မလျော်မကန်ဘေလ်ဖြတ်မှုအတွက် ၆၆(ဂ)

ဆက်သွယ်ရေးအော်ပရေတာများ၏ ဖုန်းဘေလ်မှားယွင်းဖြတ်တောက်မှုပြဿနာကား လွှတ်တော်အတွင်း ဆွေးနွေးရသည်အထိ ကြီးကျယ်လာပြီဖြစ်သည်။

အကြောင်းမူ ဆက်သွယ်ရေးအော်ပရေတာများသည် သာမန်ပြည်သူများ မဟုတ်သည့် လွှတ်တော်ကိုယ်စားလှယ်များပါမချန် ဖုန်းဘေလ်မှားယွင်းဖြတ်တောက်လျက်ရှိသောကြောင့် ဖြစ်သည်။

သာရေး၊ နာရေးနှင့် လုပ်ငန်းကိစ္စအဝ၀အတွက် ဖုန်းပြောဆက်သွယ်ရန် ချွေးနည်းစာငွေကြေးများထဲမှ ဖုန်းဘေလ်ဖြည့်သုံးစွဲနေရခြင်းဖြစ်ပြီး ဆက်သွယ်ရေးအော်ပရေတာများက နည်းမျိုးစုံဖြင့် မလျော်မကန်ဘေလ်ဖြတ်တောက်ခြင်းကြောင့် ပြည်သူလူထု၏ ငွေကြေးများဆုံးရှုံးနစ်နာနေရသည်။

ထို့ကြောင့် ဆက်သွယ်ရေးဥပဒေ၊ နည်းဥပဒေနှင့်စားသုံးသူကာကွယ်ရေးဥပဒေအရ အော်ပရေတာများ၏ ဖုန်းဘေလ်မှားယွင်းဖြတ်တောက်မှုအပေါ် ကြပ်မတ်စစ်ဆေးအရေးယူရန် အစီစဉ်ရှိ၊ မရှိ ၂၀၁၉ ခုနှစ်၊ ဖေဖော်ဝါရီလ ၂၅ ရက် ပြည်သူ့လွှတ်တော်တွင် မေးခွန်းမေးမြန်းသည်အထိ ဖြစ်လာခဲ့သည်။

 “ကျွန်တော်တို့ကို အသိမပေးဘဲ ဖြတ်တောက်ခြင်းဟာ အဒိန္နာဒါနကံ ခိုးယူခြင်းမြောက်ပါတယ်” ဟု ပြည်သူ့လွှတ်တော်အစည်းအဝေးတွင် မေးခွန်းမေးမြန်းသည့် မန္တလေးတိုင်း၊ အောင်မြေသာဇံမြို့နယ် ပြည်သူ့လွှတ်တော်ကိုယ်စားလှယ် ဒေါက်တာလှမိုးက ပြောကြားသည်။

မြန်မာနိုင်ငံလူဦးရေသည် ၅၄ သန်းအထိလာရှိပြီး မိုဘိုင်းဖုန်းဆင်းကတ်အရေအတွက် သန်း ၆၀ ကျော်အထိ အသုံးပြုလျက်ရှိသည်။ အင်တာနက်အသုံးပြုသူ သန်း ၃၀ ကျော်ရှိသည်။ အဆိုပါ မိုဘိုင်းဆက်သွယ်ရေးကွန်ရက်ကို အသုံးပြုသူအများအပြားသည် အော်ပရေတာများ၏ မလျော်မကန် ဖုန်းဘေလ်ဖြတ်ခံနေရကြောင်း ဒေါက်တာလှမိုးက ဆိုသည်။

ဖုန်းဘေလ်မှားယွင်းဖြတ်တောက်ခံရသူများထဲတွင် ဒေါက်တာလှမိုးကိုင်တိုင်လည်း ပါဝင်သည်။

မည့်သည့်ဝန်ဆောင်မှုမှ အသုံးမပြုသော်လည်း Game mania ၊ Go Game ကဲ့သို့ ဂိမ်းဝန်ဆောင်မှုရယူသည်ဟု စာတိုမက်ဆေ့များပို့ကာ ဖုန်းဘေလ် ၄၅၀ ကျပ် အကြိမ်ကြိမ်ဖြတ်တောက်နေခြင်းဖြစ်ကြောင်း ၎င်းက ဆိုသည်။ ထိုဂိမ်းဝန်ဆောင်မှုများကို ဖုန်းအသုံးပြုသူများ သိပင် မသိ။ သို့သော် ဆက်သွယ်ရေးအော်ပရေတာများသည် အပတ်စဉ်ဂိမ်းဝန်ဆောင်မှုအတွက် ဖုန်းဘေလ် ၄၅၀ ကျပ် ဖြတ်တောက်နေခြင်း ဖြစ်သည်။

သက်ဆိုင်ရာဆက်သွယ်ရေးအော်ပရေတာထံသို့ ဖုန်းဘေလ်မှားယွင်းမှုဖြတ်တောက်မှုကို ဖြေရှင်းရန် တောင်းဆိုသော်လည်း ဖုန်းသုံးစွဲသူသည် ဂိမ်းဝန်ဆောင်မှုမှားယွင်းရယူထားခြင်းကြောင့် ယင်းကဲ့သို့ ဖြတ်တောက်ခြင်းဖြစ်ကြောင်း အော်ပရေတာများက ပြန်လည်ဖြေရှင်းသည်။

“လေး၊ ငါး၊ ခြောက်ခါလောက် Complain တက်မှသာလျှင် ပြန်လည်စစ်ဆေးပေးပါ့မယ်ဆိုတဲ့ အဖြေရတယ်။ ပြီးတဲ့အခါမှာ ကျွန်တော်တို့ဆီကို မှားယွင်းဖြတ်တောက်မိတဲ့အတွက် ဘေလ်ပြန်လည်ထည့်ပေးပါ့မယ်တဲ့”ဟု ဒေါက်တာလှမိုးက ဆိုသည်။

မြန်မာနိုင်ငံတွင် ယင်းကဲ့သို့ ဖုန်းဘေလ် မှားယွင်းဖြတ်တောက်ခံနေရသည့် ဖုန်းသုံးစွဲသူ မည်မျှအထိရှိနေမည်နည်း။ နည်းပညာနှင့် ရင်းနှီးကျွမ်းဝင်မှုမရှိသော ဖုန်းအသုံးပြုသူများကို ယင်းကဲ့သို့ မှားယွင်းဖြတ်တောက်နေလျှင် ဘေလ်ဖြတ်တောက်ခြင်းကို သတိမပြုနိုင်သောကြောင့် ငွေကြေးများစွာ နစ်နာဆုံးရှုံးနိုင်မည်ဖြစ်သည်။

မိုဘိုင်းဖုန်းအသုံးပြုသူ သန်း ၆၀ ရှိသည့်အနက် တစ်ပတ်လျှင် ဝန်ဆောင်မှုတစ်မျိုးအတွက် လူတစ်သန်းခန့် မှားယွင်းဖြတ်တောက်မိလျှင်ပင် ကျပ်သန်းငါးရာ နစ်နာနိုင်သည်။ တစ်လလျှင် ကျပ်နှစ်ဘီလီယံ၊ တစ်နှစ်လျှင် ၂၅ ဘီလီယံအထိ နစ်နာနိုင်ကြောင်း ဒေါက်တာလှမိုးက ပြောကြားသည်။

မြန်မာပြည်တွင် ဆက်သွယ်ရေးဝန်ဆောင်မှုပေးနေသည့် အော်ပရေတာလေးခုစလုံး ယင်းကဲ့သို့ ဖုန်းဘေလ်မှားယွင်းဖြတ်တောက်နေခြင်းဖြစ်ကြောင်း ၎င်းက ဆိုသည်။

စင်စစ်အားဖြင့် ပြည်တွင်းဆက်သွယ်ရေးအော်ပရေတာများ ဖုန်ဘေလ်မှားယွင်းဖြတ်နေခြင်းသည် ယခုမှ မဟုတ်။ ၂၀၁၈ နှစ်ကုန်ပိုင်းကတည်းက ဖုန်းဘေလ်မှားယွင်းဖြတ်တောက်လာခြင်းဖြစ်ကြောင်း The Voice Journal က ဆက်သွယ်မေးမြန်းခဲ့သည့် ဖုန်းအသုံးပြုသူများက ပြောဆိုကြသည်။ လက်ရှိတွင် ဖုန်းဘေလ်မှားယွင်းဖြတ်တောက်မှုမှာ ပိုမိုဆိုးရွားလာသည်။ ဖုန်းအသုံးပြုသူများ၏ မကျေနပ်ချက်များ၊ စောဒကတက်သံများလည်း ပိုမိုကျယ်လောင်လာသည်။

“ကျွန်တော်က ဂိမ်းတွေ ဘာတွေလည်း မယူပါဘူး။ အဲဒါကို ၅၅၀ ကျပ် ဖြတ်သွားတယ်။ သူတို့က(အော်ပရေတာ) Message တွေက ပို့တော့ ပို့နေတာပဲ။ ကျွန်တော်ကတော့ ဘာမှမယူပါဘူး”ဟု စစ်ကိုင်းတိုင်း ဟုမ္မလင်းမြို့နယ်မှ တယ်လီနောဆင်းကတ် အသုံးပြုသူ ဦးအောင်နိုင်ဌေးကလည်း ဖေဖော်ဝါရီလကုန်ပိုင်းက သူ့အတွေ့အကြုံကို ပြောကြားသည်။

မြန်မာနိုင်ငံတွင် ဆက်သွယ်ရေးဝန်ဆောင်မှုပေးသည့် ကုမ္ပဏီလေးခုရှိပြီး မြန်မာ့ဆက်သွယ်ရေးလုပ်ငန်(MPT) အသုံးပြုသူ ၂၁ သန်း၊ တယ်လီနော ၁၉ သန်း၊ အူရီဒူး ၁၀ သန်း၊ မိုင်တယ် ၅ သန်းအသီးသီးရှိသည်။ MPT နှင့် တယ်လီနောသည် ပြည်တွင်းဆက်သွယ်ရေးကွန်ရက်တွင် အကြီးဆုံးကုမ္ပဏီများဖြစ်ပြီး မလျော်မကန် ဖုန်းဘေလ်ဖြတ်တောက်မှု အများဆုံး ကုမ္ပဏီနှစ်ခုဟု ယူဆနိုင်စရာအချက်များကိုလည်း တွေ့ရသည်။

အကြောင်းမှာ MPT နှင့် တယ်လီနော Facebook Post တိုင်းတွင် ဖုန်းဘေမှားယွင်းဖြတ်တောက်မှုအပေါ် မကျေနပ်သည့် မှတ်ချက်များစွာရှိပြီး အူရီဒူးနှင့် မိုင်တဲလ် Facebook စာမျက်နာတွင်မူ အဆိုပါမှတ်ချက်များ နည်းပါးသည်ကို တွေ့ရသည်။

ဂိမ်းဝန်ဆောင်မှုယူသည်ဟုဆိုကာ ဖုန်းဘေလ်မှားယွင်းဖြတ်တောက်နေခြင်းသည် တယ်လီနောဖြစ်သည်။ MPT သည်လည်း မည်သည့်ဝန်ဆောင်မှုမှ မဝယ်သော်လည်း ဖုန်းသုံးသူတို့ထံမှ ကျပ် ၈၀၀၊ ကျပ် ၁၀၀၀၊ ကျပ် ၃၀၀၀ စသည်ဖြင့် ဖြတ်တောက်မှုများရှိကြောင်း အဆိုပါဆက်သွယ်ရေးကွန်ရက်အသုံးပြုသူများထံမှ သိရသည်။

ယင်းသို့ဖြတ်တောက်မှုများအတွက် သုံးစွဲသူများ၏ ဆက်သွယ်မေးမြန်းမှုများကို အော်ပရေတာများ၏ ဖြေရှင်းမှုများကလည်း သုံးစွဲသူများအတွက် ကျေနပ်မှုမဖြစ်စေခဲ့ကြောင်း The Voice Journal က စုံစမ်းသိရှိရသည်။

ဂိမ်းဝန်ဆောင်မှုနှင့် အခြားမဆီမလျော်ဘေဖြတ်တောက်မှုဖြစ်ပေါ်သည့် အကြောင်းကို သိရှိနိုင်ရန် တယ်လီနောမြန်မာ၏ လူထုဆက်ဆံရေးအရာရှိ ဒေါ်ရွှေယင်းမာဦးထံ တယ်လီဖုန်း၊ အီးမေးတို့ဖြင့် ဆက်သွယ်မေးမြန်းသော်လည်း ယခုဆောင်းပါးအပြီးသတ်ချိန်အထိ ပြန်လည်ဖြေကြားခြင်းမရှိပေ။

တယ်လီနောမြန်မာ၏ ဆက်သွယ်ရေးဝန်ဆောင်မှုများသည် သုံးစွဲသူများကြား မကျေနပ်မှုအများဆုံးဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနထံ ပေးပို့သော တိုင်ကြားစာများက သက်သေပြလျက်ရှိသည်။

တယ်လီနောအိမ်သုံးကြိုးမဲ့အင်တာနက်(Broadband) ဝန်ဆောင်မှုအစီအစဉ် ပြောင်းခြင်းအပေါ် မကျေနပ်သည့် တိုင်ကြားစာပေါင်း ၃၃၈ ခုရှိပြီး တိုင်ကြားမှုများအနက် အများဆုံးဖြစ်ကြောင်း စားသုံးသူရေးရာဦးစီးဌာနထံမှ သိရသည်။ သုံးစွဲသူမကျေနပ်မှုများကို ဖြေရှင်းပေးရန် တယ်လီနောမြန်မာကို စားသုံးသူရေးရာဦးစီးဌာနက နေပြည်တော်တွင် ခေါ်ယူညှိနှိုင်းခဲ့သည်အထိ ဖြစ်ခဲ့သည်။

ဖုန်းဘေလ်များ မဆီမလျော်ဖြတ်တောက်ခံရသည်ဟူသော သုံးစွဲသူများ၏ထင်မြင်ချက်အပေါ် MPT က ယခုကဲ့သို့ ချေပသည်။ သုံးစွဲသူသည် ဖုန်းအသုံးပြုရာတွင် နောက်ကွယ်၌ ဆွဲယူနေသော ဒေတာများကို မကန့်သတ်ထားခြင်းကြောင့်ဖြစ်ကြောင်း MPT လူထုဆက်ဆံရေးဌာနမှ အမည်မဖော်လိုသည့် တာဝန်ရှိသူတစ်ဦးက ဆိုသည်။

နောက်ခံအင်တာနက်ဒေတာများ မကန့်သတ်သဖြင့် ဘေလ်ကုန်မြန်ခြင်းဖြစ်ကြောင်း ၎င်းက The Voice Journal သို့ ဖြေကြားသည်။ လူမှုကွန်ရက် Facebook အသုံးပြုရာတွင် Facebook နှင့် ချိတ်ဆက်ထားသည့် ဝက်ဘ်ဆိုက်များ၊ အခြားအင်တာနက်လင့်ခ်များသို့ ဝင်ရောက်သဖြင့် ဖုန်းဘေလ်ပိုကုန်ခြင်းဖြစ်ကြောင်း ၎င်းက ဖြေဆိုသည်။

အသုံးပြုသည့် internet package အလိုက် အသုံးပြုနိုင်သော ပမာဏကို စစ်ဆေးသုံးစွဲလျှင် ဘေလ်ကုန်သည့် အခြေအနေကို အတိအကျသိရှိနိုင်မည်ဖြစ်ကြောင်း ယင်းဌာနက ပြန်လည်ဖြေဆိုသည်။ သုံးစွဲသည့် ဒေတာများစစ်ဆေးရန် MPT Call Center နှင့် MPT Facebook မှတစ်ဆင့် ဆက်သွယ်မေးမြန်းနိုင်သည်ဟု ဆိုသည်။ မှားယွင်းဖြတ်တောက်မှုမရှိနိုင်ကြောင်းလည်း MPT က ယုံကြည်လျက်ရှိသည်။

သို့သော် အော်ပရေတာများသည် ဘေလ်မှားယွင်းဖြတ်တောက်မှုများရှိကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီးဦးသာဦးက ပြည်သူ့လွှတ်တော်တွင် ပြောဆိုထားသည်။

ဖုန်းဘေလ်မှားဖြတ်မိသည့်အတွက် အော်ပရေတာများက ကျပ်ဘီလီယံနှင့်ချီ ပေးလျော်ခဲ့ရသည့် သာဓကလည်းရှိကြောင်း ၎င်းက ဆိုသည်။

မှားယွင်းဖြတ်တောက်မှုများအပြင် သတ်မှတ်ထားသော နှုန်းထားများအတိုင်း ဖုန်းဘေလ် တိကျမှန်ကန်စွာမဖြတ်သည့် ပြဿနာလည်း ရှိနေပြန်သည်။ ပုံမှန်ဖုန်းခေါ်ဆိုခတစ်မိနစ် (စက္ကန့် ၆၀) ကို ၂၃ ကျပ်သတ်မှတ်လျှင် စက္ကန့် ၆၀ ပြည့်မြောက်မှသာ ၂၃ ကျပ်ဖြတ်တောက်ရမည် ဖြစ်သော်လည်း ၃၀ စက္ကန့်ကျော်လျှင်ပင် ၂၃ ကျပ် အပြည့်ဖြတ်တောက်ခြင်း၊ ပိုမိုဖြတ်တောက်ခြင်းများရှိကြောင်း မိုဘိုင်းဖုန်းသုံးစွဲသူများက ဆိုသည်။

ထို့အပြင် အင်တာနက်ဒေတာအသုံးပြုရာတွင်လည်း ဖုန်းအင်တာနက်ဖွင့်လိုက်သည်နှင့် ကျပ် ၅၀၊ ၁၀၀ ဖြတ်တောက်ခံရသည့် သုံးစွဲသူများရှိသည်။ သုံးစွဲသည့် ဒေတာပမာဏအလိုက် ဖုန်းဘေဖြတ်တောက်သည့် စနစ် ဖြစ်သော်လည်း အင်တာနက်ဖွင့်သည်နှင့် ကျပ် ၅၀၊ ၁၀၀ ချက်ချင်းဖြတ်တောက်ခံရခြင်းသည် အော်ပရေတာများက ဖုန်းဘေလ်ပိုမိုဖြတ်တောက်ခြင်းကြောင့်သာဖြစ်သည်ဟု သုံးစွဲသူများက သံသယရှိနေပြန်သည်။

“အခုနောက်ပိုင်းဖုန်းတွေက မြန်နှုန်းမြင့်အင်တာနက်စနစ်တွေ ပါလာတယ်။ ဒါပါလာတော့ မြန်နှုန်းမြင့်ရအောင် ဒေတာတွေကို ဆွဲချလိုက်တာပေါ့။ အဲဒီအခါ ကိုယ်က နည်းနည်းပဲ ကြည့်တယ်။ Facebook ပွတ်ရုံပဲရှိသေးတယ် အထဲမှာ ဒေတာက သုံးလိုက်တယ်” ဟု မိုင်တဲလ်မြန်မာ၏  Chief External Relation Officer ဦးဇော်မင်းဦးက ပြောကြားသည်။

လက်ရှိအချိန်ထိ မိုင်တဲလ်ဆက်သွယ်ရေးကွန်ရက်တွင် မှားယွင်းဖြတ်တောက်မှုနည်းပြီး ဖုန်းဘေလ် မှန်ကန်တိကျစွာဖြတ်တောက်နိုင်ရန် ကြိုးစားနေကြောင်း ၎င်းက ထပ်မံပြောသည်။

အင်တာနက်အသုံးပြုသည့်အခါ မိမိအသုံးပြုသည့် ဖုန်းအက်ပလီကေးရှင်းတစ်ခုထဲကသာ ဒေတာဆွဲယူရန် Background Data (နောက်ကွယ်တွင် ဆွဲယူသည့် ဒေတာ) အက်ပလီကေးရှင်းများကို ပိတ်ပင်သင့်ကြောင်း ၎င်းက ဆိုသည်။ ယင်းသည် မလိုလားအပ်သော ဘေလ်ဖြတ်တောက်မှုကို ရှောင်ကြဉ်နိုင်သည်။

ယနေ့ခေတ်သည် အင်တာနက်ခေတ်ဖြစ်ပြီး လူတိုင်းမိုဘိုင်းဆက်သွယ်ရေးကို မဖြစ်မနေအသုံးပြုနေကြရခြင်း ဖြစ်သည်။ ဆက်သွယ်ရေးဝန်ဆောင်မှုအတွက် ကျသင့်မည့် ငွေကြေးကို အသုံးပြုသူများက ယုံကြည်မှုဖြင့် ကြိုတင်ငွေဖြည့်အသုံးပြုနေကြခြင်းဖြစ်သည်။ သို့သော် အော်ပရေတာများက သုံးစွဲသူများမသိဘဲ ဘေလ်ဖြတ်တောက်နေသဖြင့် ယုံကြည်မှုကို အလွဲသုံးစားပြုနေခြင်းဖြစ်ကြောင်း ပြည်သူ့လွှတ်တော်ကိုယ်စားလှယ် ဒေါက်တာလှမိုးက ဆိုသည်။

ထိုပြဿနာကို မည်သို့ဖြေရှင်းမည်နည်း။ မည်သည့်ချွတ်ယွင်းမှုကြောင့် ဖြစ်စေ မှားယွင်းဖြတ်တောက်ခံရပါက သုံးစွဲသူပြည်သူများသာ နစ်နာမည်ဖြစ်သည်။ ယင်းအတွက် အော်ပရေတာများကို ဆက်သွယ်ရေးညွှန်ကြားမှုဦးစီးဌာနက စစ်ဆေးကြပ်မတ်နေကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီးဦးသာဦးက ပြောကြားသည်။

“တကယ်ခံစားရတာက သုံးစွဲသူတွေက ခံစားရပါတယ်။ သုံးစွဲသူတွေက သူတို့ကို(အော်ပရေတာတွေကို) လည်း Complaint လုပ်ပါ။ ကျွန်တော်တို့ ဝန်ကြီးဌာနရဲ့ ဆက်သွယ်ရေးညွှန်ကြားမှုဦးစီးဌာနကို တိုင်ကြားပေးပါ။ တိုင်ကြားပေးမယ်ဆိုရင် တောက်လျှောက်အရေးယူသွားပါမယ်” ဟု ၎င်းက ဆိုသည်။

သို့သော်အရေးယူခြင်းသည် အဓိကအပိုင်းကြီးသုံးပိုင်းရှိသည်။ ဆက်သွယ်ရေးဥပဒေအရ အော်ပရေတာများ မမှန်မကန်လုပ်ပါက သတိပေးခြင်း၊ လိုင်စင်ယာယီရပ်ဆိုင်းခြင်း၊ လိုင်စင်အပြီးပိတ်သိမ်းခြင်း ပြုလုပ်နိုင်သည်။

သတိပေးခြင်းကို အော်ပရေတာများက မမှုကြောင်း ၎င်းက ဆိုသည်။ လိုင်စင်ယာယီသိမ်းလျှင်လည်း သန်းနဲ့ချီသည့် သုံးစွဲသူများ အဆက်သွယ်ပြတ်တောက်သွားနိုင်ကြောင်း ၎င်းက ဆိုသည်။

မလျော်မကန်လုပ်ဖြတ်တောက်မှုများကို တားနိုင်ရန် တစ်နည်းရှိသည်။ ဆက်သွယ်ရေးဥပဒေ ၆၆ (ဂ) ကို အသက်ဝင်လာရန်ဖြစ်သည်။ ထိုပုဒ်မက ဆက်သွယ်ကွန်ရက်အသုံးပြု၍ ငွေကြေးနှင့် ပစ္စည်းခိုးယူခြင်း၊ လိမ်လည်ခြင်း၊ အလွဲသုံးစားပြုခြင်း၊ အကျိုးပျက်ဆီးစေခြင်းအတွက် အရေးယူနိုင်သည့် ပုဒ်မ ဖြစ်သည်။ ထို့ပုဒ်မကို မည်သူက အသုံးချမည်နည်း။

ယင်းနှင့်ပတ်သက်၍ ဒုတိယဝန်ကြီးဦးသာဦးက ယခုကဲ့သို့ ဆိုသည်။

“(၆၆-ဂ) ဒါကို အသုံးချပြန်လုပ်ရင်တော့ ရနိုင်ပါတယ်။ ဒါကို အလေးထားပြီး ပြန်လည်ဆောင်ရွက်မှာ ဖြစ်ပါတယ်” ဟု ဆိုသည်။

နိုင်လင်းအောင်

You may also like...

Leave a Reply

Your email address will not be published. Required fields are marked *