ရက်စက်မှုများ မျက်စိရှေ့ရောက်လာခြင်း

ရုပ်ရှင်ထဲတွင်သာ မြင်ရလေ့ရှိသော တုတ်၊ ဓားကိုင်ကာ လူသတ်မှုများကမျက်စိရှေ့တင် ရောက်လာသည်။

ပြီးခဲ့သည့်ရက်ပိုင်းအတွင်းက ဖြစ်ပွားသည့် တောင်ငူတွင် ဇနီးမောင်နှံနှစ်ဦးရိုက်သတ်ခံရမှုအပါအဝင် လူမြင်ကွင်းတွင် သတ်ဖြတ်မှုများ မကြာမကြာဖြစ်ပွားလာသည်။ ယင်းသို့ လူမြင်ကွင်းတွင် ကျူးလွန်လာကြခြင်းမှာ မည်သည့်အကြောင်းအရင်းများကြောင့် ဖြစ်ပါသနည်း။

လူမြင်ကွင်းတွင် ဖြစ်ပွားနေသည့် လူသတ်မှုများတွင်လည်း ပတ်ဝန်းကျင်၏ အကူအညီမရဘဲ အသက်ဆုံးပါးသွားရသူများလည်း ရှိနေပါသည်။ ထို့ကြောင့်ပင် မြန်မာ့လူ့အဖွဲ့အစည်းတွင် ကူညီရိုင်းပင်းမှုအားနည်းလာပြီလောဟုလည်း အချို့က ဝေဖန်ကြသည်။

စိတ်ပညာရှင်ပါမောက္ခအငြိမ်းစားဒေါက်တာခင်မြင့်ကမူ “လူတွေက ကိုယ်နဲ့မဆိုင်ရင် မပတ်သက်လိုတော့ဘူးဆိုတဲ့ လမ်းကြောင်းတွေ များလာတယ်။ မပတ်သက်ရင် ပိုရှင်းတယ်ဆိုတဲ့ သဘော ပိုများနေတယ်”ဟု မှတ်ချက်ပေးသည်။

စိတ်ပညာရှုထောင့်

လူမြင်ကွင်းများတွင် မည်သည့်အတွက်ကြောင့် လူသတ်မှုများဖြစ်နိုင်သနည်း။ စိတ်ပညာအရဆိုလျှင် ကျူးလွန်သူ၏ စိတ်ပိုင်းဆိုင်ရာ၊ ရုပ်ပိုင်းဆိုင်ရာ၊ ငယ်ဘ၀ စသည့်အကြောင်းအရာများကို အားလုံးကို သုံးသပ်မှသာ အဖြေထုတ်နိုင်မည် ဖြစ်ကြောင်း စိတ်ပညာရှင်တစ်ဦးက ပြောဆိုသည်။

လူသတ်သူ၏ ရုပ်ပိုင်းသဏ္ဍာန်၊ အပြင်ပိုင်းမှ ပေါ်လွင်ထားရှားနေသော သွင်ပြင်လက္ခဏာများကို ကြည့်ရမည့်အပြင် ၎င်းနှင့် သက်ဆိုင်သည် အရာအားလုံးကို လေ့လာသုံးသပ်ရန် လိုအပ်ကြောင်း ၎င်းက ဆိုသည်။

ရာဇဝတ်မှုကျူးလွန်သူများကို ယေဘူယျလေ့လာထားချက်အရ မည်သည့် အကြောင်းကြောင့်ဆိုသည်ကို တစ်သမတ်တည်း ပြော၍မရဘဲ ဖြစ်စဉ်ဖြစ်ရပ်အကျိုးအကြောင်းများစွာရှိကြောင်း စိတ်ပညာရှင်များက ဆိုသည်။

ယင်းအပြင် ပတ်ဝန်းကျင်ဆိုင်ရာအခြေအနေ၊ ဇီဝဗေဒဆိုင်ရာ (ဒေါသထွက်ချိန် လူ၏ လှုပ်ရှားမှု၊ ခန္ဓာကိုယ်ထဲက ဓာတ်ပြောင်းလဲမှု) နှင့် လူမှုရေးဆိုင်ရာတို့ကို ကြည့်ရမည်ဖြစ်ကြောင်း စိတ်ပညာကျွမ်းကျင်သူများက ပြောဆိုသည်။

ယင်းအချက်များအပြင် လူသတ်သူများသည် လိုဘမပြည့်သူများ၊ အရှက် အကြောက်တရားနည်းသူများဖြစ်ပြီး ယင်းအပြုအမှုများကို မသိစိတ်ရှိသူများဖြစ်ကြောင်း စိတ်ပညာရှင်အမျိုးသမီးတစ်ဦးက ပြောဆိုသည်။

ထို့အပြင် ရာဇဝတ်မှုကျူးလွန်သူများ၏ နောက်ခံသမိုင်းတွင် ငယ်ရွယ်စဉ်ကလေးဘ၀အတွေ့အကြုံအခြေအနေများလည်း ပါဝင်ကာ မိဘများ၏ နွေးထွေးမှု အောက်တွင် အချစ်ခံရပြီး ကြီးပြင်းခွင့်မရခဲ့သူများ၊ ပတ်ဝန်းကျင်က ပစ်ပယ်ထားသူများမှာ ရာဇဝတ်မှုကျူးလွန်နိုင်ခြေ ပိုမိုများပြားကြောင်း အငြိမ်းစားပါမောက္ခဒေါက်တာခင်မြင့်က ပြောဆိုသည်။

ယင်းသို့ မေတ္တာငတ်မွတ်သူ၊ ပစ်ပယ်ခံ ထားရသူများမှာ လူအများ၏ ဂရုစိုက်ခြင်းကို ခံယူလိုကြသည့်အတွက် ပြစ်မှုကျူးလွန်ကာလူအများ၏ ဂရုစိုက်မှုကို ရယူတတ်ကြကြောင်း ၎င်းက ဆိုသည်။

“မဟုတ်တာ လုပ်တာ ထင်ပေါ်သွားတဲ့ အပေါ်ဝင်တဲ့ စိတ်၊ ဒီလူသတ်မှုကျုးလွန်တဲ့ သူတွေမှာ အဲဒီလို စိတ် ရှိတယ်” ဟု စိတ်ပညာရှင်တစ်ဦးက ဆိုသည်။

လူမှုရေးဆိုင်ရာပြောင်းလဲမှုမှာလည်း ကူညီရိုင်းပင်းမှုအပေါ် သက်ရောက်လာသည်။

ယနေ့ခေတ် ကမ္ဘာပေါ်ရှိ လူအချင်းချင်း ဆက်ဆံရာ လူ့အဖွဲ့အစည်းသည် ယခင်နှင့် ယခု မတူတော့ပေ။ နည်းပညာများကြောင့် လူအချင်းချင်းဆက်ဆံမှု ရုတ်တရက် ပြောင်းလဲသွားသည်။ ဆက်ဆံရေးဆိုင်ရာပြောင်းလဲမှု (Social Change) က အကြီးအကျယ်ဖြစ်နေသည်ဟု စိတ်ပညာရှင်များက ပြောဆိုကြသည်။

လူများ၏အာရုံစိုက်မှုမှာ နည်းပညာသုံးစွဲမှု တစ်နည်းအားဖြင့် Facebook ၊ အခြားအွန်လိုင်းစာမျက်နှာများပေါ်တွင်သာ အာရုံရှိသည်။ ထိုအရာများက လူများအပေါ် လွှမ်းမိုးမှုပိုများလာသည်။ ဆက်ဆံရေး ဆိုင်ရာပြောင်းလဲမှုတွင် လူအများ၏ ယူဆချက်များလည်း ပြောင်းလဲလာပြီး မိမိနှင့် မသက်ဆိုင်လျှင် မဆိုင်သလိုနေသည့် အလေ့အထဖြစ်လာကြောင်း စိတ်ပညာရှင်အချို့က ထောက်ပြသည်။

ရန်ကုန်မြို့လူမှုဝန်းကျင်တွင် အိမ်တစ်အိမ်တွင် ရန်ဖြစ်နေပါက အိမ်နီးချင်းများက ကူညီဖြန်ဖြေခြင်းမရှိသည့် ဆက်ဆံရေးမျိုးဖြစ်သည်။

“ဟိုဘက်အိမ်က တစ်ခုခုဖြစ်ရင်တောင် ဒီဘက်အိမ်က ဘာမှမသိဘူး။ ရန်ဖြစ်တယ် ဝင်မဆွဲဘူး။ မပတ်သက်ဘူး” ဟု စိတ်ပညာရှင်တစ်ဦးက ပြောဆိုသည်။

ပဲခူးတိုင်းဒေသကြီး တောင်ငူမြို့နယ် ကေတုမတီမြို့သစ်မြို့တွင်း လူမြင်ကွင်းတွင် ဇနီးမောင်နှံနှစ်ဦးကို ရိုက်သတ်ခဲ့သည့် နှစ်လောင်းပြိုင်လူသတ်မှု ဖေဖော်ဝါရီလ ၂၁ ရက်က ဖြစ်ပွားခဲ့သည်။ ယင်းဖြစ်ရပ်တွင်လည်း ပတ်ဝန်းကျင်၏ အကူအညီမရသဖြင့် ဇနီးမောင်နှံနှစ်ဦး အသက်ဆုံးပါး သွားရခြင်းဖြစ်သည်။

သေဆုံးသူနှစ်ဦးသည် မြေဂရန်သက်တမ်းတိုးရန်အတွက် ရန်ကုန်မှ တောင်ငူသို့ သွားရောက်ခဲ့ခြင်းဖြစ်ပြီး ဂရန်မိတ္တူနှင့် မှတ်ပုံတင်မိတ္တူသွားတောင်းရာမှ စကားအချေအတင်ဖြစ်ကာ သားအဖနှစ်ဦးက လမ်းမီးတိုင်က ကြွေသီးဖြင့် မသေမချင်းရိုက်နှက်သတ်ဖြတ်ခဲ့ကြခြင်း ဖြစ်သည်။ ယင်းဖြစ်ရပ်အနီးတွင် ပတ်ဝန်းကျင်မှ လူအချို့ရှိနေသော်လည်း မည်သူမျှထိထိရောက်ရောက်ဝင်ရောက် မတားဆီးခဲ့ပေ။

ယင်းသို့ အခြေအနေမျိုးတွင် အမျိုးသားအချို့က ဝင်ရောက်ကူညီရန်ဆော်ဩသဖြင့်ပတ်ဝန်းကျင်က ပါဝင် လာလျှင်ဖြစ်စေ၊ လူသတ်မှုကို ကျူးလွန်နိုင်သည့် လက်နက်တစ်စုံတစ်ရာ ယင်းနေရာတွင် မရှိလျှင်ဖြစ်စေ အခြေအနေတစ်မျိုး ပြောင်းသွားနိုင်ကြောင်း စိတ်ပညာရှင်အချို့က ထောက်ပြသည်။

ဥပဒေအကြံပေးဖြစ်သူ ဦးခင်မောင်မြင့် ကမူ “တောင်ငူဖြစ်စဉ်မျိုးတွေမှာဆိုရင် လူတွေက အသိလွတ်သလိုကို ဖြစ်သွားတာ။ လူတွေက သာမန်အချိန်တွေမှာ အသိနဲ့ သတိကို ထိန်းချုပ်နိုင်ပေမယ့် ဒေါသကြောင့်၊ မူးယစ်ဆေးဝါးကြောင့်၊ တစ်ခုခုကြောင့် အသိစိတ်လွတ်သွားပြီဆိုရင် သူရဲ့အသိစိတ်က ထိန်းချုပ်မှုအောက်မှာ မရှိတော့တဲ့အတွက် ပိုပြီးတော့ ရက်စက်သွားတယ်။ အဲလိုအခြေအနေမျိုးတစ်ခု ရှိတယ်”ဟု သုံးသပ်သည်။

ရဲလုပ်ငန်း လျော့ရဲမှုကြောင့်လော

တောင်ငူကနှစ်လောင်းပြိုင်လူသတ်မှုမှာကဲ့သို့ပင် လူမြင်ကွင်းတွင် သတ်ဖြတ်သည့် ရာဇဝတ်မှုများစွာရှိသည်။ လူမိုက်ဂိုဏ်းဆန်ဆန်အုပ်စုဖွဲ့ တိုက်ခိုက်မှုများမှာလည်း ပါဝင်သည်။ ရန်ကုန်တွင်ဆိုလျှင် လူမြင်ကွင်းတွင် ကျူးလွန်သည့် ရာဇဝတ်မှုများ မကြာမကြာတွေ့ရသည်။

တာမွေမြို့နယ် တာမွေဈေးရှေ့တွင် ၂၀၁၈ ခုနှစ် စက်တင်ဘာလ ၁၁ ရက်နေ့ ည ၁၀ နာရီခန့်က မိသားစုတစ်စုကို လူတစ်စုက တုတ်၊ဓားများဖြင့် တိုက်ခိုက်ကြရာ လူတစ်ဦးသေဆုံးခဲ့သည်။ ယင်းဖြစ်စဉ်တွင်ဆိုလျှင် လူအုပ်စုက တုတ်၊ဓားများ ကိုင်ကာ တိုက်ခိုက်ခြင်းကြောင့် မည်သူမျှ ဝင်မဟန့်တားရဲကြောင်း အခင်းဖြစ်နေရာအနီးတွင် နေထိုင်သူ ဦးမျိုးအောင်စိုးက ဆိုသည်။

အဆိုပါဖြစ်စဉ်မှာ ကျိုက္ကဆံလမ်းရှိ ကလေးကစားသည့် ဂိမ်းဆိုင်မှ စတင်ကာ ဖြစ်ပွားခဲ့ခြင်းဖြစ်သည်။ ကလေးချင်းစကားများရာမှ သာကေတလူမိုက်ဟု နာမည်ကြီးနေသည့် ဝင်းထွဋ်ဝင်းဆိုသူက ဦးကြည်ဝင်းဆိုသူနှင့် စကားများပြီး ဦးကြည်ဝင်းတို့ မိသားစုတိုက်ခိုက်ခံရခြင်း ဖြစ်သည်။

လူ ၂၀ ကျော် ဓား၊ လှံများ ကိုင်ဆောင်ကာ လာရောက်ခုတ်သတ်ခဲ့ခြင်းကြောင့် ဦးကြည်ဝင်းနှင့် ၎င်းတို့ အိမ်အလုပ်သမားတစ်ဦးမှာ ဒဏ်ရာရပြီး ၎င်း၏ သမက်ဖြစ်သူမှာ ဓားဒဏ်ရာများဖြင့် သေဆုံးခဲ့သည်။

“တုတ်တွေ၊ ဓားတွေ ရန်ပွဲတွေ ဖြစ်လာတယ်ဆိုရင်တော့ ပြည်သူလူထု အနေနဲ့ ဝင်မဆွဲသင့်ဘူး။ သက်ဆိုင်ရာအုပ်ချုပ်ရေးမှူးရုံးတို့၊ ရဲစခန်းတို့ကိုသာ အကြောင်းကြားလိုက်တာ အကောင်းဆုံး ပါပဲ” ဟု ဥပဒေအကြံပေးဦးခင်မောင်မြင့်က ပြောဆိုသည်။

“ဝင်ဆွဲရင် ကိုယ့်အတွက် အသက်အန္တရာယ်လည်း ထိခိုက်နိုင်တယ်။ ကိုယ်ဝင်ဆွဲလိုက်လို့ တစ်ယောက်ယောက်က ဒဏ်ရာရသွားရင်လည်း အမှုအခင်းနဲ့ ရင်ဆိုင်ရမယ်” ဟုလည်း ၎င်းက ဆိုသည်။

လက်နက်များ ကိုင်ဆောင်ထားခြင်းကို ကြိုတင်ဖမ်းဆီးမှုအားနည်းသွားသဖြင့် လက်နက်ကိုင်လူသတ်မှုများကို ဖြစ်ပွားစေနိုင်ကြောင်း၊ လက်ရှိဖြစ်ပွားခဲ့သည့် လက်နက်ကိုင်လူသတ်မှုများကို ကြည့်ခြင်းဖြင့် ရဲလုပ်ငန်းစနစ်များ လျော့နည်းလာသည်ကို တွေ့ရကြောင်း ဦးခင်မောင်မြင့်က သုံးသပ်သည်။

“ရဲလုပ်ငန်းစနစ်တွေ လျော့ရဲသွားတော့ လက်နက်တွေ ကိုင်ဆောင်တာကို ကြိုတင်ဖမ်းဆီးမှုအပိုင်းတွေမှာ တစ်အားနည်းသွားတယ်။ မှုခင်းတွေ ဖြစ်တော့မှသာ သိရတာ။ တော်ကြာ လက်နက်တွေ တွေ့၊ သေနတ်တွေ တွေ့တယ်၊ ဓားတွေ တွေ့တယ်ဆိုတာ ကျူးလွန်ပြီးတော့မှ တွေ့ရတာ လက်နက်တွေကို” ဟု ၎င်းက ဝေဖန်ထောက်ပြသည်။

ပြီးခဲ့သည့် နှစ်ပိုင်းအတွင်း အထင်ကရမြို့ကြီးများတွင် လက်နက်ကိုင်လူသတ်မှုများ ဖြစ်ပွားခဲ့သည်။ လူသေဆုံးသည့်အထိ ဖြစ်ပွားခဲ့ရသည်။ ရန်ကုန်တိုင်းတွင် ၂၀၁၆ ခုနှစ်က လူသတ်မှု ၁၈၀ မှု၊ ၂၀၁၇ ခုနှစ်တွင် ၁၅၆ မှု ဖြစ်ပွားခဲ့သည်။

မြန်မာနိုင်ငံတွင် လွန်ခဲ့သည့် ဆယ်စုနှစ်များကထက် ရန်ပွဲပိုများကာ ပိုမိုပြင်းထန်လာသည်ဟု ထင်မြင်ကြောင်းလည်း တာမွေမြို့နယ်တွင် နေထိုင်သူ ဦးမျိုးအောင်စိုးက ဆိုသည်။ ယင်းအပြင် လူသတ်မှုများလာရသည့် အကြောင်းအရင်းများတွင် အလုပ်အကိုင်မရှိခြင်းလည်း ပါဝင်နိုင်သည်ဟု ၎င်းကယူဆသည်။ 

အလုပ်မရှိခြင်းကြောင့် ဝင်ငွေမရှိလျှင် စိတ်အလိုမကျမှုများလာကာ ယင်းအခြေအနေများကလည်း ရာဇဝတ်မှု ကို တွန်းအားပေးနေကြောင်း ဦးမျိုးအောင်စိုးက ပြောဆိုသည်။

လူမြင်ကွင်းက လူသတ်မှုများ

အဆိုပါဖြစ်စဉ်အပြင် နောက်ထပ်အကြမ်းဖက်လူသတ်မှုများ ရှိသေးသည်။

ဟာသသရုပ်ဆောင် အောင်ရဲထွေးသည် ၂၀၁၈ နှစ်သစ်ကူးညတွင် The One Entertainment ၌ လူ တစ်စု၏ ထိုးကြိတ်ကန်ကျောက်မှုကြောင့် ရရှိခဲ့သည့် ဒဏ်များများဖြင့် ရန်ကုန်ဆေးရုံကြီးတွင် ဆေးကုသပြီးနောက် သေဆုံးခဲ့ခြင်း ဖြစ်သည်။

လူအများကနေသည့် စတိတ်စင်ပေါ်တွင် အောင်ရဲထွေးကို လူအုပ်စုတစ်စုက ဝိုင်းကန်ကျောက်ကာ ရိုက်နှက်နေသော်လည်း မည်သူ့မျှ ဝင်ရောက်တားဆီးခဲ့ခြင်း မရှိပေ။ အဆိုပါ လူအုပ်စုကို အချိန်မီ တားဆီးခဲ့နိုင်ပါက လူအသက်တစ်ချောင်း ဆုံရှုံးရမည်မဟုတ်ပေ။

လူများအကြားထဲတွင် လက်နက်ဖြင့် လူသတ်မှုလည်းရှိသည်။ ၂၀၁၇ ခုနှစ် အစပိုင်းတွင် ရန်ကုန်လေဆိပ်တွင် NLD ပါတီ၏ ဥပဒေအကြံပေး ဥပဒေအရာရှိ ရှေ့နေ ဦးကိုနီကို ကြည်လင်းက သေနတ်ဖြင့် အနီးကပ် ပစ်သတ်ခဲ့သည်။ အဆိုပါ တရားခံကြည်လင်းကို အုတ်ခဲဖြင့် ပစ်ကာ ဖမ်းဆီးခဲ့သည့် အငှားယာဉ်မောင်း ကိုနေဝင်းလည်း သေနတ်ဖြင့်ပစ်သတ်ခံခဲ့ရသည်။

ကြည်လင်းသည် လွတ်ငြိမ်းချမ်းသာခွင့်ဖြင့် ထောင်မှနှစ်ကြိမ် လွတ်မြောက်လာသူဖြစ်သည်။ ရာဇဝတ်မှုကျူးလွန်သူများမှာ ယခင်ထောင်ကျဖူးသူများလည်း ပိုဖြစ်နိုင်ခြေရှိသည်ဟုလည်း အချို့က ထောက်ပြသည်။

၂၀၁၄ ခုနှစ် ဩဂုတ်လ ၂၈ နေ့ မွန်းလွဲပိုင်းကလည်း သာကေတမြို့နယ်တွင် နာမည်ကြီးလူမိုက်များဟု ပြောဆိုနေကြသည့် အဖွဲ့နှစ်ဖွဲ့ ခိုက်ရန်ဖြစ်ပွားခဲ့သေးသည်။

သာကေတမြို့နယ် (၁၀) တောင် (၁၃) ရပ်ကွက်နေ ဦးနေမျိုးအောင် ခေါင်းဆောင်သော အဖွဲ့နှင့် ထူပါရုံရပ်ကွက်နေ ဦးမြင့်အောင် ဦးဆောင်သော အဖွဲ့နှစ်ဖွဲ့တို့ ရန်ငြိုးရှိခဲ့ရာမှ နှစ်ဖွဲ့ပေါင်း လူ အယောက် ၅၀ နီးပါး ဓားများ၊ တုတ်များ ဖြင့် ခိုက်ရန်ဖြစ်ပွားနေစဉ် သေနတ်သံ နှစ်ချက်ဖောက်ကာ ထိန်းသိမ်းခဲ့ရသည်။

ရန်ပွဲများဖြစ်ပွားချိန်တွင် ဝင်မဆွဲရခြင်းက မိမိကိုယ်ကိုယ်ထိခိုက်မည်ကို စိုးရမ်ကြောင်း၊ တုတ်၊ ဓားများဖြင့် ရန်ဖြစ်နေသည်ကို ဝင်မဆွဲရဲကြောင်း သာကေတမြို့နယ် ရန်ပြေရပ်ကွက်တွင် နေထိုင်ပြီး အိမ်တွင်းလျှပ်စစ်မီး တပ်ဆင်သူ ကိုအောင်မြတ်က ပြောဆိုသည်။

“ရဲနဲ့ပတ်သက်ရမှာ စိုးတာထက် လက်တွေ့မှာ ကိုယ့်အသက်အန္တရာယ်ကို ထိခိုက်မှာ စိုးတာ။ ဝင်ဆွဲလို့ တစ်ခုခု ထိခိုက်သွားရင်တောင် ဘယ်သူကလာပြီး ကုပေးမှာလဲ။ အဲဒါတာကြောင့် လူတွေက ဖာသိဖာသာ နေနေကြတာ”ဟု ၎င်းက ဆိုသည်။

ကြောက်ရခြင်းမှာလည်း အကြောင်းရှိသည်။ ရှေ့နေဦးကိုနီအသတ်ခံရသည့်အမှုတွင် ကူညီသူ ကိုနေဝင်း အသက်ဆုံးရှုံးသွားခြင်း သာဓက ရှိနေခြင်းကြောင့်လည်း ဖြစ်သည်။

 

ကူညီမှု အားနည်းလာသလော

တောင်ငူက နှစ်လောင်းပြိုင် လူသတ်မှုတွင်မူ ပတ်ဝန်းကျင်က မကူညီဘဲ ဓာတ်ပုံ၊ ရုပ်သံမှတ်တမ်းသာ ရယူထားကြမှုအပေါ် မြန်မာ့လူမှုအဖွဲ့အစည်းအတွင်း ကူညီတတ်မှု၊ စာနာတတ်မှုများလျော့ပါးသွားပြီလားဟု မေးခွန်းထုတ်ကြသည်။

အဆိုပါရန်ပွဲများတွင် ကူညီလိုက်ခြင်းဖြင့် ကူညီလိုက်သူတွင် ဆိုးကျိုးခံစားရတတ်ပြီး ကူညီသူ ဓားထိုးခံရခြင်း၊ အကြမ်းဖက်ခံရခြင်းများကြောင့် ကူညီချင်စိတ်များ လျော့နည်းလာခြင်းဖြစ်နိုင် ကြောင်း စိတ်ပညာရှင် ပါမောက္ခအငြိမ်းစား ဒေါက်တာခင်မြင့်က ဆိုသည်။

“ကိုယ်မပါဘဲနေရင် အကြောင်း မဟုတ်ဘူး။ ပါလိုက်တာနဲ့ ကိုယ့်မှာ ဆိုးကျိုးဖြစ်လာမယ်လို့ လူတွေက ကြိုပြီး ခံယူထားကြတယ်။ အဲဒီလိုခံယူထားလို့ ကူညီချင်တဲ့စိတ် လျော့လာတာဖြစ်တယ်” ဟု ၎င်းက ရှင်းပြသည်။

သို့ရာတွင် ရန်ဖြစ်ပွဲများတွင်သာမက လမ်းပေါ်တွင် တုတ်ဆွဲ၊ ဓားဆွဲ ထွက်လာသူများကို တားဆီးကာကွယ် ပေးသူ၊ ဝင်ရောက်ကူညီသူများအတွက် နိုင်ငံတော်က ပေးထားသည့် အခွင့်အရေး ရှိသည်။

ပတ်ဝန်းကျင်တွင် လူတစ်ယောက် အသက်အန္တရာယ်၊ ကိုယ်အင်္ဂါကို ထိခိုက်နာကျင်ပျက်စီးရန် လက်တွေ့ လုပ်နေခြင်း သို့မဟုတ် ပြုလုပ်ရန်ကြိုးစားနေပါက ဥပဒေအရ တားမြစ်ခွင့်ရှိကြောင်း၊ နာကျင်အောင်လုပ်ရန် ဓား၊ တုတ်ကိုင်ပြီး ပြေးလွှားနေပါကလည်း တားမြစ်ခွင့်ရှိကြောင်း ဥပဒေအကြံပေး ဦးခင်မောင်မြင့်က ဆိုသည်။

ခိုက်ရန်ဖြစ်ပွားနေမှုကို တားမြစ်ချိန်တွင် ပြည့်သူ့ဝန်ထမ်းအဖြစ် သတ်မှတ်ရမည်ဖြစ်ကြောင်း၊ တားမြစ်ခံရသူသည် မနာခံ၍ တားမြစ်သူက ဆွဲရင်း မရည်ရွယ်ဘဲ လက်လွန်ကာတစ်ခုခု ထိခိုက်သွားပါကလည်း ပြစ်မှုမှ ကင်းလွတ်ခွင့်ရှိကြောင်း ၎င်းက ပြောဆိုသည်။

“လူတွေကလည်း နောက်ပိုင်း ဝင်မဆွဲဘူးဆိုတာကလည်း ဒီလိုလုပ်လို့ ရတယ်ဆိုတာကို မသိကြဘူး။ ပညာပေးမှု အားနည်းတယ်”ဟု ၎င်းက ဆိုသည်။

လွန်ခဲ့တဲ့ နှစ် ၃၀ လောက်က လူ့အဖွဲ့အစည်းက မိဘအသိုင်းအဝိုင်း၏ ဆိုဆုံးမမှုများသာမက ပတ်ဝန်းကျင်၏ ဆိုဆုံးမမှု၊ ပဲ့ပြင်မှုကိုခံနိုင်သည့် စိတ်အနေ အထားရှိကြသည်။ ယနေ့ခေတ် လူမှုအဖွဲ့အစည်းသည် ယဉ်ကျေးမှုပြောင်းလဲကာ လူ့အဖွဲ့အစည်း၏ ယဉ်ကျေးမှုလျော့နည်းလာသလောဟု မေးခွန်းထုတ် လာကြသည်။

တရားဥပဒေစိုးမိုးရေးအပိုင်းတွင်လည်း ပြည်သူများသည် ရဲနှင့်ပတ်သက်၍ ကြောက်ရွံ့ကြသည့် ကိစ္စများလည်း ရှိသည်။

“လူတွေက ဖြစ်နိုင်ရင် ရဲစခန်းတို့၊ ရဲတို့နဲ့ ပတ်သက်တဲ့ မှုခင်းတွေမှာ ဝင်ကို မပါချင်တော့တာ။ သက်သေအဖြစ်နဲ့လည်း မပါချင်ဘူး။ ဘယ်လိုမှကို မကူညီချင်တော့တာ” ဟု ဦးခင်မောင်မြင့်က ပြောဆိုသည်။

အဆိုပါကိစ္စရပ်များ လျော့နည်းသွားအောင် ရဲတပ်ဖွဲ့က မူခင်းကိစ္စများတွင် ပြည်သူလူထု ယုံကြည်ပြီး ကူညီမှုရအောင် ဆောင်ရွက်ရန်လိုသည်။ သို့ရာတွင် ပြောင်းလဲလာသည့် လူမှုဆက်ဆံရေး နယ်ပယ်တွင် မျက်စိရှေ့တွင် ဖြစ်ပေါ်နေသည့် မည်သည့်အရေးကိစ္စမဆို အလေးထားကူညီတတ်သည့် ယဉ်ကျေးမှုကို မွေးမြူသင့်ကြောင်း ထောက်ပြသူများ ရှိသည်။

ကောင်းမွန်သည့် လူမှုဆက်ဆံရေးပတ်ဝန်းကျင်ဖြစ်ရန် ငယ်စဉ်ကတည်းကပင် လေ့ကျင့်ပြုစု ပျိုးထောင်ရမည် ဖြစ်ကြောင်း စိတ်ပညာရှင် ဒေါက်တာခင်မြင့်က ဆိုသည်။

တုတ်၊ ဓားကိုင်ဆောင်ကာ လူမြင်ကွင်းတွင် လူသတ်မှုကျူးလွန်ခြင်းမှာ မကြာမကြာတွေ့လာရသည်။ ဆင်းရဲနွမ်းပါးခြင်း၊ တရားဥပဒေစိုးမိုးမှု အားနည်း ခြင်း၊ လူထု၏ အထွေထွေအကျပ်အတည်းကြုံနေရချိန် ယင်းသို့ ရက်စက်သည့် ရာဇဝတ်မှုများမှာ မလုံခြုံမငြိမ်းချမ်းမှုကို ပိုမိုဆိုးဝါးသွားစေသည်။

စိတ်ပညာရှင်ဒေါက်တာခင်မြင့် ကမူ ပြဿနာကို ဖြေရှင်းရာတွင် စိတ်အေးလက်အေး ဆင်ဆင်ခြင်ခြင်၊ စဉ်းစား ဆင်ခြင်တုံတရားနှင့် ဖြေရှင်းသူရှိသကဲ့သို့ ဒေါသဖြင့် တုံ့ပြန်ဖြေရှင်းခြင်းလည်းရှိရာ လက်ရှိတွင် ဒေါသဖြင့် တုံ့ပြန်ဖြေရှင်းခြင်း ပိုများလာသည်ကို တွေ့ရကြောင်း ပြောဆိုပြီး အောက်ပါအတိုင်းလည်း မှတ်ချက် ပေးသည်။

“ဒါကြောင့်မို့လို့ ရာဇဝတ်မှု ပိုဖြစ်လာတယ်”

ဥမ္မာလွင်၊ အောင်ဖြိုးဦး

You may also like...

Leave a Reply

Your email address will not be published. Required fields are marked *