မဲစာရင်း နိုင်ငံရေးကိုပါတီများ ကောက်ရန်မလိုဟု ဆို

ဓာတ်ပုံ -*ZawG *

ပုသိမ်၊ ဇူလိုင် ၁၀

လာမည့် ၂၀၂၀ ပြည့်နှစ်တွင် ပါတီစုံဒီမိုကရေစီအထွေထွေရွေးကောက်ပွဲ ကျင်းပပြုလုပ်မည်ဖြစ်ရာ မဲစာရင်း ကောက်ယူမှုဆောင်ရွက်ရာတွင် နိုင်ငံရေးပါတီများမှ ကောက်ယူရန် မလိုအပ်ကြောင်း ဧရာဝတီတိုင်း ဒေသကြီးကော်မရှင်အဖွဲ့ခွဲဥက္ကဋ္ဌ ဦးအောင်မြင့်က ပြောကြားသည်။

ပုသိမ်မြို့ ဧရာရွှေဝါခန်းမတွင် ယနေ့ (ဇူလိုင် ၁၀ ရက်) ကျင်းပပြုလုပ်သည့် ပြည်ထောင်စုရွေးကောက်ပွဲ ကော်မရှင်နှင့် ဧရာဝတီတိုင်းဒေသကြီးအတွင်းရှိ နိုင်ငံရေးပါတီများ၊ ရွေးကောက်ပွဲဆိုင်ရာကဏ္ဍစုံမှ ပါဝင်ပတ်သက်သူများတွေ့ဆုံပွဲတွင် တိုင်းကော်မရှင်အဖွဲ့ခွဲဥက္ကဋ္ဌက အထက်ပါအတိုင်း ပြောကြားလိုက်ခြင်းဖြစ်သည်။

“မဲဆန္ဒရှင်စာရင်းကောက်တယ်ဆိုတာ ကော်မရှင်ရဲ့လုပ်ငန်းတာဝန်ပါ၊ ကော်မရှင်ရဲ့ဝန်ထမ်းအင်အားနဲ့ မလုံလောက်တဲ့အတွက် သက်ဆိုင်ရာဌာနတွေရဲ့အကူအညီကိုတောင်းခံပြီး မဲစာရင်းကောက်ယူသွားမှာ၊ နိုင်ငံရေးပါတီတွေက ကောက်စရာမလိုပါဘူး၊ ဘယ်အချိန်မှာ လိုသလဲဆိုတော့ မဲစာရင်းတွေ မြို့နယ် ကော်မရှင်အဖွဲ့ခွဲကိုရောက်လာပြီဆိုရင် ပါသင့်တဲ့သူ မပါတာ၊ မပါသင့်တဲ့သူတွေပါနေတာ၊ အမှန်တကယ် မနေတော့ဘဲ ပြောင်းသွားတာ စသဖြင့် အချက်အလက်တွေကို ကော်မရှင်တွေနဲ့ ပူးပေါင်းဆောင်ရွက်ဖို့၊ ကော်မရှင်တွေရဲ့ အကူအညီတောင်းခံမှုကို ပူးပေါင်းကူညီဆောင်ရွက်ပေးဖို့ လိုအပ်မှာဖြစ်ပါတယ်” ဟု ဦးအောင်မြင့်က ဆက်လက်ပြောကြားသည်။

မြန်မာနိုင်ငံတွင် လူဦးရေ ၅၂ သန်းကျော်ရှိသည့်အနက် ၂၀၂၀ ပြည့်နှစ်တွင် မဲပေးနိုင်သူ သန်း ၄၀ ခန့်ရှိလာမည်ဖြစ်ပြီး မှတ်ပုံတင်ထားသည့်နိုင်ငံရေးပါတီ ၉၈ ပါတီရှိသည့်အတွက် လာမည့်ရွေးကောက်ပွဲတွင် ယှဉ်ပြိုင်မှုအားကောင်းလာနိုင်သဖြင့် ကော်မရှင်အဆင့်ဆင့်မှ လုပ်ငန်းဆောင်ရွက်မှုသည် ဘက်မလိုက် မျှတပြီး ရွေးကောက်ပွဲရလဒ်သည် ပြည်သူ့ဆန္ဒနှင့် ထပ်တူဖြစ်ရန် လိုအပ်ကြောင်း ပြည်ထောင်စုရွေးကောက်ပွဲကော်မရှင်အဖွဲ့ဝင် (ဧရာဝတီတိုင်းတာဝန်ခံ) ဦးသန်းအောင်က ပြောသည်။

“မဲစာရင်းကောက်ယူတဲ့နေရာမှာ၊ မဲစာရင်းကြေညာတဲ့နေရာမှာ၊ နောက်ပြီး မဲပေးတဲ့အခါမှာ ကျနော်တို့တွေအတွက် အဆင်ပြေအောင်စီစဉ်ဆောင်ရွက်ပေးဖို့လိုပါတယ်၊ မဲစာရင်းမှာပါမှ ကျွန်တော်တို့တွေ ရွေးကောက်ပွဲ ဝင်လို့ရနိုင်မှာပါ” ဟု မသန်စွမ်းအဖွဲ့ချုပ်မှ တာဝန်ရှိသူတစ်ဦးက ပြောကြားသည်။

ယနေ့ကျင်းပပြုလုပ်သည့် ပြည်ထောင်စုရွေးကောက်ပွဲကော်မရှင်နှင့် ဧရာဝတီတိုင်းဒေသကြီးအတွင်း ရှိ နိုင်ငံရေးပါတီများ၊ ရွေးကောက်ပွဲဆိုင်ရာကဏ္ဍစုံမှ ပါဝင်ပတ်သက်သူများတွေ့ဆုံပွဲတွင် ပြည်ထောင်စုရွေး ကောက်ပွဲကော်မရှင် မဟာဗျူဟာစီမံကိန်း(၂၀၁၉-၂၀၂၂)ကိုပါ ရှင်းလင်းတင်ပြခဲ့ပြီး တိုင်းဒေသကြီး/ခရိုင်/ မြို့နယ် အဆင့်ဆင့်မှ ကော်မရှင်အဖွဲ့ဝင်များ၊ ဌာနဆိုင်ရာများ၊ နိုင်ငံရေးပါတီများမှ တာဝန်ရှိသူများ၊ အရပ် ဖက်အဖွဲ့အစည်းများမှ ၁၄၀ ဦးခန့်တက်ရောက်ခဲ့ကြကြောင်း သိရသည်။

*ZawG *

You may also like...

Leave a Reply

Your email address will not be published. Required fields are marked *