အစိုးရ၏ မဲဆွယ်စည်းရုံးခွင့်

နိုင်ငံတော်သမ္မတနှင့် နိုင်ငံတော်အတိုင်ပင်ခံပုဂ္ဂိုလ်တို့ လာမည့် ၂၀၂၀ ရွေးကောက်ပွဲကို ဝင်ရောက်ယှဉ်ပြိုင်မည်ဖြစ်ကြောင်း သတင်းနှင့်အတူ အစိုးရအဖွဲ့ဝင်များ၏ မဲဆွယ်စည်းရုံးခြင်း ပြဿနာသည်လည်း နောက်ကလိုက်လာသည်။

ယင်းကား ၂၀၀၈ ခုနှစ် ဖွဲ့စည်းပုံအခြေခံဥပဒေတွင် ဒွိဟဖြစ်ဖွယ်၊ အငြင်းပွားဖွယ်ပြဋ္ဌာန်းချက်များ ပါရှိနေခြင်းများအနက်မှ အချက်တစ်ခုလည်း ဖြစ်သည်။

‘နိုင်ငံတော်သမ္မတ သို့မဟုတ် ဒုတိယသမ္မတများသည် နိုင်ငံရေးပါတီတစ်ခုခု၏ အဖွဲ့ဝင်ဖြစ်လျှင် နိုင်ငံတော်သမ္မတ သို့မဟုတ် ဒုတိယသမ္မတများအဖြစ် ရွေးချယ်တင်မြှောက်ခြင်းခံရသည့်နေ့မှစ၍ မိမိတို့ရာထူးသက်တမ်းအတွင်း ယင်းပါတီအဖွဲ့အစည်း၏ ပါတီလုပ်ငန်းများတွင် ပါဝင်ဆောင်ရွက်ခြင်းမပြုရ’ ဟူ၍ ပုဒ်မ ၆၄ တွင် ပြဋ္ဌာန်းထားသည်။

ယင်း၏ဆိုလိုချက်အရ နိုင်ငံရေးပါတီကိစ္စများကို ဝင်ရောက်ဆောင်ရွက်လိုလျှင် လက်ရှိရာထူးများမှ ဖယ်ပေးရမည့်ကိန်း။ အလားတူပင် ပုဒ်မ ၂၃၂၊ ၂၃၄၊ ၂၃၇၊ ၂၃၉၊ ၂၄၄ နှင့် ၂၄၆ တို့တွင် ပြည်ထောင်စုဝန်ကြီးများ၊ ဒုတိယဝန်ကြီးများအပါအဝင် ပြည်ထောင်စုအဆင့်အဖွဲ့အစည်းဝင်များနှင့် ပတ်သက်၍လည်း အထက်ပါအတိုင်း ပြဋ္ဌာန်းထားသည်။

ရွေးကောက်ပွဲများသည် အစိုးအဖွဲ့သက်တမ်းမကုန်ခင်တွင် ကျင်းပရလေ့ရှိရာ နောက်သက်တမ်းအတွက် ဝင်ရောက်ယှဉ်ပြိုင်လိုသည့် ပြည်ထောင်စုအစိုးရအဖွဲ့ဝင်များသည် မည်သို့လုပ်ဆောင်ရမည်နည်း။

လက်ရှိအာဏာရပါတီဖြစ်သည့် အမျိုးသားဒီမိုကရေစီအဖွဲ့ချုပ် (NLD) ပါတီကမူ ပါတီဥက္ကဋ္ဌလည်းဖြစ်၊ နိုင်ငံတော်အတိုင်ပင်ခံပုဂ္ဂိုလ်နှင့် ပြည်ထောင်စုဝန်ကြီးလည်းဖြစ်သည့် ဒေါ်အောင်ဆန်းစုကြည်၊ ပါတီဒုတိယဥက္ကဋ္ဌလည်းဖြစ်၊ နိုင်ငံတော်သမ္မတလည်းဖြစ်သည့် ဦးဝင်းမြင့်တို့သည် လာမည့်ရွေးကောက်ပွဲတွင် ဝင်ရောက်ယှဉ်ပြိုင်မည်ဖြစ်ကြောင်း သတင်းစကားပါးပြီးဖြစ်သည်။

တစ်ဆက်တည်းမှာပင် ၎င်းတို့အနေနှင့် မဲဆွယ်စည်းရုံးရေးလုပ်ရန်အတွက် လက်ရှိရာထူးများကို စွန့်လွှတ်ရန်မလိုဟု ဆိုသည်။

NLD အာဏာရလာချိန်မှ ဥပဒေသစ်ပြဋ္ဌာန်းပြီး အကောင်အထည်ဖော်ခဲ့သည့် နိုင်ငံတော်အတိုင်ပင်ခံပုဂ္ဂိုလ် ရာထူးသည် ပြည်ထောင်စုအစိုးရအဖွဲ့ထဲတွင် ပါဝင်ခြင်းမရှိသော်လည်း ဒေါ်အောင်ဆန်းစုကြည်သည် နိုင်ငံခြားရေးဝန်ကြီးဌာန၏ ပြည်ထောင်စုဝန်ကြီးအဖြစ်နှင့် ပါဝင်နေခြင်းဖြစ်သည်။

၎င်းတို့အနေနှင့် လက်ရှိရာထူးမှ နုတ်မထွက်ဘဲ မဲဆွယ်စည်းရုံးရေးလုပ်ငန်းများကို လုပ်ဆောင်နိုင်ကြောင်း ပြည်ထောင်စု ရွေးကောက်ပွဲကော်မရှင်ကလည်း ထုတ်ပြန်အသိပေးလိုက်သည်။ ယင်းသည် ဥပဒေအရသာဖြစ်ပြီး ယခင်အစိုးရဖြစ်သည့် သမ္မတ ဦးသိန်းစိန်လက်ထက်တုန်းကလည်း လုပ်ဆောင်ခဲ့သည်ဟု ဆိုသည်။

၂၀၁၅ ခုနှစ် နိုဝင်ဘာ ၈ ရက်နေ့တွင်ပြုလုပ်မည့် အထွေထွေရွေးကောက်ပွဲမတိုင်မီ လေးလတိတိအလို (၂၀၁၅ ခုနှစ် ဇူလိုင် ၈ ရက်) တွင် ထိုစဉ်က ပြည်ထောင်စုရွေးကောက်ပွဲကော်မရှင်က ကြေညာချက်တစ်စောင် (၃၁/၂၀၁၅) ကို ထုတ်ပြန်ခဲ့သည့် သာဓကရှိသည်။

နိုင်ငံတော်သမ္မတအပါအဝင် ပြည်ထောင်စုအစိုးရအဖွဲ့ဝင်များ၊ ပြည်ထောင်စု တရားသူကြီးချုပ် သို့မဟုတ် ပြည်ထောင်စု တရားလွှတ်တော်ချုပ် တရားသူကြီး၊ နိုင်ငံတော်ဖွဲ့စည်းပုံအခြေခံဥပဒေဆိုင်ရာခုံရုံးဥက္ကဋ္ဌ သို့မဟုတ် အဖွဲ့ဝင်၊ ပြည်ထောင်စုရှေ့နေချုပ် သို့မဟုတ် ဒုတိယရှေ့နေချုပ်၊ ပြည်ထောင်စု စာရင်းစစ်ချုပ် သို့မဟုတ် ဒုတိယစာရင်းစစ်ချုပ်၊ ပြည်ထောင်စုရာထူးဝန်အဖွဲ့ ဥက္ကဋ္ဌ သို့မဟုတ် အဖွဲ့ဝင်တို့သည် ရွေးကောက်ပွဲတွင် ဝင်ရောက်ယှဉ်ပြိုင်မည့်သူများဖြစ်ပါက ရွေးကောက်ပွဲဆိုင်ရာ ပါတီစည်းရုံးရေးလုပ်ငန်းများ၊ နယ်မြေစည်းရုံးရေးလုပ်ငန်းများ၊ စုဝေးဟောပြောခြင်းနှင့် မဲဆွယ်စည်းရုံးခွင့်များ ဆောင်ရွက်ခွင့်ရှိကြောင်း အသိပေးသည့် ထုတ်ပြန်ချက်ဖြစ်သည်။

အကြောင်းမှာ နိုင်ငံသားတိုင်းသည် ဥပဒေနှင့်အညီ လွတ်လပ်စွာရွေးကောက်ခံပိုင်ခွင့်ရှိပြီး မဲပေးလိုသူတို့သည်လည်း လွတ်လပ်စွာ ရွေးချယ်ပိုင်ခွင့်ရှိသောကြောင့် ဖြစ်သည်။

အခြေခံဥပဒေပါပြဋ္ဌာန်းချက်ကြောင့် နိုင်ငံရေးရာထူးလက်ဝယ်ရှိသူများ ပါတီနိုင်ငံရေးကိစ္စတွင် ဝင်ရောက်ပါဝင်ပိုင်ခွင့်မရှိလျှင် ရွေးကောက်ပွဲဝင်ရောက်ယှဉ်ပြိုင်ရာတွင် အခက်တွေ့မည်။ အခြားသူများက မဲဆွယ်စည်းရုံးနေချိန်တွင် ၎င်းတို့က မစည်းရုံးရဖြစ်နေပါက မျှတမည်လည်း မဟုတ်ပေ။

ယင်းအချက်ကိုလည်း ဖွဲ့စည်းပုံအခြေခံဥပဒေ ပုဒ်မ ၃၈ (က) တွင် ပြဋ္ဌာန်းထားသည်။ နိုင်ငံသားတိုင်းသည် ဥပဒေနှင့်အညီ ရွေးကောက်တင်မြှောက်ခွင့်နှင့် ရွေးကောက်တင်မြှောက်ခံပိုင်ခွင့် ရှိသည်။ သို့သော် မဲဆွယ်စည်းရုံးရေးလုပ်ဆောင်နိုင်သည့်ကာလမှာ ပြည်ထောင်စုရွေးကောက်ပွဲကော်မရှင်က ရွေးကောက်ပွဲကျင်းပမည့် နေ့ရက်ကို စတင်ကြေညာလိုက်သည့်အခါမှ ဖြစ်သည်။

ပြည်ထောင်စုအစိုးရအဖွဲ့ဝင်များ၏ ရွေးကောက်ပွဲ ဝင်ရောက်ယှဉ်ပြိုင်မှုနှင့် ပတ်သက်၍ ပြည်ထောင်စုအစိုးရဥပဒေတွင်လည်း ထည့်သွင်းပြဋ္ဌာန်းထားသည်။

ရွေးကောက်ပွဲ ဝင်ရောက်ယှဉ်ပြိုင်လိုသည့် ပြည်ထောင်စုအဆင့်ဝင်များသည် အခြေခံဥပဒေပါ ပေးထားချက်ဖြစ်သည့် ရွေးကောက်ခံပိုင်ခွင့်ကို မဆုံးရှုံးစေရန်အတွက် ရွေးကောက်ပွဲကျင်းပရန် ကော်မရှင်က ကြေညာသည့်နေ့မှစ၍ ရွေးကောက်ပွဲဆိုင်ရာ ပါတီစည်းရုံးရေး၊ နယ်မြေစည်းရုံးရေးလုပ်ငန်းများကို ဆောင်ရွက်ခွင့်ရှိသည်။

ယင်းဥပဒေကို ရွေးကောက်ပွဲများနှင့် လွှတ်တော်များ မပေါ်ပေါက်မီ တပ်မတော်အစိုးရလက်ထက် ၂၀၁၀ ပြည့်နှစ်တွင် ပြဋ္ဌာန်းထားခဲ့ခြင်းဖြစ်သည်။ ဥပဒေများတွင် မည်သို့ပြဋ္ဌာန်းထားသည်ဆိုစေ ယင်းတို့နှင့်ပတ်သက်၍ ဝိရောဓိဖြစ်မှုနှင့် ဝိဝါဒကွဲပြားခြင်းတို့ကား ရှိနေသည်။

အစိုးရအဖွဲ့ဝင်ဖြစ်လာပြီးသည့်အခါ လူတစ်ဦးတစ်ယောက်သည် နိုင်ငံရေးပါတီတစ်ခု၊ အဖွဲ့အစည်းတစ်ခု သို့မဟုတ် ၎င်းကို ရွေးကောက်တင်မြှောက်လိုက်သူတို့ကိုသာ ကိုယ်စားပြုခြင်းမဟုတ်တော့ဘဲ ပြည်သူပြည်သားတစ်ရပ်လုံးကို ကိုယ်စားပြုသွားခြင်းဖြစ်သည်။

ယင်းကပင် ပါတီတစ်ခု၊ အဖွဲ့အစည်းတစ်ခု၊ လူတစ်စုအတွက် အကျိုးဆောင်ခြင်း၊ ဦးတည်လုပ်ဆောင်ခြင်းမျိုးမဖြစ်ရန် တာဝန်ရှိနေပြန်သည်။

သမ္မတ ဦးသိန်းစိန်လက်ထက်ကမူ သမ္မတအဖြစ်နှင့် နယ်ခရီးစဉ်များစွာ သွားရောက်ခဲ့သော်လည်း ပါတီစည်းရုံးရေးမလုပ်ဆောင်ခဲ့ကြောင်း အတိုက်အခံပါတီဖြစ်သည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၏ ပြောရေးဆိုခွင့်ရပုဂ္ဂိုလ် ဒေါက်တာနန္ဒာလှမြင့်က ပြောဆိုထားသည်။

အစိုးရအဖွဲ့၏ ဝန်ကြီးအချို့သည်ပင် မဲဆွယ်စည်းရုံးရေးလုပ်ဆောင်ရန်အတွက် ရာထူးတာဝန်များမှ နုတ်ထွက်ခဲ့သည်ဟူ၍လည်း ၎င်းကထောက်ပြထားသည်။

လက်ရှိသမ္မတ ဦးဝင်းမြင့်နှင့် နိုင်ငံတော်အတိုင်ပင်ခံ ဒေါ်အောင်ဆန်းစုကြည်တို့သည်လည်း နယ်လှည့်ကွင်းဆင်းခရီးစဉ်များကို မကြာခဏသွားရောက်လေ့ရှိသည်။ အထူးသဖြင့် ယခု ၂၀၁၉ ခုနှစ်ထဲတွင် ဒေါ်အောင်ဆန်းစုကြည်သည် တိုင်းရင်းသားဒေသများသို့ သွားရောက်မှုသည် ခပ်စိပ်စိပ်ဖြစ်လာသည်။

ပြီးခဲ့သည့် ၂၀၁၅ အထွေထွေရွေးကောက်ပွဲနှင့် ၂၀၁၇၊ ၂၀၁၈ ခုနှစ် ကြားဖြတ်ရွေးကောက်ပွဲများတွင် တိုင်းရင်းသားဒေသအချို့တွင် NLD အနေနှင့် ဒေသအခြေစိုက် တိုင်းရင်းသားပါတီများကို အနိုင်မရခဲ့သည့် အခင်းအကျင်းများရှိနေခဲ့သည်ဖြစ်ရာ ယင်းခရီးစဉ်များအပေါ် နိုင်ငံရေးလေ့လာစောင့်ကြည့်သူများက သံသယရှိကြသည်။ ဒေါ်အောင်ဆန်းစုကြည်အနေနှင့် တိုင်းရင်းသားဒေသများသို့ စည်းရုံးရေးဆင်းနေပြီလောဟူ၍။

အစိုးရ၏ မဲဆွယ်စည်းရုံးရေးဆိုင်ရာ ပြဿနာသည် ဥပဒေများ၏အခေါင်အချုပ်ဖြစ်သည့်၂၀၀၈ ခုနှစ် ဖွဲ့စည်းပုံအခြေခံဥပဒေပါ ပြဋ္ဌာန်းချက်များ တစ်ခုနှင့်တစ်ခု ချိတ်ဆက်လွဲချော်ခြင်း၊ မညီညွတ်ခြင်းနှင့် လစ်ဟာမှုများရှိနေခြင်းတို့ကြောင့် ပေါ်ထွက်လာခြင်းဖြစ်သည်။

ပြည်ထောင်စုအစိုးရအဖွဲ့အစည်းဝင်ပုဂ္ဂိုလ်များသည် မိမိတို့ရာထူးသက်တမ်းအတွင်း နိုင်ငံရေးပါတီနှင့် အခြားအဖွဲ့အစည်းများ၏ လုပ်ငန်းများတွင် ပါဝင်လုပ်ဆောင်ခြင်းမပြုရဟု ပုဒ်မအချို့က တားမြစ်ထားသည်။ တစ်ချိန်တည်းမှာပင် နိုင်ငံသားတိုင်းသည် ဥပဒေနှင့်အညီ ရွေးကောက်တင်မြှောက်ခွင့်နှင့် ရွေးကောက်တင်မြှောက်ခံပိုင်ခွင့်ရှိသည်ဟုလည်း ဆိုထားသည်။

ရွေးကောက်ပွဲဝင်မည်ဆိုပါက အခြားသူများကဲ့သို့ပင် မဲဆွယ်စည်းရုံးခွင့်လည်း ရှိရမည်ဖြစ်သည်။

ယင်းအပြင် အခြားသက်ဆိုင်ရာအဖွဲ့အစည်းနှင့် အကြောင်းအရာအလိုက် ပြဋ္ဌာန်းသည့် ဥပဒေပါ ပြဋ္ဌာန်းချက်များကလည်း အခြေခံဥပဒေနှင့်သွား၍ ပွတ်တိုက်နေခြင်းဖြစ်သည်။ ပြည်ထောင်စုအစိုးရအဖွဲ့ ဥပဒေတွင် ရွေးကောက်ပွဲကျင်းပရန် ကော်မရှင်က ကြေညာသည့်နေ့မှစ၍ ရွေးကောက်ပွဲဆိုင်ရာ ပါတီစည်းရုံးရေး၊ နယ်မြေစည်းရုံးရေးလုပ်ငန်းများကို ဆောင်ရွက်ခွင့်ရှိသည်ဟုလည်း ပြဋ္ဌာန်းထားပြန်သည်။

ယင်းသို့ပင် ရှုပ်ထွေးနေခြင်းဖြစ်သည်။

တည်ဆဲဥပဒေတစ်ရပ်ပါ ပြဋ္ဌာန်းချက်တစ်ခုသည် အခြေခံဥပဒေနှင့် လိုက်လျောညီထွေ ရှိ၊ မရှိ သို့မဟုတ် ဆန့်ကျင် မကျင်ကို အဆုံးအဖြတ်ပြုနိုင်သည့် တစ်ခုတည်းသောအဖွဲ့အစည်းမှာ ဖွဲ့စည်းပုံအခြေခံဥပဒေဆိုင်ရာခုံရုံးဖြစ်သည်။

“အဲဒီ ပြည်ထောင်စုအစိုးရအဖွဲ့ ဥပဒေက အခြေခံဥပဒေနဲ့ မညီဘူး၊ ညီတယ်ဆိုတာကို ခုံရုံးကို လျှောက်လို့ရတယ်။ ညီတယ်ဆိုရင်တော့လည်း အဲဒီအတိုင်း အတည်ဖြစ်မှာပေါ့” ဟု နိုင်ငံရေးလေ့လာသုံးသပ်သူလည်းဖြစ်၊ ပြည်သူ့လွှတ်တော်ကိုယ်စားလှယ်ဟောင်းလည်းဖြစ်သည့် ဦးရဲထွန်းက ဆိုသည်။

အခြားတစ်ဖက်တွင် အဆိုပါခုံရုံးကို အစိုးရအဖွဲ့အကြီးအကဲ နိုင်ငံတော်သမ္မတနှင့် NLD အများစုဖြစ်သည့် ပြည်ထောင်စုလွှတ်တော်တို့ ပေါင်းစပ်၍ ဖွဲ့စည်းပေးထားခြင်းဖြစ်သည်။ အလားတူပင် ရွေးကောက်ပွဲဆိုင်ရာ စည်းမျဉ်းစည်းကမ်းများ သတ်မှတ်ရေးဆွဲရသည့် ပြည်ထောင်စုရွေးကောက်ပွဲကော်မရှင်သည်လည်း သမ္မတကပင် ဖွဲ့စည်းရသည်။ တစ်နည်းအားဖြင့် သမ္မတက သူယုံကြည်စိတ်ချရသည့်သူများဖြင့် ဖွဲ့စည်းထားခြင်းဖြစ်ရာ အဆိုပါအဖွဲ့အစည်းများ၏ ခိုင်မာတောင့်တင်းမှုနှင့်ပတ်သက်၍ မေးခွန်းထုတ်ဖွယ်ရာများ ရှိနေပြန်သည်။

ယင်းသို့ ဖွဲ့စည်းနိုင်ခွင့်တို့သည်ပင် အခြေခံဥပဒေ၏ ပေးထားချက်လည်း ဖြစ်သည်။

လက်ရှိတွင် အခြေခံဥပဒေပြင်ဆင်ရန်အတွက် NLD ဦးဆောင်သည့် ပူးပေါင်းကော်မတီက ပြဋ္ဌာန်းချက်များကို လေ့လာသုံးသပ်လျက်ရှိပြီး မည်သည့်အချက်များပြင်ဆင်ရန် ပါတီများက အဆိုပြုသည်ကို မကြာခင် ထုတ်ပြန်ရန်ရှိနေသည်။

အဆိုပါအခြေအနေများအောက်တွင် ပြည်ထောင်စုအစိုးရအဖွဲ့ဝင်များ၏ ရွေးကောက်ပွဲဆိုင်ရာ မဲဆွယ်စည်းရုံးမှုကိစ္စသည် အငြင်းပွားဖွယ်များ ရှိနေခြင်း ဖြစ်သည်။

“အခြခံဥပဒေမှာကိုက ညီညွတ်မှု မရှိဘူးပေါ့” ဟု ဦးရဲထွန်းက ဆိုသည်။

အောင်မျိုးထက်

You may also like...

Leave a Reply

Your email address will not be published. Required fields are marked *