အတိုင်ပင်ခံ၏ ခွင့်ပြုချက်ဖြင့် တင်ဒါမခေါ်ဘဲ လုပ်ကိုင်ခွင့်ပေးခဲ့ဟု မွန်ပြည်နယ်ဝန်ကြီးချုပ်ဆို

ရန်ကုန်၊ မေ ၃

အတိုင်ပင်ခံပုဂ္ဂိုလ်၏ ခွင့်ပြုချက်ဖြင့် ကျေးရွာချင်းဆက် လမ်းဖောက်လုပ်မှုကို တင်ဒါမခေါ်ဘဲ လုပ်ကိုင်ခွင့်ချပေးခဲ့သည်ဟု မွန်ပြည်နယ်ဝန်ကြီးချုပ် ဒေါက်တာအေးဇံက မေလ ၃ ရက်တွင် ကျင်းပသည့် မွန်ပြည်နယ်လွှတ်တော် အစည်းအဝေးတွင် ပြောကြားသည်။

မွန်ပြည်နယ်ရေးမြို့နယ် အောင်သပြေ – နှစ်ကရင် ကျေးရွာချင်းဆက် လမ်းအဆင့်မြှင့်တင်ခြင်းလုပ်ငန်းအတွက် ၂၀၁၈ -၂၀၁၉ ဘဏ္ဍာနှစ်တွင် ခွင့်ပြုဘဏ္ဍာငွေ သန်း ၁၀၀၀ ဖြင့် မွန်ပြည်နယ်အစိုးရက SMD (Southen Myanmar Development) ကုမ္ပဏီကို လုပ်ကိုင်ခွင့်ပြုခဲ့ပြီး မွန်ပြည်နယ်လွှတ်တော်ကိုယ်စားလှယ် ဒေါက်တာအောင်နိုင်ဦးက ပြည်နယ်ဘဏ္ဍာရန်ပုံငွေဖြင့် ကျေးလက်ဒေသ ဖွံ့ဖြိုးရေးလုပ်ငန်းများ ဆောင်ရွက်ထားရှိမှုအခြေအနေနှင့် စပ်လျဉ်း၍မေးမြန်းခဲ့ခြင်းဖြစ်သည်။

“ကျွန်တော်တို့ သိသလောက်တော့ တင်ဒါမခေါ်ဘဲ ပေးလုပ်ခဲ့တယ်။ လုပ်ထုံးလုပ်နည်းနဲ့ညီ မညီ ဘယ်လိုလုပ်ခဲ့ကြလဲ မေးတာ” ဟု ဒေါက်တာအောင်နိုင်ဦးက ဆိုသည်။

မွန်ပြည်နယ်စည်ပင်သာယာရေးနှင့် ဆောက်လုပ်ရေးဝန်ကြီး ဦးမင်းကျော်လွင်ကမူ နိုင်ငံသမ္မတရုံးက ၂၀၁၇ ခုနှစ်တွင် ထုတ်ပြန်သော တင်ဒါလုပ်ထုံးလုပ်နည်းလမ်းညွှန်ချက်ပါ အပိုဒ် ၆ နှင့်အညီ ပြည်နယ်  အစိုးရအဖွဲ့အစည်းအဝေး ခွင့်ပြုချက်အရ လုပ်ကိုင်ခွင့်ရှိသဖြင့် လုပ်ကိုင်ပါကြောင်း လွှတ်တော်တွင် ဖြေကြားခဲ့သည်။

အပိုဒ် ၆ တွင် ယင်းသို့ ဖော်ပြထားခြင်းမရှိဘဲ ပြည်ထောင်စုအဆင့် စီမံကိန်းဖြစ်မှသာ ပြည်ထောင်စုအစိုးရအဖွဲ့၏ သဘောတူညီချက်ဖြင့် လုပ်ကိုင်ခွင့်ပြုခြင်းဖြစ်သောကြောင့် ပြန်လည်ရှင်းလင်းပေးရန် ဦးအောင်နိုင်ဦးက လွှတ်တော်တွင် ထပ်ဆင့်မေးခွန်းမေးမြန်းခဲ့သည်။

“ဝန်ကြီးက ဆက်မဖြေဘဲ ဝန်ကြီးချုပ်က ဖြေပေးတယ်။ ဒါကတော့ ဒီလို ရှိပါတယ်။ Mini Budget ကာလ ဖြစ်တဲ့အတွက်၊ မိုးတွင်းကာလဖြစ်တဲ့အတွက် အခက်အခဲရှိလို့ နိုင်ငံတော်အတိုင်ပင်ခံ ပုဂ္ဂိုလ်ရဲ့ ညွှန်ကြားချက်အရ လုပ်ခဲ့တာလို့ သူက ဖြေတယ်”ဟု ဒေါက်တာအောင်နိုင်ဦးက ရှင်းပြသည်။

အတိုင်ပင်ခံပုဂ္ဂိုလ်သည် မည်သည့်နေရက်တွင် မည်သို့သော ညွှန်ကြားစာဖြင့် ပေးပို့ခဲ့ပါသနည်းဟု ဒေါက်တာအောင်နိုင်ဦး ဆက်လက်မေးမြန်းရာ စာဖြင့် ပေးပို့ညွှန်ကြားခဲ့ခြင်း မဟုတ်ဘဲ လူချင်းတွေ့ဆုံမှု တင်ပြခဲ့မှုအပေါ် အတိုင်ပင်ခံက ခွင့်ပြုခဲ့ခြင်းဖြစ်ကြောင်း ဒေါက်တာအောင်နိုင်ဦးက ပြန်လည်ပြောပြသည်။

“ကျွန်တော်မေးတာ ဘယ်နေ့၊ ဘယ်ရက်၊ ဘယ်စာအမှတ်နဲ့ ညွှန်ကြားခဲ့တာလဲမေးတာ။ ဒါကို ဖြေကြားပေးဖို့ မေးတာ။ သူဖြေတာက စာနဲ့ လာတာ မဟုတ်ဘူး။ သူပြောတဲ့ပုံစံက သူတို့ အခက်အခဲရှိလို့ တင်ပြလို့ ခွင့်ပြုခဲ့တဲ့ ပုံစံ ဖြေသွားတာ။ ဒါဆိုရင်တော့ ဘယ်သူမှန်တယ်၊ ဘယ်သူမှားလဲ ခန့်မှန်းလို့ရတယ်။ သေချာတာကတော့ အတိုင်ပင်ခံက ဒီလိုကြီးတော့ ဘယ်ပြောပါ့မလဲ”ဟု ဒေါက်တာအောင်နိုင်ဦးက ဆိုသည်။

မတ်လ ၁၈ ရက်က ပြုလုပ်ခဲ့သည့် အတိုင်ပင်ခံနှင့် ကရင်ပြည်နယ်ပြည်သူများတွေ့ဆုံပွဲတွင် “ဘာကိုမှ နှုတ်မိန့်နဲ့ လုပ်လို့ မရပါဘူး။ ကျွန်မတို့ စည်းကမ်းဥပဒေအရ သေသေချာချာသုံးသပ်ပြီးတော့ လုပ်ပါ့မယ်”ဟု အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က ပြောကြားပြီး နှုတ်မိန့်ဖြင့် လုပ်ဆောင်မှုများသည် ဥပဒေအရ အကျုံးမဝင်ကြောင်း ပြောကြားထားသည်။

မွန်ပြည်နယ်ဝန်ကြီးချုပ် ဒေါက်တာအေးဇံသည် ပြီးခဲ့သည့် ဧပြီလအတွင်းကလည်း ခရုကျနေသည့် နွေစပါးခင်းအတွက် အကူအညီပေးရန် ဒေသခံတစ်ဦး၏ တင်ပြမှုအပေါ် မိသားစုလိုက်လယ်ကွက်ထဲဆင်း ခရုဖမ်းပြီး ပြည်ပပို့ရန် ပြောသဖြင့် ဝေဖန်ခံခဲ့ရသေးသည်။   

You may also like...

Leave a Reply

Your email address will not be published. Required fields are marked *