အစိုးရ မျက်စိမှောက်နေသော မြန်မာ့ငွေကြေးအရင်းအနှီးဈေးကွက်

တအိအိပြိုဆင်းနေသော စတော့ဈေးကွက်သို့ ရင်းနှီးမြှုပ်နှံသူအချို့ ပြန်လည်စိတ်ဝင်စားမှုနှင့်အတူ ပြည်တွင်းစတော့ရှယ်ယာဈေးကွက် တစ်ဖန်ဦးမော့လာသည်။

နှစ်နှစ်အတွင်း ပြည်တွင်းစတော့ ရှယ်ယာဈေးကွက်ကို အတက်ဈေးကွက်အဖြစ် စတင်မြင်တွေ့ရချိန် ဖြစ်သည်။

အရောင်းအဝယ်သာမက ရှယ်ယာဈေးနှုန်းများပါ ဆက်တိုက်ကျဆင်းနေသည့် စတော့ဈေးကွက် ပြန်ဦးမော့လာရသည့် အချက်များအနက် အဓိကတစ်ချက်မှာ နိုင်ငံခြားသားများ ပါဝင်လာတော့မည့် အချက်ဖြစ်သည်။

နိုင်ငံခြားသားများ စတော့ရှယ်ယာဈေးကွက်တွင် ရင်းနှီးမြှုပ်နှံခွင့်ကို မကြာခင် ခွင့်ပြုနိုင်မည်ဖြစ်ကြောင်း မြန်မာနိုင်ငံ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင် (SECM) မှ အဖွဲ့ဝင် ဦးဌေးချွန်က ပြောကြားထားပြီး ဖြစ်သည်။

ရင်းနှီးမြှုပ်နှံသူများအကြားတွင် စတော့ရှယ်ယာဈေးကွက်သို့ နိုင်ငံခြားသားများ မည်သည့်အချိန် ပါဝင်လာမည်ကို စောင့်ဆိုင်းနေပြီး ယင်းအတွက် ကြိုတင်ပြင်ဆင်သည့်အနေနှင့် အကျဘက်ရောက်နေသော ရှယ်ယာဈေးကွက်သို့ ပြန်ဝင် လာကြခြင်းဖြစ်သည်။

အခြားရင်းနှီးမြှုပ်နှံစရာရွေးချယ်နိုင်မည့် အခွင့်အလမ်းနည်းပါးချိန်နှင့် ကြုံကြိုက်နေသောကြောင့်လည်း ဖြစ်သည်။

ဧပြီလနောက်ဆုံးပတ်မှ စတင်ကာ စတော့ရှယ်ယာအရောင်းအဝယ် ပြန်လည်သွက်လက်လာပြီး သီတင်းပတ် ငါးပတ်ဆက်တိုက် အရောင်းအဝယ်နှင့် ရှယ်ယာဈေးများ အတက်ဘက်တွင် ရှိနေသည်။

စတော့ရှယ်ယာအရောင်းအဝယ်ကို သီတင်းပတ်အလိုက် နှိုင်းယှဉ်မည်ဆိုပါက ယခုနှစ် မေလ ၁၀ ရက်နေ့တွင် ဈေးကွက်ပိတ်ခဲ့သည့် တစ်ပတ်တာ စတော့ရှယ်ယာအရောင်းအဝယ်သည် တစ်နှစ်နှင့် ရှစ်လအတွင်း ပမာဏအများဆုံးဖြစ်ခဲ့သည်။

အဆိုပါသီတင်းပတ်တွင် ရှယ်ယာစုစုပေါင်း ၈၈,၀၀၀ ကျော်၊ ကျပ်သန်း ၅၅၀ ခန့် အရောင်းအဝယ်ဖြစ်ခဲ့ပြီး ၂၀၁၈ ခုနှစ် တစ်နှစ်လုံးတွင် ထိုအရောင်းအဝယ် ပမာဏကိုမီသည့် သီတင်းပတ်မရှိခဲ့ပေ။

ထို့အတူ စာရင်းဝင်အများပိုင်ကုမ္ပဏီများ၏ ရှယ်ယာဈေးအတက်အကျကို တွက်ချက်ပြသည့် အညွှန်းကိန်း (MYANPIX) မှာလည်း ထိုသီတင်းပတ်တွင် ၄၆၄ ဒသမ ၂ သို့ ရောက်ရှိခဲ့ပြီး ကိုးလအတွင်း အမြင့်ဆုံး စံချိန်ဖြစ်သည်။

စတော့ရှယ်ယာဈေးများ အမြင့်ဆုံး အချိန်တွင် ဝယ်ထားမိသည့် ရင်းနှီးမြှုပ်နှံသူများအနေနှင့် လက်ရှိအချိန်တွင် အရှုံးပြနေဆဲဖြစ်သော်လည်း ရှယ်ယာဈေးကျချိန်တွင် ဝယ်ထားသူများမှာ ယခုကာလတွင် အကျိုးအမြတ်ခံစားနေရပြီဖြစ်သည်။

“ဒီနှစ်စကတည်းက ဈေးတွေက တောက်လျှောက်ကျလာတာ။ အဲဒီတုန်းက ဝယ်သင့်တဲ့အချိန်လို့ ကိုယ်ထင်တယ်လေ။ အခုတော့ ဘဏ်တိုးထက် အများကြီး ပိုသာနေတာပေါ့” ဟု FMI နှင့် MTSH ရှယ်ယာများဝယ်ယူထားသူ ရင်းနှီးမြှုပ်နှံသူတစ်ဦးက ဆိုသည်။

စာရင်းဝင်ကုမ္ပဏီများမှာ နှစ်စဉ် အမြတ်ရရှိမှု ရှိနေသော်လည်း ရှယ်ယာဈေးနှုန်းမှာ ကျဆင်းနေပြီး ထိုအခြေအနေတွင် ကုမ္ပဏီ၏စွမ်းဆောင်ရည်နှင့် ဘဏ္ဍာရေးရှင်းတမ်းများကို လေ့လာကာ ရှယ်ယာဝယ်သင့်ကြောင်း ၎င်းက ဆက်လက်ပြောဆိုသည်။

မေလ ၁၇ ရက်က ပြုလုပ်သည့် မြန်မာ့စတော့ဈေးကွက်အကြောင်း ဆွေးနွေးပွဲတွင် ဘဏ္ဍာရေးနှင့် ငွေရေးကြေးရေးအကြံပေး ဦးကျော်မျိုးထွန်းကမူ “ကုမ္ပဏီရဲ့အမြတ်က တက်နေတယ်။ စတော့ဈေးက ကျနေတယ်။ အဲဒီလိုအချိန်မျိုးမှာ ဝယ်။ ဝယ်ပြီးရင် လှည့်မကြည့်နဲ့။ စတော့ရှယ်ယာဆိုတာ Long-term Investment (နှစ်ရှည်ရင်းနှီးမြှုပ်နှံမှု) ပဲ” ဟု ပြောသည်။

သင်္ကြန်ကာလအပြီး တစ်လအတွင်း စတော့ရှယ်ယာဈေးများမှာ ၁၀ ရာခိုင်နှုန်းမှ ၄၀ ရာခိုင်နှုန်းကျော်အထိ မြင့်တက်ခဲ့ကြောင်း ရန်ကုန်စတော့အိတ်ချိန်း၏ နေ့စဉ်ထုတ်ပြန်သော စတော့ရှယ်ယာ အရောင်းအဝယ်စာရင်းများအရ သိရသည်။

သို့သော် အတက်ဘက်ဦးမော့နေသည့် ပြည်တွင်းစတော့ရှယ်ယာဈေးကွက်မှာ အချိန်မည်မျှ ခံမည်မသိနိုင်ပေ။

ယင်းသို့ အတက်ပြပြီး မနားတမ်းထိုးဆင်းသွားသည့်ဖြစ်ရပ်များ ပြီးခဲ့သည့် နှစ်နှစ်အတွင်း ကြုံတွေ့ရပြီးဖြစ်သည်။

ပြည်တွင်းစတော့ရှယ်ယာဈေးကွက် ကျဆင်းနေသည်ကို သက်ဆိုင်ရာ တာဝန်ရှိသူအားလုံးက လက်ခံထားပြီး အခြေအနေပြန်ကောင်းလာရန် အစိုးရ၏ အားပေးထောက်ကူမှုလိုအပ်နေကြောင်း ပြောဆိုမှုများရှိသည်။

“ပွင့်ပွင့်လင်းလင်းပြောရရင် ထိပ်ဆုံးမိန့်ခွန်းမှာလည်း မကြားဖူးဘူး။ အလယ်ကမိန့်ခွန်းမှာလည်း မကြားဖူးဘူး” ဟု အရင်းအနှီးဈေးကွက်နှင့်ပတ်သက်၍ အစိုးရအဖွဲ့၏ အာရုံစိုက်မှုအားနည်းခြင်းကို ရန်ကုန်စတော့အိတ်ချိန်းမှ အကြီးတန်း အမှုဆောင်အရာရှိ ဦးသက်ထွန်းဦးက ဆိုသည်။

မကြာသေးမီက ပြုလုပ်ခဲ့သည့် မြန်မာ့စတော့ရှယ်ယာဈေးကွက် ၂၀၁၉ ခုနှစ် အခြေအနေနှင့် အနာဂတ်လားရာအကြောင်းဆွေးနွေးပွဲတွင် ယင်းသို့ပြောကြားခဲ့ခြင်းဖြစ်သည်။

တိုင်းပြည်စီးပွားရေးကို များစွာအထောက်အကူပြုနိုင်သည့် အရင်းအနှီးဈေးကွက်ကို ကိရိယာတစ်ခုအဖြစ် အသုံးမချနိုင် သို့မဟုတ် အသုံးမချတတ် သို့မဟုတ် အသုံးချရန်မသိခြင်းလားဆိုသည်က မေးခွန်းဖြစ်သည်။

လက်ရှိအခြေအနေမှာ စတော့ရှယ်ယာဈေးကွက် ယိုင်လဲမသွားရန် ကျားကန်ထားရချိန်ဖြစ်ပြီး အစိုးရ၏ ပါဝင်ထောက်ကူမှု လိုအပ်နေကြောင်း SECM နှင့် ရန်ကုန်စတော့အိတ်ချိန်းမှ တာဝန်ရှိသူများက ပြောဆိုထားကြသည်။

အဘယ်ကြောင့်ဆိုသော် ငွေကြေးအရင်းအနှီးဈေးကွက်တစ်ခုလုံးကို ကြီးကြပ်ထိန်းကျောင်းသည့် SECM မှာ စီမံကိန်းနှင့် ဘဏ္ဍာရေးဝန်ကြီးဌာနလက်အောက်တွင် ယခုအချိန်ထိ ရှိနေဆဲဖြစ်ပြီး အဆိုပါဝန်ကြီးဌာန၏ ခွင့်ပြုချက်ဖြင့်သာ ဈေးကွက်ကို ထိန်းကျောင်းလည်ပတ်နေရခြင်း ဖြစ်သည်။

ယမန်နှစ် ဩဂုတ်လမှ စတင်အသက်ဝင်သော မြန်မာနိုင်ငံကုမ္ပဏီများ ဥပဒေသစ်အရ ပြည်တွင်းလုပ်ငန်းများတွင် နိုင်ငံခြားသားပိုင်ဆိုင်ခွင့် ၃၅ ရာခိုင်နှုန်းအထိ ခွင့်ပြုထားသောကြောင့် စတော့အိတ်ချိန်း စာရင်းဝင်ကုမ္ပဏီများ၏ ရှယ်ယာကိုလည်း ဝင်ရောက်ရောင်းဝယ်ခွင့်ပြုရန် မြန်မာနိုင်ငံငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင်က ထိုအချိန်မှစတင် ပြင်ဆင်လာသည်မှာ ဆယ်လနီးပါးကြာပြီဖြစ်သော်လည်း ခွင့်ပြုနိုင်ခြင်းမရှိပေ။

အကြောင်းမှာ ဝန်ကြီးဌာန၏ ခွင့်ပြုချက်ကို စောင့်ဆိုင်းနေရခြင်းပင်။

“ကုမ္ပဏီဥပဒေအသက်ဝင်ကတည်းက လုပ်ခဲ့တာ SECM အပိုင်းက ပြီးပါပြီ။ မူကြမ်းကို ဝန်ကြီးရုံးကို တင်ထားပါတယ်။ ဝန်ကြီးရုံးကထုတ်ဆိုတဲ့အချိန်မှာ ထုတ်ရုံပါပဲ။ ကျွန်တော်တို့ကတော့ တာဝန်ရှိပါတယ်။ ဒါပေမဲ့ အထက်ကညွှန်ကြား တာကိုပဲလုပ်ရမှာပါ” ဟု SECM အဖွဲ့ဝင် ဦးဌေးချွန်က ပြောသည်။

စတော့ရှယ်ယာဈေးကွက် မစတင်မီကပင် SECM ကို အကူးအပြောင်းကာလပြီးပါက သီးခြားလွတ်လပ်သော ပြည်ထောင်စုအဆင့်အဖွဲ့အစည်းအဖြစ် ခွဲထုတ်ရန် ရေးဆွဲထားသော်လည်း လက်ရှိအချိန်ထိ ဝန်ကြီးဌာနအောက်တွင်သာ ဆက်လက်ထားရှိသည်။

အကူးအပြောင်းကာလကို အချိန်မည်မျှသတ်မှတ်ထားသည် မသိရသော်လည်း ပြည်တွင်းစတော့ဈေးကွက် သက်တမ်းမှာ သုံးနှစ်ကျော်လာပြီဖြစ်သည်။

ယခုအချိန်သည် SECM ကို သီးခြားအဖွဲ့အစည်းအဖြစ် တည်ထောင်ရန် အချိန်အခါသင့်ပြီဖြစ်ကြောင်း ရန်ကုန်စတော့အိတ်ချိန်းတည်ထောင်ရာတွင် ဦးဆောင်ပါဝင်ခဲ့သူ ဒေါက်တာမောင်မောင်သိမ်းက စတော့ဈေးကွက်သက်တမ်း သုံးနှစ်ပြည့်ချိန်က ပြောကြားထားသည်။

ပုဂ္ဂလိကဏ္ဍစီးပွားရေးလုပ်ငန်းများ ဖွံ့ဖြိုးရေးအတွက် နိုင်ငံတော်အဆင့် ကော်မတီဖွဲ့စည်းကာ ပြည်တွင်းလုပ်ငန်းများ ရင်ဆိုင်နေရသည့် အခက်အခဲများကို ဖြေရှင်းနေသည်ဆိုသော်လည်း ပြည်တွင်းလုပ်ငန်းများ လိုအပ်သောငွေကြေးအရင်းအနှီးရရှိရေး စိန်ခေါ်မှုကို ဖြေရှင်းနိုင်မည့် နည်းတစ်ခုမှာ အရင်းအနှီးဈေးကွက် ဖွံ့ဖြိုးကြီးထွားလာစေခြင်းဖြစ်သည်။

သို့သော် အရင်းအနှီးဈေးကွက်နှင့်ပတ်သက်၍ ပြောဆိုလုပ်ဆောင်မှုမျိုး အစိုးရအဖွဲ့တွင် တွေ့ရခဲသည်။

“ပုဂ္ဂလိကကဏ္ဍဖွံ့ဖြိုးရေးကော်မတီဆိုတာလည်း ရှိတယ်။ ကော်မတီစဖွဲ့ကတည်းက အခုထိ မိန့်ခွန်းတွေ နားထောင်တယ်။ အခုထိ Capital Market (အရင်းအနှီးဈေးကွက်) ဆိုတာပြောတဲ့သူ တစ်ယောက်မှ မပါဘူး။ တကယ့်အရေး ကြီးတဲ့ ဈေးကွက်က ကျန်ခဲ့တယ်” ဟု ရန်ကုန်စတော့အိတ်ချိန်းမှ အကြီးတန်းအမှုဆောင်အရာရှိ ဦးသက်ထွန်းဦးက ဆိုသည်။

တိုင်းပြည်စီးပွားရေး ဖွံ့ဖြိုးလာရန် အစိုးရအဖွဲ့ အများဆုံးပြောလေ့ရှိသည်က နိုင်ငံခြားတိုက်ရိုက်ရင်းနှီးမြှုပ်နှံမှု FDI အကြောင်း ဖြစ်သည်။

“ကျွန်တော်တို့နိုင်ငံမှာ FDI ကိုပဲ အရမ်းဇောင်းပေးနေတယ်။ စတော့ဈေးကွက်ကိုလာတဲ့ FII ဆိုတာ Foreign Institutional Investment၊ သူတို့က ငွေထုပ်နဲ့ လာရင်းနှီးမြှုပ်နှံတာ။ FDI မှာ သူတို့က သခင်၊ သူတို့ဆီမှာ ကိုယ်က အလုပ်လုပ်ရတာ။ FII မှာ ကိုယ်ကသခင်။ ကိုယ့်လုပ်ငန်းတွေထဲကို ငွေလာထည့်တာ” ဟု ဦးကျော်မျိုးထွန်းက ဆိုသည်။

ထို့အတူ စတော့ရှယ်ယာဈေးကွက်၊ အရင်းအနှီးဈေးကွက် ဖွံ့ဖြိုးလာရန် ပြည်သူများကို အသိပညာပေးမှုများစွာ လုပ်ဆောင်ရန်လိုအပ်ပြီး နှစ်ရှည်ရင်းနှီးမြှုပ်နှံမှုလုပ်ခြင်း၏ အကျိုးကျေးဇူးကို သိရှိအောင် လုပ်ဆောင်ရမည်ဖြစ်ကြောင်း ၎င်းက ပြောသည်။

သို့သော် သက်ဆိုင်ရာတာဝန်ရှိ အစိုးရအဖွဲ့ကိုယ်တိုင်ပင် စတော့ရှယ်ယာဈေးကွက်၊ အရင်းအနှီးဈေးကွက်ကို ယခုအချိန်ထိ မျက်စိမှောက်နေဆဲဖြစ်သည်။ 

မောင်ပေါ်ပင်

You may also like...

Leave a Reply

Your email address will not be published. Required fields are marked *