“ဇာတ်လမ်းမရိုက်ခင်ကတည်းက ဒီဇာတ်ကောင်ကို ပြန်ကြည့်တဲ့အချိန်မှာ လုံးဝနောင်တမရစေရဘူးဆိုတဲ့ စိတ်နဲ့ပဲ အကောင်းဆုံးရိုက်ခဲ့တာပါ။ ကျွန်တော့်အနုပညာအတွက် ဒီဇာတ်ကားက နောင်တမရမယ့် ဇာတ်ကားတစ်ကားပါ”

အခုလက်ရှိရုံတင်ပြသနေတဲ့ ဒဏ္ဍာရီမိုးဇာတ်ကားထဲက အမှတ်တရအကြောင်းတွေ၊ မကြာခင်ရိုက်ကူးမယ့် ဝတ်လဲတော် ရွှေပုဆိုးတန်းထိုးလို့ ကြိုမယ် ဇာတ်ကားအတွက် ပြင်ဆင်မှုအပိုင်းတွေနဲ့ ဇာတ်ကားလက်ခံမှု ပုံစံတွေကို သရုပ်ဆောင် ဒေါင်းကို မေးမြန်းထားတာဖြစ်ပါတယ်။

Voice          :       ဒဏ္ဍာရီမိုးဇာတ်ကားကို ဘယ်လိုကြောင့် လက်ခံဖြစ်တာလဲ။ အခု အထူးပွဲကြည့်ပြီးချိန်မှာ ဒီလှိုင်းဘယ်လောက်ထိ ဖြစ်ခဲ့လဲ။

Daung        :        ဇာတ်လမ်းကို အရင်နားထောင်ပြီးတော့ စဖတ်တယ်။ စဖတ်ထဲက အဲဒီဇာတ်ကောင်ကို ကြိုက်တာ။ ရိုက်ရမှာကလည်း အဲဒီဇာတ်ကောင်ပဲဆိုတော့ ရိုက်ဖြစ်သွားတာပါ။ ၁၀၀ ရာခိုင်နှုန်းပဲ။ ဘာဖြစ်လို့လဲဆိုတော့ ကျွန်တော်က အဲဒီအချိန်မှာ ဒီလှိုင်းဖြစ်ဖို့အတွက်ပဲ စိတ်ရှိတယ်။ကျန်တာ ဘာမှမရှိဘူး။ ဇာတ်လမ်းမရိုက်ခင်ကထဲက ဒီဇာတ်ကောင်ကိုပြန်ကြည့်တဲ့အချိန်မှာ လုံးဝနောင်တမရစေရဘူးဆိုတဲ့စိတ်နဲ့ ပဲ အကောင်းဆုံး ရိုက်ခဲ့တာပါ။ကျွန်တော့် အနုပညာအတွက်ဒီဇာတ်ကားက နောင်တမရမယ့် ဇာတ်ကားတစ်ကားပါ။

Voice         :       ဒီဇာတ်ကားမရိုက်ခင်ကထဲက ဒီကားက ကိုယ့်စိတ်ကို မွန်းကျပ်စေတယ်လို့ ပြောခဲ့တော့ အခုပြန်ကြည့်ချိန်မှာ ဘယ်လိုခံစားရလဲ။

Daung        :       ရိုက်နေတုန်းကလည်း မွန်းကျပ်တယ်။အခုထိလည်း မွန်းကျပ်တုန်း။ ဒီဟာဆို နှစ်ကြိမ်မြောက်ကြည့်တာ။ အခုထိ ဝမ်းနည်းတုန်း။တချို့ဇာတ်ဝင်ခန်းဆို တစ်ခန်းထဲကို အဲဒီတစ်နေ့လုံး မနက်ကနေ ညနေအထိ ရိုက်ခဲ့ရတာတွေ ရှိခဲ့တယ်။

Voice         :       ဇာတ်ကားရိုက်ကူးနေစဉ် အမှတ်တရဆို ဘာတွေဖြစ်မလဲ။

Daung        :        အဓိကအမှတ်တရက ဇာတ်လမ်းထဲမှာရှိတဲ့ ခံစားချက်တွေနဲ့ နေထိုင်နေကြတာပေါ့။ ကျွန်တော်က ချစ်လို့ ဆိုးတဲ့ လူတစ်ယောက်၊ သူတို့က  အချစ်ကြီးနေတဲ့လူတွေ အဲဒီလိုလူတွေ ဇာတ်လမ်းထဲမှာရော၊ အပြင်မှာရော အားလုံးက ပျော်စရာကောင်းတယ်။အဲဒီတော့ ချိတ်ဆက်မှုတွေ အားလုံးက တမင်ဖန်တီးနေစရာ မလိုဘူး။

Voice         :       ဒီလထဲမှာ ဘာဇာတ်ကားတွေ ရိုက်ကူးဖို့ရှိလဲ။

Daung        :        ဝတ်လဲတော် ရွှေပုဆိုးတန်းထိုးလို့ ကြိုမယ်ဇာတ်ကားက ကိုကျီးညို ဇာတ်ကောင် ကြိုတင်ပြင်ဆင်ဖို့အတွက် ပခုက္ကူဘက်မှာ သွားနေမယ်။

Voice         :       ကာရိုက်တာအတွက် ဘယ်လိုမျိုး ကြိုတင်ပြင်ဆင်လေ့ရှိလဲ။

Daung        :        အဓိက အနီးစပ်ဆုံးလူတွေကို လေ့လာတယ်။ဒီတစ်ယောက်က ဘယ်လောက်အထိ ဇာတ်လမ်းမှာ အနိမ့်၊ အမြင့်တွေရှိလဲ။အဲဒီလိုအနိမ့်၊ အမြင့်တူညီတဲ့လူတွေရဲ့ ခံစားချက်တွေကိုအဓိက  လေ့လာဖြစ်တယ်။ အခု ကိုကျီးညိုဆိုရင်လည်း အဲဒီရွာတွေမှာ ရှိတဲ့လူတွေကို သွားလေ့လာမယ်။ ကိုကျီးညို မဟုတ်ဘူး။ ဒါပေမဲ့ သူနဲ့ ခပ်ဆင်ဆင်စိတ်ရော၊ လူရော တူတဲ့လူ အဲဒီရွာမှာ နေထိုင်ကြတဲ့ ကာလသားတွေက ဘယ်လိုနေထိုင်တတ်ကြသလဲဆိုတာ အတိအကျ သိချင်တယ်။

Voice         :       နာမည်ကြီးဝတ္ထုတွေနဲ့ အလွတ်ဇာတ်လမ်း၊ ဇာတ်ညွှန်းတွေရိုက်တဲ့အခါ  ဘယ်လို ကွာခြားမှုတွေ ရှိလဲ။

Daung        :        အဓိက စာဖတ်ပရိသတ်တွေအတွက် ကျော်ပြီးတော့ မြင်နိုင်အောင် ကြိုးစားရတာပေါ့။ ကျော်မြင်နိုင်လားဆိုတော့ ကျော်ပြီး မမြင်နိုင်ပြန်ဘူး။ ဘာဖြစ်လို့လဲဆိုတော့ ဇာတ်ကောင်က ဘောင်ခတ်ပြီးသားကို။ ဘောင်ခတ်ပြီးသားအရာတစ်ခုကို လုပ်ရတာက ကိုယ့်ရဲ့ဖန်တီးမှုကို ခဏ မေ့ထားရတယ်။ ဒီ ဇာတ်ကောင်အတိုင်းဖြစ်အောင် ကိုယ့်ကိုယ်ကိုယ် ဘောင်ခတ်ရတယ်။ အလွတ်ဇာတ်လမ်း၊ ဇာတ်ညွှန်းရိုက်ရတာကျတော့ ဖန်တီးမှုက လွတ်လပ်တယ်။ ဝတ္ထုကျတော့ စာရေးဆရာရဲ့ ဖန်တီးထားတဲ့ ဇာတ်ကောင်ဖြစ်တဲ့အတွက် စာရေးဆရာကို တွေ့မှကို အဆင်ပြေတဲ့ဟာမျိုး ရှိတယ်။ မတွေ့ဘူးဆိုရင်လည်း ဒီဇာတ်ကောင်ကို အနီးစပ်ဆုံးမြင်ရမှသာပိုပြီးတော့ သေချာနိုင်တာပေါ့။

Voice         :       ကာရိုက်တာအတွက် ကြိုတင်ပြင်ဆင်လေ့ရှိတော့ တချို့ဇာတ်ကား ကမ်းလှမ်းမှုတွေဆို လွှတ်လိုက်တာမျိုး ရှိလား။

Daung        :        ရှိတယ်။ ကျွန်တော်ကလည်း အဲဒီဟာကို အချိန်ပေးဖို့အတွက် တခြား ကားတွေကို လွှတ်လိုက်တာတွေ ရှိတယ်။ တချို့ကျတော့ ရက်တွေပြည့်သွားတယ်လို့ ထင်ကောင်းထင်ကြတာပေါ့။ ဒါပေမဲ့လည်း အဲဒါကကျွန်တော်ရဲ့  Rule ပဲလေ။

Voice         :       ဇာတ်ကားတွေထဲကို  ဘယ်လိုပုံစံတွေနဲ့ အဓိကရွေးချယ်ဖြစ်လဲ။

Daung        :        ဇာတ်လမ်းစရွေးထဲက ပရိသတ် အတွက် ခံစားပြီး ရွေးတယ်။ ပြီးတော့ ကိုယ့်ကိုယ်ကိုယ်ခံစားတယ်။ အဲဒီနှစ်ခုက အဓိကအကျဆုံးပဲလေ။ ပရိသတ်အတွက် ခံစားမှ ပရိသတ်ကြည့်ရင်လည်း နောင်တမရမှာ။ ကိုယ့်ပြန်ကြည့်ရင်လည်း နောင်တမရအောင် လုပ်ရတာဆိုတော့ အချိန် အများကြီး ယူထားတာ။ ပြီးတော့ အချစ်ကားတွေချည်းပဲ ကျွန်တော် မရိုက်ချင်ဘူး။ ကျွန်တော်တို့နိုင်ငံမှာ ဖြစ်တည်တဲ့ အရာတွေက အများကြီးပဲလေ။ ကျွန်တော့်နိုင်ငံထဲက ပြည်သူတွေထဲက မြန်မာဆန်တဲ့ ဇာတ်ကောင်ကာရိုက်တာတွေကို စိတ်ဝင်စားတယ်။ အဲဒီလိုမျိုး တည်ဆောက်ထားတဲ့ ကာရိုက်တာတွေကို ကျွန်တော် အရမ်းရိုက်ချင်တယ်။ အလိုလိုသွေးထဲက ဖြစ်လာတာ။

ဆုအိနြေ္ဒဦး

You may also like...

Leave a Reply

Your email address will not be published. Required fields are marked *