သရုပ်ဆောင် ထွန်းအိန္ဒြာဗိုနှင့် တွေ့ဆုံခြင်း

“သူတို့က ဆင်းန်အပေါ်မှာလည်း အရမ်းစည်းကမ်းရှိတယ်။ တစ်ယောက်နဲ့ တစ်ယောက် စနောက်တယ်ဆိုတာ နားတဲ့ အချိန်မှပဲ။ ကျန်တဲ့ အလုပ်လုပ်တဲ့အချိန်တွေမှာ အနှောင့်အယှက်ဖြစ်အောင် ဘယ်တော့မှမလုပ်ဘူး”

ခသုံးလုံး ရုပ်ရှင်ထုတ်လုပ်ရေးကနေ တတိယမြောက်ရိုက်ကူးမယ့် ဇာတ်ကားအတွက် ဒါရိုက်တာထူးပိုင်ဇော်ဦး ရွေးချယ်ဖြစ်တဲ့အကြောင်း၊ အမေရိကားမှာ တစ်လကျော်သွားရောက်ရိုက်ကူးခဲ့တဲ့ မေတ္တာဇာတ်ကားအကြောင်းနဲ့ ဇာတ်ကားရိုက်ကူးနေစဉ် အတွေ့အကြုံတွေကို သရုပ်ဆောင်ထွန်းအိန္ဒြာဗိုကို မေးမြန်းထားတာ ဖြစ်ပါတယ်။

Voice :       ခသုံးလုံး ထုတ်လုပ်ရေးက ဒီတစ်ခေါက် မခိုင်ကြီးရွေးရမယ့်အလှည့် ဆိုတော့ ဘယ်လိုဇာတ်မျိုး ရွေးချယ်ထားလဲ။

HEDB :        ကျွန်မအလှည့်ကို ဇာတ်ရွေးတာထက် ဒါရိုက်တာ ရွေးလိုက်တာ။ ဒါရိုက်တာကတော့ ထူးပိုင်ဇော်ဦးကို ရွေးထားတယ်။ ဒါပေမဲ့ ကျွန်မ ဘာမှ ဝင်မပါပါဘူး။ ဘာဖြစ်လို့လဲဆိုတော့ ထူးပိုင်ကို သူရဲ့ တကယ် အိုင်ဒီယာစစ်စစ်ကို ရချင်လို့ပါ။ ဘာဖြစ်လို့လဲဆိုတော့ ကျွန်မတို့ဝင်ပါနေရင် သူဟာလည်း မပြည့်၊ ကိုယ့်ဟာလည်း မရောက်နဲ့ အဲဒီလိုဖြစ်နေမှာ စိုးလို့ပါ။

Voice :       ဘယ်လိုကြောင့် ဒါရိုက်တာ ထူးပိုင်ဇော်ဦးကို ရွေးချယ်ထားတာလဲ။

HEDB :        ကျွန်မက ညဇာတ်ကား ကြော်ငြာထဲကလည်း ကြိုက်တယ်။ သွားကြည့်ပြီးတော့လည်း သူ့ကို ကြိုက်တယ်။ ရည်ရွယ်ထားတာ ကြာပါပြီ။ ပြီးတော့ ထူးပိုင်နဲ့ သူစိမ်းအိမ်ဆိုတဲ့ ကားတစ်ကား  ရိုက်ထားတယ်။ ကျွန်မနဲ့ သရုပ်ဆောင်ဖြစ်တဲ့ အချိန်တွေမှာလည်း ထူးပိုင် အလုပ်လုပ်တာတွေကို သဘောကျတယ်။ ပြီးတော့ ထူးပိုင်တစ်ယောက်ထဲကို သဘောကျကြောင်း ပြောနေတာ မဟုတ်ပါဘူး။ ကျွန်မ နောက်ပိုင်းလူငယ်တွေနဲ့ အများကြီးရိုက်ဖူးပါတယ်။ အားလုံးကို သဘောကျပါတယ်။ သူတို့တွေ တကယ်ကြိုးစားပါတယ်။

Voice :       နောက်ပိုင်းမှာ လူငယ်ဒါရိုက်တာတွေနဲ့ တွဲလုပ်ဖြစ်ဖို့ များမလား။

HEDB :        လူငယ်ဒါရိုက်တာပဲ ဖြစ်ဖြစ်၊လူကြီးဒါရိုက်တာပဲ ဖြစ်ဖြစ် ကျွန်မအားလုံးနဲ့ လက်တွဲချင်ပါတယ်။ ကားကောင်းကောင်းကို တိုင်ပင်ကြိုးစားပြီး အလုပ်လုပ်ကြမယ့်သူ မည်သူမဆို ကျွန်မကြိုဆိုပါတယ်။

Voice :       အကယ်ဒမီနဲ့ ပတ်သက်ပြီး ပရိသတ်တွေကြား ပွဲဆူသွားတော့ ကိုယ်တိုင်က ဘယ်လိုမြင်မိလဲ။

HEDB :         ပရိသတ်အများစုရဲ့ အသံဆိုတော့ အလေးထားသင့်ပါတယ်။

Voice :       နောက်နှစ်တွေမှာ အကယ်ဒမီအဖွဲ့ဝင်ထဲမှာ ပါဝင်ဆောင်ရွက်သွားဖို့ ရှိလား။

HEDB :        ကျွန်မဘယ်တော့မှ မလုပ်တဲ့ အလုပ်က အကယ်ဒမီအကဲဖြတ် အလုပ်ပါပဲ။ကျွန်မ မလုပ်ပါဘူး။

Voice :       ဘယ်လိုကြောင့် မလုပ်ချင်တာလဲ။

HEDB :       ကျွန်မ လောလောဆယ်အထိကို ဆန္ဒမရှိပါဘူး။ ဘာကြောင့်ရယ်မှတော့ မဟုတ်ပါဘူး။

Voice :       အမေရိကားမှာ တစ်လကျော် သွားရောက်ရိုက်ကူးခဲ့တဲ့ မေတ္တာဇာတ်ကားက ဘယ်လိုကြောင့် လက်ခံရိုက်ကူးဖြစ်တာလဲ။

HEDB :        အဲဒီကားကို ကျွန်မ ကြိုက်တယ်။ အဲဒီကားက ကျွန်မတို့ စတည်ဖို့ ရိုက်တာ လေးနှစ်လောက်ရှိပါပြီ။ တကယ်တော့ လေးနှစ်ပြည့်မှ ရိုက်ဖြစ်တာပေါ့။မြန်မာဒါရိုက်တာလည်း သုံး၊ လေးယောက်လောက် အမေရိကားကို ရောက်တဲ့အထိ ရိုက်ကွင်းကြည့်တာတို့ ဘာတို့၊ ဇာတ်ညွှန်းအပ်တာ၊ ဇာတ်လမ်းဆင်တာအထိ အားလုံးတည်ပြီးကာမှ အကြောင်းအမျိုးမျိုးကြောင့် ပျက်ပယ်သွားပြီး နောက်ဆုံးတော့ ဟောလိဝုဒ်ဒါရိုက်တာနဲ့ ရိုက်ဖြစ်တာပါ။ ဟိုဘက်မှာ ဖန်တီးထားတဲ့ ဇာတ်လမ်းဖြစ်တဲ့အတွက် ကျွန်မတို့က ဒီဘက်က သွားတယ်။ အဲဒီကားက ရိုက်တဲ့အခြမ်းတွေက ကျွန်မတို့ဘက်သာ ပြီးသွားတာ။ မြန်မာပြည်ကို လာရိုက်ရမယ့် အခြမ်းနည်းနည်းကျန်ပါတယ်။ ဟိုဘက်က မင်းသားနဲ့ သူတို့တွေရိုက်ဖို့ နည်းနည်းကျန်ပါတယ်။ အဲဒါတွေပြီးမှ ရုံတင်ဖို့ သွားရမယ်ထင်ပါတယ်။

Voice :       ဇာတ်လမ်းက ဘယ်လိုပုံစံမျိုးလဲ။

HEDB :        မေတ္တာဖွဲ့ဇာတ်လမ်းပါပဲ။ ဇာတ်က မန္တလေး Production ကပဲ တည်ထားတဲ့ဇာတ်ပါ။ သူတို့ရဲ့ ကိုယ်ပိုင်ရေးထားတဲ့ ဇာတ်ပေါ့နော်။ အဲဒီဇာတ်ကို ဟောလိဝုဒ်ဒါရိုက်တာနဲ့ ရိုက်ဖြစ်တဲ့အခါ ကျတော့ ဒါရိုက်တာစိတ်ကြိုက် ဇာတ်လမ်းနည်းနည်း ပါးပါးပြုပြင်တာတွေကလွဲလို့ မူရင်းတော့ မပျက်ပါဘူး။

Voice :       မြန်မာသရုပ်ဆောင်တွေ ဘယ်သူတွေ ပါဝင်ထားလဲ။

HEDB :       ဒီကနေ ကိုလူမင်းနဲ့ ကျွန်မ သွားကြတယ်။ ဟိုမှာလည်း မြန်မာသရုပ်ဆောင်တွေ ပါတယ်။ မြန်မာသရုပ်ဆောင်တွေဆိုတာ အမေရိကန်မှာ ကြီးကြ၊ အဲဒီမှာ မွေးကြတဲ့ မြန်မာသရုပ်ဆောင်တွေပါတယ်။ တချို့မြန်မာတွေက မြန်မာစကားတောင် သိပ်မတတ်ကြဘူး။ ကျန်တာတွေကလည်း တကယ့် အမေရိကန်စစ်စစ် အဖြူတွေ ပါတယ်။

Voice :       ရိုက်ကူးချိန်မှာ ဘယ်လိုမျိုး အတွေ့အကြုံတွေ ရခဲ့လဲ။

HEDB :       ပြောစရာတွေက အများကြီး။ သူတို့က အရမ်းပဲအလုပ်ကို အလုပ်နဲ့ တူအောင် လုပ်တယ်။ မနက် ၅ နာရီဆို ကျွန်မတို့က ထကို ထရတယ်။ ၆ နာရီ ၁၅ ဆို ကားက ရောက်နေပြီ။ မြန်မာပြည် မှာဆိုရင် အဲဒီအချိန်က အိပ်ရာတောင် မနိုးသေးဘူး။ ဆိုလိုတာက အဲကနေ စပြောရမယ်။ သူတို့က ဆင်းန် အပေါ်မှာလည်း အရမ်းစည်းကမ်းရှိတယ်။ တစ်ယောက်နဲ့ တစ်ယောက် စနောက်တယ်ဆိုတာ နားတဲ့ အချိန်မှပဲ။ ကျန်တဲ့ အလုပ်လုပ်တဲ့အချိန်တွေမှာ အနှောင့်အယှက် ဖြစ်အောင် ဘယ်တော့မှ မလုပ်ဘူး။ ဆိုလိုတာက ကျွန်မတို့မြန်မာပြည်မှာ အလုပ်လုပ်ကြတာ အနှောင့်အယှက် ဖြစ်တယ်လို့တော့ မဟုတ်ဘူး။ တစ်ယောက်နဲ့ တစ်ယောက် ခင်မင်ပြီး စနောက်တာများလွန်းတယ်လို့ ကျွန်မထင်တယ်။ ဘာဖြစ်လို့လဲဆိုတော့ အလုပ်ထဲမှာ အာရုံက ရှိရမှာလေ။ အလုပ်ကို သေချာအာရုံပေးရဦးမှာဆိုတော့ စနောက်နေတာကြီးနဲ့ မပြီးဘူးပေါ့။ တစ်ယောက်နဲ့ တစ်ယောက်ချစ်ခင်မှုအရ စကြနောက်ကြတာကောင်းပါတယ်။ များလွန်းတော့လည်း မကောင်း ဘူးပေါ့။

ဆုအိနြေ္ဒဦး

You may also like...

Leave a Reply

Your email address will not be published. Required fields are marked *