တရားဥပဒေစိုးမိုးရေးသည် နိုင်ငံ့အသက်

‘တရားမျှတ လွတ်လပ်ခြင်းနှင့်မသွေတို့ပြည်… တို့မြေ’ ‘ခွင့်တူညီမျှ ဝါဒဖြူစင်တဲ့ပြည် တို့မြေ’ ဟူသော အားလုံးနှင့် ရင်းနှီးပြီးသား စာကြောင်းနှစ်ကြောင်းကိုကြည့်လိုက်လျှင် မြန်မာနိုင်ငံသည် တရားဥပဒေစိုးမိုးရေးကို မူအားဖြင့် ဦးထိပ်ထားသော နိုင်ငံဖြစ်ကြောင်း ပြသနေသော်လည်း လက်တွေ့တွင် မြန်မာနိုင်ငံသားတို့ကိုယ်တိုင်က တရားဥပဒေစိုးမိုးရေးကို အယုံအကြည်နည်းနေကြောင်း ကလေးသူငယ် အဓမ္မအကျင့်ခံရမှုတွင် တရားဥပဒေအတိုင်း ဖြစ်ရေး တောင်းဆိုမှုသည် လှုပ်ရှားမှုကြီးအဖြစ် တစ်နေ့တခြား ကြီးထွားအရှိန်ရလာသည်ကိုကြည့်လျှင် မြင်နိုင်သည်။

တရားဥပဒေမစိုးမိုးဟု ပြည်သူတို့ မြင်ခြင်းသည် တရားဥပဒေစိုးမိုးရေးကို အဓိကဖော်ဆောင်သော နိုင်ငံတော်နှင့် ပြည်သူကြား အပြန်အလှန်ယုံကြည်မှုကို ထိခိုက်စေသည်။ စီးပွားရေး၊ နိုင်ငံရေး ခေတ်ပြောင်းတော်လှန်ရေး ဆောင်ရွက် နေသော မြန်မာနိုင်ငံတွင် ပြည်သူနှင့် အစိုးရ လက်တွဲညီညီ အားကုန်ထုတ်နိုင်မှ တန်ကာကျမည်ဖြစ်ရာ ယခုဖြစ်ရပ်အပါအဝင် တရားဥပဒေစိုးမိုးရေးကို မေးခွန်းထုတ်စရာကိစ္စများသည် မြန်မာနိုင်ငံ၏ အရှိုက်ကို ထိုးလိုက်သကဲ့သို့ပင် ဖြစ်သည်။

မည်သူမျှ တရားဥပဒေအထက်တွင် မရှိခြင်း၊ မျှမျှတတ တရားစီရင်ခြင်းတို့သည် တရားဥပဒေစိုးမိုးရေး၏ အခြေခံအုတ်မြစ်များဖြစ်သည်။ ပြည်သူများက သံသယဝင်ခြင်းသည် ထိုအုတ်မြစ်များ ယိုင်နဲ့နေကြောင်းမြင်၍ ဖြစ်သည်။

တရားဥပဒေစိုးမိုးရေးကို သံသယဝင်လာကြပြီဆိုလျှင် လူအများသည် သာမန်လူနေမှုဘ၀လှုပ်ရှားလုပ်ကိုင်ရသည်ကိုပင် တထိတ်ထိတ် တလန့်လန့် ဖြစ်နေရလိမ့်မည်။ ဒီမိုကရေစီခေတ်သည် အကြောက်တရားဖြင့် ကင်းဝေးရာ Freedom from Fear ဟု ယူဆသဖြင့် ကြိုးစားရယူခဲ့ကြသော်လည်း ‘ထင်သာထင်၊ မဝင်ဘူး ကျောင်းအမရေ’ ဟု လူအများခံစားကြရသဖြင့် ဒီမိုကရေစီကို အထင်လွဲကြလိမ့်မည်။

တရားဥပဒေစိုးမိုးမှု မရှိဟုထင်ကြလျှင် စီးပွားရေးတွင်လည်း သမ္မာအာဇီဝသမားများသည် ဝိသမလောဘသမားများနှင့်ယှဉ်ပြီး စီးပွားဆောင်ရွက်ဝံ့တော့မည်မဟုတ်တော့ဘဲ ရှိသမျှအထုပ်လေး မပျောက်အောင်သာ ကာကွယ်ကြမည်ဖြစ်သောကြောင့် နိုင်ငံ့စီးပွားကိုလည်း အညွန့်ချိုးရာရောက်မည်။

တစ်ဖန် တရားဥပဒေစိုးမိုးမှု မရှိသည်ကို မကျေနပ်သဖြင့် တရားစီရင်ရေးကို ကိုယ့်လက်တွင်းကိုယ်ထည့်သူများ လာပြန်လျှင်လည်း တရားဥပဒေစိုးမိုးရေးကို ပျက်ပြားစေလိမ့်မည်။ Facebook တရားစီရင်ခြင်းသည် မှန်မှန်ကန်ကန် လမ်းကြောင်းဖြင့်သွားလျှင် တရားဥပဒေစိုးမိုးရေးကို ထောက်ကူနိုင်သော်လည်း လမ်းကြောင်းသွေသွားလျှင် ‘မစစ်ဆေးမီက ကြိုတင်ပြစ်ဒဏ်ချ’ ခြင်းဘက်သို့ ရောက်သွားကာ တရားဥပဒေစိုးမိုးရေးကို ထိခိုက်ပြန်သည်။

တရားဥပဒေစိုးမိုးရေးသည် မြန်မာနိုင်ငံသူနိုင်ငံသားတို့ ဆင်နွှဲနေသော ခေတ်ပြောင်းတော်လှန်ရေးကြီး၏ အသက်ဖြစ်သည့်အတွက် ပြည်သူတို့နှင့် အစိုးရကဦးစားပေး၍ တည်ဆောက်ပါမည့်အကြောင်း The Voice Journal က ထပ်မံဆော်ဩအပ်ပါသည်။ 

 

အယ်ဒီတာ
၎.၇.၂၀၁၉

You may also like...

Leave a Reply

Your email address will not be published. Required fields are marked *