ကျေးလက်လမ်းဖွံ့ဖြိုးရေးဦးစီးဌာန စာရေးမကို အဂတိလိုက်စားမှုဖြင့် အလုပ်နှင့် ထောင်ဒဏ် လေးနှစ်ချမှတ်

မန္တလေး၊ မေ ၁၆

မန္တလေးတိုင်းဒေသကြီး ကျေးလက်လမ်းဖွံ့ဖြိုး ရေးဦးစီးဌာနဌာနခွဲ စာရေးမဒေါ်သူဇာကို အဂတိ လိုက်စားမှုဖြင့် အလုပ်နှင့် ထောင်ဒဏ်လေးနှစ်ကျခံစေရန် မန္တလေးတိုင်းဒေသကြီးတရားလွှတ်တော်က မေလ ၁၆ ရက်နေ့တွင် အမိန့်ချမှတ်လိုက်သည်။

အဂတိလိုက်စားမှုတိုက်ဖျက်ရေးဥပဒေပုဒ်မ ၅၆ အရ အလုပ်နှင့် ထောင်ဒဏ် ၂ နှစ်၊ အဂတိလိုက်စားမှုတိုက်ဖျက်ရေး ဥပဒေပုဒ်မ ၅၆/၆၃ အရ အလုပ်နှင့် ထောင်ဒဏ်၂နှစ်ကို သီးခြားစီကျခံရမည် ဖြစ်သည့်အတွက် စုစုပေါင်းလေးနှစ်ချမှတ်ခံရခြင်း ဖြစ်သည်။

၂၀၁၇ – ၂၀၁၈ ဘဏ္ဍာရေးနှစ်ပြည်ထောင်စု ရန်ပုံငွေဘတ်ဂျက်နှင့် တိုင်းဒေသကြီးအစိုးရ ရန်ပုံငွေဘတ်ဂျက်တို့ဖြင့် ကျေးလက်လမ်းလုပ်ငန်းများ တင်ဒါခေါ်ယူဆောင်ရွက်ရာတွင် လုပ်ငန်းပြီးစီးမှုအရ ၂၅ ရာခိုင်နှုန်းကို လုပ်ငန်းတန်ဖိုးငွေအဖြစ် ခွဲဝေထုတ်ပေးရာတွင် မန္တလေးတိုင်းဒေသကြီး ကျေးလက်လမ်းဖွံ့ဖြိုးရေးဦးစီးဌာန ငွေထုတ်အရာရှိတိုင်းဦးစီးမှူး ဒုတိယညွှန်ကြားရေးမှူးဦးအောင်မြင့်ကျော်နှင့် ဌာနခွဲစာရေးမ ဒေါ်သူဇာတို့သည် လုပ်ပိုင်ခွင့်အာဏာကို အလွဲသုံးစားပြု၍ တင်ဒါအောင်မြင်သည့် ကုမ္ပဏီခြောက်ခုထံမှ လုပ်ငန်းပြီးစီးမှု ရာခိုင်နှုန်းအလိုက် ထုတ်ပေးရမည့် ငွေများထဲမှ ၃ ရာခိုင်နှုန်း ဖြစ်သည့် ငွေကျပ် ၁၀ သန်းကျော်ကို ‘ရုံးစရိတ်/ငွေထုတ်စရိတ်’ဟု အကြောင်းပြ၍ အဂတိလိုက်စားခဲ့ကြောင်း စစ်ဆေးပေါ်ပေါက်ခဲ့သည်ဟု အဂတိလိုက်စားမှုတိုက်ဖျက်ရေးကော်မရှင်က ထုတ်ပြန်ထားသည်။

ထို့ကြောင့် ၎င်းတို့နှစ်ဦးကို အရေးယူပေးရန် မြစ်ငယ်နယ်မြေရဲစခန်းတွင်  အောက်တိုဘာလ ၃၁ ရက်နေ့က အမှုဖွင့်တိုင်ကြားခဲ့ခြင်း ဖြစ်သည်။

အမှုတွဲဖြစ်သည့် ဒုတိယညွှန်ကြားရေးမှူးဦးအောင်မြင့်ကျော်မှာ ထွက်ပြေးတိမ်းရှောင်နေသဖြင့် ဖမ်းဆီးရမိခြင်း မရှိသေးပေ။

You may also like...

Leave a Reply

Your email address will not be published. Required fields are marked *