဒေါက်တာနိုင်ဆွေဦးကမူ တိုင်းရင်းသားလက်နက်ကိုင်အဖွဲ့များ၏ အကောင့်များ ပိတ်ပင်ခံရမှုမှာ တိုင်းရင်းသားလက်နက်ကိုင်အဖွဲ့များသည် လူထုအပေါ်တွင် ငွေကြေးကောက်ခံမှုနှင့် ထိခိုက်မှုများ ပြုလုပ်နေသဖြင့် ဖြစ်နိုင်ကြောင်း မှတ်ချက်ပေးသည်။

ထိုပြင် AA ကဲ့သို့သော လက်နက်ကိုင်အဖွဲ့သည် ရဲတပ်ဖွဲ့ဝင်များကို တိုက်ခိုက်ခဲ့ပြီး အစိုးရ၏ အကြမ်းဖက်တိုက်ဖျက်ရေးဥပဒေအဖြင့် အမှုဖွင့်ခြင်းလည်းခံထားရသည်ဖြစ်ရာ Facebook က အန္တရာယ်ရှိသောအဖွဲ့အဖြစ်ကြေညာခြင်းသည် မှန်ကန်ကြောင်း ၎င်းက ဆိုသည်။

အမုန်းစကား တားနိုင်သလား

မည်သို့ပင်ဖြစ်စေ တပ်မတော်နှင့်သက်ဆိုင်သောအကောင့်၊ စာမျက်နှာများအပါအဝင် မြောက်ပိုင်းမဟာမိတ်လက်နက်ကိုင်လေးဖွဲ့နှင့် စပ်ဆက်သည့်အကောင့်၊ စာမျက်နှာများမှာ Facebook ၏ ပိတ်ပင်အပြစ်ပေးခြင်းကို ခံလိုက်ရပြီဖြစ်သည်။

The Voice Journal ၏ ၂၀၁၉ ဟောကိန်းတွင် အမုန်းစကားများ၊ သတင်းတုများကို အစိုးရက မည်ကဲ့သို့ကိုင်တွယ်မည်ကို စောင့်ကြည့်နေစဉ်မှာပင် Facebook က ဦးစွာဆောင်ရွက်လိမ့်မည်ဟု ကြိုတင်ဟောကိန်းထုတ်ထားသည့် အတိုင်းပင် ဖြစ်လာခြင်းဖြစ်သည်။

နိုင်ငံတော်အဖွဲ့အစည်းများ၊ ပြင်ပအဖွဲ့အစည်းများကို ဆန်းစစ်လေ့လာမှုများပြုလုပ်ကာ တစ်ဦးတစ်ယောက်ဖြစ်စေ၊ အဖွဲ့အစည်းနှင့်ဖြစ်စေ အကြမ်းဖက်မှု၌ လှုံ့ဆော်ပါဝင်ခြင်းကို တားဆီးပိတ်ပင်မည်ဖြစ်ကြောင်း Facebook က ဖေဖော်ဝါရီလ ၅ ရက်ထုတ်ပြန်ချက်တွင် ဖော်ပြထားသည်။

တပ်မတော်နှင့် တိုင်းရင်းသားလက်နက်ကိုင်အဖွဲ့များ၏ အကောင့်များကို ဖယ်ရှားလိုက်ရုံဖြင့် အမုန်းစကားပြောဆိုမှုများမှာ ရပ်တန့်သွားမည်မဟုတ်ကြောင်း လုံခြုံရေးနှင့် ငြိမ်းချမ်းရေးဆိုင်ရာ မြန်မာအင်စတီကျု (MIPS) ၏ အမှူဆောင် ဒါရိုက်တာ ဒေါက်တာ မင်းဇော်ဦးက ဆိုသည်။

တပ်မတော်နှင့် တိုင်းရင်းသားလက်နက်ကိုင်အဖွဲ့များ၏ အကောင့်၊ စာမျက်နှာများတွင် ၎င်းတို့၏ ရပ်တည်ချက်နှင့်ပတ်သက်သော ဝါဒဖြန့်ချိမှုများ ရှိနေသော်လည်း အမုန်းစကားများကို ဖြန့်ဝေနေခြင်းမျိုး မရှိကြောင်း ၎င်းက ဆိုသည်။

ဒေါက်တာ နိုင်ဆွေဦးကမူ Facebook သည် မြန်မာနိုင်ငံတွင် ဖြစ်ပေါ်နေသော လူမှုကွန်ရက်ရှိ အမုန်းစကားပြောဆိုမှုများကို ထိန်းချုပ်မည်ဟု အမေရိကန်လွှတ်တော်တွင် ကတိပေးထားရာ ၎င်းတို့ကတိအတိုင်း အလုပ်လုပ်ကြောင်း ပြသလိုသဖြင့် အကောင့်များပိတ်ခြင်းကို ဆောင်ရွက်သည်ဟု ယူဆကြောင်း မှတ်ချက်ပေးသည်။

သို့သော်အကောင့်များကို ဖယ်ရှားခြင်းဖြင့် အမုန်းစကားပြောဆိုမှုများမှာ ရပ်တန့်သွားခြင်းမရှိဘဲ အမုန်းစကားပြောဆိုနေသည့် အချို့သောအကောင့်များမှာ ပြောဆိုနေကြဆဲဖြစ်ကြောင်း ၎င်းက ထောက်ပြသည်။

ထိုပြင် အမုန်းစကားပြောဆိုခြင်း မရှိသူများကိုလည်း Facebook က အကောင့်ဖယ်ရှားခြင်းများ လုပ်ဆောင်သည်လည်းရှိပြီး ၎င်းကိုယ်တိုင်ပင် လွန်ခဲ့သောခြောက်လခန့်က Facebook အကောင့်အပိတ်ခံခဲ့ရကြောင်း ဒေါက်တာ နိုင်ဆွေဦးက ပြောဆိုသည်။

“ကျွန်တော်ဟာ ကာကွယ်ရေးနဲ့ဆိုင်တဲ့ သုတေသနအဖွဲ့အစည်းတစ်ခုကို ဦးဆောင်နေတဲ့လူဖြစ်ပါတယ်။ ကျွန်တော်တို့က Hate Speech ရေးသားခြင်းလည်းမရှိဘူးဆိုတာကို သူတို့ကို Email ပို့လိုက်တော့ နှစ်ရက်လောက်နေတော့ ပြန်ဖွင့်ပေးတယ်” ၎င်းက ဆိုသည်။

သို့သော်လည်း လူတိုင်း၏ Facebook အကောင့်တစ်ခု စဖွင့်ကတည်းကပင် Facebook ၏ မူဝါဒနှင့် လုပ်ဆောင်ချက်များကို သဘောတူပါမည်ဟု အတည်ပြုမှသာ အကောင့်ဖွင့်သုံးခွင့်ရခြင်းဖြစ်ရာ Facebook ၏ အကောင့်ပိတ်ပင်ခြင်းကို စောဒကတက်ရန် မလွယ်ကြောင်း ၎င်းကပြောသည်။

“အကုန်လိုက်ပိတ်နေရုံနဲ့ တခြားဘက်မှာ ကြိုက်သလိုရေးနေတာတွေကို မပိတ်တာက တရားမျှတမှုဘယ်လိုလဲဆိုတာ မေးခွန်းထုတ်စရာရှိပါတယ်” ဟု ၎င်းက ပြောကြားသည်။

ယခင်ကဆိုလျှင် ဘင်္ဂါလီအကြမ်းဖက်တိုက်ခိုက်မှုကို ကိုင်တွယ်ဖြေရှင်းရသည့် တပ်မတော်၊ ဘင်္ဂါလီအရေးနှင့်ပတ်သက်၍ အမုန်းစကားဖြန့်ဝေသူများကိုသာ Facebook က ဒဏ်ခတ်ခဲ့သည်။ ယခုတစ်ကြိမ်တွင် တိုင်းရင်းသားလက်နက်ကိုင်များကိုပါ ဒဏ်ခတ်လာသည်။ Facebook သည် ၂၀၁၈ ခုနှစ် အောက်တိုဘာလအထိ စာမျက်နှာနှင့် အကောင့်ပေါင်း ရှစ်ရာကျော်ကို ဖယ်ရှားခဲ့သည်။.

အဖွဲ့အစည်းအမည်ဖြင့်အသုံးပြုနေသည့်အကောင့်များ၊ စာမျက်နှာများကို Facebook က ဖယ်ရှားလိုက်ခြင်းဖြင့် ဖြစ်ပေါ်လာနိုင်သောအကျိုးဆက်နှင့် ပတ်သက်၍ ဒေါက်တာမင်းဇော်ဦးက ယခုကဲ့သို့ မှတ်ချတ်ပေးသည်။

“အဲဒီလိုလုပ်လိုက်ခြင်းအားဖြင့် အကောင့်အတုတွေပေါ်လာမယ်။ တချို့အကောင့်တွေကျရင် စည်းမဲ့ကမ်းမဲ့ရေးတာတွေ ပိုများလာတာပေါ့။ အဖွဲ့အစည်းတွေက နာမည်တွေရေးထားတော့ ထိန်းပြော၊ ထိန်းရေးရတာပေါ့။ အကောင့်တုတွေကျတော့ ပြောချင်တိုင်းပြော၊ ဆဲချင်တိုင်းဆဲတာတွေ ဖြစ်လာတာပေါ့”

ဇင်လင်းထက်

You may also like...

Leave a Reply

Your email address will not be published. Required fields are marked *