နိုင်ငံကို ကာကွယ်စောင့်ရှောက်ခြင်း

Facebook ခေတ်တွင် သတင်းအချက်အလက်များ ပေါများပြည့်လျှံစွာ စီးဆင်းနေသလောက် သတင်းယောင်များ၊ သတင်းမှားများ၊ လံကြုပ်သတင်းများ များပြားလှသည်။ ဦးနှောက်အဆိပ်သင့်မည့် အန္တရာယ်ကို ရှောင်ရှားနိုင်ရေး သတင်းအကြောသိ (Media Literate) ရန်လိုသည်။

သတင်းမှားများကို ယုံမိလျှင် အဆုံးအဖြတ်မှားမည်။ စိတ်ဓာတ်မှိုင်းမိမည်။ စိတ်အားကုန်မည်။

သတင်းမှားနှင့် ခဏခဏတိုးလျှင် သတင်းမီဒီယာတစ်ခုလုံးကို သိမ်းကျုံးပြီး အထင်လွဲ အပြစ်မြင်သွားနိုင်သည်။ သတင်းမီဒီယာနှင့် ပြည်သူ ကွာဟသွားလျှင် ဒီမိုကရေစီအပြောင်းအလဲကို မလိုလားသည့် ကြားလူ စားသွားမည်။

လူသည် ရေးထားသောစာ Written Word ကို အမှန်ထင်တတ်သည်။ ပုံနှိပ်မီဒီယာများသာ ရှိသည့်ခေတ်က ရေးထားသော၊ ပုံနှိပ်ထားသော စာများသည် အယ်ဒီတာအဆင့်ဆင့်ကို ဖြတ်ကျော်ခဲ့ရသည့်အတွက် တာဝန်ယူမှု၊ တာဝန်ခံမှုရှိသော်လည်း ယနေ့ Facebook ခေတ်တွင် Written Word တွေ့တိုင်း အလိုအလျောက် မယုံအောင် ဦးနှောက်ကို လေ့ကျင့်ထားရတော့မည်။

ကိုယ်မြင်ရသော သတင်း မှန် မမှန် ဆုံးဖြတ်နည်းအဆင့်ဆင့် ရှိသော်လည်း အနှစ်သာရမှာ ဆင်ခြင်တုံတရား Common Sense ပင်ဖြစ်သည်။ သနားအောင်ရေးထားလျှင် ယုံတတ်ခြင်း၊ ကိုယ်မုန်းသော အဖွဲ့အစည်း လူပုဂ္ဂိုလ်တို့ကို အပြစ်ပြောထားလျှင် ယုံတတ်ခြင်း၊ ကိုယ်ချစ်သောအဖွဲ့အစည်း လူပုဂ္ဂိုလ်တို့အကြောင်း အကောင်းပြောထားလျှင် ယုံတတ်ခြင်း စသည့် အစွဲ Bias ပေါင်းများစွာကို အစဉ်မပြတ် သတိထားနေမှသာ သတင်းမှားတို့၏အန္တရာယ်ကို ရှောင်ရှားနိုင်မည်။

ဒီမိုကရေစီအပြောင်းအလဲ နောက်တစ်ဆင့်တက်သည်နှင့်အမျှ သတင်းမီဒီယာတို့၏ အခန်းကဏ္ဍသည် အရေးပိုပါလာသည့်အတွက် သတင်းမီဒီယာများကို ပြည်သူလူထု အယုံအကြည်နည်းအောင် သတင်းမှားများကို သတင်းမီဒီယာ များအသွင်ဖြင့် Facebook စာမျက်နှာများမှ ထုတ်လွှင့်လာကြသည်။ သတင်းမီဒီယာများကို ပြည်သူလူထု ယုံကြည်မှုနည်းလာမှသာ အကျိုးခံစားရမည့် အင်အားစုကြီးများသည် ထုနှင့်ထည်နှင့် ရှိနေသည်။ ထို့ကြောင့် သတင်းတု သတင်းလွဲများကို ရှောင်ရှားရန် သတင်းမီဒီယာအစစ်နှင့် အတုကို ခွဲခြားတတ်ရမည်။ အမျိုးအမည်မသိ Facebook Page များမှ သတင်းများဆိုလျှင် မဖတ်ခြင်း၊ မဝေမျှခြင်းသည် အကောင်းဆုံး။

သတင်းမှားများ၏ အန္တရာယ်မှ ရှောင်ရှားနိုင်အောင် စိတ်ကိုလေ့ကျင့်ထားခြင်းသည် ကိုယ့်ကိုယ်ကိုယ် ကာကွယ်စောင့်ရှောက်ခြင်းသာမက ကိုယ်လိုလူစားအများကြီးဖြင့်ဖွဲ့စည်းထားသော မြန်မာနိုင်ငံကိုပါ ကာကွယ်စောင့်ရှောက်ခြင်းဖြစ်သည်။ 

 

အယ်ဒီတာ
၁၁.၇.၂၀၁၉

You may also like...

Leave a Reply

Your email address will not be published. Required fields are marked *