မြစ်ဆုံချည်းသာလော… ရန်ကုန်မြို့သစ်နှင့်ပါဘုရား

၂၀၁၁ ခုနှစ် နိုဝင်ဘာလ ၂၂ ရက်က ရန်ကုန်မြို့ ယောမင်းကြီးလမ်းရှိ THE SKETCH OF A RIVER ပြပွဲသို့ ဒေါ်အောင်ဆန်းစုကြည် တက်ရောက်ခဲ့စဉ်။

သမ္မတဦးသိန်းစိန်လက်ထက်က ရပ်တန့်ခဲ့သည့် မြစ်ဆုံစီမံကိန်းသည် ဒေါ်အောင်ဆန်းစုကြည် အစိုးရသက်တမ်း သုံးနှစ်ပြည့်ခါနီးတွင် ပြည်သူများကို ပြန်လည်ခြောက်လှန့်လာသည်။ အမွေရခဲ့သည့် ထိုစီမံကိန်းဟောင်းတစ်ခုတည်းသာ မြန်မာပြည်သူများကို ခြောက်လှန့်လာသလော။ မဟုတ်ပါ။ အသစ်တီထွင်ဖန်တီးလိုက်သည့် ရန်ကုန်မြို့သစ်စီမံကိန်းကပါ ပါဝင်ခြောက်လှန့်လာသည်။

ဇာတ်လမ်းက မြစ်ဆုံမှ စသည်။ မြန်မာနိုင်ငံရှိ တရုတ်သံအမတ်နှင့်တကွ တရုတ်အစိုးရ သို့မဟုတ် ကွန်မြူနစ်ပါတီအာဘော်သတင်းစာများက မြစ်ဆုံစီမံကိန်းပြန်စရန် ၂၀၁၈ နှစ်ကုန်ပိုင်းတွင် ဆက်တိုက်တွန်းအားပေးလာကြသည်။

‘လက်ရှိတွင် တရုတ်-မြန်မာပူးပေါင်း ဆောင်ရွက်မှု၌ ရင်ဆိုင်နေရသည့် အခက်အခဲတစ်ခုမှာ ခုနစ်နှစ်ကြာ ရပ်ဆိုင်းခဲ့သည့် မြစ်ဆုံ ရေအားလျှပ်စစ်စီမံကိန်း ဖြစ်ကြောင်း၊ မြစ်ဆုံစီမံကိန်း ပြဿနာကို မဖြေရှင်းဘဲ အကြာကြီး အချိန်ဆွဲမည်ဆိုပါက တရုတ်ကုမ္ပဏီများက မြန်မာနိုင်ငံသို့ လာရောက်ရင်းနှီးမြှုပ်နှံရန် ယုံကြည်စိတ်ကို ဆိုးရွားစွာ ထိခိုက်နိုင်ပါကြောင်း၊ မြန်မာနိုင်ငံ လူမှုစီးပွားဖွံဖြိုးတိုးတက်ရန်နှင့် တရုတ်-မြန်မာ စီးပွားရေးစင်္ကြံ တည်ဆောက်ရန်အတွက် လုံလောက်သည့် လျှပ်စစ်ဓာတ်အား အရေးတကြီးလိုအပ်မည်ဖြစ်ကြောင်း’ ဟု တရုတ်သံအမတ်၏ ၂၀၁၈ခုနှစ် ဒီဇင်ဘာလကုန်ခါနီး ကချင်ပြည်နယ် ခေါင်းဆောင်များနှင့်တွေ့သည့် ခရီးစဉ်အပြီး ထုတ်ပြန်ချက်တွင် မြစ်ဆုံစီမံကိန်းကို အချိန်မဆွဲဘဲ ပြန်စရန် တွန်းအားပေးထားသည်။

သံအမတ်ကြီးက ကြေညာချက်ထုတ်ပြန်အပြီး တစ်လအကြာတွင် တရုတ်အစိုးရ၏ အာဘော်ဖြစ်သည့် The Global Times တွင်လည်း ဇန်နဝါရီ ၃၀ ရက်နေ့က ဖော်ပြသော ‘Myitsone dam concerns Myanmar’s credibility’ ဆောင်းပါးသည် မြစ်ဆုံရေကာတာအကြောင်း ဖြစ်သည်။ မြစ်ဆုံကိစ္စ တွန်းအားပေးလာခြင်းသည် တရုတ်အစိုးရ၏ မူဝါဒပင်လား။ ရေးသူမှာ တရုတ်ကွန်မြူနစ်ပါတီ၏ အာဘော် People’s Daily မှ ဝါရင့်အယ်ဒီတာလည်းဖြစ်၊ တရုတ် think tankု ဖြစ်သည့် Chongyang Institute for Financial Studies at Renmin University of China မှ Senior Fellow လည်း ဖြစ်သည်။ ‘ရှေ့အစိုးရက အတည်ပြုသည့် နိုင်ငံခြားရင်းနှီးမြုပ်နှံမှုစီမံကိန်းများကို နောက်အစိုးရကဖျက်လျင် မည်သည့် စီးပွားရေးလုပ်ငန်းရှင်ကမျှ မြန်မာတွင် ရင်းနှီးမြုပ်နှံမည်မဟုတ်ကြောင်း’ ဒေါ်အောင်ဆန်းစုကြည် ပြောခဲ့သည့်စကားကို ကိုးကားကာ မြစ်ဆုံကိစ္စကို သေချာစွာ မဖြေရှင်းလျှင် မြန်မာနိုင်ငံအပေါ် ယုံကြည်စိတ်ချရမှုကို ထိခိုက်နိုင်ကြောင်း ဆောင်းပါးရှင်က ရေးသားထားသည်။

မြစ်ဆုံ စီမံကိန်းကို ရပ်တန့်ထားရသည်မှာ ခုနစ်နှစ်ခန့်ရှိပြီဖြစ်ရာ တရုတ်က စကားပြန်စလာခြင်းသည် သူတို့ဘက်က ကြည့်လျှင် မလွန်။ ယခင်အစိုးရလက်ထက်က သူတို့လက်ထက်တွင် ရပ်တန့်ကြောင်း အဖြူအမည်း အဖြေပေးခဲ့သည့်အတွက် ယခုအစိုးရထံမှလည်း အဖြူအမည်း အဖြေရချိန်တန်ပြီဟု ဆုံးဖြတ်သောကြောင့်လည်း ဖြစ်နိုင်သည်။

သို့သော် မြစ်ဆုံကိစ္စကို တရုတ်ဘက်က ပြောလာခြင်းသည် တရုတ်တို့၏ အချိန်ဇယားအရ သင့်တော်ကောင်းသင့်တော်မည်ဖြစ်သော်လည်း မြန်မာအစိုးရအတွက်မူ မသင့်လျော်သော ကာလဖြစ်နေသည်။ အဆုံးအဖြတ်ဖြစ်သည့် ၂၀၂၀ ရွေးကောက်ပွဲက နီးလာပြီ။ မဲဆွယ်ကာလရောက်နေပြီ။ မြစ်ဆုံသည် အကဲဆတ်သည်။ ဒေါ်အောင်ဆန်းစုကြည်ကို ပြည်သူများအကြား ထောက်ခံမှုမြင့်နေသေးသော်လည်း မြစ်ဆုံစီမံကိန်းသည်လည်း ပြည်သူအကန့်ကွက်ဆုံး စီမံကိန်းဖြစ်နေသည်။

မြစ်ဆုံကိစ္စတွင် လက်ရှိအစိုးရ၏ သဘောထားမည်သို့ ရှိမည်မသိသည့်အတွက် အစိုးရအကျပ်အတည်းဖြစ်မည်စိုးသောကြောင့် ယခင်ဦးသိန်းစိန်အစိုးရ လက်ထက်လောက် ဆန့်ကျင်သူမများသော်လည်း ထင်ရှားကျော်ကြားသည့် သဘာဝပတ်ဝန်းကျင်သမားများအပါအဝင် အများအပြားက လူသိရှင်ကြား ကန့်ကွက်ပြောဆိုကြသည်။ မြစ်ဆုံအိပ်မက်ဆိုး ပြန်မက်ကြရတော့မည်လား။

မြစ်ဆုံစီမံကိန်းကို လူကြိုက်နည်းမှန်း လက်ရှိအစိုးရ သဘောပေါက်သည်။ လူထုထောက်ခံမှု အများအပြားရထားသည့် အစိုးရဖြစ်သော်လည်း မြစ်ဆုံစီမံကိန်း အနာဂတ်အကြောင်း မေးသမျှကို အထူးသတိထားဖြေဆိုသည်။ NLD ၏ ဒုဥက္ကဌ ဖြစ်သည့် မန္တလေးတိုင်းဒေသကြီးဝန်ကြီးချုပ် ဦးဇော်မြင့်မောင်က ပြည်သူ့ဆန္ဒအတိုင်း ဆောင်ရွက်မည့်သဘော မြစ်ဆုံမေးခွန်းကို ဖြေကြားသည်။

ရင်းနှီးမြုပ်နှံမှုဝန်ကြီး ဦးသောင်းထွန်းကမူ နေရာပြောင်းလျှင် ပြောင်းမည့် သဘော၊ အရွယ်အစားပြောင်းလျှင် ပြောင်းမည့်သဘော ပြောကြားခဲ့ဖူးသည်။

လုပ်မည်၊ မလုပ်မည် တိတိကျကျကိုမူ တာဝန်ရှိသူ မည်သူကမျှ မပြောသေး။

မြစ်ဆုံစီမံကိန်းသည် မရေမရာဖြစ်နေသေးသော်လည်း လူထုစိုးရိမ်မှုများ မြင့်တက်လာသည့် ရန်ကုန်မြို့သစ်စီမံကိန်းမှာမူ စတင်အကောင်အထည်ဖော်နေပြီ။

မြစ်ဆုံနှင့် ရန်ကုန်မြို့သစ်

နှစ်ခုလုံးမှာ ဧရာမစီမံကိန်းများ။ တပ်မတော်အစိုးရလက်ထက်က တရုတ်နိုင်ငံနှင့် သဘောတူလက်မှတ်ရေးထိုးခဲ့သည့် မြစ်ဆုံစီမံကိန်းသည် အမေရိကန် ဒေါ်လာ ၃ ဒသမ ၆ ဘီလီယံ တန်ဖိုးရှိ စီမံကိန်းကြီးဖြစ်သည်။

ရန်ကုန်မြို့သစ်စီမံကိန်းသည်လည်း အမေရိကန်ဒေါ်လာဘီလီယံချီတန်ဖိုးရှိသည်။

မြစ်ဆုံစီမံကိန်းကဲ့သို့ပင် ရန်ကုန်မြို့သစ်စီမံကိန်းကို အကောင်အထည်ဖော်မည့်ကုမ္ပဏီမှာ တရုတ်နိုင်ငံပိုင်ကုမ္ပဏီကြီးဖြစ်သည်။ တရုတ်ကုမ္ဗဏီများဆိုသည့်အတွက် စိုးရိမ်သွားသူများ ရှိသည်။ နောက်ထပ် စိုးရိမ်ကြသည်မှာ “ပွင့်လင်းမြင်သာမှု” တွင်။

ဒေါ်လာဘီလီယံချီသည့် လုပ်ငန်းကြီးများ၊ မြန်မာ့အနာဂတ်ကို ပြောင်းသွားစေမည့် စီမံကိန်းကြီးများဖြစ်သည့်အတွက် ပွင့်လင်းမြင်သာမှုကို စိုးရိမ်ကြသည်မှာ အဆိုးမဆိုသာ။ မြန်မာနိုင်ငံသည် ပွင့်လင်းမြင်သာမှုနှင့်ပတ်သက်လျင် သမိုင်းမကောင်းခဲ့။

နောက်ထပ်တူညီသောအချက်မှာ ထိုစီမံကိန်း နှစ်ခုလုံးတွင် ဆန့်ကျင်ကန့်ကွက်သူ၊ စိုးရိမ်သူများ များပြားသည်။ မြစ်ဆုံကို စိုးရိမ်သူပိုများသည်။

မြစ်ဆုံကို သဘာဝပတ်ဝန်းကျင်ရှုထောင့်နှင့် အမွေအနှစ်ရှုထောင့်မှ အထူးကန့်ကွက်ကြသည်။ ဆည်ပြိုလျင် အန္တရာယ်ကျရောက်နိုင်သည့် ရှုထောင့်မှလည်း ကြည့်ကြသည်။ ရန်ကုန်မြို့သစ်ကိုမူ အကြွေးနွံနစ်မည့် ရှုထောင့်နှင့် မြန်မာနိုင်ငံ၏ အင်ဂျင်ဖြစ်သည့် ရန်ကုန်မြို့နှင့်ကပ်ရက် ရန်ကုန်မြို့သစ်တွင် တရုတ်နိုင်ငံမှ တရုတ်များ သိန်းနှင့်သန်းနှင့်ချီ ဝင်ရောက်လာမည်ကို စိုးရိမ်သည့် လူဦးရေ ရှုထောင့်၊ လူမှုရေးရှုထောင့်တို့မှ ကြည့်ကြသည်။

နောက်ထပ်ကြည့်လျင် တစ်ခုက စီမံကိန်းအဟောင်း။ နောက်တစ်ခုက အသစ်။

မြစ်ဆုံသည် တပ်မတော် အစိုးရလက်ထက်က စီမံကိန်းဖြစ်သည်။ ရန်ကုန် မြို့သစ်သည် ယခုကျမှ စဉ်းစားအကောင် အထည်ဖော်ခြင်းဖြစ်သည်။
မြစ်ဆုံသည် အမွေခံ စီမံကိန်းဖြစ် သည်။ ရန်ကုန်မြို့သစ်သည် ယခုအစိုးရ လက်ထက်မှ စတင်မွေးဖွားသော စီမံကိန်း ဖြစ်သည်။ ယခင်အစိုးရလက်ထက်က အလားတူစီမံကိန်းမျိုး စဉ်းစားခဲ့သော် လည်း လုပ်ပုံကိုင်ပုံများနှင့် စီမံကိန်းသည် အသစ်ဖြစ်သည်။

မြစ်ဆုံစီမံကိန်းကို ပြန်စရန် တရုတ်ဘက်က ဖိတွန်းနေသည်။ ရန်ကုန်မြို့သစ်စီမံကိန်းကိုမူ တရုတ်ဘက်က အထူးတလည် ဖိအားပေးရန်မလို။ မြန်မာဘက်က “မဆွတ်ခင်က ညွတ်ချင်လျက်”။

ထိုစီမံကိန်းကြီးနှစ်ခုလုံးတွင် ကြီးမားသော တူညီသည့်အချက်မှာ တရုတ်၏ ကုန်းရေပိုးလမ်းမသစ်စီမံကိန်း Belt and Road Initiative BRI ကို မြန်မာတွင် အကောင်အထည်ဖော်မည့် တရုတ် – မြန်မာစီးပွားရေးစင်္ကြံအောက်မှ စီမံကိန်းကြီးများဖြစ်ခြင်း ဖြစ်သည်။

ပိုးလမ်းမသစ်နှင့် တရုတ် – မြန်မာ စီးပွားရေးစင်္ကြံ

တရုတ်ပိုးလမ်းမသစ်စီမံကိန်း Belt and Road Initiative BRI သည်တရုတ်နိုင်ငံကို နောက်တစ်ဆင့်မြှင့်မည့် ဧရာမစီမံကိန်းကြီးဖြစ်သည်။ အစိတ်အပိုင်းဖြစ်သည်။ BRI ကိုအမျိုးမျိုး အဓိပ္ပာယ်ဖွင့်ကြသော်လည်း အရင်းစစ်လျှင် တရုတ်ကို ဗဟိုပြုသည့် လမ်း၊ တံတား၊ စွမ်းအင်၊ စီးပွားရေးဇုန်စသည့် စီမံကိန်းမျိုးစုံပါဝင်သည့် ဧရာမအခြေခံအဆောက်အဦစီမံကိန်းကြီးဖြစ်သည်။ မြန်မာနိုင်ငံတွင် ရန်ကုန်မြို့သစ်စီမံကိန်း၊ ကျောက်ဖြူရေနက်ဆိပ်ကမ်းစီမံကိန်း၊ တရုတ်နှင့် ကျောက်ဖြူရထားလမ်းနှင့် မြစ်ဆုံစီမံကိန်းကိုယ်တိုင်တို့သည် BRI စီမံကိန်းများဟု သတ်မှတ်နိုင်သည်။

စင်စစ် မြစ်ဆုံစီမံကိန်းကို တရုတ်ဘက်က တွန်းလာခြင်းကို သီးခြားစီကြည့်၍မဖြစ်ပါ။ တရုတ် – မြန်မာစီးပွား ရေးစင်္ကြံအရှိန်ရလာခြင်းနှင့် တွဲကြည့်မှ ပိုဝေးဝေး၊ ရှင်းရှင်းမြင်ရမည်။ ရက်စွဲအချို့ကိုကြည့်ပါ။

တရုတ်-မြန်မာမူဆယ်-မန္တလေး ရထားလမ်းစီမံကိန်း ဖြစ်မြောက်နိုင်ခြေလေ့လာမှု (Feasibility Study) ဆိုင်ရာ နားလည်မှု စာချွန်လွှာလက်မှတ်ရေးထိုးပွဲ အခမ်းအနားကို ၂၀၁၈ အောက်တိုဘာလ ၂၂ ရက်နေ့တွင် နေပြည်တော်၌ ကျင်းပသည်။

ကျောက်ဖြူအထူး စီးပွားရေးဇုန် ရေနက်ဆိပ်ကမ်းစီမံကိန်းမူဘောင် သဘောတူညီချက် လက်မှတ်ရေးထိုးပွဲအခမ်းအနားကို နိုဝင်ဘာလ ၈ ရက်နေ့တွင် နေပြည်တော်၌ ကျင်းပခဲ့သည်။

တရုတ်ပြည်သူ့သမ္မတနိုင်ငံသမ္မတ Mr. Xi Jinping နှင့် ပြည်ထောင်စုသမ္မတမြန်မာနိုင်ငံတော် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့အကြား ၂၀၁၇ ခုနှစ် နှစ်ကုန်က သဘောတူညီခဲ့သော “The Belt and Road” အဆိုပြုချက်အောက်၌ တရုတ်-မြန်မာစီးပွားရေးစင်္ကြံ ပူးတွဲတည်ထောင်ရေးဆိုင်ရာ အရေးပါသော သဘောတူညီချက်အား တစ်ဆင့်တက် လက်တွေ့အကောင်အထည်ဖော်ရန်အတွက် တရုတ်နိုင်ငံ အမျိုးသားဖွံဖြိုးတိုးတက်ရေးနှင့် ပြုပြင် ပြောင်းလဲရေးကော်မရှင် ဒုတိယဥက္ကဌ Mr. Ning Jizhe သည် နိုဝင်ဘာလ ၂၄ ရက်မှ၂၇ ရက် နေ့အထိ မြန်မာနိုင်ငံသို့ လာရောက်သည်။

တရုတ်သံအမတ်ကြီး Mr. Hong Liang သည် ဒီဇင်ဘာလ ၂၈ ရက်နေ့မှ ၂၉ ရက်နေ့အထိ ကချင်ပြည်နယ် မြစ်ကြီးနားမြို့၌ ကချင်ခေါင်းဆောင်များနှင့်တွေ့ဆုံပြီး မြစ်ဆုံပြန်စရေးအပါအဝင် အခြားကိစ္စများ ဆွေးနွေးသည်။

တရုတ်-မြန်မာစီးပွားရေးစင်္ကြံဆိုင်ရာ ပူးတွဲကော်မတီ ဒုတိယအကြိမ်အစည်းအဝေးနှင့် ဒုတိယအကြိမ်မြောက် တရုတ်-မြန်မာစီးပွားရေးစင်္ကြံဖိုရမ်ကို ဖေဖော်ဝါရီလ ၂၁ ရက်နေ့မှ ၂၂ ရက်နေ့အထိ တရုတ်နိုင်ငံ ယူနန်ပြည်နယ် ကူမင်းမြို့၌ ကျင်းပပြီး စီမံကိန်းနှင့်ဘဏ္ဍာရေး ဝန်ကြီးဌာနဝန်ကြီး ဦးစိုးဝင်း တက်ရောက်သည်။

တရုတ် – မြန်မာ စီးပွားရေးစင်္ကြံဖော်ဆောင်ရေး အရှိန်မြှင့်လာသည်နှင့်အမျှ မြစ်ဆုံတွန်းအားများလာခြင်းနှင့် ရန်ကုန်မြို့သစ်တည်ဆောက်ရေးအဆင့်များ မြန်လာသည်ကို မြင်ရသည်။

ဒေါ်အောင်ဆန်းစုကြည်အမြင်

မြစ်ဆုံစီမံကိန်းဖြစ်စေ၊ ရန်ကုန်မြို့သစ်စီမံကိန်းဖြစ်စေ မြန်မာတစ်နိုင်ငံလုံးတွင် အာဏာအရှိဆုံးပုဂ္ဂိုလ်ဖြစ်သည့် ဒေါ်အောင်ဆန်းစုကြည်၏ အဆုံးအဖြတ်သည် နောက်ဆုံးအဆုံးအဖြတ်ဖြစ်သည်။ ဒေါ်အောင်ဆန်းစုကြည် မည်သို့ဆုံးဖြတ် မည်ကို မသိသေးသော်လည်း စီမံကိန်းကြီးများအပေါ် သူ၏အမြင်ကို မကြာသေးမီရက်ပိုင်းက ကျင်းပသည့် ပြည်မြို့ပြည်သူလူထုနှင့် တွေ့ဆုံပွဲတွင် အကဲခတ်နိုင်သည်။

“မြစ်ဆုံ စီမံကိန်းနဲ့ ပတ်သက်လို့ပဲ ဖြစ်ဖြစ်၊ ဘယ်လိုပဲ ကြီးကျယ်တဲ့ စီမံကိန်းကြီးတွေနဲ့ ပတ်သက်လို့ပဲဖြစ်ဖြစ် ကျွန်မတို့ ပြည်သူလူထုဟာ အမြင်ကျယ်ကျယ်နဲ့ အဘက်ဘက်ကနေ စဉ်းစားစေချင်ပါတယ်။ ကျွန်မတို့နိုင်ငံရဲ့ ဂုဏ်သိက္ခာအတွက်၊ ကျွန်မတို့နိုင်ငံကို ကမ္ဘာကယုံကြည်မှုရဖို့အတွက် ကျွန်မတို့က စကားတည်ဖို့လိုတယ်နော်” ဟု မတ်လ ၁၄ ရက်နေ့တွင် ကျင်းပသည့် ထိုတွေ့ဆုံပွဲတွင် ဒေါ်အောင်ဆန်းစုကြည်က ပြောသည်။

“ယခင်တုန်းက စတင်ခဲ့တဲ့ စီမံကိန်းကြီးတွေကို ကျွန်မတို့အစိုးရတက်ပြီး ဘယ်ဟာမှ ဂရုမစိုက်တော့ဘူး၊ လုပ်ချင်ရာလုပ်မယ်ပြောလို့မရပါဘူး။ အဲဒီလိုလုပ်ရင် ဒီနိုင်ငံဟာ ဘယ်တော့မှ အားကိုးရတဲ့နိုင်ငံ မဟုတ်တော့ဘူး။ အစိုးရတစ်ခုတက်ရင် တစ်မျိုး၊ ငါတို့ ဒီနိုင်ငံမှာ ဘာမှမလုပ်တာပဲ ကောင်းတယ်ဆိုတဲ့ စိတ်ဓာတ်တွေ ကမ္ဘာကြီးမှာ ဖြစ်သွားလို့ရှိရင် ကျွန်မတို့ နိုင်ငံကို ထိခိုက်တယ်” ဟု ဒေါ်အောင်ဆန်းစုကြည်က ထပ်မံပြောကြားသည်။

ဒေါ်အောင်ဆန်းစုကြည်က သူ သို့မဟုတ် သူ့အစိုးရခံယူချက်များကို ပြောပြခြင်းသာ ဖြစ်သည်။ မည်သို့ ဆုံးဖြတ်မည်ကို မသိရသေး။ စီးပွားရေးသာမက နိုင်ငံရေးဘက်ကပါ ကြည့်ရမည့် ပုံပေါ်သည်။

ယခုစီမံကိန်းကြီး နှစ်ခုလုံးသည် Belt and Road စီမံကိန်းအောက်မှ ဖြစ်သည်။ သက်ဆိုင်ရာဌာနများ၊ တိုင်းဒေသကြီးနှင့် ပြည်နယ်ဝန်ကြီးချုပ်တို့ပါဝင်သော “The Belt and Road” အကောင်အထည်ဖော်ဆောင်ရေးဆိုင်ရာ ဦးဆောင်ကော်မတီတွင် ဒေါ်အောင်ဆန်းစုကြည်သည် ကိုယ်တိုင်ဥက္ကဋ္ဌဖြစ်သည့်အတွက် ‘The Belt and Road’ အဆိုပြုချက်အောက်ရှိ တရုတ်-မြန်မာ စီးပွားရေးစင်္ကြံ ပူးတွဲတည်ထောင်ရေး အပေါ်တာဝန်အပြည့်ယူထားသလို အာဏာလည်း အပြည့်ရှိသည့် တစ်ဦးတည်းသောသူဖြစ်သည်။

ပြည်သူလူထု စိုးရိမ်နေသော အထက်ပါ စီမံကိန်းကြီးနှစ်ခုအနက် မြစ်ဆုံမှာ “သို့လော၊ သို့လော” ဖြစ်နေသော်လည်း ရန်ကုန်မြို့သစ်စီမံကိန်းမှာ ဆက်သွားရန် သေချာသလောက်ဖြစ်သည်။ ရန်ကုန်မြို့သစ်ကဲ့သို့ စီမံကိန်းကြီးသည် ဒေါ်အောင်ဆန်းစုကြည်၏ သဘောတူညီမှုမပါဘဲ ဖြစ်နိုင်ရန် ခဲယဉ်းသည်။ ထို့ပြင် နေပြည်တော်တွင် မကြာသေးမီက ကျင်းပခဲ့သည့် ရင်းနှီးမြုပ်နှံမှု ထိပ်သီးညီလာခံတွင် ရန်ကုန်မြို့သစ်စီမံကိန်းအကြောင်း ဒေါ်အောင်ဆန်းစုကြည်ကို တင်ပြနေသည်ကို တွေ့လိုက်ရသည်။

မြစ်ဆုံကို ဆက်လက်လုပ်ဆောင်မည်၊ မလုပ်ဆောင်မည်ကို ဒေါ်အောင်ဆန်းစုကြည်အပါအဝင် မြန်မာအစိုးရက ယခုအချိန်ထိ တိတိကျကျပြောကြားခြင်း မရှိသေးပေ။ မြစ်ဆုံကို လွဲမှားဆုံးဖြတ်လျှင် ရွေးကောက်ပွဲတွင် အထိနာနိုင်သည်ဟု ထင်ကြေးပေးကြသည်။ သို့ရာတွင် ဒေါ်အောင်ဆန်းစုကြည်သည် မြန်မာနိုင်ငံတွင် လူကြိုက်အများဆုံး နိုင်ငံရေးသမား ဖြစ်နေဆဲ။

ရန်ကုန်မြို့သစ်စီမံကိန်းသည် စတင်အကောင်အထည် ဖော်နေပြီဖြစ်သော်လည်း ထိုစီမံကိန်းနှင့် ပတ်သက်ပြီး စီမံကိန်းတာဝန်ရှိသူများနှင့် ဒေသခံပြည်သူများကို နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် မကြာမီရက်ပိုင်းအတွင်း တွေ့ဆုံမည့် သတင်းထွက်လာသည်။ တွေ့ဆုံပွဲမှသည် အချိုး ၏အကွေ့တစ်စုံတစ်ရာ ပေါ်လာနိုင်သလား။

မကြာမီ ဒေါ်အောင်ဆန်းစုကြည် ဆုံးဖြတ်ရတော့မည်။ 

 

TVJ

You may also like...

Leave a Reply

Your email address will not be published. Required fields are marked *