အိမ်ထောင်စုစာရင်းရှိမှ စည်ပင်ရွေးကောက်ပွဲ မဲပေးခွင့်ရမည်ဟု စည်ပင်နည်းဥပဒေပြင်ဆင်မှု ယခုကျင်းပမည့် ရန်ကုန်စည်ပင်ရွေးကောက်ပွဲနှင့် မဆိုင်ဟုဆို

ရန်ကုန်၊ မတ် ၁

ရန်ကုန်တိုင်းဒေသကြီးလွှတ်တော်သည် စည်ပင်ရွေးကောက်ပွဲနည်းဥပဒေကို မတ်လ ၁ ရက်တွင် ပြင်ဆင်ခဲ့ပြီး ယင်းပြင်ဆင်မှုတွင်ပါဝင်သည့် အိမ်ထောင်စု စာရင်းပုံစံ ၆၆/၆ ရှိမှ စည်ပင်ရွေးကောက်ပွဲ မဲပေးခွင့်ရမည်ဟူသော အချက်သည် မကြာမီကျင်းပမည့် ရန်ကုန်စည်ပင်ရွေးကောက်ပွဲနှင့်မဆိုင်ဟု ရန်ကုန်တိုင်းလွှတ်တော်ဥပဒေကြမ်းကော်မတီဥက္ကဋ္ဌ ဦးသိန်းမြင့်က The Voice Journal သို့ ပြောကြားသည်။

မတ်လ ၃၁ ရက်နေ့တွင် ကျင်းပမည့် ရန်ကုန်စည်ပင် ရွေးကောက်ပွဲအတွက် ဆန္ဒမဲပေးခွင့်ရှိသူများစာရင်းကို ထုတ်ပြန်ပြီးဖြစ်သောကြောင့် ယခုပြင်ဆင်လိုက်သည့်နည်းဥပဒေအတိုင်း ဆန္ဒမဲပေးခွင့်ရှိ သူစာရင်းကို ကောက်ယူမည်ဆိုပါက လက်ရှိကောက်ယူထားသော စာရင်းများကို ပယ်ဖျက်ရမည် ဖြစ်သည်။

သို့သော်လည်း ၂၀၁၉ နောက်ပိုင်းတွင်ကျင်းပမည့် ရန်ကုန်စည်ပင်ရွေးကောက်ပွဲတွင်မူ အဆိုပါအချက်သည် အကျုံးဝင်မည်ဖြစ်ကြောင်း ဦးသိန်းမြင့်ကပြောဆိုသည်။

“ဒါက မဲစာရင်းကြေညာပြီးသွားပြီဆိုတော့။ နောက်ရွေးကောက်ပွဲကျမှ ဖြစ်သွားပြီ။ နောက်စည်ပင်ရွေးကောက်ပွဲလုပ်ရင် ဒီတိုင်းလုပ်ရမယ်ဆိုပြီးဖြစ်သွားပြီ။ ဒီဟာ (မတ်လ ၃၁ ရက် စည်ပင် ရွေးကောက်ပွဲ) အတွက် မဟုတ်ဘူး” ဟု ၎င်းက ရှင်းပြသည်။

ရန်ကုန်စည်ပင်ရွေးကောက်ပွဲတွင် ဆန္ဒမဲပေးခွင့်ရှိသူများ စာရင်းကို ဖေဖော်ဝါရီလ ၂၇ ရက်တွင် ထုတ်ပြန်ခဲ့ပြီး စုစုပေါင်း မဲပေးခွင့်ရှိသူ ၃ ဒသမ ၄ သန်းရှိကာ အဆိုပါစာရင်းကို ယာယီအိမ်ထောင်စုဇယားဖြင့် နေထိုင်သူများကိုပါ ထည့်သွင်းကောက်ယူထားခြင်းဖြစ်ကြောင်း ရန်ကုန်စည်ပင်ရွေးကောက်ပွဲကော်မရှင်ထံမှ သိရှိရသည်။

ရန်ကုန်စည်ပင်ရွေးကောက်ပွဲနည်းဥပဒေသည် သက်ဆိုင်ရာဥပဒေပါပြဋ္ဌာန်းချက်များနှင့် ညီညွတ်မှုမရှိသောကြောင့် ဆန္ဒမဲပေးပိုင်ခွင့်နှင့် မဲစာရင်းပြုစုသည့်အချက်များနှင့် ပတ်သက်သည့် ဥပဒေအချို့ကို ပြင်ဆင်ရန် တိုင်းလွှတ်တော် ဥပဒေကြမ်းကော်မတီက တင်သွင်းခဲ့ခြင်း ဖြစ်သည်။ 

You may also like...

Leave a Reply

Your email address will not be published. Required fields are marked *