လူမှုကွန်ရက်အသုံးပြု လူထုနှင့်ဆက်သွယ်မှုတွင် ရန်ကုန်ထက် မန္တလေးမြို့တော်ဝန် ပိုသာ

မန္တလေး၊ ဇွန် ၂ဝ

Facebook လူမှုကွန်ရက်အသုံးပြု၍ လူထုဆက်သွယ်ရေးဆောင်ရွက်မှုတွင် ရန်ကုန်မြို့တော်ဝန် ဦးမောင်မောင်စိုးထက် မန္တလေးမြို့တော်ဝန် ဒေါက်တာရဲလွင်က ပရိသတ်ပိုသာနေပြီး Follower (နောက်လိုက်) သုံးဆခန့် ပိုမိုများပြားကြောင်း Social Media Development Myanmar(SMDM) က ထုတ်ပြန်သည်။

ရန်ကုန်မြို့တော်ဝန်သည် Official Page ကို အသုံးပြုပြီး Follower အရေအတွက် လေးသောင်းခွဲခန့်ရှိသည်။

မန္တလေး မြို့တော်ဝန်သည် Personal Profile ကို အသုံးပြုပြီး Friends အရေအတွက် ငါးထောင်နီးပါးနှင့် Follower အရေအတွက် တစ်သိန်း သုံးသောင်းကျော် ရှိသည်။

ရန်ကုန်မြို့တော်ဝန်သည် ၎င်း၏စာမျက်နှာတွင် တင်ဆက်နေမှုများကို အခြားသူတစ်ဦးက Admin ယူကာ တင်ဆက်ပေးနေခြင်းဖြစ်ပြီး မန္တလေးမြို့တော်ဝန်ကမူ ကိုယ်တိုင်အနေနှင့် ရေးသားတင်ပြနေသည်ဟု SMDM က ဆိုသည်။

“မန္တလေးကတော့ အလုပ်လုပ်တယ်။ သူကိုယ်တိုင်မဟုတ်ရင်တောင် ပြောသမျှ ရေးသမျှ ဖြေပေးမယ့် ပညာရှင် ရှိမယ်ထင်တယ်။ နောက်ပြီး သူ့မှာ ကောင်းအောင်လုပ်မယ့် စိတ်ကူးတွေ ရှိနေတယ်။ လုပ်ချင်တာတွေကို အကောင်အထည် ဖော်လေ့ရှိတယ်။ ဒါတွေကို မြို့ခံတွေကလည်း ဝင်ပါကူညီလေ့ရှိတယ်။ ဒါမျိုးတွေနဲ့ လူချစ်အောင် လုပ်တတ်တယ်။ တက်ခါစကဆို အဆဲခံရတာမျိုး ရှိတယ်” ဟု မန္တလေးမြို့ခံ အမျိုးသားစာပေဆုရ စာရေးဆရာ ညီပုလေးက မန္တလေးမြို့တော်ဝန်နှင့်ပတ်သက်၍ သူ့အမြင်ကို ပြောပြသည်။

Facebook ကို အသုံးပြုကာ ပြည်သူလူထုနှင့် ထိတွေ့ဆက်သွယ်မှုတွင် ရန်ကုန်မြို့တော်ဝန် ဦးမောင်မောင်စိုးထက် မန္တလေးမြို့တော်ဝန် ဒေါက်တာ ရဲလွင်က ပိုမိုအသုံးပြုကြောင်းလည်း SMDM က ပြောသည်။

ဦးရဲလွင်သည် အတွေးအမြင် ခံစားချက်၊ လုပ်ငန်းစစ်ဆေးမှု၊ သတင်းထုတ်ပြန်မှု၊ အခမ်းအနားတက်ရောက်မှု၊ အသိပေးချက်၊ စီမံကိန်းတင်ပြချက်၊ လုပ်ငန်း ဆောင်ရွက်ချက်၊ သုတေသနတွေ့ရှိချက်၊ အဖွဲ့အစည်းများနှင့် ပူးပေါင်းဆောင် ရွက်ချက်၊ သတိပေးနှိုးဆော်ချက်၊ ပြည်သူတို့၏ လှူဒါန်းမှုများနှင့် မှတ်ချက်များ၊ စည်ပင်ဝန်ထမ်းများ၏ဘ၀ စသည်တို့ကို တင်ပြပေးနေပြီး ပါဝင်ဆွေးနွေးသူများကိုလည်း ပြန်လည်တုံ့ပြန်ဆွေးနွေးကာ အခက်အခဲတင်ပြသူများကို တာဝန်ယူ ဖြေရှင်းပေးလျက်ရှိသည်ဟု SMDM က ထုတ်ပြန်သည်။

ဦးမောင်မောင်စိုးကမူ အခမ်းအနား တက်ရောက်မှု၊ ကော်မတီအစည်းအဝေး၊ ဂုဏ်ပြုအမှာစကား ပြောကြားမှု၊ စည်ပင်လုပ်ငန်း ဆောင်ရွက်ချက်၊ နိုင်ငံတကာအဖွဲ့အစည်းများနှင့် တွေ့ဆုံမှု၊ လုပ်ငန်းကြည့်ရှု စစ်ဆေးမှု၊ အသိပေးကြေညာချက်၊ ဒေသခံများနှင့် တွေ့ဆုံမှု စသည်တို့ကို တင်ပြပြီး ပါဝင်ဆွေးနွေးသူများကို တုံ့ပြန်မှု နည်းပါးသည်ဟု SMDM ၏ လေ့လာချက်အရ သိရသည်။

“မြို့တော်ဝန်က ဝန်ကြီးချုပ်ထက် ပိုပြီးတော့ အရေးကြီးတယ်။ လူထုက တိုက်ရိုက်ထိတွေ့ ဆက်ဆံချင်ကြတယ်။ သူတို့ရဲ့ စိုးရိမ်ပူပန်မှုတွေ မျှော်လင့်ချက်တွေကို ပြောချင်ကြတယ်။ နိုင်ငံတကာမှာလည်း လူထုနဲ့ အပြန်အလှန်ရှိတဲ့ မြို့တော်ဝန်တွေ ရှိကြတယ်။ ရန်ကုန်ကတော့ ဝေဖန်သံ နည်းနည်းညံတာပေါ့လေ” ဟု ရန်ကုန်သတင်းစာပညာသင်တန်းကျောင်း ဒါရိုက်တာ ဦးရဲနိုင်မိုးက ပြောသည်။

သို့သော် လူမှုကွန်ရက်တွင် ပြည်သူနှင့် ထိတွေ့မှု ကောင်းမွန်ခြင်းတစ်ခုတည်းဖြင့် အစိုးရတစ်ရပ်၏ အရည်အသွေးကို မှတ်ချက်ချရန် မလွယ်ကူကြောင်း ၎င်းက ထပ်လောင်း ပြောဆိုသည်။

Social Media Development Myanmar(SMDM) သည် မြန်မာနိုင်ငံရှိအင်တာနက်လူမှုကွန်ရက် အသုံးပြုသူများအတွက် ကောင်းမွန်သော လူမှုကွန်ရက်ဝန်းကျင် ရရှိစေရေး သတင်းအချက်အလက်နှင့် နည်းပညာများ ဖြန့်ဝေရန် ဖွဲ့စည်းထားသည့် အဖွဲ့တစ်ခုဖြစ်သည်။ 

You may also like...

Leave a Reply

Your email address will not be published. Required fields are marked *