စည်ပင်ရွေးကောက်ပွဲအတွက် ဒုတိယအကြိမ် မဲဆန္ဒရှင်စာရင်း မတ်လ ၁၅ ရက် ထုတ်ပြန်မည်

ရန်ကုန်၊ မတ် ၈

ရန်ကုန်စည်ပင်ရွေးကောက်ပွဲတွင် ဆန္ဒမဲပေးခွင့်ရှိသည့် လူဦးရေစာရင်းကို ဒုတိယအကြိမ်အဖြစ် မတ်လ ၁၅ ရက်တွင် ထုတ်ပြန်မည်ဖြစ်ကြောင်း ရန်ကုန်စည်ပင်ရွေးကောက်ပွဲကော်မရှင် ဥက္ကဋ္ဌဦးအောင်ခိုင်က ဆိုသည်။

ပထမအကြိမ် ဆန္ဒမဲပေးခွင့်ရှိသူများ စာရင်းကို သက်ဆိုင်ရာစည်ပင်ရွေးကောက်ပွဲ ကော်မရှင်ရုံးခွဲများတွင် ဖေဖော်ဝါရီလ ၂၇ ရက်မှ မတ်လ ၅ ရက်အထိ ကြေညာခဲ့ပြီး ယင်း ကာလအတွင်း အမည်မပါရှိခြင်း၊ အချက်အလက် မှားယွင်းခြင်းများကို ပြင်ဆင်ကန့်ကွက်ရန် စာရင်းကောက်ယူခဲ့ကြောင်း စည်ပင်ရွေးကောက်ပွဲကော်မရှင်ထံမှ သိရှိရသည်။

အမှားပြင်ဆင်ဖြည့်စွက်ခြင်းများကို မတ်လ ၆ ရက်မှ ၁၄ ရက်အထိ ဆောင်ရွက်ပြီး မတ်လ ၁၅ ရက်နေ့တွင် နောက်ဆုံးအကြိမ်အဖြစ် ထုတ်ပြန်ပေးရန် စီစဉ်နေကြာင်း ဥက္ကဋ္ဌဦးအောင်ခိုင်က ရှင်းပြသည်။

“ပြန်ပြင်လိုက်တဲ့ မဲစာရင်းကို ပြန်ကပ်မယ်။ Second time နဲ့ Final  ပေါ့”  ၎င်းက ဆိုသည်။

ပထမအကြိမ်ထုတ်ပြန်သည့်မဲဆန္ဒ ရှင်စာရင်းတွင်နာမည်မှားယွင်းခြင်း၊မှတ်ပုံတင်နံပါတ် မှားယွင်းခြင်းများပြန်လည် ပြင်ဆင်ပေးရန်တင်ပြကြမှုများရှိပြီးမဲဆန္ဒ ရှင်အမည်စာရင်းတွင်မပါဝင်သူများကိုပုံစံ၃ဖြင့်ဖြည့်စွက်ကာမှတ်တမ်းယူထား ကြောင်းရွေးကောက်ပွဲကော်မရှင်ဥက္ကဋ္ဌဦးအောင်ခိုင်က ဆိုသည်။

အချို့မဲရုံများတွင် မဲဆန္ဒရှင်စာရင်းပြင်ဆင်ရန် စာရင်းပေးသူ ၁၀ ဦးခန့်သာ ရှိသော်လည်း အချို့မဲရုံများတွင်မူ ၁၀၀ ခန့်အထိ ပြင်ဆင်ရန် လာရောက်တင်ပြကြကြောင်း ၎င်းက ရှင်းပြသည်။

“အကုန်မှန်တယ်။ နာမည်စာရင်းငါးခုမှာ တစ်ခုပဲ နည်းနည်းမှားလို့ ပြင်လိုက်ရတယ်” ဟု ဒဂုံမြို့သစ် (မြောက်ပိုင်း) မြို့နယ်တွင် နေထိုင်သည့် ဒေါ်ချိုချိုမြင့်က ဆိုသည်။

မတ်လ ၃၁ ရက်တွင် ကျင်းပမည့် စည်ပင်ရွေးကောက်ပွဲကို အသက် ၁၈ နှစ် ပြည့်ပြီး သက်ဆိုင်ရာမြို့နယ်တွင် တစ်နှစ်တိတိ နေထိုင်သူများ မဲပေးခွင့်ရရှိမည်ဖြစ်ကြောင်း ရန်ကုန်စည်ပင်ရွေးကောက်ပွဲ  နည်းဥပဒေတွင် ပြဋ္ဌာန်းထားသည်။

ရန်ကုန်စည်ပင်ရွေးကောက်ပွဲတွင် ဆန္ဒမဲပေးခွင့်ရှိသူ စုစုပေါင်း ၃ ဒသမ ၄ သန်း ရှိကြောင်း စည်ပင်ရွေးကောက်ပွဲကော်မရှင်က သတင်းထုတ်ပြန်ထားသည်။

You may also like...

Leave a Reply

Your email address will not be published. Required fields are marked *