ဝန်ကြီးသစ်အဖြစ် ကြယ်ပွင့်ပြမေးခွန်း မေးမြန်းမှု မရှိခဲ့သူကို အဆိုပြု

မန္တလေး၊ ဇူလိုင် ၁၁

မန္တလေးတိုင်းဒေသကြီးအစိုးရအဖွဲ့တွင် အသစ်ဖွဲ့စည်းရန် အတည်ပြုပြီးဖြစ်သည့် လူဝင်မှုကြီးကြပ်ရေးနှင့် လူ့စွမ်းအားအရင်းအမြစ်ဝန်ကြီးဌာနကို တာဝန်ယူမည့် ဝန်ကြီးသစ်အဖြစ် လွှတ်တော်တွင် ကြယ်ပွင့်ပြမေးခွန်း မေးမြန်းခြင်းမရှိခဲ့သည့် လွှတ်တော်ကိုယ်စားလှယ်ကို ဝန်ကြီးချုပ်က အဆိုပြုခဲ့ကြောင်း မန္တလေးတိုင်းဒေသကြီး လွှတ်တော်အစည်းအဝေးအရ သိရသည်။

ယနေ့ ကျင်းပသည့် ဒုတိယအကြိမ် မန္တလေးတိုင်းဒေသကြီးလွှတ်တော် အထူးအစည်းအဝေး (၁/၂၀၁၉) ပထမနေ့တွင် ဝန်ကြီးအဖြစ် ကျောက်ဆည်မြို့နယ် အမှတ် ၂ တိုင်းဒေသကြီးလွှတ်တော်ကိုယ်စားလှယ် ဦးအောင်ကြည်ကို အဆိုပြုခဲ့ခြင်းကြောင်း လွှတ်တော်ဥက္ကဌက လွှတ်တော်သို့ အမည်စာရင်း တင်သွင်းခဲ့သည်။

အဆိုပြုခံရသူသည် ၂၀၀၈ ခုနှစ် ဖွဲ့စည်းပုံအခြေခံဥပဒေပုဒ်မ ၂၆၁ (က) တွင် ပြဌာန်းထားသည့် အရည်အချင်းနှင့်မညီလျှင် ကန့်ကွက်နိုင်ပြီး ကန့်ကွက်သူ ရှိမရှိကို မနက်ဖြန် ကျင်းပမည့် အစည်းအဝေးတွင် သိရမည်ဖြစ်ကြောင်း လွှတ်တော်ဥက္ကဌ ဦးအောင်ကျော်ဦးက ပြောသည်။

“ကန့်ကွက်သူ မရှိဘူးဆိုရင် ဇူလိုင်လ ၁၅ ရက်နေ့မှာ ကျမ်းကျိန်ရမယ်” ဟု ၎င်းက ဆိုသည်။

ဝန်ကြီးသစ်အဖြစ် အဆိုပြုခံရသည့် အသက် ၆၄ နှစ်အရွယ် ဦးအောင်ကြည်သည် ကျောက်ဆည်မြို့ ဇာတိဖြစ်ပြီး စာရင်းစစ်အဖြစ် စဥ့်ကိုင်မြို့နယ်၊ ကျောက်ဆည်မြို့နယ်တို့တွင် လုပ်ကိုင်ခဲ့ဖူးသည်။

ယင်းအပြင် မြပါဝါဆီဖြန့်ဖြူးရေးကုမ္ပဏီနှင့် Myanmar Conch Cement ကုမ္ပဏီ (Alpha ဘိလပ်မြေ) တို့တွင်လည်း စာရင်းစစ်အဖြစ် လုပ်ကိုင်ခဲ့ဖူးကြောင်း လွှတ်တော်သို့ ဖြန့်ဝေသည့် ကိုယ်ရေးမှတ်တမ်းအရ သိရသည်။

“ကိုယ်စားလှယ်မဖြစ်ခင် လုပ်ခဲ့တဲ့ အလုပ်တွေပါ” ဟု ဦးအောင်ကြည်က ရှင်းပြသည်။

ဒုတိယအကြိမ် မန္တလေးတိုင်းဒေသကြီးလွှတ်တော် အစည်းအဝေးများတွင် ယနေ့အထိ မေးခွန်းမေးမြန်းမှု မရှိသည့် လွှတ်တော်ကိုယ်စားလှယ်မှာ ဦးအောင်ကြည်အပါအဝင် နှစ်ဦးရှိသည်ဟု ကနောင်အင်စတီကျု့၏ လေ့လာမှုများအရ သိရှိရသည်။

ဦးအောင်ကြည်သည် လွှတ်တော်အစည်းအဝေးများတွင် ကြယ်ပွင့်ပြမေးခွန်း မေးမြန်းမှုများ မရှိသော်လည်း ကြယ်ပွင့်မပြ မေးခွန်းများကိုမူ ၂၆ ခုအထိ မေးမြန်းပြီးဖြစ်ကာ သက်ဆိုင်ရာ ဝန်ကြီးများနှင့် တိုက်ရိုက်ထိတွေ့ တောင်းဆိုမှုများ ပြုလုပ်ခဲ့သည်ဟု ဖြေရှင်းထားသည်။

ယင်းအပြင် ဦးအောင်ကြည်သည် မန္တလေးတိုင်းဒေသကြီးလွှတ်တော် ဒေသန္တရစီမံကိန်း၊ အရအသုံးငွေစာရင်းနှင့် ဘဏ္ဍာရေးဆိုင်ရာကော်မတီ ဥက္ကဌအဖြစ်လည်းကောင်း၊ ပြည်သူ့ငွေစာရင်း သုံးစွဲမှု စိစစ်ရေးကော်မတီတွင် အဖွဲ့ဝင်အဖြစ်လည်းကောင်း ဆောင်ရွက်နေသည်။

You may also like...

Leave a Reply

Your email address will not be published. Required fields are marked *