ကွန်ဒိုမီနီယံ ရောင်ခြည်

ပူပြင်းခြောက်သွေ့လှသည့် လက်ရှိရာသီဥတုနှယ် ပြည်တွင်းတိုက်ခန်း၊ ကွန်ဒိုဈေးကွက်မှာလည်း ခြောက်သွေ့လျက်ရှိသည်။

သို့သော်လည်း သင်္ကြန်မတိုင်မီ ဧပြီလ ၆ ရက်တွင် စုပေါင်းပိုင် အဆောက်အအုံဆိုင်ရာလုပ်ငန်းလိုင်စင်ပေးအပ်ပွဲကို ရန်ကုန်မြို့တွင် ကျင်းပခဲ့သည်။ အဆိုပါပွဲ သို့ ရန်ကုန်တိုင်းဝန်ကြီးချုပ် ဦးဖြိုးမင်းသိန်းကိုယ်တိုင် တက်ရောက်ခဲ့ခြင်းဖြစ်သည်။

ကာလအတန်ကြာ ခြောက်သွေ့နေခဲ့သော ကွန်ဒို၊ တိုက်ခန်းဈေးကွက်အတွက် စုပေါင်းပိုင်အဆောက်အအုံဆိုင်ရာ လုပ်ငန်းလိုင်စင်ပေးအပ်ခြင်းသည် ဈေးကွက်ပြန်ကောင်းလာရေးလမ်းစဖြစ်သည်ဟု ဆောက်လုပ်ရေးလုပ်ငန်းရှင်များက မျှော်လင့်လျက်ရှိပြီဖြစ်သည်။

ရန်ကုန်တိုင်းဒေသကြီး စုပေါင်းပိုင်အဆောက်အအုံဆိုင်ရာ မှတ်ပုံတင်ရုံး၏ ဧပြီလ ၂၄ ရက်အထိစာရင်းများအရ ကွန်ဒိုမီနီယံ တိုက်ခန်းတည်ဆောက်ရန်အတွက် ဆောက်လုပ်ရေးကုမ္ပဏီ ၃၂ ခုကို လုပ်ငန်းလိုင်စင်ထုတ်ပေးထားပြီးဖြစ်သည်။

လက်ရှိဥပဒေအရ အဆိုပါလုပ်ငန်းလိုင်စင်ရရှိထားသူများတည်ဆောက်သည့် ကွန်ဒိုမီနီယံများသာ နိုင်ငံခြားသားများကို ရောင်းချနိုင်မည်ဖြစ်သည်။ စုပေါင်းအဆောက်အအုံဆိုင်ရာဥပဒေ (ကွန်ဒိုမီနီယံ ဥပဒေ) တွင် နိုင်ငံခြားသားများကို ကွန်ဒိုအဆောက်အအုံတစ်ခု၏ ၄၀ ရာခိုင်နှုန်း ရောင်းချနိုင်ကြောင်း အတိအလင်းပြဋ္ဌာန်းထားသည်။

ကျပ်သိန်း ထောင်ချီတန်သော ကွန်ဒိုမီနီယံ တိုက်ခန်းစစ်စစ်များကို ပြည်တွင်း ပြည်ပဝယ်လက်များထံ ရောင်းချနိုင်ရန် ဆောက်လုပ်ရေးကုမ္ပဏီများက သူထက်ငါအပြိုင် စိတ်အားထက်သန်နေကြပြီဖြစ်သည်။

ကျပ်သိန်းထောင်ချီတန်ဖိုးရှိသော ကွန်ဒိုမီနီယံတိုက်ခန်းများ အပြိုင်တည်ဆောက်ပါက ဆောက်လုပ်ရေးကဏ္ဍ လုပ်သားဈေးကွက်၊ အုတ်၊ သဲ၊ ကျောက် စသည့် ဆောက်လုပ်ရေးပစ္စည်းဈေးကွက် အရောင်းသွက်လာမည့်အပြင် အိမ်၊ ခြံ၊ မြေဈေးကွက်လည်း ကျွဲကူးရေပါ ပြန်လည်ကောင်းလာနိုင်မည်ဟု လုပ်ငန်းရှင်များက မျှော်လင့်လျက်ရှိသည်။

သို့သော် ကျပ်သိန်းထောင်ချီတန်သော ကွန်ဒိုမီနီယံတိုက်ခန်းများကို မည်သူများက ဝယ်ယူမည်နည်း။

နိုင်ငံခြားသားမျှော် ကွန်ဒိုဈေးကွက်

“ဈေးကွက်တစ်ခုလုံး ပြန်လည်ဖွံ့ဖြိုးလာဖို့က ဝယ်လိုအားဘယ်လောက်ရှိမလဲ။ ကွန်ဒိုမီနီယံတိုက်ခန်းတွေ သတ်မှတ်ဈေးနှုန်းအပေါ်မှာ ဝယ်နိုင်တဲ့အင်အား ဘယ်လောက်ရှိမလဲ။ မြန်မာနိုင်ငံရဲ့ လူတန်းစားအခြေအနေအရဆိုရင်တော့ ကွန်ဒိုမီနီယံနဲ့ အဆင်မြင့်တိုက်ခန်းဈေးနှုန်းတွေက သာမန်အားဖြင့် ဝယ်နိုင်ဖို့ အားနည်းနေတယ်” ဟု အိမ်၊ ခြံ၊ မြေနှင့် ဥပဒေရေးရာကျွမ်းကျင်သူ ဦးတင်သန်းဦးက သုံးသပ်သည်။

လက်ရှိ ကွန်ဒိုမီနီယံနှင့် အဆင့်မြင့်အိမ်ရာတို့တွင်နေထိုင်သူများသည် လစဉ် အဆောက်အအုံထိန်းသိမ်းစရိတ်အဖြစ် ကျပ်သုံးသိန်းခန့်ပေးဆောင်နေရသည်။ ထိုငွေသည် သာမန်တိုက်ခန်းတစ်ခန်း ငှားရမ်းခနှုန်းထားဖြစ်နေသည့်အတွက် လူလတ်တန်းစားများနှင့် ရုံးခန်းဖွင့်လှစ်သူများမှာ ကွန်ဒိုမီနီယံတိုက်ခန်းများ ဝယ်ယူရန် လက်တွန့်လာကြသည်။

ပြည်တွင်းရှိ သူဌေးကြီးများနှင့် အဆောက်အအုံပြုထိန်းသိမ်းစရိတ်ကို ထည့်သွင်းစဉ်းစားခြင်းမရှိသည့် နိုင်ငံခြားသားများသာ ကွန်ဒိုမီနီယံတိုက်ခန်းများကို အဓိကဝယ်ယူမည်ဖြစ်ပြီး အဆောက်အအုံထိန်းသိမ်းရန် အိမ်ရာကော်မတီများကို စနစ်တကျဖွဲ့စည်းကာ ထိန်းသိမ်းစရိတ်များ ကျစ်လျစ်အောင်ဆောင်ရွက်နိုင်မှသာ လူလတ်တန်းများဝယ်ယူနိုင်ခြေဖြစ်ပေါ်ကာ ကွန်ဒိုမီနီယံဈေးကွက် အရောင်းသွက်လာမည်ဖြစ်ကြောင်း ဦးတင်သန်းဦးက ဆိုသည်။

“အနှစ်ချုပ်ရင် ပြည်ပကိုပဲမျှော်ရမယ်” ဟု ၎င်းက မှတ်ချက်ပြုသည်။

၂၀၁၆ ခုနှစ် ဇန်နဝါရီလတွင် ပြဋ္ဌာန်းခဲ့သည့် ကွန်ဒိုမီနီယံဥပဒေအရ ကွန်ဒိုမီနီယံအဆောက်အအုံများသည် မပြီးစီးမီ ကြိုတင်ရောင်းချနိုင်ကြပြီး အဆောက်အအုံ၏ ၄၀ ရာခိုင်နှုန်းအထိ နိုင်ငံခြားသားများကို ရောင်းချခွင့်ပြုထားရာ ထိုက်သင့်သလောက် အရောင်းအဝယ်ဖြစ်နိုင်ကြောင်း ပြည်တွင်းဆောက်လုပ်ရေး လုပ်ငန်းရှင်များက သုံးသပ်ကြသည်။

“ဈေးကွက်က ယေဘုယျပြောရရင် အေးတယ်။ ဒါပေမဲ့ လုံးဝကြီး အရောင်းအဝယ် မဖြစ်တာတော့မဟုတ်ဘူး” ဟု ကွန်ဒိုမီနီယံတည်ဆောက်ခွင့်လိုင်စင်ရရှိထားသည့် MKT ဆောက်လုပ်ရေးလုပ်ငန်းရှင် ဦးမျိုးမြင့်ကဆိုသည်။

ဦးမျိုးမြင့်သည် မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်းချုပ် (MCEA) ၏ အထွေထွေအတွင်းရေးမှူးချုပ်လည်း ဖြစ်သည်။

MKT ဆောက်လုပ်ရေးကုမ္ပဏီသည် ရန်ကုန်တွင် မြေပိုင်ဆိုင်မှုပါ ခွဲဝေပေးမည့် ကွန်ဒိုမီနီယံတည်ဆောက်ရန် ဒီဇိုင်းရေးဆွဲလျက်ရှိပြီး လာမည့်မိုးရာသီတွင် တည်ဆောက်ခွင့်တင်ရန် စီစဉ်နေကြောင်း ၎င်းက ဆက်လက်ပြောကြားသည်။

လက်ရှိကွန်ဒိုမီနီယံတိုက်ခန်းများမှာ နိုင်ငံခြားသားများသာ အငှားသွက်လျက်ရှိပြီး တစ်လလျှင် အမေရိကန်ဒေါ်လာ ၁၅၀၀ မှ ၃၀၀၀ ခန့် ဈေးရှိကြောင်း မဏ္ဍိုင် အိမ်၊ ခြံ၊ မြေနှင့် အထွေထွေဝန်ဆောင်မှုကုမ္ပဏီ အုပ်ချုပ်မှုဒါရိုက်တာ ဦးသန်းဦးက ဆိုသည်။

“အနည်းဆုံးကတော့ ကွန်ဒိုတိုက်ခန်းနဲ့ပတ်သက်ရင် တစ်ပေပတ်လည်ကို ရှစ်သောင်းကနေ လေးငါးသိန်းအထိရှိပါတယ်။ သူ့ဘာသာသူ တတ်နိုင်တဲ့သူက တတ်နိုင်သလို ဝယ်ကြတာပါပဲ။ နေရာကောင်းရင် ကောင်းသလို တကယ်ကောင်းတဲ့ ကွန်ဒိုကြီးတွေဆိုရင်က စပြီးတော့ ဆောက်စဉ်ကာလကတည်းက ရောင်းလိုက်တာ အခုဆိုရင် တော်တော်များများဟာ ရောင်းပြီးသလောက်ဖြစ်နေကြပါပြီ။ အချို့ဆို ၂၀ ရာခိုင်နှုန်း၊ ၂၅ ရာခိုင်နှုန်းလောက်ပဲ ကျန်တာမျိုး ရှိပါတယ်” ဟု ၎င်းကဆိုသည်။

ကွန်ဒိုမီနီယံဥပဒေဖြင့် တည်ဆောက်မည့် တိုက်ခန်းဝယ်ယူရန် လာရောက်မေးမြန်းသူမရှိသော်လည်း ကျပ်သိန်းထောင်ချီသည့် မြေကွက်ဝယ်ယူရန်မေးမြန်းသူများရှိကြောင်း သုခစံရာ အိမ်၊ ခြံ၊ မြေ အကျိုးဆောင်မှ ဦးဝဏ္ဏက ဆိုသည်။

ပြည်တွင်းဆောက်လုပ်ရေးလုပ်ငန်းရှင်များသာမက မြန်မာနိုင်ငံရင်းနှီးမြှုပ်နှံမှု ကော်မရှင်ကလည်း လာမည့် ၂၀၂၀-၂၀၂၁ ဘဏ္ဍရေးနှစ်တွင် အိမ်၊ ခြံ၊ မြေကဏ္ဍ၌် ပြည်ပရင်နှီးမြှုပ်နှံမှု တိုးမြင့်လာမည်ဟု မျှော်မှန်းထားသည်။

“အခုကျွန်တော်တို့ကလေ Real Estate (အိမ်၊ ခြံ၊ မြေ ဆောက်လုပ်ရေး)ကိုပိုပြီးတော့ Target ထားပါတယ်။ ဘာဖြစ်လို့လဲဆိုတော့ သူကတကယ်အလုပ်ရတယ်။ စက်ရုံ အလုပ်ရုံလိုလိုမျိုးပဲ” ဟု မြန်မာနိုင်ငံရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန ခေတ္တညွှန်ကြားရေးမှူးချုပ် ဦးသန့်စင်လွင်က The Voice Journal သို့ ပြောကြားသည်။
နိုင်ငံခြားရင်းနှီးမြှုပ်နှံမှုလုပ်ငန်းတွင် အိမ်၊ ခြံ၊ မြေကဏ္ဍပိုမိုဝင်ရောက်ရန် မျှော်မှန်းချက်ထားရှိထားရာ ဆောက်လုပ်ရေးလုပ်ငန်းပိုကောင်းလာမည်ဖြစ် ကြောင်း ၎င်းကဆိုသည်။

သမ္မတဦးသိန်းစိန်အစိုးရလက်တွင် အိမ်၊ ခြံ၊ မြေ လုပ်ငန်းတစ်ခုတည်းမှ အမေရိကန်ဒေါ်လာ သန်း ၃၀၀ အထိ ရင်းနှီးမြှုပ်နှံခဲ့ဖူးသည့် သာဓကများရှိခဲ့သည်။

ဗီယက်နမ်အခြေစိုက် Hoang Anh Construction & Development House Joint Stock Company (HAGL) သည် စက်မှု (၁) ဝန်ကြီးဌာနရုံးဟောင်းနေရာတွင် Build, Operation and Transfer (BOT) စနစ်ဖြင့် ဟိုတယ်၊ ဈေးဝယ်စင်တာ၊ ရုံးခန်းနှင့် အဆင့်မြင့်လူနေအိမ်ခန်းများကို ဆောက်လုပ်ခဲ့ခြင်းဖြစ်သည်။

BOT ပြဿနာ

BOTစနစ်ဖြင့်တည်ဆောက်သည့် အဆောက်အအုံများသည် ယေဘုယျအား ဖြင့် အစိုးရပိုင်မြေနေရာများတွင် တည်ဆောက်ခြင်းဖြစ်ပြီး သတ်မှတ်ထားသည့် နှစ်ပြည့်ပါက မြေပြန်လည်အပ်နှံရသည်။ ထိုကြောင့် BOT စနစ်ဖြင့် တည်ဆောက်ထားသည့် ကွန်ဒိုမီနီယံတိုက်ခန်း ဝယ်ယူသူများသည် မြေကိုအချိုးကျပိုင်ဆိုင်မည် မဟုတ်ချေ။

ယင်းအချက်သည် ကွန်ဒိုမီနီယံဥပဒေနှင့် ဆန့်ကျင်နေသည်။ ရန်ကုန်မြို့တွင် BOT စနစ်ဖြင့်တည်ဆောက်ကာ ကွန်ဒိုမီနီယံအမည်တပ်ရောင်းချထားသည့် တိုက်ခန်းများလည်း များစွာရှိသည်။

“BOT ငှားတဲ့မြေပေါ်မှာ တိုက်ခန်းဆောက်ခွင့်၊ ရောင်းချခွင့်ပြုတာဟာ သမိုင်းက အမတ်ကြီးဦးပေါ်ဦးရဲ့ ဆင်ဖြူတော်လျှောက်ထုံးလိုပဲ။ နှစ် ၇၀ ကြာရင် ဘုရင်လည်းမရှိ၊ ဆင်လည်းမရှိ၊ ငါလည်းမရှိ ဒါကြောင့် ဆင်ဖြူဟာ မဖြူဘဲ မည်းသွားရင်လည်း ကိစ္စမရှိပါဘူး” ဟု မတ်လ ၇ နေ့တွင်ကျင်းပသည့် ပြည်သူ့လွှတ်တော်အစည်းအဝေးတွင် မင်းကင်းမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးမောင်မြင့်က ဝေဖန်ခဲ့သည်။

ပြည်သူ့လွှတ်တော်တွင်အတည်ပြု ပြဋ္ဌာန်းခဲ့သည့် ကွန်ဒိုမီနီယံဥပဒေနှင့် အညီတည်ဆောက်သည့် ကွန်ဒိုမီနီယံနှင့် BOT စနစ်ဖြင့်တည်ဆောက်သည့် ကွန်ဒိုမီနီယံကို ဝယ်ယူသူများ ရှင်းရှင်းလင်းလင်း သိရှိရန်လိုအပ်သည်။

ယနေ့ဆောက်လုပ်ရေးလောကတွင် ကွန်ဒိုဟူသောဝေါဟာရအပြင် BOT စနစ်ဖြင့်ဆောက်လုပ်သော ကွန်ဒိုအဆောက်အအုံကို BOT နှင့် ကွန်ဒို ပေါင်းကာ ဘီဒိုဟူသည့်ဝေါဟာရတစ်ခုပင် ပေါ်ထွန်းလာကြောင်း ပြည်သူ့လွှတ်တော် ကိုယ်စားလှယ် ဦးမောင်မြင့်က လွှတ်တော်အစည်းအဝေးတွင် မှတ်ချက်ပြုသည်။

BOT စနစ်ဖြင့် တည်ဆောက်ထားသည့် ကွန်ဒိုများကို ရောင်းချပြီးနောက် BOT သက်တမ်းကုန်၍ မြေကိုပြန်လည်လွှဲပြောင်းချိန်တွင် နေထိုင်လျက်ရှိသူများနှင့်ပတ်သက်၍ မည်သို့ဆက်လက်ဆောင်ရွက်မည့်အချက်ကို BOT စာချုပ်တွင် ထည့်သွင်းချုပ်ဆိုနိုင်ကြောင်း စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင်က ပြည်သူ့လွှတ်တော်အစည်းဝေးတွင် ပြောကြားခဲ့သည်။

ကွန်ဒိုမီနီယံဝယ်ယူရာတွင် မြေအချိုးကျပိုင်ဆိုင်ခွင့်ရှိမရှိ ဝိဝါဒကွဲပြားစွာ သိရှိရန်လိုအပ်ကြောင်း မဏ္ဍိုင် အိမ်၊ ခြံ၊ မြေနှင့် အထွေထွေဝန်ဆောင်မှုကုမ္ပဏီ အုပ်ချုပ်မှုဒါရိုက်တာ ဦးသန်းဦးကဆိုသည်။

ဦးသန်းဦးသည် မြန်မာနိုင်ငံ အိမ်၊ ခြံ၊ မြေဝန်ဆောင်မှုအသင်း အတွင်းရေးမှူးလည်း ဖြစ်သည်။

၂၀၁၆ ခုနှစ်တွင်ပြဋ္ဌာန်းခဲ့သည့် ကွန်ဒိုမီနီယံဥပဒေတွင်မူ နိုင်ငံခြားသားများကို ကွန်ဒိုမီနီယံ တိုက်ခန်းဝယ်ယူခွင့်ပြုထားပြီး ကွန်ဒိုမီနီယံဝယ်ယူများသည် (မရွှေ့ပြောင်းနိုင်သည့်ပစ္စည်း) မြေကိုပါ အချိုးကျပိုင်ဆိုင်နိုင်မည်ဟု ပြဋ္ဌာန်းထားသည်။ တစ်နည်းဆိုသော် နိုင်ငံခြားသားများပါ မြေပိုင်ဆိုင်ခွင့်ပေးထားသည့်သဘောပင်။

ယင်းအချက်သည် ၁၉၈၇ ခုနှစ်က ပြဋ္ဌာန်းခဲ့သည့် မရွှေ့ပြောင်းနိုင်သောပစ္စည်း လွှဲပြောင်းခြင်းကိုကန့်သတ်သည့်ဥပဒေနှင့် ဆန့်ကျင်နေကြောင်း ဦးသန်းဦးက ဆိုသည်။

၁၉၈၇ မရွှေ့ပြောင်းနိုင်သောပစ္စည်း လွှဲပြောင်းခြင်းကို ကန့်သတ်သည့်ဥပဒေ အခန်း(၂) တွင် မည်သူမျှ နိုင်ငံခြားသားနှင့်ဖြစ်စေ၊ နိုင်ငံခြားသားပိုင်ကုမ္ပဏီနှင့်ဖြစ်စေ မရွှေ့ပြောင်းနိုင်သောပစ္စည်းကို ရောင်းချခြင်း၊ ဝယ်ယူခြင်း၊ ပေးကမ်းခြင်း၊ ပေးကမ်းသည်ကိုလက်ခံခြင်း၊ ပေါင်နှံခြင်း၊ ပေါင်နှံသည်ကို လက်ခံခြင်း၊ လဲလှယ်ခြင်း သို့မဟုတ် အခြားနည်းလမ်းတစ်ရပ်ရပ်ဖြင့် လွှဲပြောင်းခြင်း၊ လွှဲပြောင်းသည်ကို လက်ခံခြင်းမပြုရဟု ပြဋ္ဌာန်းထားသည်။

ထိုကြောင့် ယင်းအချက်ကို ဖောက်ဖျက်ကျူးလွန်၍ ပြစ်မှုထင်ရှားစီရင်ခြင်းခံရလျှင် အနည်းဆုံးထောင်ဒဏ် သုံးနှစ်မှ အများဆုံးထောင်ဒဏ်ငါးနှစ်အထိ ကျခံရနိုင်ကြောင်း အဆိုပါဥပဒေ အခန်း (၄) ပြစ်ဒဏ်များတွင် ဖော်ပြထားသည်။

၁၉၈၇ ခုနှစ် မရွှေ့ပြောင်းနိုင်သော ပစ္စည်းလွှဲပြောင်းခြင်းကို ကန့်သတ်သည့် ဥပဒေနှင့် ၂၀၁၆ ခုနှစ် ကွန်ဒိုမီနီယံ ဥပဒေ နှစ်ခုကြားက နိုင်ငံခြားသား မြေအချိုးကျ ပိုင်ဆိုင်ခွင့်သည် ဝိရောဓိဖြစ်လျက်ရှိနေ ပြန်သည်။

ဤသို့သောအခြေအနေမျိုးတွင် ကွန်ဒိုဈေးကွက်ကောင်းမွန်လာရေး လုပ်ငန်းရှင်များက စောင့်မျှော်နေကြခြင်း ဖြစ်သည်။ ထို့ပြင် အစိုးရကလည်း တိုင်းဒေသကြီးနှင့်ပြည်နယ် ၁၁ ခုတွင် စုပေါင်းပိုင် အဆောက်အအုံစီမံခန့်ခွဲရေး ကော်မတီ များဖွဲ့ထားဖြစ်သည်။

ရန်ကုန်တိုင်းအတွက်မူ ရွှေတောင်၊ တက်လမ်း၊ ဒဂုံအင်တာနေရှင်နယ် စသည့် နာမည်ကြီးဆောက်လုပ်ရေးလုပ်ငန်းများအပါအဝင် ဆောက်လုပ်ရေးကုမ္ပဏီ ၃၂ ခုကို ကွန်ဒိုတည်ဆောက်ခွင့် လုပ်ငန်းလိုင်စင်များ ထုတ်ပေးပြီးဖြစ်သည်။

နိုင်ငံခြားသားများကို ရောင်းချခွင့်နှင့် မြေအချိုးကျ ပိုင်ဆိုင်ခွင့်ပေးမည့် ကွန်ဒိုမီနီယံဈေးကွက် အခြေအနေသည် လာမည့်ကာလများတွင် မည်သို့ရှိမည်နည်းဟူသည်ကို မြန်မာနိုင်ငံအိမ်၊ ခြံ၊ မြေ ဝန်ဆောင်မှုအသင်းအတွင်းရေးမှူး ဦးသန်းဦးက ယခုကဲ့သို့မှတ်ချက်ပြုသည်။

“လမ်းမပီပြင်ရင်တော့ လျှောက်တဲ့သူကနည်းမှာပဲ။ ဥပဒေမပီပြင်သမျှကာလပတ်လုံး ဈေးကွက်ကောင်းလာနိုင်ဖို့မရှိသေးဘူး” 

ပို့ပို့

You may also like...

Leave a Reply

Your email address will not be published. Required fields are marked *