ဖိလစ်ပိုင်ငြိမ်းချမ်းရေးလုပ်ငန်းစဉ်နှင့်ကြားသိခဲ့ရသောသင်ခန်းစာများ (၁)

ဖိလစ်ပိုင်နိုင်ငံမရောက်ဖြစ်တာ ၁၀နှစ်ကျော် ကြာခဲ့ပြီ။ ဖေဖော်ဝါရီလ တတိယပါတ်က နောက်တစ်ခေါက် ပြန်ရောက်ခဲ့ပါသည်။

ယခုတစ်ခေါက်ရောက်တော့ အရင်တုန်းကနဲ့ ဘာမှမဆိုင်။ မနီလာမြို့တော်တွင် ရုပ်ပိုင်းဆိုင်ရာ အပြောင်းအလဲများစွာကို တွေ့ရသည် ။ ငြိမ်းချမ်းရေးလုပ်ငန်းစဉ်သည်လည်း များစွာပြောင်းလဲသွားသည်ကို တွေ့ရသည်။

ဖိလစ်ပိုင်သည် မြန်မာနိုင်ငံကဲ့သို့ နှစ်ရှည်လများ လက်နက်ကိုင်ပဋိပက္ခဖြစ်နေခဲ့သော နိုင်ငံတစ်နိုင်ငံ ဖြစ်သည်။ လူသိန်းချီ၍ အသက်ဆုံးရှုံးခဲ့ရသည်။ ပြင်းထန်သော တိုက်ပွဲကြီးများ ဖြစ်ခဲ့ကြသည်။ တော်လှန်ရေးတွေလည်း ဖြစ်ခဲ့ကြသည်။ ဒီမိုကရေစီကတော့ ကြာရှည်ခံခဲ့သည်။ ငြိမ်းချမ်းရေးလုပ်ငန်းစဉ်ကိုလည်း အစိုးရအဆက်ဆက် ဇောက်ချလုပ်ကိုင်ခဲ့သည်ကို တွေ့ရသည်။

ကျွန်တော့်အနေဖြင့် ငြိမ်းချမ်းရေးလုပ်ငန်းစဉ်များကို တောင်အာဖရိက၊ ကိုလံဘီယာ၊ နီပေါစသည့် နိုင်ငံများသို့ အစိုးရ၊ တပ်မတော်၊ တိုင်းရင်းသားလက်နက်ကိုင်ကိုယ်စားလှယ်များဖြင့် သွားရောက်လေ့လာခဲ့ဖူးသည်။ စာတွေလည်း ဖတ်ဖူးခဲ့သည်။ သို့သော် ယခုတစ်ခေါက်သည် ကျွန်တော်အမြင် အတွေ့အကြုံအရ အကောင်းဆုံးသော လေ့လာရေးခရီးစဉ်ဟု ဆိုရမည်။

ဖိလစ်ပိုင်လေ့လာရေးခရီးစဉ်ကို လွန်ခဲ့သော ခြောက်လကျော်ကတည်းက နော်ဝေနိုင်ငံ၏ အစီအစဉ်ဖြင့် စီစဉ်ခဲ့သည်။ JMC (ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ) အတွက် ဖြစ်သည်။ လုံခြုံရေးအနေအထားကြောင့် JMC မှ ကိုယ်စားလှယ် (၆) ဦးသာသွားခွင့် ရသည်။ လုံခြုံရေးမကောင်း၍ တစ်ခုခုဖြစ်လျှင် မိမိကိုယ်ကိုယ် တာဝန်ယူပါသည်ဟူသော ဝန်ခံချက်ကိုလည်း ရေးပေးခဲ့ရသည်။ မိမိတို့သာမဟုတ် လိုက်လံပို့ဆောင်သော နော်ဝေနိုင်ငံမှ သံတမန်များလည်း အလားတူ စာများကို ရေးပေးခဲ့ရသည်။

ပဋိပက္ခဖြစ်နေသာ ဒေသများ၊ နှစ်ဖက်အဖွဲ့များ၊ ဖိလစ်ပိုင်တပ်မတော်နှင့် နိုင်ငံတကာအဖွဲ့အစည်းများအား တွေ့နိုင်အောင် ကြိုတင်စီစဉ်ရသည်။ အချိန်ယူရသည်။ သက်ဆိုင်ရာ (ဖိလစ်ပိုင်နိုင်ငံတွင်) လုံခြုံရေးအတွက် ခွင့်ပြုချက် အဆင့်ဆင့်ယူရသည်။ ခရီးစဉ်တွင် မိမိလိုက်ပါခွင့်ရရှိသဖြင့် လေ့လာခွင့်များ ရရှိခဲ့သည်။

မနီလာ၌ ငြိမ်းချမ်းရေးလုပ်ငန်းစဉ်တွင် ကူညီနေသော HD Center၊ ဖိလစ်ပိုင် အစိုးရဘက်မှ ငြိမ်းချမ်းရေးလုပ်ငန်းစဉ်တွင် အဓိကဆောင်ရွက်နေသော(OPAPP) The Office of the Presidential Adviser on the Peace Process(သမ္မတ၏ ငြိမ်းချမ်းရေးအကြံပေးရုံး) ဖိလစ်ပိုင်တပ်မတော်ကာကွယ်ရေးဦးစီးချုပ်၊ ထိပ်တန်းတပ်မတော်အရာရှိကြီးများနှင့် ဖိလစ်ပိုင်တပ်မတော်၏ Peace and Development Office(ငြိမ်းချမ်းရေးနှင့် ဖွံ့ဖြိုးရေးရုံး) ၊ MILF ခေါ် မိုရိုအစ္စလာမ်မစ် လွတ်မြောက်ရေးတပ်ဦး၏ ဦးဆောင်ဆွေးနွေးသူ(Chief Negotiator) စသူတို့နှင့် မနီလာတွင် တွေ့ဆုံဆွေးနွေးခွင့် ရခဲ့ပါသည်။

ထို့နောက်မင်ဒါနာအိုရှိ ကိုတာဘာတိုမြို့တွင် နိုင်ငံတကာမှ ကျွမ်းကျင်သူများ ပါဝင်သော Independent Decommissioning Body (လွတ်လပ်သော လက်နက်ဖျက်သိမ်း/ဖြုတ်သိမ်းရေးအဖွဲ့) ၊ IMT (International Monitoring Team) ခေါ် အပြည်ပြည်ဆိုင်ရာလေ့လာစောင့်ကြည့်ရေးအဖွဲ့၊ CCCH ခေါ် အပစ်အခတ်ရပ်စဲရေးအဖွဲ့များ (အစိုးရနှင့် MILF နှစ်ဖက်လုံး) ကို တွေ့ဆုံဆွေးနွေးနိုင်ခဲ့သည်။

ပို၍စိတ်ဝင်စားစရာကောင်းသည်မှာ ကိုတာဘာတိုရှိ 6ID ခေါ် ခြေမြန်တပ်မ (၆) နှင့် တွေ့ဆုံဆွေးနွေးခဲ့ရခြင်း ဖြစ်သည်။ 6ID သည် အထူးတပ်ဖွဲ့ဖြစ်ပြီး MILF နှင့် အစိုးရမဟုတ်သော အခြားလက်နက်ကိုင်များ၊ အကြမ်းဖက်သမားများကို တိုက်ခိုက်ရာတွင် နာမည်အကျော်ဆုံး အတိုက်ရဆုံး တပ် ဖြစ်သည်။ယခုအခါ ငြိမ်းချမ်းရေးလုပ်ငန်းစဉ်တွင် ရှေ့ဆုံးက ပါနေပြီဖြစ်သော တပ်မလည်း ဖြစ်သည်။ စစ်ပွဲမှသည် ငြိမ်းချမ်းရေးဆီသို့ အပြီးသတ်ကူးပြောင်းနိုင်ရေး ငြိမ်းချမ်းရေးရှေ့တန်းမှ တပ်ဖြစ်သည်။

ကိုတာဘာတိုမြို့မှာ ယခုတိုင် စစ်အုပ်ချုပ်ရေးအောက်တွင် ရှိနေဆဲဖြစ်ပြီး ည ၁၀ နာရီမှ နံနက် ၄ နာရီအထိ ‘ညမထွက်ရ’ အမိန့်အောက်တွင် ရှိနေပါသည်။

ကိုတာဘာတိုမြို့တွင် ပထမဆုံးကြားရသော တင်ပြမှုမှာ ဒေသဆိုင်ရာ လုံခြုံရေးအနေအထားကို ရှင်းပြမ ဖြစ်သည်။ တိုက်ခိုက်မှုအချိန်မရွေးဖြစ်နိုင်၍ ဖြစ်လာပါက မည်သည့်နေရာသို့ သွားရမည်၊ ရှောင်ရမည်၊ ရဲနှင့် တပ်တို့က မည်သို့ တုံ့ပြန်မည် စသည်တို့ကို ရှင်းပြရုံမက ကားပေါ်တွင် သွားနေသည့် အချိန်တွင်လည်း ပြတင်းပေါက် မဖွင့်ရန်၊ တစ်ဦးတည်း အပြင်မထွက်ရန် စသည့် တားမြစ်ချက်များလည်း ပါရှိသည်။

လမ်းပေါ်တွင်လည်း လုံခြုံရေးဂိတ်များ၊ စစ်ဆေးရန် ကားမှန်ကို ဖွင့်ရန်၊ ညဘက်ဆိုလျှင် ကားထဲမှ မီးကို စစ်ဆေးချိန်တွင် ဖွင့်ထားရန် စသော ဆိုင်းဘုတ်များကို စစ်ဆေးရေးဂိတ်များတွင် ကျယ်ကျယ်ပြန့်ပြန့် ရေးသားထားသည်ကိုတွေ့ရသည်။

အချုပ်ဆိုရသော ငြိမ်းချမ်းရေးသဘောတူညီချက်များအား အကောင်အထည်ဖော်မှု မည်မျှအောင်မြင်မည်၊ လက်ကျန်ပြဿနာများနှင့် အကြမ်းဖက်အဖွဲ့များကို ဘယ်လောက် အမြန်ဆုံးရှင်းနိုင်မည် ဆိုသော အချက်များကို စောင့်ကြည့်ရဦးမည် ဖြစ်သော်လည်း ဖိလစ်ပိုင်နိုင်ငံ၏ ငြိမ်းချမ်းရေးလုပ်ငန်းစဉ်သည် ရှေ့သို့ အများကြီးရောက်သွားပြီ ဖြစ်သည်။ ကျွန်တော်တို့ မသွားခင်အချိန်ကလေးမှာတင် BOL (Bangsamoro Organic Law) ခေါ် ဘန်ဆာမော်ရိုအခြေခံဥပဒေကို အတည်ပြုခဲ့ပြီး ဘန်ဆာမော်ရိုသဘောတူညီချက်အရ ကျွန်တော်တို့ ပြန်လာသော ဖေဖော်ဝါရီလ ၂၂ ရက်နေ့တွင် ဘန်ဆာမောရို အသွင်ကူးပြောင်းရေးအစိုးရ (BTA – Bangsamoro Transition Authority) ၏ ကျမ်းသစ္စာကျိန်ဆိုပွဲကို ဖိလစ်ပိုင်သမ္မတ နန်းတော်တွင် ကျင်းပခဲ့ပြီး သမ္မတဒူတာတေးကိုယ်တိုင် တက်ရောက်ခဲ့သည်။ အဆိုပါ အသွင်ကူးပြောင်းရေး အစိုးရအဖွဲ့အား MILF ဘက်မှ ၄၁ ဦးနှင့် ဖိလစ်ပိုင်အစိုးရဘက်မှ ၃၄ ဦးတို့ ပါဝင်ဖွဲ့စည်းထားခြင်း ဖြစ်သည်။ ယင်းအစိုးရသည် ၂၀၂၂ ခုနှစ်အထိ ရှိနေမည်ဖြစ်ပြီး ၂၀၂၂ ခုနှစ်တွင် ရွေးကောက်ပွဲလုပ်ကာ တက်လာသော အစိုးရက ဆက်လက်အုပ်ချုပ်သွားရမည် ဖြစ်သည်။

ဖိလစ်ပိုင်ခရီးစဉ်အတွင်း လေ့လာစရာများ၊ မှတ်သားစရာများ၊ အတုယူစရာများကို ရရှိခဲ့သည်။ အထူးသဖြင့် အစိုးရ၊ တပ်မတော်၊ မိုရိုအစ္စလာမ်မစ် လွတ်မြောက်ရေးတပ်ဦး (MILF) ၊ နိုင်ငံတကာအဖွဲ့အစည်းများ စသည်ဖြင့် တွေ့ဆုံခဲ့ရာတွင် အားလုံးက ရှင်းပြသည့် အချက်များမှာ ကွဲပြားခြားနားမှုမရှိဘဲ ရာနှုန်းပြည့်နီးပါး တူညီနေသည်ကို တွေ့ရသည်။

ဤသို့ပင်လျှင် အောင်မြင်သော လုပ်ငန်းတခု၏ ပြယုဒ်လားဟု ယူဆမိခဲ့ပါသည်။

ကြားသိခဲ့ရသော သင်ခန်းစာများကို ဆက်လက်ထုတ်နုတ် တင်ပြပါမည်။

(ဤဆောင်းပါးတွင် ပါဝင်သောအကြောင်းအရာများသည် မိမိ ကြားသိခဲ့ရသည်များကို တင်ပြခြင်းသာဖြစ်၍ ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ (JMC) အား ကိုယ်စားမပြုပါ။)

အောင်နိုင်ဦး

You may also like...

Leave a Reply

Your email address will not be published. Required fields are marked *