လူကို လှန့်နေသည့် ဝက်ရောဂါ

The Voice

ဝက်အပြင်းဖျားရောဂါဂယက်က မြန်မာနိုင်ငံသို့ ရိုက်ခတ်လျက်ရှိသည်။ ယခုရက်ပိုင်းအတွင်း ဝက်နှင့် ဝက်ထွက်ပစ္စည်းများကို စားသောက်ရန် မြန်မာပြည်သူများ မဝံ့မရဲ ဖြစ်ကြရသည်။

အိမ်နီးချင်းတရုတ်နှင့် ဗီယက်နမ်နိုင်ငံတို့ရှိ ဝက်များတွင် ကူးစက်ပျံ့နှံ့ဖြစ်ပွားနေသော အာဖရိကဝက်အပြင်းဖျားရောဂါ  (African Swine Fever) ၏ဂယက်ရိုက်ခတ်နေခြင်း ဖြစ်သည်။

မြန်မာနိုင်ငံတွင်လည်း ရောဂါကူးစက်ပျံ့နှံ့မှုမဖြစ်စေရန် ဝက်နှင့် ဝက်ထွက်ပစ္စည်းများဖြစ်သော ဝက်သား၊ အေးခဲသား၊ ဝက်ပေါင်ခြောက်၊ ဝက်အူချောင်းနှင့် အခြားဝက်ထွက်ပစ္စည်းများကို လေဆိပ်၊ ရေဆိပ်၊ နယ်စပ်ဂိတ်များထံမှ မဝင်ရောက်လာစေရန် တားဆီးကန့်သတ်နေပြီဖြစ်သည်။

တရုတ်နိုင်ငံယူနန်ပြည်နယ်အတွင်း ဖြစ်ပွားနေသော အာဖရိကဝက်အပြင်းဖျားရောဂါမှာ မြန်မာ၊ လာအို၊ ကမ္ဘောဒီးယားနှင့် ဗီယက်နမ်နိုင်ငံတို့သို့ ကူးစက်ခံရနိုင်ဖွယ်ရှိကြောင်း ကုလသမဂ္ဂစားနပ်ရိက္ခာနှင့် စိုက်ပျိုးရေးအဖွဲ့ (FAO) က သတ်မှတ်ထားသည်။ လက်ရှိဗီယက်နမ်တွင် ဝက်များ ကူးစက်ခံနေရပြီဖြစ်သည်။

သို့သော် အာဖရိကဝက်အပြင်းဖျားရောဂါမှာ လူကို ကူးစက်တတ်သောရောဂါ မဟုတ်ဟု ကမ္ဘာ့တိရစ္ဆာန်ကျန်းမာရေးအဖွဲ့က တရားဝင်ထုတ်ပြန်ကြေညာထားကြောင်း မွေးမြူရေးနှင့် ကုသရေးဦးစီးဌာနမှ ညွှန်ကြားရေးမှူးချုပ်ဒေါက်တာရဲထွန်းဝင်းက ပြောဆိုထားသည်။

ထို့ကြောင့်မြန်မာပြည်သူများအနေနှင့် ဝက်သားကို စနစ်တကျချက်ပြုတ်စားသောက်နိုင်ပြီး မစိုးရိမ်ကြရန် မွေးမြူရေးနှင့် ကုသရေးဦးစီးဌာန၊ ကာကွယ်ဆေးထုတ်လုပ်ရေးနှင့် ရောဂါထိန်းချုပ်ရေးဌာနခွဲမှ ညွှန်ကြားရေးမှူး ဒေါက်တာမင်းသိန်းမော်က ပြောဆိုသည်။

“ဒီရောဂါနဲ့ ပတ်သက်ရင်တော့(ဝက်သားကို) စိတ်ချလက်ချစားလို့ ရပါတယ်”

အဆိုပါရောဂါမှာ ဗိုင်းရပ်စ်ပိုးတစ်မျိုးကြောင့်ဖြစ်ပြီး ဝက်အချင်းချင်း ကူးစက်ကာ သေဆုံးနှုန်း ၁၀၀ ရာခိုင်နှုန်း ရှိသည်။ ထို့ကြောင့် ဝက်မွေးမြူရေးလုပ်ငန်းလုပ်ကိုင်သူများအတွက် စီးပွားရေးအရ ဆုံးရှုံးနစ်နာမှုများဖြစ်နိုင်၍ ယခုကဲ့သို့ နိုင်ငံအတွင်း ကူးစက်ဝင်ရောက်မှု မရှိရန် တားမြစ်ခြင်းဖြစ်ကြောင်းလည်း ၎င်းက ပြောကြားသည်။

ရောဂါပိုးကူးစက်ခံရသော ဝက်များတွင် ခြေလက်အဆစ်ရောင်ခြင်း၊ အရေပြားအနာဖြစ်ခြင်း၊ အရေပြား (နားရွက်၊ အမြီး၊ ဝမ်းဗိုက်) နီရဲခြင်း၊ ကိုယ်ပူချိန်မမှန်ခြင်း၊ အစာအနည်းငယ်သာ စားခြင်း၊ အလေးချိန်လျော့ကျခြင်း၊ ပျို့အန်ခြင်း၊ သွေးဝမ်းသွားခြင်း၊ ဇီးဝက်များတွင် သားလျှောခြင်းတို့ ဖြစ်တတ်ကြောင်း မွေးမြူရေးနှင့် ကုသရေးဦးစီးဌာနထံမှ သိရသည်။

ထို့ပြင် အဆိုပါဗိုင်းရပ်စ်မှာ သက်တမ်းအားဖြင့် တစ်လကြာရှင်သန်နိုင်ပြီး ရောဂါဖြင့် သေဆုံးသွားသော ဝက်၏ အသား၊ အညစ်အကြေး၊ ဝက်ထွက်ပစ္စည်းများ၊ အေခဲအသား၊ မွှားကောင်၊ ယင်ကောင်နှင့် ဆေးထိုးအပ်ကဲ့သို့ ပစ္စည်းများ၊ ရောဂါပိုးနှင့် ထိတွေ့မိသော လူ၏ အသုံးအဆောင်ပစ္စည်းများမှ တစ်ဆင့်လည်း ဝက်များထံသို့ ကူးစက်နိုင်ကြောင်း ဒေါက်တာမင်းသိန်းမော်က ပြောကြားသည်။

ထို့ပြင် ဝက်နားရွက်ပြာရောဂါ၊ ဝက်ဝမ်းကျရောဂါများနှင့် အခြားသောရောဂါများနှင့် လက္ခဏာဆင်တူသောကြောင့် မြင်ရုံဖြင့် ရောဂါအတည်ပြုနိုင်ရန် ခက်ခဲပြီး ဓာတ်ခွဲခန်းဖြင့် စစ်ဆေးမှသာ သိရှိနိုင်မည်ဖြစ်သည်။

တရုတ်နိုင်ငံတွင် အဆိုပါရောဂါဖြစ်ပွားနေသည်မှာ ၂၀၁၈ ခုနှစ် ဩဂုတ်လကတည်းက ဖြစ်သည်။ ထို့ကြောင့် မြန်မာနိုင်ငံတွင်လည်း စက်တင်ဘာလကစတင်၍ မွေးမြူရေးနှင့် ကုသရေးဦးစီးဌာနက ပြည်ပမှကုန်ပစ္စည်းတင်သွင်းမှု အများဆုံးနယ်စပ်ဂိတ်တို့ ဖြစ်သည့် လားရှိုးနှင့် မူဆယ်ဂိတ်များတွင် အသိပညာပေးခြင်း၊ သတိပေးဆိုင်းဘုတ်စိုက်ထူခြင်းနှင့် စစ်ဆေးခြင်းများ လုပ်ဆောင်ထားသည်ဟု ဒေါက်တာမင်းသိန်းမော်က ဆိုသည်။

ထို့ပြင် အဆိုပါရောဂါနှင့် ပတ်သက်ပြီး ဝက်မွေးမြူရေးလုပ်ကိုင်သူများကြိုတင်ကာကွယ်နိုင်ရန် အစိုးရသတင်းစာများတွင် ထည့်သွင်းကြော်ငြာခြင်း၊ ဝက်မွေးမြူရေးလုပ်ငန်းလုပ်ကိုင်သူများထံသို့ လက်ကမ်းစာစောင်ဖြန့်ဝေခြင်းများ လုပ်ဆောင်နေကြောင်းလည်း မွေးမြူရေးနှင့် ကုသရေးဦးစီးဌာနထံမှ သိရသည်။

သို့သော် ပြည်သူများထံသို့ အဆိုပါ ရောဂါ၏ အမျိုးမျိုးသော သတင်းစကားများက လူမှုကွန်ရက်မှတစ်ဆင့် ပျံ့နှံ့ရောက်ရှိလို့ လာသည်။ ရောဂါဖြစ်ပွားနေသည့် ဝက်များ၏ ပုံများနှင့် လူတွင် ဖြစ်ပွားသည်ဆိုသော လူမှုကွန်ရက်ပေါ်မှ စကားများကြောင့် ဝက်သားကို စားသုံးရန် ထိတ်လန့်တုန်လှုပ်ကြသည်။

“Facebook မှာတွေ့တယ်။ ဝက်တွေရဲ့အရေပြားတွေ လန်ပြီးတော့လေ။ လူတွေမှာလည်း ဖြစ်တယ်ဆိုတာမျိုး ပြောကြတော့ မစားရဲဘူး။ အိမ်မှာလည်း အခုရက်တွေ မချက်စားဘူး”ဟု ဒဂုံမြို့သစ်(တောင်ပိုင်း)မြို့နယ်မှ အိမ်ရှင်မဒေါ်မာမာက ပြောကြားသည်။

ထို့ကြောင့် ဝက်မွေးမြူရေးလုပ်ငန်းလုပ်ကိုင်သူများမှာ အွန်လိုင်းမှ ကောလာဟလစကားများကြောင့် ဝက်သားထုတ်လုပ်မှုအတွက် ပို၍ စိုးရိမ်ကြရသည်။ ယခင်ကလည်း ဝက်နားရွက်ပြာရောဂါဖြစ်ပွားခဲ့မှုကြောင့် အိမ်နီးချင်းနိုင်ငံများမှ ဝက်သားနှင့် ပတ်သက်သည့် တစ်စုံတစ်ရာရောဂါဖြစ်ပွားမှုသတင်းထွက်လျှင် ပြည်တွင်းတွင်လည်း ဝက်သားစားသုံးမှုလျော့နည်းလေ့ရှိသည်။

သို့သော် လက်ရှိတွင် ဝက်သားဈေးကွက်မှာ တည်ငြိမ်လျက်ရှိနေသည်ဟု မြန်မာနိုင်ငံဝက်မွေးမြူသူများနှင့် ထုတ်လုပ်ရောင်းချသူများအသင်း၏ အတွင်းရေးမှူးဦးအောင်စိုးမင်းကျော်က ပြောကြားသည်။

“ရောဂါအကြောင်း သေသေချာချာမသိဘဲ ဖြန့်ဝေမှုကြောင့် ပြည်သူက စိုးရိမ်မှုရှိနေတာ။ လက်ရှိတော့ တည်ငြိမ်နေတာပဲ။ အနည်းအကျဉ်းလောက်ပဲ လျော့တာ။ ဒီလိုဖြန့်ဝေမှုတွေကြောင့်တော့ ကြာလာရင် ထိခိုက်နိုင်တယ်”ဟု ဦးအောင်စိုးမင်းကျော်က ဆိုသည်။

လူမှုကွန်ရက်က စကားများကဲ့သို့ အာဖရိကဝက်အပြင်းဖျားရောဂါမှာ လူကို မကူးစက်နိုင်ပေ။

ကမ္ဘာ့ကျန်းမာရေးအဖွဲ့အစည်းကလည်း မကူးစက်နိုင်ကြောင်း ပြောကြားထားသည်ဟု ကျန်းမာရေးနှင့် အားကစားဝန်ကြီးဌာန၊ ပြည်သူ့ကျန်းမာရေးဦးစီးဌာန၊ ကူးစက်ရောဂါတိုက်ဖျက်ရေးဌာနခွဲမှ ညွှန်ကြားရေးမှူးဒေါက်တာထွန်းတင်က ဆိုသည်။

“လက်ရှိအချိန်ထိ လူကို ကူးတယ်ဆိုတဲ့ သက်သေ၊ သာဓကမရှိပါဘူး။ ရောဂါပိုးနဲ့ ထိတွေ့တဲ့လူမှာ လူထဲကို မရောက်ပေမယ့် အသုံးအဆောင်ကနေတော့ (ဝက်များကို) ကူးနိုင်တယ်။ အဲဒါကြောင့်(ဝက်ခြံထဲ) ဝင်ထွက်သွားလာတယ်ဆိုရင် လူကနေ ကူးနိုင်တာပေါ့။ ဘယ်လိုဆက်လုပ်မလဲဆိုတာ ကမ္ဘာ့အခြေအနေကို ကြည့်ရဦးမယ်”ဟု ၎င်းက ပြောဆိုသည်။

လက်ရှိတွင် တရုတ်ပြည်သူ့သမ္မတနိုင်ငံအရှေ့မြောက်ဒေသ၊ အလယ်ပိုင်း ဒေသနှင့် အရှေ့ပိုင်းဒေသတို့ရှိ ပြည်နယ်အချို့ရှိ ဝက်ခြံပေါင်းတစ်ရာကျော်တွင် ရောဂါပျံ့နှံ့ဖြစ်ပွားခဲ့ပြီး ဝက်ကောင်ရေတစ်သန်းနီးပါး သုတ်သင်ခဲ့ရသည်။

မြန်မာနိုင်ငံတွင်လည်း ရောဂါကူးစက်ပျံ့နှံ့မှုမဖြစ်စေရန် ဝက်နှင့် ဝက်ထွက်ပစ္စည်းများကို လေဆိပ်၊ ရေဆိပ်၊ နယ်စပ်ဂိတ်များထံမှ မဝင်ရောက်လာစေရန် တားဆီးကန့်သတ်နေပြီဖြစ်သည်။

အချို့သော ပြည်ပဧည့်သည်များက တစ်ပိုင်တစ်နိုင်စားသောက်ရန်အတွက် အဆိုပါပစ္စည်းများကို ယူဆောင်လာမှုများရှိသောကြောင့် လေဆိပ်၊ ရေဆိပ်များတွင် တားဆီးခြင်းဖြစ်သည်။ ထိုသို့ကြိုတင်ကာကွယ်မှုများရှိသော်လည်း မွေးမြူရေးလုပ်ကိုင်သူများက ပြည်တွင်းရှိ ဝက်များထံ ကူးစက်လာမည်ကို စိုးရိမ်မှုရှိနေသည်။

“ကျွန်တော်တို့ မွေးမြူသူတွေနဲ့ တိုက်ရိုက်ပတ်သက်နေတော့ စိုးရိမ်မှုကတော့ ရှိတာပေါ့။ ဒါပေမဲ့ အရင်ဖြစ်ခဲ့တဲ့ တခြားရောဂါတွေနဲ့ အတွေ့အကြုံရထားပြီးသားမို့ ကာကွယ်ဖို့အတွက် ဖြန့်ဝေထားတာလည်း ရှိတယ်”ဟု မြန်မာနိုင်ငံမွေးမြူရေးအဖွဲ့ချုပ် ဒုတိယဥက္ကဋ္ဌဒေါက်တာကျော်ထင်က ပြောကြားသည်။

အချို့မှာ တိုးချဲ့မွေးမြူရန်စီစဉ်ထားသော်လည်း ယခုဖြစ်စဉ်ကြောင့် အနည်းငယ် ထိတ်လန့်မှုရှိကြောင်းလည်း ဝက်မွေးမြူရေးလုပ်ငန်းလုပ်ကိုင်သည့် အသိုင်းအဝိုင်းထံမှ သိရသည်။ လက်ရှိ ရောဂါမကူးစက်ရေးကာကွယ်မှုများတွင် တရားမဝင်တင်သွင်းလာသော ဝက်ထွက်ပစ္စည်းများ တင်သွင်းခြင်း၊ ရောင်းချခြင်း မပြုရန်လည်း မွေးမြူရေးနှင့်ကုသရေးဦးစီးဌာနက တိုက်တွန်းထားသည်။

ထို့ပြင် ပြည်တွင်းမှ ဝက်မွေးမြူသူများထံသို့ ကြိုတင်ကာကွယ်နိုင်ရန်အသိပညာပေး လက်ကမ်းစာစောင် တစ်သောင်းကျော် ဖြန့်ဝေထားကာ ဝက်မွေးမြူရေးခြံများ၏ ဇီဝလုံခြုံမှုကို အထူးဂရုပြုဆောင်ရွက်ရန်လည်း တိုက်တွန်းထားသည်။

အဓိကလိုအပ်သည်မှာ တစ်ပိုင်တစ်နိုင်ဝက်မွေးမြူသူများအနေနှင့် ဝက်များကို အစာကျွေးရာတွင် စားကြွင်းစားကျန်များ၊ အသားစိမ်း၊ ငါးစိမ်းများ မကျွေးဘဲ ကျိုချက်ကျွေးသင့်ကြောင်းနှင့် အခါအားလျော်စွာ ဌာနက ထုတ်ပြန်သည့် ညွှန်ကြားချက်များကို သတိပြုလိုက်နာရန်လိုအပ်ကြောင်း ဒေါက်တာမင်းသိန်းမော်က ဆိုသည်။

လတ်တလော ထိတ်လန့်မှုဖြစ်ပေါ်စေခဲ့သည့် အာဖရိကဝက်အပြင်းဖျားရောဂါနှင့် ပတ်သက်၍ လူကိုမကူးစက်နိုင်သောကြောင့် ပြည်သူများအကြားတွင်လည်း စိုးရိမ်စရာမလိုဘဲ သားသတ်လိုင်စင်ဖြင့် စည်ပင်သာယာရေးကော်မတီက တရားဝင်ခွင့်ပြုသည့် ဝက်သားကို ဝယ်ယူကာ စနစ်တကျချက်ပြုတ်စားသောက်ရန် လိုအပ်သည်။

“မီးပူပူနဲ့ ကျက်အောင် ချက်ပြုတ်စားသောက်တဲ့ အကျင့်ကြောင့် ဒီကလူတွေ အတွက် စိုးရိမ်စရာမရှိပါဘူး။ စနစ်တကျကောင်းကောင်းမွန်မွန် ချက်ပြုတ်စားသောက်ဖို့ လိုပါတယ်”ဟု ဒေါက်တာမင်းသိန်းမော်က ပြောဆိုသည်။

မေသက်ဇင်

You may also like...

Leave a Reply

Your email address will not be published. Required fields are marked *