လွှတ်တော်နာယက ဖြုတ်ချရေးဂယက်

အခြေခံဥပဒေကို ပြင်ဆင်ရန် အာဏာရပါတီနှင့် အတိုက်အခံပါတီတို့က အပြိုင်ကြိုးပမ်းလာမှု၏ နောက်ဆက်တွဲအဖြစ် ၎င်းတို့ကြားထဲတွင်ရှိသည့် လွှတ်တော်နာယကတို့၏ ထိုင်ခုံကိုပါ သွား၍ထိပါးစေပြီ။

လက်ရှိ ပြည်ထောင်စုလွှတ်တော်၏ နာယကအဖြစ် တာဝန်ယူထားသူသည် တစ်ချိန်က တပ်မတော်နှင့် အလွမ်းသင့်သည့် ပြည်သူ့စစ်ခေါင်းဆောင်လည်းဖြစ်၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ဝင်လည်းဖြစ်၊ နောက်ပိုင်းတွင် အာဏာရ အမျိုးသားဒီမိုကရေစီအဖွဲ့ချုပ် (NLD) ပါတီနှင့် နီးစပ်လာသူလည်းဖြစ်သည့် ဦးတီခွန်မြတ်ဖြစ်သည်။ ဒုတိယနာယကသည် NLD မှ ဦးထွန်းထွန်းဟိန် ဖြစ်သည်။

၎င်းတို့ကို ဖြုတ်ချရန်တွေးတောလျက်ရှိသည်ဟု USDP က ကိုယ်စားလှယ် ဦးသိန်းထွန်းက မတ်လ ၅ ရက်နေ့တွင် မီဒီယာများသို့ ထုတ်ဖော်ပြောဆိုလိုက်ရာမှ ယခုကိစ္စများ ပေါ်ပေါက်လာခြင်းဖြစ်သည်။

ဦးသိန်းထွန်းသည် ဧရာဝတီတိုင်း ကျောင်းကုန်းမဲဆန္ဒနယ်မှ ပြည်သူ့လွှတ်တော်ကိုယ်စားလှယ်တစ်ဦးဖြစ်ပြီး ပြည်နယ်နှင့်တိုင်းများ၏ ဝန်ကြီးချုပ်များ ခန့်အပ်ခြင်းအတွက် အခြေခံဥပဒေပြဋ္ဌာန်းချက်ဖြစ်သည့် ပုဒ်မ ၂၆၁ ကို ပြင်ဆင်ရေးကို အခြားကိုယ်စားလှယ် ၁၄၃ ဦးနှင့်အတူ ဦးဆောင်တင်သွင်းထားသူလည်း ဖြစ်သည်။

USDP အပါအဝင် တပ်မတော်နှင့် တိုင်းရင်းသားကိုယ်စားလှယ်အချို့က ၂၀၀၈ ခုနှစ် ဖွဲ့စည်းပုံအခြေခံဥပဒေပါ အထက်ပါပုဒ်မကို ပြင်ဆင်ရန် ဥပဒေမူကြမ်းကို တင်သွင်းထားသည်။ တစ်ချိန်ထဲမှာပင် အခြေခံဥပဒေ ပြင်ဆင်ရေးအတွက် လေ့လာသုံးသပ်ရေးပူးပေါင်း ကော်မတီကို ၄၅ ဦးဖြင့် NLD က ဦးဆောင်ကာ ဖွဲ့စည်းထားသည်။

USDP က ဦးဆောင်တင်သွင်းထားသည့် အခြေခံဥပဒေပြင်ဆင်ရေးကိစ္စသည် ပုဒ်မတစ်ခုတည်းသာဖြစ်ရာ ကွက်၍ပြင်ဆင်မည်ဆိုပါက အခြားပြဋ္ဌာန်းချက်များနှင့် ရှေ့နောက်မညီ၊ လိုက်လျောမညီ ဖြစ်သွားမည့်အရေးများရှိနေခြင်းကြောင့် NLD ၏ ၄၅ ဦးကော်မတီက ဆောင်ရွက်နေသည့် လုပ်ငန်းစဉ်များထဲသို့ သွတ်သွင်းလိုက်သင့်သည်ဟု ပြည်ထောင်စုလွှတ်တော် ဥပဒေမူကြမ်းလေ့လာစိစစ်ရေး ပူးပေါင်းကော်မတီက သဘောထားမှတ်ချက်ပေးခဲ့သည်။

“ပုဒ်မ ၂၆၁ ကို ပြင်ဆင်မယ်ဆိုရင် ဆက်နွှယ်နေတဲ့ ပုဒ်မများကိုပါ ထည့်သွင်းစိစစ်ရန် လိုအပ်ကြောင်း တွေ့ရှိခဲ့ရပါတယ်” ဟု ကော်မတီအတွင်းရေးမှူး ဒေါက်တာ မြတ်ဉာဏစိုးက ပြောဆိုသည်။

ယင်းအဓိပ္ပာယ်က USDP က ဦးဆောင်ပြင်ဆင်လိုသည့်ကိစ္စကို ရှေ့ဆက်မလုပ်ဆောင်တော့ဘဲ ပြင်ဆင်ရေးအတွက် NLD ၏ နောင်လာမည့် အစီအစဉ်ကြီးနှင့်အတူ လုပ်ဆောင်ရန်ဖြစ်သည်။ ယင်းအပေါ် USDP အပါအဝင် တပ်မတော် သားများက မကျေနပ်။

အဆိုပါကိစ္စကို လွှတ်တော်တွင် ဆွေးနွေးခွင့်မရပါက အဓိကတာဝန်ရှိသည့် နာယကတို့ကို စွပ်စွဲပြစ်တင်ကာ ဖြုတ်ချရန်လုပ်ဆောင်မည်ဟု ကြိမ်းဝါးလိုက်ခြင်း ဖြစ်သည်။ မြန်မာ့လွှတ်တော်သမိုင်းတွင် ဥက္ကဋ္ဌများကို စွပ်စွဲပြစ်တင်၊ ဖြုတ်ချခဲ့ဖူးခြင်း မရှိပေ။

“အခု ဒီပြဿနာရဲ့အရင်းခံက အခြေခံဥပဒေကို ပြင်ရေး၊ မပြင်ရေး မဟုတ်ဘူး။ အခြေခံဥပဒေကို ပြင်ဖို့ပြဋ္ဌာန်းထားတဲ့ ဖွဲ့စည်းပုံအခြေခံဥပဒေပြဋ္ဌာန်းချက်တို့၊ ပြည်ထောင်စုလွှတ်တော်ဥပဒေတို့၊ နည်းဥပဒေတို့နဲ့အညီ ပြင်တာဟုတ်သလား၊ မဟုတ်သလား၊ သဘောကတော့ အခုဆောင်ရွက်မှုသည် ဥပဒေနဲ့အညီဆောင်ရွက်ချက် ဟုတ်သလား၊ မဟုတ်သလားဆိုတဲ့ ပြဿနာပဲ” ဟု ဦးသိန်းညွန့်က ဆိုသည်။

၎င်းသည် ဝါရင့်နိုင်ငံရေးသမားလည်းဖြစ်၊ ဥပဒေပညာရှင်လည်းဖြစ်သည်။ ယင်းအပြင် လွှတ်တော်ကိုယ်စားလှယ်ဟောင်းလည်းဖြစ်၊ အမျိုးသားဒီမိုကရေစီပါတီသစ် (NNDP) ပါတီ၏ ဥက္ကဋ္ဌလည်း ဖြစ်သည်။

“ဘယ်လိုဖြစ်လာမယ်ဆိုတာ ကျွန်တော်တို့ စောင့်ကြည့်ရမှာပေါ့” ဟု ၎င်းကဆိုသည်။

လွှတ်တော်နာယကများကို ဖြုတ်ချခြင်းအတွက် ဥပဒေ၊ လုပ်ထုံးလုပ်နည်းများ အဆင့်ဆင့်ရှိနေပြီး လွယ်ကူမည့်ပုံတော့ မပေါ်ပေ။ နာယကတို့သည် ပြည်သူ့လွှတ်တော်၏ ဥက္ကဋ္ဌနှင့် ဒုတိယဥက္ကဋ္ဌများဖြစ်ရာ အဆိုပါဥက္ကဋ္ဌနှင့် ဒုတိယဥက္ကဋ္ဌများကို စွပ်စွဲပြစ်တင်၊ ဖြုတ်ချခြင်းနည်းနာများအတိုင်း လုပ်ဆောင်ရမည်ဖြစ်သည်။

ပြည်သူ့လွှတ်တော်ဆိုင်ရာ ဥပဒေ ပုဒ်မ ၂၁ တွင် ယင်းကိစ္စနှင့်ပတ်သက်၍ ပြဋ္ဌာန်းထားသည်။ (က) နိုင်ငံတော်၏ ကျေးဇူးသစ္စာတော်ကို ဖောက်ဖျက်ခြင်း၊ (ခ) ဖွဲ့စည်းပုံအခြေခံဥပဒေပါ ပြဋ္ဌာန်းချက်များကို ဖောက်ဖျက်ကျူးလွန်ခြင်း၊ (ဂ) အကျင့်သိက္ခာပျက်ပြားခြင်း၊ (ဃ) ဥပဒေအရ ပေးအပ်သောတာဝန်များကို ကျေပွန်စွာ မဆောင်ရွက်ခြင်း စသည့် အကြောင်းလေးရပ်ဖြင့် ဥက္ကဋ္ဌများကို တာဝန်မှ ရပ်စဲနိုင်သည်။

ယခုဖြစ်စဉ်တွင် အခြေခံဥပဒေပြင်ဆင်သည့်ဥပဒေမူကြမ်းကို လွှတ်တော်အနေနှင့် လုံးဝလက်ခံဆွေးနွေး၊ ဆုံးဖြတ်ပေးရမည်ဟု အခြေခံဥပဒေပြဋ္ဌာန်းချက်များ၊ လွှတ်တော်ဆိုင်ရာဥပဒေ၊ နည်းဥပဒေနှင့် လုပ်ထုံးလုပ်နည်းများကို ကိုးကား ၍ USDP နှင့် တပ်မတော်က ပြောဆိုသည်။ အကယ်၍ ထိုသို့မဟုတ်ခဲ့ဘဲ ဆွေးနွေးခွင့်မရခဲ့လျှင် အခြေခံဥပဒေကို ကျော်လွန်လုပ်ဆောင်ခြင်း၊ ပေးအပ်သည့် တာဝန်မကျေခြင်းတို့အဖြစ် မှတ်ယူကာ စွပ်စွဲပြစ်တင်မည့်လက္ခဏာ ဖြစ်သည်။

သို့သော် စွပ်စွဲပြစ်တင်၊ ဖြုတ်ချခြင်းအတွက် လုပ်နည်းအဆင့်များက ကြားထဲတွင် ရှိနေသေးသည်။ ကနဦးအနေနှင့် ကိုယ်စားလှယ် လေးပုံတစ်ပုံက လက်မှတ်ရေးထိုးတင်ပြရမည်ဖြစ်ပြီး ယင်းကို လွှတ်တော်တွင် ဆွေးနွေးပြီး မဲခွဲဆုံးဖြတ်ရ မည်ဖြစ်ကာ သုံးပုံနှစ်ပုံကျော်က ထောက်ခံရန် လိုအပ်သည်။

ပြည်ထောင်စုလွှတ်တော်တွင် NLD က ၅၈ ရာခိုင်နှုန်းကျော် (တစ်နည်းအားဖြင့် ထက်ဝက်ကျော်) ရှိနေရာ USDP ၏ အဆိုကို သုံးပုံနှစ်ပုံကျော်က ထောက်ခံရန်မှာ အလားအလာနည်းပါးနေသည်။ အကယ်၍ ထောက်ခံသည်ဆိုလျှင်လည်း နောက်တစ်ဆင့် ဆက်သွားရမည်။ ဥက္ကဋ္ဌများကို စွပ်စွဲပြစ်တင်ရေးအတွက် လွှတ်တော်ကိုယ်စားလှယ်များ ပါဝင်သည့် စုံစမ်းစစ်ဆေးရေးအဖွဲ့ကို ဖွဲ့စည်းရမည်။ ယင်းအဖွဲ့က စစ်ဆေးတွေ့ရှိချက်များကို အစီရင်ခံစာပြုစုရမည်ဖြစ်သည်။ အကယ်၍ အစီရင်ခံစာက စွပ်စွဲပြစ်တင်ရန်သင့်သည်ဟု ဆိုမှသာ လွှတ်တော်တွင် နောက်တစ်ကြိမ် မဲခွဲဆုံးဖြတ်ရမည်ဖြစ်သည်။ သုံးပုံနှစ်ပုံက ယင်းကိစ္စကို ထောက်ခံမှသာ ဥက္ကဋ္ဌများကို ဖြုတ်ချနိုင်မည်ဖြစ်သည်။

ယင်းကိစ္စအတွက် တစ်စုံတရာ မှတ်ချက်မပေးလိုဟု ဒုတိယဥက္ကဋ္ဌ ဦးထွန်းထွန်းဟိန်က ပြောဆိုထားသည်။ လွှတ်တော်အတွင်းက ကိုယ်စားလှယ်များ၏ ဆန္ဒအပေါ်မူတည်သည်ဟု ၎င်းက ဆိုသည်။

လွှတ်တော်တွင် NLD ကိုယ်စားလှယ်များက ထက်ဝက်ကျော်ရှိရာ ၎င်းတို့ ဆန္ဒမပါဘဲ မဖြစ်နိုင်။

သို့သော် မကြာသေးခင်ရက်ပိုင်းက သူရဦးရွှေမန်းကော်မရှင်ကို လွှတ်တော်က ရပ်ဆိုင်းလိုက်သည့်ဖြစ်ရပ်နှင့် ချိတ်ဆက်စဉ်းစားလျှင် လွှတ်တော်နာယက ဦးတီခွန်မြတ်၏ထိုင်ခုံသည် ပူနွေးနေမည်ဖြစ်သည်။

၎င်းသည် NLD ပါတီမှ မဟုတ်ဘဲ လွှတ်တော်အကြီးအကဲနေရာကို ရရှိထားသူဖြစ်သည်။
သူရဦးရွှေမန်း ဥက္ကဋ္ဌအဖြစ် ဆောင်ရွက်သည့် ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်ကို တပ်မတော်က အတန်တန် ကန့်ကွက်နေသည့်ကြားမှ ပြီးခဲ့သည့် ကာလတစ်လျှောက် လုံးတွင် NLD က ခွင့်ပြုထားခဲ့ပြီး သူရဦးရွှေမန်း၏ မျက်နှာကို ထောက်ရှုခဲ့သည်။ တစ်ပြိုင်နက်ထဲမှာပင် ၎င်း၏ လူယုံနှင့် လုပ်ဖော်ကိုင်ဖက်ဖြစ်သည့် ဦးတီခွန်မြတ်ကိုလည်း ပြည်သူ့လွှတ်တော်တွင် ဒုတိယ ဥက္ကဋ္ဌအဖြစ် ရွေးချယ်ခဲ့သည်။
နောက်ပိုင်းတွင် ဥက္ကဋ္ဌဖြစ်သည့် ဦးဝင်းမြင့်က နိုင်ငံတော်သမ္မတဖြစ်လာသည့်အခါ ဒုတိယဥက္ကဋ္ဌ ဦးတီခွန်မြတ်သည် ဥက္ကဋ္ဌ ဖြစ်လာသည်။

ယခုမူ အခြေအနေများက ပြောင်းလဲသွားခဲ့ပြီ။ သူရဦးရွှေမန်းကော်မရှင်ကို NLD ကြီးစိုးသည့် လွှတ်တော်က ဖျက်သိမ်းလိုက်ပြီ။ ယင်းက နှစ်ဦးနှစ်ဖက် ကြိုတင်အသိပေး၊ ညှိနှိုင်းခြင်းမရှိဘဲ ရုတ်တရက် လုပ်ဆောင်လိုက်ခြင်းဖြစ်ပြီး သူရဦးရွှေမန်းကို အရှိုက်ထိသွားစေသကဲ့သို့ NLD နှင့် ၎င်းအကြားက ဆက်ဆံရေးကိုပါ ထိခိုက်သွားစေခဲ့သည်။

ဦးတီခွန်မြတ်သည် သူရဦးရွှေမန်းဘက်က လူဖြစ်ရာ NLD အနေနှင့် ဦးတီခွန်မြတ်ကို အကာကွယ်ပေးပါမည်လော။

“စိုးရိမ်မယ်ဆိုရင် သူလည်း စိုးရိမ်စိတ်တော့ ရှိနိုင်တာပေါ့” ဟု နိုင်ငံရေးလေ့လာသုံးသပ်သူလည်းဖြစ်၊ လွှတ်တော်ကိုယ်စားလှယ်ဟောင်းလည်းဖြစ်သည့် ဦးရဲထွန်းက ဆိုသည်။

ပြည်ထောင်စုလွှတ်တော် နာယကလည်းဖြစ်၊ ပြည်သူ့လွှတ်တော်ဥက္ကဋ္ဌလည်းဖြစ်သည့် ဦးတီခွန်မြတ်ကမူ သူ၏လုပ်ရပ်များနှင့်ပတ်သက်၍ မတ်လ ၈ ရက်နေ့ အစည်းအဝေးတွင် လွှတ်တော်သို့ ရှင်းလင်းပြောဆိုခဲ့သည်။ နာယကအနေနှင့် အခြေခံဥပဒေအပါအဝင် လွှတ်တော်ဥပဒေများ၊ လုပ်ထုံးလုပ်နည်းများ၊ အစဉ်အလာများ၊ ကိုယ်ပိုင်အတွေ့အကြုံများကို အခြေခံ၍ အားလုံးကို ဥပဒေနှင့်အညီသာ လုပ်ဆောင်ခဲ့ခြင်းဖြစ်သည်ဟု ဆိုသည်။

လက်ရှိတွင် မတ်လ ၅ ရက်နေ့က တင်သွင်းခဲ့သည့် ဥပဒေမူကြမ်းလေ့လာစိစစ်ရေး ပူးပေါင်းကော်မတီ၏ အစီရင်ခံစာနှင့် ပတ်သက်၍ တပ်မတော်နှင့် USDP ကိုယ်စားလှယ်များအပါအဝင် ကိုယ်စားလှယ်များက တုံ့ပြန်ဆွေးနွေးကြဦးမည်ဖြစ်ည်။ ယင်းအတွက် စံချိန်တင်ပမာဏဖြစ်သည့် ကိုယ်စားလှယ် ၆၀ ကျော်က ဆွေးနွေးရန် စာရင်းပေးသွင်းထားပြီး မတ်လ ၈ ရက်နေ့တွင် ကိုယ်စားလှယ် ၁၆ ဦးက ဆွေးနွေးကာ ကျန်လူများအနေနှင့် လာမည့်တစ်ပတ်အစည်းအဝေး များတွင် ဆက်လက်ဆွေးနွေးရန်ဖြစ်သည်။ အဆိုပါ ဆွေးနွေးမှုများ ပြီးပြတ်လျှင် USDP က တင်သွင်းသည့် အခြေခံဥပဒေပြင်ဆင်ရေး ဥပဒေမူကြမ်းကို လွှတ်တော်က လက်ခံဆွေးနွေး၊ မဆွေးနွေး အဖြေထွက်မည်ဖြစ်သည်။

ပထမနေ့ ဆွေးနွေးမှုများတွင် တပ်မတော်သား ကိုယ်စားလှယ်များနှင့် USDP ကိုယ်စားလှယ်များက ယခုကိစ္စကို ပြန်လည်သုံးသပ်ရန် လွှတ်တော်နာယကကို ပန်ကြားလိုက်သည်။ တစ်ချိန်တည်းမှာပင် အခြေခံဥပဒေကို ကျော်လွန် လျက်ရှိနေပြီဟု သတိလည်းပေးလိုက်သည်။

အခြေခံဥပဒေနှင့်အညီ လုပ်ဆောင်ရန် သမ္မတဦးသိန်းစိန်လက်ထက်က တန်ခိုးထွားခဲ့သည့် သမ္မတရုံး ဝန်ကြီးဟောင်းလည်းဖြစ်၊ လက်ရှိတွင် ကယားပြည်နယ် မဲဆန္ဒနယ်အမှတ် (၉) မှ အမျိုးသားလွှတ်တော်ကိုယ်စားလှယ်လည်းဖြစ်သူ ဦးစိုးသိန်းက တိုက်တွန်းသည်။ တပ်မတော်သားကိုယ်စားလှယ်ဖြစ်သူ ဗိုလ်မှူးကျော်စိုးဦးကလည်း ၄၅ ဦးကော်မတီထဲသို့ သွတ်သွင်းလိုသည့် ဥပဒေမူကြမ်းလေ့လာစိစစ်ရေး ပူးပေါင်းကော်မတီ၏ သဘောထားသည် လုံးဝလက်ခံနိုင်ဖွယ်မရှိဟု အားမာန်အပြည့်ဖြင့် ဆွေးနွေးပြောဆိုခဲ့သည်။

NLD ကြီးစိုးထားသည့် လွှတ်တော်နာယကများကို ဖြုတ်ချရေးအတွက် USDP က အဆိုတင်သွင်းမည့်ကိစ္စတွင် ရလဒ်အနေနှင့် အရှုံးဖြင့်ကြုံနိုင်သော်လည်း ယခုကိစ္စတွင် အနိုင်ရရှိခြင်း၊ မရရှိခြင်းက အဓိကမဟုတ်။ ဥပဒေကြောင်းအရ မှန်ကန်မှု၊ မမှန်ကန်မှုသာ အရေးကြီးသည်ဟု ဦးသိန်းညွန့်က ဆိုသည်။

“နိုင်ဖို့မနိုင်ဖို့က ပြဿနာမဟုတ်ဘူး။ ကိုယ်မှန်လား မမှန်လား၊ ကိုယ်ဥပဒေနဲ့ ညီလား၊ မညီလား။ ကိုယ်မှန်ကန်တယ်၊ ကိုယ်ဥပဒေနဲ့ညီရင် တင်ရမှာ ကိုယ့်တာဝန်ပဲ” ဟု ၎င်းကဆိုသည်။ 

 

အောင်မျိုးထက်

You may also like...

Leave a Reply

Your email address will not be published. Required fields are marked *