ရာပြည့်ရန်ကုန်တက္ကသိုလ်ရင်ခွင် ခိုဝင်လာကြမယ့် သားငယ်သမီးငယ်များအတွက်

ဓာတ်ပုံ - ကျော်နိုင်

၂၀၁၉ ခုနှစ် တက္ကသိုလ်ဝင်တန်းအောင်မြင်ခဲ့ကြတဲ့ သားတို့သမီးတို့အနေနဲ့ တက္ကသိုလ်ဝင်ခွင့်ကို ရွေးချယ်ကြရတော့မယ်။ တက္ကသိုလ်ဝင်ခွင့်ကို ရွေးချယ်ရာမှာ သားတို့သမီးတို့ရဲ့ ဝါသနာဗီဇအရ မှန်ကန်တဲ့ရွေးချယ်မှုဖြစ်ဖို့  အလွန်လိုအပ်ပါတယ်။ ဝိဇ္ဇာနဲ့သိပ္ပံဘာသာရပ်တွေမှာ ထူးချွန်တဲ့ကျောင်းသူ ကျောင်းသားတစ်ယောက် ဖြစ်ချင်တယ်ဆိုရင်တော့ ထူးချွန်ကျောင်းသူ ကျောင်းသားတွေကို မွေးထုတ်ပေးနေတဲ့ ရန်ကုန်တက္ကသိုလ်ကို ရွေးချယ်နိုင်မှာ ဖြစ်ပါတယ်။ အခုသားတို့သမီးတို့ကို ရန်ကုန်တက္ကသိုလ်အကြောင်းနဲ့ ရန်ကုန်တက္ကသိုလ်မှာ ရွေးချယ်နိုင်မယ့်ဘာသာရပ်တွေကို ပြောပြမှာဖြစ်ပါတယ်။

ရန်ကုန်တက္ကသိုလ်ဆိုတာ မြန်မာနိုင်ငံမှာ သက်တမ်းအရှည်ကြာဆုံးနဲ့ အစဉ်အလာအကြီးမားဆုံး တက္ကသိုလ်ကြီးတစ်ခု ဖြစ်တယ်။ မြန်မာနိုင်ငံမှာ ရှိရှိသမျှ တက္ကသိုလ်အားလုံးရဲ့ မိခင်ကြီးသဖွယ်လည်း ဖြစ်ပါတယ်။ သားတို့သမီးတို့သိအောင် ရန်ကုန်တက္ကသိုလ်ရဲ့ သမိုင်းကြောင်းကို ပြောပြရမယ်ဆိုရင် မြန်မာနိုင်ငံ ဗြိတိသျှကိုလိုနီ လက်အောက်ကျရောက်နေတဲ့အချိန် ၁၉၂၀ ပြည့်နှစ်မှာ စတင်ပေါ်ပေါက်လာခဲ့တဲ့ တက္ကသိုလ်ဖြစ်တယ်။ ဒါကြောင့် လာမယ့်၂၀၂၀ ပြည့်နှစ်မှာ ရန်ကုန်တက္ကသိုလ်ဟာ သက်တမ်း အနှစ်(၁၀၀) ပြည့်မြောက်ပြီး ရာပြည့်ပွဲသဘင်ကို စည်ကားသိုက်မြိုက်စွာ ကျင်းပတော့မှာဖြစ်ပါတယ်။

ရန်ကုန်တက္ကသိုလ်ကို စတင်တည်ထောင်ချိန်မှာ မြန်မာနိုင်ငံရဲ့ တစ်ခုတည်းသော တက္ကသိုလ်ဖြစ်ပါတယ်။ စတင်ဖွင့်လှစ်စဉ်က သင်ကြားရေးစနစ်ဟာ ‘Combination System’ လို့ခေါ်တဲ့ ဘာသာတွဲစနစ်ဖြစ်တယ်။ ဥပစာတန်း (Intermediate) ကို ဝိဇ္ဇာနဲ့သိပ္ပံ ခွဲထားပြီး ဥပစာဝိဇ္ဇာနဲ့ ဥပစာသိပ္ပံလို့ ခေါ်ဝေါ်ခဲ့ပါတယ်။ ဥပစာတန်းအောင်မြင်ပြီးတဲ့အခါ ဆေး၊ အင်ဂျင်နီယာ၊ သစ်တော၊ ဆရာအတတ်သင် စတဲ့ပညာရပ်တွေနဲ့  ဝိဇ္ဇာဘာသာရပ်၊ သိပ္ပံဘာသာရပ်တွေကို  စိတ်ကြိုက်ရွေးချယ်တက်ရောက်နိုင်ပါတယ်။ အဲဒီအတန်းတွေမှာ ပညာထူးချွန်ရင်တော့ ဂုဏ်ထူးတန်း၊ မဟာတန်းတွေကိုလည်း ဆက်လက်တက်ရောက်နိုင်ခဲ့ပါတယ်။

ရန်ကုန်တက္ကသိုလ်ဟာ စစ်ကြိုခေတ်နဲ့လွတ်လပ်ရေးရပြီးစကာလမှာ အရှေ့တောင်အာရှမှာ ပညာအရည် အသွေး အကောင်းမွန်ဆုံးနဲ့ အသာယာအလှပဆုံး  တက္ကသိုလ်တစ်ခုအဖြစ်နဲ့ ရပ်တည်နိုင်ခဲ့ပါတယ်။ အာရှမှာ ထင်ရှားကျော်ကြားတဲ့ တက္ကသိုလ်တစ်ခုဖြစ်ခဲ့ပြီး  အာရှနိုင်ငံများက ကျောင်းသူကျောင်းသားတွေဟာ ရန်ကုန်တက္ကသိုလ်မှာ ပညာလာရောက်ဆည်းပူးခဲ့ကြပါတယ်။ နိုင်ငံတွင်းမှာလည်း ဗိုလ်ချုပ်အောင်ဆန်းတို့လို  အာဇာနည်ခေါင်းဆောင်ကြီးတွေ၊ ကမ္ဘာ့ကုလသမဂ္ဂ အထွေထွေအတွင်းရေးမှူးချုပ်ဦးသန့်တို့လို ကမ္ဘာ့အကျိုးပြု ပုဂ္ဂိုလ်ကြီးတွေကို မွေးဖွားပေးခဲ့တဲ့ တက္ကသိုလ်ဖြစ်ပါတယ်။

မျက်မှောက်ကာလမှာတော့ ရန်ကုန်တက္ကသိုလ်ဘွဲ့ကြိုတန်းတွေကို  ထူးချွန်ကျောင်းသူကျောင်းသားများ  ပြုစုပျိုးထောင်ရေးအစီအစဉ်နဲ့ ၂၀၁၃ ခုနှစ် ဒီဇင်ဘာလမှာ စတင်ဖွင့်လှစ်ခဲ့ပါတယ်။ ရန်ကုန်တက္ကသိုလ်ဟာ ခေတ်မီဖွံ့ဖြိုးတိုးတက်တဲ့ နိုင်ငံတော်သစ်တည်ဆောက်ရာမှာ လိုအပ်တဲ့ အရည်အသွေးမြင့် လူ့စွမ်းအားအရင်းအမြစ်တွေ ပေါ်ထွန်းလာစေဖို့  ပြုစုပျိုးထောင်ပေးလျက်ရှိပြီး ဆရာဆရာမများ၊ ကျောင်းသား ကျောင်းသူများ အရည်အသွေး မြင့်မားရေးအတွက် စွမ်းဆောင်ရည်မြှင့်တင်ခြင်းကို အလေးထား ဆောင်ရွက်လျက်ရှိပါတယ်။

နိုင်ငံတကာအဆင့်မီ တက္ကသိုလ်တစ်ခု ဖြစ်လာစေဖို့ ရည်မှန်းချက်ထားရှိပြီး  နိုင်ငံတကာတက္ကသိုလ်တွေ၊ နိုင်ငံတကာ အဆင့်မြင့်ပညာရေးအဖွဲ့အစည်းတွေနဲ့ ပူးပေါင်းဆောင်ရွက်မှုများကိုလည်း တိုးချဲ့ဆောင်ရွက်လျက်ရှိပါတယ်။ ဂျာမနီ၊ အင်္ဂလန်၊ နော်ဝေ၊ ဟန်ဂေရီ၊  နယူးဇီလန် ၊ အမေရိကန်၊ ဗီယက်နမ်၊  ဩစတြေးလျ၊ ကိုရီးယား၊  ဂျပန်၊ စင်ကာပူ၊  ထိုင်း၊ တရုတ်၊ ထိုင်ဝမ် အစရှိတဲ့နိုင်ငံများမှ တက္ကသိုလ်များနဲ့ နိုင်ငံတကာအဖွဲ့အစည်း  စုစုပေါင်း ၆၄ ခုတို့နဲ့ နားလည်မှု စာချွန်လွှာများရေးထိုးပြီး ပူးပေါင်းဆောင်ရွက်မှု လုပ်ငန်းတွေကို လုပ်ဆောင်လျက်ရှိပါတယ်။

ရာပြည့်ကာလရောက်ရှိတော့မယ့် မြန်မာနိုင်ငံရဲ့ဂုဏ်ဆောင် ရန်ကုန်တက္ကသိုလ် အဆင့်မြှင့်တင်နိုင်ဖို့အတွက်  ပထမအကြိမ် ပြည်သူ့လွှတ်တော်ကျင်းပစဉ်က ပြည်သူ့လွှတ်တော်ကိုယ်စားလှယ်  ယခု နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အဆိုတင်သွင်းခဲ့ပါတယ်။ အဲဒီအဆိုကို မဲခွဲဆုံးဖြတ်ပြီး  အတည်ပြုနိုင်ခဲ့တာကြောင့် ရန်ကုန်တက္ကသိုလ် ပြန်လည်မွမ်းမံခြင်း၊ အဆင့်မြှင့်တင်ခြင်းလုပ်ငန်းတွေကို မဟာစီမံကိန်း  (Master Plan) တစ်ခုရေးဆွဲကာ နိုင်ငံတော်အဆင့်အနေနဲ့ ခိုင်ခိုင်မာမာ စတင်ဆောင်ရွက်နေပြီ ဖြစ်ပါတယ်။

အကောင်အထည်ဖော်ဆောင်ရွက်နေတဲ့ ရန်ကုန်တက္ကသိုလ် အဆင့်မြှင့်တင်ရေး မဟာစီမံကိန်း (Master Plan) အရ ရန်ကုန်တက္ကသိုလ်ဖွဲ့စည်းပုံ၊ စီမံခန့်ခွဲမှုကိစ္စ များ၊ မူဝါဒများ၊ လုပ်ငန်းစဉ်များကို တိုးတက် ပြောင်းလဲလာတဲ့ခေတ်အခြေအနေနဲ့ ဆီလျော်ညီညွတ်မှုရှိအောင် ပြုပြင်ပြောင်းလဲ   ဆောင်ရွက်လျက်ရှိပါတယ်။၂၀၁၅ ခုနှစ် အမျိုးသားပညာရေးဥပဒေပါ ပြဋ္ဌာန်းချက်အရ ရန်ကုန်တက္ကသိုလ်ကို ကိုယ်ပိုင်စီမံခန့်ခွဲခွင့်ရတက္ကသိုလ် (Autonomous University) ဖြစ်စေဖို့ လိုအပ်ချက်တွေကို ဖြည့်ဆည်းလျက် ရှိပါတယ်။

ရန်ကုန်တက္ကသိုလ်ရဲ့ ပညာရေးဆိုင်ရာ ပြုပြင်ပြောင်းလဲမှုများအဖြစ် မဟာဌာနစနစ် (Faculty System)  ကို  ထူထောင်ဖို့၊ သင်ရိုးညွှန်းတမ်းတွေကို ပြန်လည်ဆန်းစစ်ပြီး မွမ်းမံပြင်ဆင်ဖို့၊ လိုအပ်ချက်နဲ့အညီ ပြန်လည်ရေးဆွဲဖို့  စတဲ့လုပ်ငန်းတွေကို စီမံဆောင်ရွက်လျက်ရှိပါတယ်။ ရန်ကုန်တက္ကသိုလ် အဆင့်မြှင့် တင်ရာမှာ(၁) သင်ကြားသင်ယူမှုနဲ့သုတေသန ဖွံ့ဖြိုးတိုးတက်မှု၊ (၂) အင်္ဂလိပ်စာစွမ်းရည်မြှင့်တင်ရေး၊ (၃) သတင်းအချက်အလက်နဲ့ နည်းပညာဖွံ့ဖြိုးတိုးတက်ရေး၊ (၄) ကျောင်းပရိဝုဏ်နဲ့ လိုအပ်တဲ့ သင်ထောက်ကူပစ္စည်းများ မြှင့်တင်ရေးဆိုတဲ့ ဦးစားပေးအစီအစဉ်လေးရပ်ကိုလည်း ချမှတ်ဆောင်ရွက်လျက်ရှိပါတယ်။

ဒီလို အဘက်ဘက်က ပြည့်စုံကောင်းမွန်အောင် အဆင့်မြှင့်တင်နေတဲ့  ရာပြည့်ရန်ကုန်တက္ကသိုလ်ကြီးဟာ တက္ကသိုလ်ဝင်တန်းအောင်မြင်ထားတဲ့ သားတို့သမီးတို့အတွက် ပညာဆည်းပူးဖို့ ရွေးချယ်စရာ အခွင့်အလမ်းတစ်ခုပဲဖြစ်ပါတယ်။ ရန်ကုန်တက္ကသိုလ်ကို ထူးချွန်ကျောင်းသူကျောင်းသား ပြုစုပျိုးထောင်ရေး အစီအစဉ်အရ စတင်ဖွင့်လှစ်တဲ့ ၂၀၁၃ ခုနှစ်မှာ ဘာသာရပ်ပေါင်း ၂၀ ကိုသာ ဖွင့်လှစ်နိုင်ခဲ့ပေမယ့် အခုအခါမှာတော့ သားတို့သမီးတို့အတွက် ရွေးချယ်စရာ ဘာသာရပ်ပေါင်း ၂၆ ခု ရှိနေပြီဖြစ်ပါတယ်။  ရွေးချယ်နိုင်တဲ့ ဘာသာရပ်တွေနဲ့ သတ်မှတ်ထားတဲ့ အနိမ့်ဆုံးရမှတ်တွေကတော့ ဇယားပါအတိုင်း ဖြစ်ပါတယ်။

ရန်ကုန်တက္ကသိုလ်မှာ နယ်ကလာရောက်ကြမယ့် ကျောင်းသူကျောင်းသားတွေအတွက် အဆောင်နေ ခွင့်ကိုလည်း ရရှိမှာဖြစ်ပါတယ်။ သာယာလှပတဲ့ အင်းယားကန်နောက်ခံ၊ ဘွဲ့နှင်းသဘင် အဆောက်အအုံ၊ သစ်ပုပ်ပင်၊ အဓိပတိလမ်း၊ စာအုပ်စာတမ်း စုံလင်လှတဲ့ ရန်ကုန်တက္ကသိုလ် စာကြည့်တိုက်နဲ့တက္ကသိုလ်များ ဗဟိုစာကြည့်တိုက်၊ အပန်းဖြေရိပ်သာ စတဲ့ ရန်ကုန်တက္ကသိုလ်ရဲ့ အထင်ကရနေရာတွေဟာ များပြားလှပါ တယ်။ ပညာရပ်ဝန်းကျင်ကောင်းတစ်ခုဖြစ်ပြီး မကြာမီမှာ ရာပြည့်သဘင် ဆင်ယင်ကျင်းပတော့မယ့်  ရန်ကုန်တက္ကသိုလ်ဟာ တက္ကသိုလ်ဝင်တန်းအောင် သားငယ်သမီးငယ်တို့အတွက် ပညာရင်ငွေ့ခိုလှုံစရာ နေရာမွန်တစ်ခု ဖြစ်ပါတော့တယ်။

ဒေါက်တာအောင်မြင့်ဦး

 

You may also like...

Leave a Reply

Your email address will not be published. Required fields are marked *