တက္ကသိုလ်ဝင်တန်း စာမေးပွဲကာလအတွင်း စည်ပင်ရွေးကောက်ပွဲ မဲဆွယ်ချိန်ကန့်သတ်

ရန်ကုန်၊ မတ် ၈

ရန်ကုန်စည်ပင်ရွေးကောက်ပွဲ အတွက် မဲဆွယ်စည်းရုံးရေး စတင်နေသည့် ကိုယ်စားလှယ်များသည် တက္ကသိုလ်ဝင်တန်း စာမေးပွဲ ဖြေဆိုနေသည့်ကာလအတွင်း နံနက် ၆ နာရီမှ ည ၆နာရီအထိသာ မဲဆွယ်စည်းရုံးရန် အချိန်သတ်မှတ်ထားကြောင်း စည်ပင်ရွေးကောက်ပွဲကော်မရှင်ဥက္ကဋ္ဌ ဦးအောင်ခိုင်က ဆိုသည်။

တက္ကသိုလ်ဝင်စာမေးပွဲကို မတ်လ ၆ ရက်နေ့မှ ၁၆ ရက်နေ့အထိ ကျင်းပနေသောကြောင့် စည်ပင်ရွေးကောက်ပွဲ မဲဆွယ်စည်ရုံးသတ်မှတ်ထားသည့် ရက်နှင့် တိုက်ဆိုင်နေသဖြင့် အချိန်ကန့်သတ်ရခြင်းဖြစ်ကြောင်း ၎င်းက ရှင်းပြသည်။

စည်ပင်ရွေးကောက်ပွဲ ဝင်ရောက်ယှဉ်ပြိုင်သည့် ကိုယ်စားလှယ်လောင်းများကို ဖေဖော်ဝါရီလ ၂၈ ရက်မှ မတ်လ ၂၉ ရက်အထိ မဲဆွယ်စည်းရုံးရန် ရက်သတ်မှတ်ပေးထားကြောင်း ရန်ကုန်စည်ပင်ရွေးကောက်ပွဲကော်မရှင်ထံမှ သိရသည်။

မဲဆွယ်ကာလအတွင်းကိုယ်စားလှယ်လောင်းအချို့က ည ၁၀ နာရီခန့်အထိ မဲဆွယ်စည်ရုံးခွင့်ပြုရန် ကော်မရှင်ရုံးသို့ တင်ပြထားပြီး မတ်လ ၁၆ရက် နောက်ပိုင်းမှသာ ထိုသို့ မဲဆွယ်ရန်ညွှန်ကြားထားကြောင်း ကော်မရှင်ဥက္ကဋ္ဌဦးအောင်ခိုင်က ဆိုသည်။

“မဲဆွယ်စည်းရုံးမယ့် သူတွေကို ပြောထားတာကတော့ အများပြည်သူအနှောင့်အယှက် မဖြစ်စေဖို့။ မဲဆွယ်စည်းရုံးခွင့် ညွှန်ကြားလွှာကို ၂/၂၀၁၉ ကို တစ်ယောက်ချင်းစီကို ပေးလိုက်တယ်” ဟု ၎င်းက ဆိုသည်။

မဲဆန္ဒနယ်တစ်ခုတည်းသို့ ကျရောက်နေသည့် မြို့တော်ကော်မတီဝင်၊ မြို့နယ်ဥက္ကဋ္ဌ၊ အဖွဲ့ဝင် (၁) နှင့် အဖွဲ့ဝင် (၂) ကိုယ်စားလောင်း လေးဦးစုပြုံ၍  ရပ်ကွက်တစ်ခုထဲတွင် မဲ မဆွယ်ရန်လည်း ရွေးကောက်ပွဲကော်မရှင်က ညွှန်ကြားထားကြောင်း  ဥက္ကဋ္ဌဦးအောင်ခိုင်က ဆိုသည်။

ကိုယ်စားလှယ်လောင်းများသည် မဲဆွယ်စည်းရုံးခြင်းကြောင့် အများပြည်သူအနှောင့်အယှက်မဖြစ်ရန်၊ လမ်းပိတ်ဆို့မှု၊ ပတ်ဝန်းကျင်ညစ်ညမ်းမှု၊  ရုန်းရင်းဆန်ခတ်မှု စသည်တို့ ဖြစ်ပွားပါက ယင်းကိစ္စအားလုံးကို တာဝန်ယူရမည်ဟု ကတိခံဝန်ချက်လက်မှတ်ထိုးခိုင်းထားကြောင်း ၎င်းက ဆက်လက်ပြောကြားသည်။

တက္ကသိုလ်ဝင်တန်းစာမေးပွဲများ ရှိသောကြောင့် စည်ပင်ရွေးကောက်ပွဲနှင့်  သက်ဆိုင်သည့် စကားဝိုင်းများကို စာမေးပွဲချိန်ကာလအတွင်း ရပ်နားထားရကြောင်း ယင်းစကားဝိုင်းစီစဉ်သူ မဲဆန္ဒနယ် (၃) မှ မြို့တော်ကော်မတီဝင်အဖြစ် ဝင်ရောက်ယှဉ်ပြိုင်မည့် ဦးဝင်းချိုက ဆိုသည်။

ကိုယ်စားလှယ်အချို့သည် ဖေဖော်ဝါရီလ ၂၈  ရက်မှစ၍ စတင်မဲဆွယ်နေသော်လည်း ရွေးကောက်ပွဲကော်မရှင်က သတ်မှတ်ထားသည့် စည်းမျဉ်းနှင့် အညီ မဲဆွယ်နိုင်ရေးကြိုတင်အစီအစဉ်ရေးဆွဲကာ မဲဆွယ်ရန် စီစဉ်နေကြောင်း မဲဆန္ဒ နယ် (၃) မှ မြို့တော်ကော်မတီဝင်အဖြစ် ဝင်ရောက်ယှဉ်ပြိုင်မည့် အလှမယ်ထက်ထက်ထွန်းက မဲဆွယ်မည့်အစီအစဉ်ကို ပြောကြားသည်။  

You may also like...

Leave a Reply

Your email address will not be published. Required fields are marked *