မယ်ခွေပါးသည့် ‘လက်ဆောင်’

အင်းဝခေတ်စာဆိုတော် မယ်ခွေပါးလိုက်သည့်လက်ဆောင်ကို ၂၁ ရာစု မြန်မာနိုင်ငံမှ ကျွန်တော်တို့ ရလိုက်သည်။ ရိုးရိုးလက်ဆောင် မဟုတ်။ မူဝါဒလက်ဆောင်။

အဋ္ဌမတန်း မြန်မာစာတွင် ထည့်သွင်းထားသော စာဆိုတော်မယ်ခွေ၏ ‘လက်ဆောင်’ ကဗျာလေးကို အတော်များများ မှတ်မိကြဦးမည်။

‘မဝယ်ဘူး၊ မယ်ခူးတဲ့ ဖက်စို
မီးမပူ၊ နေပူမှာ မကင်အားလို့
ထားရတယ်၊ အိပ်ရာအောက်မှာ
မင်းသောက်ဖို့ကို၊
ညှာအနား၊ ရှေ့သွားနှင့် ကိုက်လို့တို
မချိုတောင့်လိပ်ဆေး။
ပိုးမကူ၊ ဝါချည်ဖြူ တစ်ပင်ရစ်ကယ်နှင့်
ငယ်ချစ်မောင်၊ ရွှေဝသွားကို၊ ပါးလိုက်ကဲ့လေး’

ရွတ်ဆို၍ ကောင်းသလောက် အဓိပ္ပာယ်ပြည့်ဝသော ကဗျာလေးသည် ဖတ်စာမှ ဖယ်ရှားခံခဲ့ရသည်ကို အကြောင်းပြုပြီး ကန့်ကွက်သံများ၊ ဝေဖန်သံများ ဆူညံသွားခဲ့သည်။

ကျန်းမာရေးရှုထောင့်မှ ကန့်ကွက်သောကြောင့်၊ ဆေးလိပ်သောက်သုံးခြင်းကို အားပေးသောကြောင့် ထိုကဗျာကို သင်ရိုးမှဖြုတ်ခဲ့ကြောင်း သက်ဆိုင်ရာဝန်ကြီးဌာန တာဝန်ရှိသူထံမှ ကြားရသဖြင့် ပွဲပိုဆူသွားသည်။

လူအများ အာရုံအထူးစိုက်လာသဖြင့် အစိုးရ၏ ပြောခွင့်ရပုဂ္ဂိုလ် ဦးဇော်ဌေး၏ သတင်းစာရှင်းလင်းပွဲတွင် ထိုကဗျာကိစ္စ မေးမြန်းခံခဲ့ရသည်။ ဆရာဝန်မကြီးတစ်ဦး၏ အကြံပြုစကားကြောင့် ထိုသို့ ဖြစ်ပွားခဲ့ကြောင်း ဦးဇော်ဌေးက ရှင်းပြသည်။

စင်စစ် ထိုကဗျာသည် မေတ္တာတရားကို ဖော်ကျူးသောကဗျာဟုသာမြင်သည်။ ထိုကဗျာသည် ဆေးရွက်ကြီးပါသော ဆေးလိပ်ကို ရည်ညွှန်း မညွှန်းပင် မသေချာ။

မူဝါဒ

လက်ဆောင်ကဗျာသည် ကဗျာတန်ဖိုးမြင့် မမြင့်၊ ခေတ်နှင့်လျော်ညီ မလျော်ညီ၊ ဆေးလိပ်လိပ်ခြင်းကို ဖွဲ့နွဲ့ထားသည့်ကဗျာလား၊ မေတ္တာဘွဲ့လား စသည်တို့ကို ယခုဆောင်းပါးတွင် မဆွေးနွေးလိုပါ။ မယ်ခွေ၏ လက်ဆောင်ကဗျာက ပြောပြသည့် မြန်မာနိုင်ငံ၏ မူဝါဒချမှတ်အကောင်အထည်ဖော်သည့် ဖြစ်စဉ်ကိုသာ ဆွေးနွေးလိုသည်။

ထိုကဗျာကြောင့် ဆေးလိပ်သောက်သုံးသူများလာခြင်း ရှိ မရှိ သုတေသနမရှိဘဲနှင့် ဖြုတ်လိုက်ခြင်းဖြစ်ကြောင်း ဦးဇော်ဌေး၏ အဖြေစကားအရ သိရသည်။ Democracy Today သတင်းစာတွင် ဒေါက်တာခင်အေး (မောင်ခင်မင် ( ဓနုဖြူ)) နှင့် တွေ့ဆုံမေးမြန်းချက်အရ ‘မြန်မာစာသင်ရိုးအဖွဲ့တွင်ပါသော ဆရာအကုန်လုံးမသိဘဲ ဖြုတ်ပစ်လိုက်’ ကြောင်း သိရသည်။ မူဝါဒချမှတ်ခြင်းသည် Evidence-based Policymaking သုတေသနအချက်အလက်ကို အခြေခံသော မူဝါဒ ချမှတ်ခြင်း ဖြစ်သင့်သည်။ သက်ဆိုင်ရာ အကျိုးစီးပွားရှင် Stakeholder များကို တိုင်ပင်ပြီး ဆုံးဖြတ်သင့်သည်။

တာဝန်အရှိဆုံးသူ

မူဝါဒချမှတ်အကောင်အထည်ဖော်သူသည် သက်ဆိုင်ရာမူဝါဒနှင့်ပတ်သက်ပြီး တာဝန်အရှိဆုံးသူဖြစ်သည်။ အကြံပေးသူများ၊ တိုက်တိုက်တွန်းတွန်းသမားများ၊ ပညာရှင်များသည် မူဝါဒဖြစ်စဉ်တွင် အရေးကြီးသူများဖြစ်သော်လည်း နောက်ဆုံး ဆုံးဖြတ်သည့်အစိုးရသည် တာဝန်အရှိဆုံးဖြစ်သည်။ ယခု မယ်ခွေကိစ္စတွင် ကျန်းမာရေးရှုထောင့်မှ တွန်းသည့် ဆရာဝန်မကြီးကို အပြစ်တင်သူများ မနည်း။ အကြံပေးတွန်းအားပေးသောသူများ ရှိမည်သာ။ ကိစ္စတစ်ရပ်ရပ်ကို တွန်းအားပေးသူများသည် စိတ်အားထက်သန်စွာ တောက်လျှောက်တွန်းအားပေးကြလျှင် Activist ခေါ် လှုပ်ရှားတက်ကြွသူများ ဖြစ်လာသည်။ ဆေးလိပ်ဆန့်ကျင်သည့် Activist ၊ အမှိုက်ကင်းစင်ရေး Activist၊ အမျိုးသမီးအရေး Activist စသည်ဖြင့် အရေးမျိုးစုံ Activist မျိုးစုံရှိမည်။ တွန်းလို့ ဖြုတ်ပစ်လိုက်သည်ဆိုပြီး Activist ကိုချည်း အပြစ်ပြောလို့မရ။ Activist သည် သူတွန်းချင်သောဘက်၊ သူယုံကြည်သောဘက် တွန်းမည်ဖြစ်သည်။ သူတွန်းတိုင်း တာဝန်ရှိသူက လိုက်လုပ်စရာမလို။ သူတွန်းသောကြောင့် တမင်လိုက်မလုပ်ရန်လည်းမလို။ စဉ်းစားပြီး လုပ်သင့်လျှင်လုပ်၊ မလုပ်သင့်လျှင် မလုပ်ရုံသာ။

နောက်တစ်ခုပြောလိုသည်မှာ ယခုအစိုးရ ယခင်အစိုးရဟု လက်ညှိုးထိုးနေရုံနှင့်မပြီး။ မူဝါဒချမှတ်ပုံ ဖြစ်စဉ်ကို ပြင်ကိုပြင်ရမည်။ မည်သည့်အစိုးရတက်တက် မူဝါဒဖြစ်စဉ်ကို မပြင်နိုင်သရွေ့ ယခုကဲ့သို့ အဖြစ်မျိုးများ ဆက်ကြုံတွေ့ရမည်။

အတိုင်းအတာ

ယခုဖြစ်ရပ်နှင့် အလားတူဖြစ်ရပ်မျိုး မူဝါဒနယ်ပယ်တွင် မည်မျှ ဖြစ်ပွားနေသနည်း။ ယခုဖြစ်ရပ်သည် လူအများရှေ့သို့ ဘွားဘွားကြီးပေါ်လာသော ဖြစ်ရပ်ဖြစ်သည်။ ထိုဖြစ်ရပ်မျိုး နယ်ပယ်အသီးသီးတွင် မည်မျှရှိနေပါသနည်း။ ရေထဲတွင် မျောနေသော ရေခဲတုံးကြီး ရေပေါ်တွင်ပေါ်နေသောအစွန်းသည် ရေခဲတုံးကြီးတစ်ခုလုံး၏ ၁၀၊ ၁၅ ရာခိုင်နှုန်းသာရှိသည်။ ရေထဲတွင် ၈၅၊ ၉၀ ရာခိုင်နှုန်းရှိသည်။

ယခုကဲ့သို့ ဖြစ်ရပ်ပေါင်းများစွာ ရှိနေဦးမည်။ လက်ဆောင်သည် မြန်မာ့မူဝါဒနယ်ပယ်တွင် ရေခဲတုံး၏ ထိပ်စွန်းမျှသာဖြစ်သည်။

လွတ်လပ်စွာပြောဆိုရေးသားခွင့်နှင့် မူဝါဒ

မယ်ခွေကိစ္စမျိုးသည် ယခင်အစိုးရအစဉ်အဆက်များကလည်း ဖြစ်ခဲ့သည်။ သက်သေသက္ကာယနှင့် လူသိရှင်ကြားမဖြစ်သည်သာ ရှိသည်။ ယနေ့ခေတ်တွင် လွတ်လပ်စွာရေးသားပြောဆိုခွင့် တိုးတက်လာသည့်အတွက် မြင်ရကြားရခြင်းသာ ကွာသည်။ လူမှုမီဒီယာတွင် ဝေဖန်နိုင်သည်။ သတင်းစာရှင်းလင်းပွဲများတွင် အစိုးရပြောရေးဆိုခွင့်ရှိသူကို မေးနိုင်သည်။ ထိုသို့မေးမည်ကို အစိုးရပြောရေးဆိုခွင့်ရှိသူက ကြိုတင်ခန့်မှန်းပြီး သက်ဆိုင်ရာတာဝန်ရှိသူများကို မေးမြန်းသည်။ မေးမြန်းရင်း မသင့်လျော်သည်များ တွေ့လာသောအခါ နောင်ထိုသို့ မဖြစ်ရန် ညွှန်ကြားသည်။

ထိုသို့ ဝိုင်းပြောကြသဖြင့် တလွဲဖြစ်နေသောမူဝါဒ ပြန်တည့်မတ်သွားသည့် အခွင့်အရေးရှိသည်။ လွတ်လပ်စွာ ရေးသားပြောဆိုခွင့်သည် မူဝါဒကောင်းဖြစ်ပေါ်ရေးကို အထောက်အကူပြုကြောင်း မယ်ခွေဥပမာတွင် ထင်ထင်ရှားရှားမြင်ရမည်။

မယ်ခွေ၏ကဗျာကို မည်သို့မည်ပုံ ဆက်စီစဉ်မည် မသိရသေးသော်လည်း တာဝန်ရှိသူများနှင့် အကျိုးစီးပွားရှင် Stakeholder များ မညှိနှိုင်း မတိုင်ပင် သက်သေအထောက်အထားမရှိဘဲ လက်လွတ်စပယ် ဖြုတ်ပစ်ခြင်းသည် မသင့်တော်ကြောင်း အားလုံးသိသွားသည်။ တာဝန်ရှိသူများ ယူတတ်လျှင် နောင်အတွက်ကောင်းလိမ့်မည်။ ထို့ကြောင့် လွတ်လပ်စွာ ရေးသားပြောဆိုခွင့်ကို ဆက်ထိန်းထားရမည်။

အမြင်ကျယ်

မူဝါဒချမှတ်သူများသည် အမြင်ကျယ်သူ၊ ဗဟုသုတပြည့်စုံသူ၊ ဆင်ခြင်ဉာဏ်ရှိသူတို့ ဖြစ်ရန်လိုသည်။ သို့မဟုတ်လျှင် ဟိုလူလာ ဟုတ်နိုးနိုး၊ သည်လူလာ ဟုတ်နိုးနိုးထင်မည်။ မူဝါဒချမှတ်သည့်အဆင့်ဆင့်တွင်ရှိနေသည့် အစိုးရဝန်ထမ်းများ၏ အရည်အသွေးကို မြှင့်တင်ရမည်။ ထို့ပြင် ခေတ်စနစ်ပြောင်းလဲခဲ့ပြီဖြစ်သည့်အတွက် ယခင်ကလို အစိုးရတွင်းတွင် Bureaucrat ပြည်သူ့ဝန်ထမ်းများချည်း မဟုတ်တော့ပါ။ သက်ဆိုင်ရာဝန်ကြီးဌာနများ၏ ထိပ်တွင် ဝန်ကြီး၊ ဒုဝန်ကြီးအဖြစ်နှင့် နိုင်ငံရေးရာထူးများ ရှိလာပြီ။ မူဝါဒကို ထိန်းကျောင်းသည့် လွှတ်တော်ကိုယ်စားလှယ်များကဲ့သို့ နေရာများသည်လည်း နိုင်ငံရေးရာထူးများဖြစ်သည်။ ထို့ကြောင့် နိုင်ငံရေးသမားများသည်လည်း ကိုယ့်အရည်အသွေး ကိုယ်မြှင့်တင်ထားရမည်။ ထိုနိုင်ငံရေးရာထူးများကို ခန့်အပ်သည့်သူများသည်လည်း ထိုနေရာတွင် အရည်အသွေးမြင့်မားသောသူများရောက်အောင် သတိထားရွေးချယ်ရမည်။

အင်းဝမှသည် နေပြည်တော်သို့

‘ရွှေဝသွားကို ပါးလိုက်ကဲ့’ ဟု ထိုစဉ်က အစိုးရုံးစိုက်ရာ အင်းဝမြို့သို့တက်သွားသော ချစ်သူထံ ချစ်ခြင်းမေတ္တာဖြင့်ပါးလိုက်သော မယ်ခွေ၏ ‘လက်ဆောင်’ သည် ယနေ့ဒီမိုကရေစီခေတ် အစိုးရုံးစိုက်ရာ နေပြည်တော်သို့ ရောက်လာသည့်အလား၊ မြန်မာ့မူဝါဒဖြစ်ပျက်နေပုံများကို အရပ်ရပ်နေပြည်တော်ကြားအောင် သတင်းစကားပါးနေသည့်အလား။

သူ့ကဗျာကြောင့် မြန်မာ့မူဝါဒဖြစ်စဉ် တိုးတက်ပြောင်းလဲမှု စတင်လာမည်ဆိုလျှင် မယ်ခွေ ကျေနပ်မည်ထင်သည်။ 

ဇေယျသူ

You may also like...

Leave a Reply

Your email address will not be published. Required fields are marked *