နှစ်ဘီလီယံတန် စည်ပင်ရွေးကောက်ပွဲ ဒွိဟများ

ဓာတ်ပုံ - မိုးကျော်လွင်

ရန်ကုန်စည်ပင်ရွေးကောက်ပွဲကို မတ်လ ၃၁ ရက်တွင် ကျင်းပမည်ဖြစ်သည်။

အလှမယ်ထက်ထက်ထွန်းနှင့် အခြားသောလူငယ်များ၊ စီးပွားရေး လုပ်ငန်းရှင်များနှင့် တက်ကြွလှုပ်ရှားသူများ အပြင် လူရွှင်တော်များလည်း ရန်ကုန် စည်ပင်ရွေးကောက်ပွဲတွင် ဝင်ရောက်ယှဉ်ပြိုင်ကြမည်ဖြစ်သည်။

အသက် ၁၈ နှစ်ပြည့်သူတိုင်း ဆန္ဒမဲပေးပိုင်ခွင့်ရရှိမည့် ပထမဦးဆုံးသော စည်ပင်ရွေးကောက်ပွဲလည်း ဖြစ်သည်။ သမ္မတဦးသိန်းစိန်လက်ထက် ရန်ကုန် စည်ပင်ရွေးကောက်ပွဲကမူ တစ်အိမ်ထောင်တစ်မဲသာ ပေးခွင့်ရရှိခဲ့ခြင်းဖြစ်သည်။ ယခုအခါ ထိုသို့မဟုတ်တော့။ လူတစ်ကိုယ် မဲတစ်ပြားပေးခွင့်ရပြီ ဖြစ်သည်။

ရန်ကုန်စည်ပင်ရွေးကောက်ပွဲအတွက် ကိုယ်စားလှယ် ၂၇၇ ဦး စာရင်းသွင်းခဲ့ပြီး အရည်အချင်းမပြည့်၍ ထုတ်ပယ်ခံရသူလေးဦးနှင့် မိမိသဘောဆန္ဒအလျောက် နုတ်ထွက်သူတစ်ဦး စုစုပေါင်း ငါးဦးရှိသည်။ ထို့ကြောင့် ဝင်ရောက်ယှဉ်ပြိုင်သူ ၂၇၂ ဦး ရှိသည်။

အဆိုပါ ၂၇၂ ဦးအနက် ၁၀၅ ဦးကို ရွေးချယ်ရမည်ဖြစ်သည်။

သို့သော်လည်း ပြည်သူ့ငွေကျပ် နှစ်ဘီလီယံ အကုန်ကျခံကျင်းပမည့် ရန်ကုန်စည်ပင်ရွေးကောက်ပွဲတွင် ဒွိဟ ဖြစ်စရာများရှိသည်။

မပြိုင်မီက နိုင်နှင့်သည်

ရန်ကုန်စည်ပင်ရွေးကောက်ပွဲတွင် စည်ပင်ကိုယ်စားလှယ်အတွက် ခြောက်နေရာရွေးချယ်မည်ဖြစ်သည်။

ရန်ကုန်စည်ပင်နယ်နိမိတ်တွင် ၃၃ မြို့နယ်ရှိရာ မြို့နယ်စည်ပင်ဥက္ကဋ္ဌနေရာအတွက် ၃၃ နေရာ၊ စည်ပင်အဖွဲ့ဝင် (၁) အတွက် ၃၃ နေရာ၊ စည်ပင်အဖွဲ့ဝင် (၂) အတွက် ၃၃ နေရာရွေးချယ်မည် ဖြစ်သည်။

ထူခြားသည်မှာ မပြိုင်မီကပင် နိုင်နှင့်သည့် မြို့နယ်များလည်း ရှိနေခြင်း ဖြစ်သည်။

အလိုအလျောက်စည်ပင်ဥက္ကဋ္ဌ

ရန်ကုန်စည်ပင်ရွေးကောက်ပွဲဝင်ရန် သက်ဆိုင်ရာမြို့နယ်တွင် တစ်ဆက်တည်း သုံးနှစ်ဆက်တိုက်နေထိုင်ကာ အသက် ၂၅ နှစ်ပြည့်ပါက ကိုယ်စားလှယ်လောင်းအဖြစ် ဝင်ရောက်ရွေးချယ်ခံနိုင်ကြောင်း စည်ပင်ရွေးကောက်ပွဲနည်းဥပဒေတွင် ပြဋ္ဌာန်းထားသည်။

ရန်ကုန်စည်ပင်ရွေးကောက်ပွဲတွင် YCDC နယ်နိမိတ် ၃၃ မြို့နယ်အတွက် တစ်မြို့နယ်တစ်ဦးနှုန်းဖြင့် မြို့နယ်စည်ပင်သာယာ ဥက္ကဋ္ဌ ၃၃ ဦးရွေးချယ်ရမည်ဖြစ်သည်။ ယင်းနေရာအတွက် ဝင်ရောက် ယှဉ်ပြိုင်သူ စုစုပေါင်း ၉၉ ဦး ရှိသည်။

သို့သော်လည်း အချို့သော ပုဂ္ဂိုလ်များသည် ယှဉ်ပြိုင်ရန်မလိုဘဲ အလိုအလျောက်မြို့နယ်စည်ပင်ဥက္ကဋ္ဌ ဖြစ်သွားမည့်သူများဖြစ်သည်။ အကြောင်းမှာ ၎င်းတို့မြို့နယ်တွင် မြို့နယ်စည်ပင် ဥက္ကဋ္ဌ နေရာအတွက် ယှဉ်ပြိုင်သူတစ်ဦးသာရှိသောကြောင့် မြို့နယ်စည်ပင်ဥက္ကဋ္ဌများ အလိုအလျောက်ဖြစ်သွားမည်ဖြစ်သည်။

လသာမြို့နယ်နှင့် အလုံမြို့နယ်သည် မြို့နယ်စည်ပင်ဥက္ကဋ္ဌနေရာအတွက် မပြိုင်မီက နိုင်နှင့်သည့် မြို့နယ်များဖြစ်သည်။ အဆိုပါမြို့နယ်များတွင် ဥက္ကဋ္ဌနေရာအတွက်တစ်ဦးစီသာ ယှဉ်ပြိုင်ကြကြောင်း ရန်ကုန်စည်ပင်ရွေးကောက်ပွဲကော်မရှင်၏ ထုတ်ပြန်ချက်အရသိရသည်။

လသာမြို့နယ် စည်ပင်ဥက္ကဋ္ဌအတွက် ဦးကျော်စိုးအောင်နှင့် အလုံမြို့နယ်စည်ပင်ဥက္ကဋ္ဌနေရာအတွက် ဦးစန်းလွင်တို့က ဝင်ရောက်ယှဉ်ပြိုင်ကြမည်။ ၎င်းတို့သည် NLD ကိုယ်စားပြုဝင်ရောက်ယှဉ်ပြိုင်ကြသူများ ဖြစ်သည်။ ယှဉ်ပြိုင်သူတစ်ဦးစီသာရှိသည့် မြို့နယ်များဖြစ်သောကြောင့် အလိုအလျောက်မြို့နယ် ဥက္ကဋ္ဌများ ဖြစ်ကြသည်။

အလုံဥက္ကဋ္ဌနေရာအတွက် ဝင်ရောက်ယှဉ်ပြိုင်သူ ဦးစန်းလွင်သည် ၂၀၁၄ ခုနှစ် စည်ပင်ရွေးကောက်ပွဲတွင် တစ်သီးပုဂ္ဂလအနေနှင့် ဝင်ရောက်ယှဉ်ပြိုင်ခဲ့ပြီး အနိုင်ရခဲ့သူဖြစ်သည်။ ယခုအခါတွင်မူ NLD ပါတီ နောက်ခံဖြင့် ပါဝင်ယှဉ်ပြိုင်လိုသူ ဖြစ်သည်။

အလိုအလျောက် မြို့နယ်စည်ပင် အဖွဲ့ဝင်(၁)

စည်ပင်ဥက္ကဋ္ဌနေရာကဲ့သို့ပင် မြို့နယ်စည်ပင်အဖွဲ့ဝင် (၁) နေရာအတွက်လည်း မပြိုင်မီကပင် နိုင်နှင့်သူများ ရှိသည်။

YCDC စာရင်းဝင် ၃၃ မြို့နယ် ရှိသောကြောင့် မြို့နယ်စည်ပင်အဖွဲ့ဝင်(၁)အတွက် ၃၃ ဦး ရွေးချယ်မည်ဖြစ်သည်။ ဝင်ရောက်ယှဉ်ပြိုင်သူက ၇၄ ဦး ရှိသည်။ မပြိုင်မီက နိုင်နှင့်သည့် သုံးမြို့နယ်ရှိသည်။

သင်္ဃန်းကျွန်း၊ ဒဂုံမြို့နယ်နှင့် ကြည့်မြင်တိုင်မြို့နယ်တို့တွင် မြို့နယ်စည်ပင်အဖွဲ့ဝင်(၁)နေရာအတွက် တစ်ဦးစီ သာ ယှဉ်ပြိုင်ကြမည်ဖြစ်ရာ ပြိုင်ဘက် မရှိချေ။ ထိုကြောင့် အလိုအလျောက် မြို့နယ်စည်ပင်အဖွဲ့ဝင် (၁) များ ဖြစ်လာကြမည်ဖြစ်သည်။

ဓာတ်ပုံ – မိုးကျော်လွင်

အလိုအလျောက် မြို့နယ်စည်ပင် အဖွဲ့ဝင်(၂)

လာမည့် ရန်ကုန်စည်ပင်ရွေးကောက်ပွဲတွင် မြို့နယ်စည်ပင်အဖွဲ့ဝင် (၂) နေရာ အတွက် ၃၃ ဦး ရွေးချယ်မည်ဖြစ်သည်။ ယင်းနေရာအတွက် ဝင်ရောက်ယှဉ်ပြိုင်သူ ၇၂ ဦး ရှိသည်။

သို့သော်လည်း ပြိုင်ဘက်မရှိသော မြို့နယ်များ သို့တည်းမဟုတ်တစ်ဦးသာ ယှဉ်ပြိုင်သော မြို့နယ်များတွင်မူ အလိုအလျောက် မြို့နယ်စည်ပင်အဖွဲ့ဝင်(၂)များ ထွက်ပေါ်လာမည်ဖြစ်သည်။

ကြည့်မြင်တိုင်၊ ဗဟန်း၊ ရန်ကင်း၊ လသာနှင့် ဒဂုံမြို့သစ်(ဆိပ်ကမ်း) မြို့နယ်ငါးခုတွင်အဖွဲ့(၂) နေရာအတွက် ဝင်ရောက်ယှဉ်ပြိုင်သူတစ်ဦးစီသာရှိသည့်အတွက် မပြိုင်မီကပင် အနိုင်ရနေသည့်သဘောပင်။

“တစ်ဦးတည်းမဲဆန္ဒနယ် ၁၀ နေရာရှိတယ်။ ယှဉ်ပြိုင်စရာ မလိုတော့ဘူး။ နိုင်သွားတဲ့ သဘောပေါ့ ”ဟု ယှဉ်ပြိုင်ခွင့်ရှိသည့် ကိုယ်စားလှယ်လောင်းအမည် စာရင်းထုတ်ပြန်ချက်ကို ကိုးကား၍ ရွေးကောက်ပွဲကော်မရှင်ရုံးအဖွဲ့ဝင် ဦးဇင်မင်းလှိုင်က ဆိုသည်။

တစ်ဘီလီယံတန်မဲပေးခွင့်

မတ်လ ၃၁ ရက်နေ့တွင် ကျင်းပမည့် စည်ပင်ရွေးကောက်ပွဲအတွက် ကျပ်ငွေနှစ်ဘီလီယံသုံးစွဲမည် ဖြစ်သည်။

ရန်ကုန်တိုင်းဒေသကြီးအစိုးရသည် မဲပေးခွင့်ရှိသူအရေအတွက်သိရှိရေး လူဦးရေ စာရင်းကောက်ရန်အတွက် ကျပ်တစ်ဘီလီယံအသုံးပြုကြောင်း စည်ပင်ရွေးကောက်ပွဲကော်မရှင်ဥက္ကဋ္ဌ ဦးအောင်ခိုင်က ဆိုသည်။

ရန်ကုန်စည်ပင်သာယာနယ်နိမိတ် ၃၃ မြို့နယ်တွင် တစ်ဆက်တည်း အနည်းဆုံးတစ်နှစ်နေထိုင်ကာ အသက် ၁၈ နှစ်ပြည့်သူတိုင်း ဆန္ဒမဲပေးနိုင်ကြောင်း စည်ပင်ရွေးကောက်ပွဲနည်းဥပဒေတွင် ပြဋ္ဌာန်းထားသည်။

“တစ်ဘီလျံကတော့ လူဦးရေကောက်တဲ့ စာရင်းမှာ သုံးတယ်။ တိုင်းဒေသကြီးအစိုးရအဖွဲ့နဲ့ အထွေထွေအုပ်ချုပ်ရေးဦးစီးပြီး ဆောင်ရွက်သွားရတာ ဖြစ်တယ်။ ဒီပမာဏအတွင်းမှာပဲ ဆောင်ရွက်ပြီးဖြစ်တယ်လို့ အကြမ်းဖျင်း သိပါတယ်”ဟု ၎င်းက ဆိုသည်။

ကျန်သည့် တစ်ဘီလီယံဖြင့် ရွေးကောက်ပွဲအတွက် လိုအပ်သည့် မဲပုံးနှင့် လိုအပ်သည့် ပစ္စည်းများဝယ်ယူခြင်း၊ ရွေးကောက်ပွဲကို အများပြည်သူသိရှိစေရန် လက်ကမ်းစာစောင်ရိုက်နှိပ်ခြင်း၊ ကြေညာခြင်းနှင့် ရွေးကောက်ပွဲကော်မရှင်တွင် တာဝန်ထမ်းဆောင်သူများအတွက် ချီးမြှင့်ငွေတို့အတွက် သုံးစွဲသည်။

တစ်နည်းဆိုရသော်အသက်၁၈နှစ်ပြည့်သူတိုင်းမဲပေးနိုင်ရေးအတွက်ကျပ်တစ်ဘီလီယံသုံးစွဲခြင်းပင်။

၆၆/၆ ဂယက်

ရန်ကုန်စည်ပင်ရွေးကောက်ပွဲနည်းဥပဒေတွင် အသက် ၁၈ နှစ်ပြည့်ကာ သက်ဆိုင်ရာမြို့နယ်တွင် တစ်နှစ်နေထိုင်သူသည် မဲပေးနိုင်ကြောင်း ပြဋ္ဌာန်းထားသည်။ ဤပုံစံဖြင့်ပင် ရန်ကုန်စည်ပင်ရွေးကောက်ပွဲ မဲပေးခွင့်ရှိသူစာရင်းကို ကောက်ယူခဲ့ခြင်း ဖြစ်သည်။

သို့သော်လည်း ဖေဖော်ဝါရီလ ၇ ရက်တွင် ကျင်းပသည့် ရန်ကုန်တိုင်းလွှတ်တော်အစည်းအဝေးတွင် ယင်းအချက်ကို ပယ်ဖျက်ရန် ရန်ကုန်တိုင်းလွှတ်တော် ဥပဒေကြမ်းကော်မတီက တင်သွင်းခဲ့သည်။

စည်ပင်ရွေးကောက်ပွဲကျင်းပရန် ၅၁ ရက်အလိုတွင် အိမ်ထောင်စုစာရင်းပုံစံ ၆၆/ ၆ ရှိသူသာ ဆန္ဒမဲပေးခွင့်ရှိသည့်အချက် အပါအဝင် မဲပေးခွင့်ပြဋ္ဌာန်းချက် နည်းဥပဒေထဲမှ ပုဒ်မငါးခုကို ပြင်ဆင်ရန် တိုင်းဥပဒေကြမ်းကော်မတီဥက္ကဋ္ဌ ဦးသိန်းမြင့်က လွှတ်တော်သို့ တင်သွင်းခဲ့ခြင်း ဖြစ်သည်။

ဆိုလိုသည်မှာ ပြိုင်ပွဲကျင်းပရန် နီးကပ်ချိန်ကျမှ ပြိုင်ပွဲစည်းမျဉ်းကို ပြန်လည်ရေးဆွဲရန်ပြင်ဆင်ခြင်းပင် ဖြစ်သည်။

ပုဒ်မငါးခုပြင်ဆင်ရန် အဆိုပါတင်ပြမှုကို ရန်ကုန်တိုင်းလွှတ်တော်ဥက္ကဋ္ဌက လက်ခံခဲ့သောကြောင့် တိုင်းလွှတ်တော်တွင် ဆွေးနွေးကာ ပြင်သင့် မသင့် ဆုံးဖြတ်ရမည်။ ရွေးကောက်ပွဲကျင်းပရန် ရက်ပေါင်း ၃၀ ကျော်သာ ကျန်တော့သည့် အချိန်အထိ လွှတ်တော်တွင် ယင်းကိစ္စအတွက် ဆွေးနွေးသံမကြားရသေးချေ။

ရန်ကုန်စည်ပင်ရွေးကောက်ပွဲကော်မရှင်ကမူ ဖေဖော်ဝါရီလ ၂၇ ရက်နေ့တွင် ဆန္ဒမဲပေးပိုင်ခွင့်ရှိသူများ အမည်စာရင်းကို ကြေညာမည်ဟု အဆိုပါကော်မရှင်ဥက္ကဋ္ဌဦးအောင်ခိုင်က ဆိုသည်။

အသံတိတ်ရွေးကောက်ပွဲ

ရွေးကောက်ပွဲသည် ရွေးကောက်ပွဲသာ မဟုတ်။ ပြည်သူ့ရပိုင်ခွင့်လည်း ဖြစ်သကဲ့သို့ ဒီမိုကရေစီသွေးကြောလည်း ဖြစ်သည်။ သို့သော်လည်း နှစ်ဘီလီယံတန် ရန်ကုန်စည်ပင်ရွေးကောက်ပွဲသည်ကား အသံတိတ်လှသည်။

ရန်ကုန်စည်ပင်ရွေးကောက်ပွဲတွင် အလှမယ်ထက်ထက်ထွန်း၊ သီးလေးသီး အငြိမ့်မှ လူရွှင်တော်ဂေါ်ဇီလာ၊ လူငယ်စီးပွားရေးလုပ်ငန်းရှင် ဦးနေလင်းဇင်၊ နာမည်ကြီးဇောတိကဦးခင်လှိုင်၊ အလုပ်ရှာဖွေရေးအေဂျင်စီနွယ်ရိုးကုမ္ပဏီပိုင်ရှင် ဦးကျော်စိုးထွဋ်၊ နာမည်ကြီးတက်ကြွလှုပ်ရှားသူ ဦးဝင်းချိုတို့လည်း ဝင်ရောက်ယှဉ်ပြိုင်မည်ဖြစ်သည်။

ဤမျှ လူသိများသူများ ဝင်ရောက်ယှဉ်ပြိုင်သော်လည်း ပြည်သူများအကြားတွင် ရန်ကုန်စည်ပင် ရွေးကောက်ပွဲအကြောင်း သိပ်မကြားရပေ။ စိတ်ဝင်တစားပြောဆိုမှုလည်း မရှိသေး။

အင်းစိန်မြို့နယ် စည်ပင်သာယာဥက္ကဋ္ဌနေရာအတွက် ဝင်ရောက်ယှဉ်ပြိုင်မည့် သီးလေးသီး ဆေးရောင်စုံအငြိမ့်မှ လူရွှင်တော်ဂေါ်ဇီလာက စည်ပင်ရွေးကောက်ပွဲနှင့် ပတ်သက်၍ ရွေးကောက်ပွဲကော်မရှင်သည် မီဒီယာအပိုင်းတွင် ကြေညာမှုအားနည်းခြင်းကြောင့် ယခုကဲ့သို့ လူစိတ်ဝင်စားမှုနည်းခြင်း ဖြစ်သည်ဟု ဆိုသည်။

“ရွေးကောက်တဲ့ ကိုယ်စားလှယ်တွေက ဖွတာတွေများလို့ ဒီရွေးကောက်ပွဲက နည်းနည်းလေး လှုပ်လာတာ” ဟု ၎င်းက သုံးသပ်သည်။

ရန်ကုန်စည်ပင်ရွေးကောက်ပွဲကော်မရှင်ဥက္ကဋ္ဌ ဦးအောင်ခိုင်က နှစ်ဘီလီယံတန် စည်ပင်ရွေးကောက်ပွဲအပေါ် ပြည်သူစိတ်ဝင်စားမှုနည်း၊ မနည်းကို ရွေးကောက်ပွဲပြီးမှသာ သိနိုင်မည်ဟု မှတ်ချက်ပြုသည်။

သာကေတမြို့နယ် (၂) ရပ်ကွက်တွင် နေထိုင်သူ ဒေါ်ယွန်းစန္ဒီတို့ မိသားစုတွင် စည်ပင်ရွေးကောက်ပွဲအတွက် မဲပေးရန် အသက် ၁၈ နှစ်ပြည့်မီသူ ခုနစ်ဦးရှိသော်လည်း မဲပေးရမည့် ပုံစံကို တိကျစွာမသိဟုဆိုသည်။ ရပ်ကွက်အတွင်း လိုက်လံကြေညာခြင်းလည်း မရှိ။ အခြားသူများ ပြောသံကြားမှသာ ရွေးကောက်ပွဲရှိမှန်း သိရှိခြင်းဖြစ်သည်ဟု ဒေါ်ယွန်းစန္ဒီက ဆိုသည်။

စည်ပင်ရွေးကောက်ပွဲနှင့်ပတ်သက်၍ သူသိသမျှကို ဒေါ်ယွန်းစန္ဒီက ယခုကဲ့သို့ မှတ်ချက်ပြုသည်။

“အလှမယ်ထက်ထက်ထွန်း ပြိုင်တယ်ဆိုတာကလွဲရင် စည်ပင်ရွေးကောက်ပွဲနဲ့ ပတ်သက်ပြီး ကျန်တာ ဘာမှမသိဘူး”

ပို့ပို့

You may also like...

Leave a Reply

Your email address will not be published. Required fields are marked *