အစိုးရကို မထီမဲ့မြင်ပြုမှုနှင့် သတင်းဖြန့်ချိမှုကို တားမြစ်သည့် ဥပဒေ ရုရှားပါလီမန် ပြဋ္ဌာန်း

မော်စကို၊ မတ် ၈

ရုရှားအစိုးရကို မထီမဲ့မြင်ပြုမှုနှင့် သတင်းအမှားဖြန့်သူများကို အရေးယူမည့် ဥပဒေနှစ်ရပ်ကို ရုရှားပါလီမန်က ပြဋ္ဌာန်းလိုက်ကြောင်း ဘီဘီစီသတင်းတွင် ဖော်ပြထားသည်။

ရုရှားပါလီမန်က မတ်လ ၇ ရက်နေ့က ပြဋ္ဌာန်းလိုက်သည့် ဥပဒေအရ ရုရှား နိုင်ငံ၊ ရုရှားအစိုးရတာဝန်ရှိသူနှင့် ရုရှားလူ့အဖွဲ့အစည်းကို သိသာထင်ရှားစွာ မထီမဲ့မြင့်ပြုလုပ်ခြင်းကို တားမြစ်ထားပြီး ပြစ်မှုကျူးလွန်သူကို ထောင်ဒဏ် ၁၅ ရက်ချမှတ်နိုင်မည့် ဥပဒေကို အတည်ပြုခဲ့သည်။

နောက် ဥပဒေအရ အများပြည်သူအကျိုးစီးပွားနှင့် သက်ဆိုင်သည့် သတင်းများတွင် သတင်းအမှားဖြန့်ချိမှုကို တားမြစ်ထားသည်။

အဆိုပါ ဥပဒေကို ရုရှားအထက်လွှတ်တော်က အတည်ပြုပြီးပါက ရုရှား သမ္မတပူတင်က လက်မှတ်ထိုးအတည်ပြုဖွယ် ရှိသည်။

ရုရှားအောက်လွှတ်တော်က အတည်ပြုလိုက်သည့် အဆိုပါဥပဒေများနှင့် ပတ်သက်၍ ရုရှားအစိုးရဝန်ကြီးများ၊ ဂျာနယ်လစ်များ၊ လူ့အခွင့်အရေးလှုပ်ရှားသူများက ဆန့်ကျင်ကြောင်း ပြောကြားခဲ့ကြသည်။

“ဒီလိုအရိုင်းအစိုင်းဥပဒေမျိုးက ဂျာနယ်လစ်တွေ ပြောဖို့၊ ရေးဖို့ ကြောက်ရွံ့နေအောင် လုပ်လိုက်တာဖြစ်တယ်”ဟု ရုရှားအစိုးရက ဖွဲ့စည်းထားသော လွှတ်တော်၊ အစိုးရ၏ လုပ်ရပ်များကို စောင့်ကြည့်ရေး အဖွဲ့တစ်ခုဖြစ်သည့် ‘အရပ်ဘက်အဖွဲ့’အဖွဲ့ဝင်လည်း ဖြစ် ဂျာနယ်လစ်တစ်ဦးလည်း ဖြစ်သည့် နီကိုလိုင်ဆဗန်ဇီက ပြောကြားသည်။

ထို့ပြင် အဆိုပါဥပဒေသည် ရုရှားအစိုးရကို ဝေဖန်သည့် အွန်လိုင်းသတင်းဝက်ဘ်ဆိုက်များနှင့် ဘလော့ခ်များကို ခြိမ်းခြောက်မှုဖြစ်ကြောင်း ရုရှားထုတ်စီးပွားရေးသတင်းစာတစ်ခုက ဝေဖန်ခဲ့သည်။

အစိုးရကို မထီမဲ့မြင်ပြုသည့် ဥပဒေအရ ပထမအကြိမ်ကျူးလွန်သူကို ရုရှားရူဘယ်ငွေ ၁၀၀,၀၀၀ (အမေရိကန်ဒေါ်လာ ၁,၅၀၀) ချမှတ်နိုင်ပြီး ထပ်မံကျူးလွန်ပါက မူလငွေဒဏ်ထက် နှစ်ဆ သို့မဟုတ် သုံးဆ သို့မဟုတ် ထောင်ဒဏ် ၁၅ ရက်ထိ ချမှတ်နိုင်မည်ဖြစ်သည်။

သတင်းအမှားဖြန့်ချိမှုကို တားမြစ်သည့် ဥပဒေအရ ရုရှားရူဘယ်ငွေ ၃၀၀,၀၀၀ မှ ၁သန်းအထိ ချမှတ်နိုင်မည်ဖြစ်ကြောင်း အဆိုပါသတင်းတွင် ဖော်ပြထားသည်။    

You may also like...

Leave a Reply

Your email address will not be published. Required fields are marked *