ရဲတပ်ဖွဲ့ မေးခွန်းထုတ်ခံရသည့် Viictoria အမှု ပျော့ကွက်များ

Victoria အမှုတွင် ရဲတပ်ဖွဲ့အမြင်နှင့်ပြည်သူ့အမြင် ဝိဝါဒကွဲပြားလျက်ရှိနေသည်။

Victoria အမှုတွင် ပြစ်မှုကျူးလွန်သည်ဟု ယူဆရသူကို ဖမ်းဆီးထားသော်လည်း ရဲတပ်ဖွဲ့အပေါ်ပြည်သူများ ၏ဝေဖန်မှုမှာ လျော့မသွားသည့်အပြင် မြင့်သထက်မြင့်တက်လျှက်ရှိနေသည်။ ပြစ်မှုကျူးလွန်သည်ဟုဆိုသူ အောင်ကျော်မျိုး (ခေါ်) အောင်ကြီးကို ဇူလိုင်လ ၄ ရက်နေ့တွင် ရဲတပ်ဖွဲ့ကတရားစွဲတင်ပြီးနောက် အမှုကို ဇူလိုင်လ ၁၅ ရက်နေ့တွင် စတင်စစ်ဆေးတော့မည် ဖြစ်သည်။

ရဲတပ်ဖွဲ့ကအောင်ကြီးကို CCTV မှတ်တမ်းအပါအဝင် သက်သေအထောက်အထားအခိုင်အလုံဖြင့် တရားစွဲ တင်ထားခြင်းဖြစ်ကြောင်း နေပြည်တော်သမ္မတရုံးတွင်ပြုလုပ်သည့် သတင်းစာရှင်းလင်းပွဲတွင် မြန်မာနိုင်ငံရဲတပ်ဖွဲ့မှ ဒုတိယရဲချုပ်ရဲဗိုလ်ချုပ်အောင်နိုင်သူက ပြောဆိုထားသည်။

သတင်းစာရှင်းလင်းပွဲတွင် ရဲတပ်ဖွဲ့ကရှင်းလင်းချက်၊ ကျောင်းအတွင်းဖြစ်ခဲ့သည့်ဆိုသည့် သုံးသပ်တင်ပြသည့် အခြေအနေများ၊ သတင်းမီဒီယာများကပြသခဲ့သည့် အခင်းဖြစ်နေရာက CCTV ရုပ်သံမှတ်တမ်းများက တွေ့ရှိချက်များအပေါ်အခြေခံကာ ပြည်သူများကြားတွင် ဝေဖန်မှုမြင့်တက်လာသည်။

ဒုတိယရဲချုပ်ရှင်းလင်းချက်၌ CCTV မှတ်တမ်းအခြေအနေတွင် အောင်ကြီးသည် Wisdom Hill ပုဂ္ဂလိက ကိုယ်ပိုင်ကျောင်းရှိ Victoria တက်ရောက်နေသည့် မူကြိုအဆောင်သို့ဝင်ရောက်ခဲ့သည့် တစ်ဦးတည်းသော အမျိုးသားဟု ဆိုသည်။

အခင်းဖြစ်နိုင်ခြေကိုစိစစ်ရာတွင် နေအိမ်တွင် Victoria ၏ မိခင်နှင့်အဖွားသာရှိခြင်း၊ ကျောင်းကြိုပို့ယာဉ် တွင်လည်း ဆရာမနှစ်ဦးလိုက်ပါသဖြင့် လမ်းနှင့်အိမ်တွင်မဖြစ်နိုင်ဘဲ ကျောင်းတွင်သာဖြစ်ပွားခြင်းဟု သုံးသပ်ထားသည်။ ယင်းကြောင့်ပင် အောင်ကြီးမှာပြစ်မှုကျူးလွန်သည်ဟု ရဲတပ်ဖွဲ့ကစွပ်စွဲခြင်းဖြစ်သည်။

အောင်ကြီးသည် ၎င်းအကြိုအပို့လုပ်ရမည့် ကျောင်းကြီးကြပ်ရေးမှူး ဒေါ်ဥမ္မာလှိုင်အမျိုးသား၏ မော်တော်ယာဉ် မူကြိုဆောင်ရှေ့ရောက်မှသာ ကျောင်းထဲကထွက်လာခဲ့ကြောင်း ဒုတိယရဲချုပ်ကဆိုသည်။

“ကျောင်အုပ်ဆရာမရဲ့ကားလာမှ ဒီကောင်(အောင်ကြီး) က ဒီဘက်ကိုလာပြီး တံခါးလာဖွင့်တယ်။ အဲဒီလိုမဖွင့်ခင်မှာ လက်တွေနမ်းတယ်။ ဒီလိုအခြေအနေလေးတွေ ဒါတွေကိုကျွန်တော်တို့ သက်သေခံအဖြစ် တင်သွင်းထားပါတယ်။ ဒီအချက်သည် ကျွန်တော်တို့မသင်္ကာတဲ့ အချက်ပဲရှိသေးတယ်” ဟု ၎င်းကဆိုသည်။

ယင်းရှင်းလင်းပွဲပြီးနောက် ရက်ပိုင်းအကြာတွင် ကျောင်းဘက်ကတာဝန်ရှိသူများ မီဒီယာများတွင် ထုတ်ဖော်ပြောဆိုမှု၊ သတင်းမီဒီယာများက ထုတ်ဖော်ပြသသည့်  CCTV ရုပ်သံမှတ်တမ်းများမှာ ရဲတပ်ဖွဲ့၏ ရှင်းလင်းချက်ကို မေးခွန်းထုတ်စရာဖြစ်လာသည်။ 

ရဲတပ်ဖွဲ့က ရှင်းလင်းပြီးနောက် Wisdom Hill ကျောင်းဘက်က ရှင်းလင်းချက်များ ဆက်တိုက်ထွက်လာသည်။ Victoria တက်ရောက်သည့် စာသင်ခန်းကိုတာဝန်ယူရသည် ဆရာမနှင်းနှင်းနု၊ ဆရာမနီလာအေးတို့ မီဒီယာတွင် အင်တာဗျူးဖြေကြားသည်။ ကျောင်းကြီးကြပ်ရေးမှူ ဒေါ်ဥမ္မာလှိုင်လည်း မီဒီယာအချို့တွင် ထုတ်ဖော်ပြောဆိုလာသည်။ ကျောင်းအုပ်ဦးပညာကလည်း မီဒီယာများသို့ မကြာခဏဖြေကြားလေ့ရှိသည်။

၎င်းတို့၏ ပြောဆိုချက်များအနက် တစ်သံတည်းထွက်ပေါ်လာသည့်အချက်မှာ အဆိုပါလိင်အမြတ်ထုတ်မှုမှာ ကျောင်းတွင်ဖြစ်ခြင်းမဟုတ်နိုင်ကြောင်းဆိုသည့် အချက်ဖြစ်သည်။

အောင်ကြီးကျောင်းဝင်းထဲသို့ ဝင်ရောက်ခဲ့သည့်အချိန်တွင် မူကြိုကလေးငယ်များသည် ကျောင်းစာသင်ခန်း အတွင်းတွင် ၎င်းတို့နှင့်အတူရှိနေပြီး အိမ်သာသွားလျှင်လည်း ဆရာမများက လိုက်လံစောင်ကြပ်ပေးသဖြင့် ယင်းကျောင်းထဲတွင် ပြစ်မှုကျူးလွန်ရန်မှာ မဖြစ်နိုင်ကြောင်း ဆရာမနှစ်ဦးက ပြောဆိုသည်။

ထိုအချိန်တွင်Victoria သည် မူကြိုစာသင်ခန်းတွင်ရှိနေသည့်အပြင် ၎င်းအခန်းအတွင်း မူကြိုတက်နေသည့် အခြား ကလေးငယ် ၁၇ နှစ်ဦးသာမက အကြိုအပို့စောင့်နေသည့် ဆရာမနှင်းနု နှင့် အခန်းအတွင်း ဆရာမနှစ်ဦး စုစုပေါင်း ဆရာမသုံးဦးရှိသည်ဟုလည်း ဒေါ်ဥမ္မာလှိုင်က ပြောဆိုထားသည်။

အောင်ကြီးသည် ဆရာမများစောင့်ကြည့်နေသည့်ကြားက ကလေးငယ်အပေါ် လိင်အမြတ်ထုတ်ရန်မှာအလွန် စဉ်းစားဖွယ်ရာဖြစ်နေကြောင်း အဆိုပါကျောင်း၏ ကျောင်းအုပ်ဦးပညာက ပြောဆိုသည်။

ဆရာမ ဒေါ်နီလာအေးကလည်း အခင်းဖြစ်သည့်နေ့က Victoria သည် ၎င်းနှင့်အတူစာသင်ခန်းထဲတွင် အချိန် ပြည့်ရှိနေသည်ဟုလည်း ဆိုထားပြန်သည်။ ယင်းသို့ ကျောင်းတာဝန်ရှိသူများက ကျောင်းတွင်မဖြစ်ကြောင်း ပြောဆိုနေကြချိန်တွင် သတင်းမီဒီယာနှစ်ခုကအခင်းဖြစ်နေချိန်တွင် ယင်းကျောင်းအနီးမှတ်တမ်းတင်ထားသည် CCTV ရုပ်သံမှတ်တမ်းဖိုင်ကို ထုတ်ဖော်ပြသလာသည်။

ယင်းသတင်းဌာနနှစ်ခုလုံး၏ဖော်ပြချက်တွင် အောင်ကြီးသည် အင်္ကျီအဖြူ၊ ပုဆိုးအပြာနှင့် ဦးထုပ်ဆောင်းကာ ကျောင်းအတွင်းသို့ ၂၆ မိနစ်ကြာဝင်ရောက်ခဲ့သော်လည်း ဝင်ပေါက်အနီးတွင်သာ အချိန်ကြာကြာရှိနေခဲ့ ကြောင်းတင်ပြခဲ့ကြသည်။ထို့ကြောင့်ပင် အောင်ကြီးသည် ပြစ်မှုကျူးလွန်ရန်အချိန်ရခဲ့သလောဆိုသည့် မေးခွန်းထွက်လာသည်။

ယင်းသို့ ရဲတပ်ဖွဲ့ရှင်းလင်းချက်နှင့် ကျောင်းဘက်ကပြောဆိုချက်ကွဲလွဲမှု၊ သတင်းဌာနများက ဖော်ထုတ်ပြသည့် မှတ်တမ်းတွေ့ရှိချက်နှင့်ကွဲလွဲမှုများ ရှိလာပြီးနောက် ရဲတပ်ဖွဲ့အနေနှင့်ခိုင်မာသည့် သက်သေအထောက်အထားပြရန် တောင်းဆိုသံများ ပိုကျယ်လာသည်။

အောင်ကြီးသည် တရားခံအစစ်လော။

ကျောင်းကြီးကြပ်ရေးမှူး ဒေါ်ဥမ္မာလှိုင်၏ယာဉ်မောင်းအဖြစ် အလုပ်စဝင်သည့် မေလ ၁၆ ရက်နေ့တွင် Victoria သည် လိင်အမြတ်ထုတ်ခံခဲ့ရခြင်းဖြစ်သည်။ အဆိုပါနေ့တွင် အောင်ကြီးသည် ဒေါ်ဥမ္မာလှိုင်တို့မိသားစုကို အကြိုအပို့ကိစ္စအတွက် ၃ နာရီ ၁၂ မိနစ်တွင် ကျောင်းရှေ့သို့ရောက်လာခဲ့သည်။

ထို့နောက် ဒေါ်ဥမ္မာလှိုင်နှင့် သုံးမိနစ်ခန့်တွေ့ဆုံကြောင်း ဒေါ်ဥမ္မာလှိုင်က ပြောဆိုထားသည်။

၃ နာရီ မိနစ် ၂၀ တွင်လည်း ကျောင်းတံခါးပွင့်ခဲ့ပြီး အင်္ကျီအဖြူဝတ်ဆင်ထားသည့် လူတစ်ဦးထိုင်နေကြောင်း CCTV မှတ်တမ်းတွင် တွေ့ရှိနေရသည်။

ယင်းနောက်ပိုင်းတွင် ကျောင်းတံခါးပွင့်ခဲ့သည့်လေးကြိမ်လုံးတွင် အင်္ကျီအဖြူနှင့် လူတစ်ဦးထိုင်နေသည့်ကိုဆက်တိုက် မြင်တွေ့ခဲ့သည်။ ၃ နာရီ ၃၅ မိနစ်တွင် ကျောင်းကြီးကြပ်ရေးမှူး ဒေါ်ဥမ္မာလှိုင်ခင်ပွန်းဖြစ်သူ ရဲအရာရှိက ကားမောင်းလာပြီး အဆိုပါမူကြိုဆောင်ရှေ့တွင် ကားကိုရပ်ပြီးမှသာ အောင်ကြီးသည် ကျောင်းအဆောက်အအုံအတွင်းမှ ထွက်လာခဲ့သည်။

၃ နာရီ ၃၈ မိနစ်တွင် ကိုအောင်ကြီးသည် ရဲအရာရှိ၏ ကားဘယ်ဘက်တံခါးကိုဖွင့်ကာ တစ်စုံတစ်ရာပြုလုပ်ခဲ့ပြီး တံခါးပြန်ပိတ်ကာ ၎င်းနှုတ်ခမ်းနားကို ဘယ်ညာလက်များဖြင့် ပွတ်သပ်ကာ ကိုယ်ပိုင်အထက်တန်း ကျောင်းဘက်သို့ ထွက်လာခဲ့သည်။ ထိုအချိန်မှစ၍ အောင်ကြီးသည် မူကြိုဆောင်အတွင်းမှ အပြီးတိုင်ထွက်ခွာခဲ့ပြီဖြစ်သည်။ ထိုအချက်များသည် CCTV မှတ်တမ်းမှတစ်ဆင့် ရရှိသည့်အချက်များပင်။

Wisdom Hill ပုဂ္ဂလိက ကိုယ်ပိုင်အထက်တန်းကျောင်း မူကြိုစာသင်ခန်းဘက်သို့မြင်ရသည့် CCTV တွင် ကလေးများကို အကြိုအပို့လိုက်လုပ်ပေးနေသူ တစ်ဦးလည်းရှိနေသည်။ ဒေါ်ဥမ္မာလှိုင်နှင့်ဦးပညာတို့ကလည်း ကျောင်းလွှတ်ခါနီးအချိန်တွင် ကလေးများအကြိုအပို့အတွက် ကျောင်းဆရာမတစ်ဦးကို ကျောင်းစာသင်ခန်း အပေါက်ဝတွင်ဂျူတီစောင့်ခိုင်းကြောင်း ပြောဆိုထားသည်။ထိုဆရာမသည် ဒေါ်နှင်းနှင်းနုပင်။

ထို့အပြင် အောင်ကြီးကျောင်းသို့ရောက်ရှိနေချိန်သည် ကျောင်းဆင်းချိန်ဖြစ်သည့်အတွက် မူကြိုကလေးများကို အကြိုအပို့စောင့်ကြည့်ပေးသည့် ဆရာမနှင်းနုနှင့်အောင်ကြီး ထိုင်နေသည်ဆိုသည့်နေရာသည်လည်း ရှစ်ပေခန့်သာဝေးသည့် နေရာတွင်ရှိနေမည်ဖြစ်သည်။

၎င်းသည် အမှုတွင် အဓိကသက်သေတစ်ဦးလည်းဖြစ်နေသည်။ အဆိုပါနေရာတွင်ထိုင်နေသည့် အောင်ကြီးနောက်ကျောဘက်ကို မြင်တွေ့ရကြောင်း ဒေါ်နှင်းနှင်းနုက သတင်းဌာနတစ်ခုကို ပြောဆိုထားသည်။

ထို့ကြောင့် အောင်ကြီးသည် မူကြိုဆောင်အတွင်းရှိခဲ့သည့်အချိန်အတွင်း ရဲတပ်ဖွဲ့ကစွပ်စွဲထားသည့်အတိုင်း Victoria ကို လိင်အမြတ်ထုတ်နိုင်ခဲ့လားဆိုသည်မှာ မေးခွန်းထုတ်စရာပင်။

ကျောင်းဘက်ကတာဝန်ရှိသူများက အောင်ကြီးနှင့်ပတ်သက်၍ မီဒီယာများတွင် ဖြေကြားထားသည့်အတိုင်း ရဲတပ်ဖွဲ့ထံတွင် ထွက်ဆိုထားခဲ့သည်ဆိုပါက အောင်ကြီးကိုသံသယရှိသူအဖြစ် စွဲချက်တင်လျှင် မေးခွန်းထုတ်ဖွယ်ရာ ဖြစ်လာမည်ဖြစ်ကြောင်း ဥပဒေအကြံပေးဦးခင်မောင်မြင့်က ပြောဆိုသည်။

“သူတို့တွေက ရဲရှေ့မှာလည်း ဒီလိုမှန်မှန်ကန်ကန်ထွက်ခဲ့တယ်ဆိုရင် ရဲနဲ့ ဥပဒေရုံးတွေက ဘာကြောင့်သံသယတရားခံအဖြစ် တရားစွဲတင်တာလဲဆိုတာကို မေးရတော့မှာပေါ့” ဟု ၎င်းက ပြောဆိုသည်။

သို့သော် ဒုတိယရဲချုပ်ရဲဗိုလ်ချုပ်အောင်နိုင်သူက သက်သေအခိုင်အလုံဖြင့် တရားစွဲတင်ခဲ့ခြင်းဖြစ်ကြောင်း ပြောဆိုခဲ့သည်။

Victoria ၏ မိန်းမကိုယ်တွင်းတွေ့ရှိသည့် ဆေးစာပြန်ကြားချက်၊ တရားခံဟုယူဆရသူ၏ အောက်ခံဘောင်းဘီတွင်တွေ့ရှိသည့် ပြန်ကြားချက်၊ ကျောင်းအတွင်းသို့ အောင်ကြီးဝင်ရောက်ခဲ့သည့်အချက်၊ ကလေးငယ်က CCTV တွင် တွေ့ရှိသည့်လူတစ်ဦးကို “အဲဒါကိုကို” ဟု ပြောဆိုထားသည့် အချက်လေးချက်ဖြင့် အောင်ကြီးကို တရားစွဲတင်ခဲ့ခြင်းဖြစ်ကြောင်း ၎င်းကဆိုသည်။

အသက်သုံးနှစ်မပြည့်သေးသည့် နစ်နာသူ Victoria လေးသည်CCTV တွင် မှုန်ဝါးဝါးသာတွေ့ရသည့် အောင်ကြီးကို “အဲဒါကိုကို” ဟု ပြောဆိုချက်ကြောင့် ရဲတပ်ဖွဲ့ကအောင်ကြီးကို စစ်ဆေးကာသက်သေအချက် အလက်အခိုင်အလုံဖြင့် တရားစွဲတင်ခဲ့ခြင်းဖြစ်ကြောင်း ဒုတိယရဲချုပ်ကပြောဆိုသည်။

“ကလေးငယ်ကတော့ မုသားပြောမှာမဟုတ်ပါဘူး” ဟု ၎င်းကဆိုသည်။

ကလေးငယ်သည် လိမ်လည်မပြောနိုင်ဟုဆိုသော်လည်း မှုန်ဝါးဝါးသာတွေ့သည့်အောင်ကြီးကို ကျူးလွန်သူ ဟုတ် မဟုတ် အတည်ပြုနိုင်ရန်ခက်ခဲပြီး ကလေးငယ်ဖြစ်သဖြင့် တစ်ခါသာမြင်တွေ့ဖူးသူကို မှတ်မိနိုင်ရန်မှာလည်း မေးခွန်းထုတ်ဖွယ်ရာဖြစ်ကြောင်း ဝေဖန်သံများထွက်လာသေးသည်။

သို့သော် Victoria သည် ရဲတပ်ဖွဲ့ကစစ်ဆေးရာတွင် “ဆရာမနှင်းနုသိတယ်” ဟုလည်း ပြောဆိုထားသေးသည်။ ကလေးက ယင်းသို့ပြောထားသဖြင့် ဆရာမနှင်းနုကို စစ်ဆေးခြင်းနှင့်ပတ်သက်ပြီး မီဒီယာများ မေးခွန်းထုတ်မှုကို ဒုတိယရဲချုပ်က အောက်ပါအတိုင်းဖြေကြားသည်။

“ဆရာမနှင်းနှင်းနုကတော့ အဲဒါသူ့အပိုင်းပါ။ သူဖြေချင်လည်းဖြေမှာပေါ့။ကျွန်တော်တို့က မေးစရာရှိတာလည်း မေးပြီးသွားပြီ”

ဒုရဲချုပ်၏ ပြောကြားချက်သည် ဥပဒေနှင့်ညီညွတ်မှုမရှိကြောင်း၊ နှင်းနှင်းနုသည် ရဲတပ်ဖွဲ့ကမေးသည်ကို ဖြေဆိုရန်ငြင်းပယ်ပါက ပြစ်ဒဏ်ခံရနိုင်ကြောင်း ဦးခင်မောင်မြင့်က ပြောဆိုသည်။

ရာဇသတ်ကြီးဥပဒေပုဒ်မ ၁၇၉ တွင် မေးပိုင်ခွင့်ရှိသည့် ပြည်သူ့ဝန်ထမ်းက အမှန်ကိုထွက်ဆိုရန်မေးသည်ကို ငြင်းပယ်လျှင် အလုပ်မဲ့ထောင်ဒဏ် ခြောက်လ သို့မဟုတ် ငွေတစ်ထောင်ဖြစ်စေ ဒဏ်နှစ်ရပ်လုံးဖြစ်စေ ချမှတ်ရမည်ဟု ပြဋ္ဌာန်းထားသည်။

“ဘယ်လောက်စစ်ဆေးပြီးတော့ ဘယ်လောက်ပေါ်ပေါက်ခဲ့လဲ။ ဒါပြန်ကြည့်ဖို့လိုတာပေါ့။ သူသိတဲ့ အချက်အလက်တွေကို မဖြေဆိုခဲ့ဘူးဆိုရင် တရားရုံးကိုဦးတိုက်လျှောက်ထားပြီးတိုင်ရင် ပြစ်ဒဏ်ကျခံရနိုင်တယ်။ အဲဒီလိုကျခံနိုင်တာကို ဆရာမကိုပြောခဲ့သလား” ဟု ဦးခင်မောင်မြင့်က မေးခွန်းထုတ်သည်။

ဆရာမနှင်းနုသည် အောင်ကြီးနှင့်အနီးဆုံးရှိနေသူဖြစ်ပြီး အောင်ကြီးထိုင်နေသည်ကိုလည်း လှမ်းမြင်ခဲ့သူဖြစ်သည်။ မူကြိုကျောင်းစာသင်ခန်းဝတွင်စောင့်နေသည့် ဆရာမနှင်းနှင်းနုကို ရဲတပ်ဖွဲ့က ကိုးကြိမ်အထိ ခေါ်ယူစစ်ဆေးခဲ့ကြောင်းလည်း ကာယကံရှင်က ထုတ်ဖော်ပြောဆိုထားသည်။

လက်ရှိအမှုဖြစ်စဉ်တွင် ရဲတပ်ဖွဲ့လုပ်ဆောင်ချက်မှာ ကျိုးကြောင်းဆီလျော် မှုမရှိကြောင်းလည်း Victoria အမှု အမှုမှန်ပေါ်ပေါက်ရေးတက်ကြွလှုပ်ရှားသူ ကိုအောင်ထိုက်မင်းကပြောဆိုသည်။

“ဆိုလိုချင်တာက အောင်ကြီးဖြစ်စေ၊ ဘယ်သူပဲဖြစ်ဖြစ် တရားခံလို့ စွဲချက်တင်တယ်ဆိုရင် တရားခံဖြစ်ကြောင်းကို လုံလောက်အောင် အကြောင်းမပြနိုင်ဘူးလို့ ယူဆတယ်” ဟု ၎င်းကဆိုသည်။

DNA စစ်ချက်ချက်အပေါ်လည်း ဝေဖန်မှုများရှိနေသည်။

အခင်းဖြစ်နေ့က Victoria ဝတ်ဆင်ခဲ့သည့် ဘောင်းဘီကို မိခင်ကရေထဲစိမ်လိုက်ခြင်းကြောင့် DNA ကို အားနည်းသွားကြောင်း ဒုတိယရဲချုပ်က သမ္မတရုံးတွင်ပြုလုပ်သည့် သတင်းစာရှင်းလင်းပွဲတွင် ပြောဆိုသည်။

“ကလေးရဲ့ဘောင်းဘီကို သူ့အမေက အမှုမဲ့၊ အမှတ်မဲ့ ရေထဲကိုထည့်လိုက်တဲ့အခါ DNA ပိုင်းက ပျက်နေပါတယ်။ ကျွန်တော်တို့က ဒါကို (DNA) အားကိုးလို့မရဘူး။ စစ်လို့မဖြစ်နိုင်တော့ဘူး အဲဒါကြောင့်မို့ သက်ဆိုင်ရာ CE အပိုင်း ဓာတုဗေဒအပိုင်းနဲ့ စစ်တာပဲရှိပါတယ်” ဟု ၎င်းကပြောဆိုသည်။

သို့သော်လည်း Victoria ၏ မိန်းမကိုယ်တွင် သုက်ပိုးတွေ့သည်ဟု ၎င်းကဆိုသည်။ ယင်းသုတ်ပိုးသည် ပြစ်မှုကျူးလွန်သူက လက်ကိုမိမိဘောင်းဘီအတွင်းနှိုက်၍ အာသာဖြေပြီးကလေးငယ်ကို လက်ဖြင့်လိင်အမြတ်ထုတ်ရာမှ လက်တွင်သုတ်ပိုးကပ်ပါလာခြင်းလည်းဖြစ်နိုင်ကြောင်း ဒုတိယရဲချုပ်ကပြောဆိုထားသည်။

ယင်းသို့ဆိုသော်လည်း အောင်ကြီး DNA နှင့် Victoria လေး၏ ခန္ဓာကိုယ်အတွင်းတွေ့ရှိခဲ့သည် DNA တူညီမှု  ရှိမရှိကို ရဲချုပ်က ရှင်းရှင်းလင်းလင်းပြောဆိုခဲ့ခြင်းမရှိပေ။

DNA စစ်ဆေးရာတွင် ကျောင်းကြီးကြပ်ရေးမှူးဒေါ်ဥမ္မာလှိုင်၏သားနှစ်ဦးလည်း ပါဝင်ခဲ့သည်။ Facebookတွင် နာမည်ကြီးခဲ့သည့် “ကိုကိုနှစ်ယောက် လုပ်တာ” ဟု Victoria ပြောဆိုခဲ့သည့်အတွက် အမည်တူသည့် ဒေါ်ဥမ္မာလှိုင်၏သားနှစ်ဦးကို DNA စစ်ခဲ့ကြောင်း ဒုတိယရဲချုပ်ကပြောဆိုသည်။

ရဲတပ်ဖွဲ့က ကလေးငယ်ဘောင်းဘီသည် ရေစိမ်လိုက်ပြီဖြစ်သည့်အတွက် DNA ကို အားကိုး၍မရကြောင်း ပြောကြားထားသော်လည်း ဒေါ်ဥမ္မာလှိုင်၏သားနှစ်ယောက် DNA ကို စစ်ကာ၎င်းတို့နှစ်ဦးနှင့် DNA မတူကြောင်း ဒုတိယရဲချုပ်အောင်နိုင်သူက ပြောဆိုခဲ့သည်။ သို့သော် မည်သည့် DNA နှစ်ခုကို နှိုင်းယှဉ်စစ်ဆေးခဲ့သည်ကိုမူ ထုတ်ဖော်ပြောဆိုခြင်းမရှိခဲ့ပေ။

“သူတို့နဲ့လည်း လုံးဝမတူပါဘူး။ ဘာဖြစ်လို့လဲဆိုတော့ သူတို့သည် အဲဒီအချိန် (အခင်းဖြစ်တဲ့နေ့) မှာလည်း အဲဒီကို (Wisdom Hill မူကြိုစာသင်ခန်း) မရောက်ပါဘူး။ ကိုကိုဆိုတဲ့ နာမည်တူလို့သာ စိစစ်လိုက်ရတာဖြစ်ပါတယ်” ဟု ၎င်းကဖြေရှင်းချက်ပေးခဲ့သည်။

အဆိုပါအမှုတွင် DNA ဆေးစစ်ချက်ကိုလည်း ရဲတပ်ဖွဲ့ကရှင်းရှင်းလင်းလင်းပြောဆိုထားခြင်းမရှိပေ။

အောင်ကြီးကို ပထမဖမ်းဆီးစစ်ဆေးပြီးနောက် ဇွန်လ၂၄ ရက်နေ့တွင် DNA မတူဟုဆိုကာ လွှတ်ပေးခဲ့ကြောင်း အောင်ကြီးမိခင်က ပြောဆိုသည်။ ထို့နောက် ၁၀ ရက်အကြာတွင် အောင်ကြီးကိုဖမ်းဆီးကာ တရား စွဲတင်ခဲ့ခြင်းဖြစ်သည်။

လက်ရှိအချိန်တွင် Victoria အမှုကိစ္စနှင့်ပတ်သက်ပြီး တရားစွဲခံထားရသည်မှာ အောင်ကြီးအပြင်ရဲတပ်ဖွဲ့က ၎င်းဂုဏ်သိက္ခာကို ထိခိုက်စေသည်ဟုဆိုကာ ကျန်းမာရေးနှင့်အားကစားဝန်ကြီးဌာန ဒုတိယညွှန်ကြားရေးမှူး ဒေါက်တာဝင်းကိုကိုသိန်း(သက္ကမိုးညို)ကိုပါ အီလက်ထရောနစ်ဆက်သွယ်ဆောင်ရွက်ရေး ဥပဒေ ပုဒ်မ ၃၄ (ဃ) (လူတစ်ဦး၊ အဖွဲ့အစည်းတစ်ခုခုကို ဂုဏ်သိက္ခာကျဆင်းစေရန် အီလက်ထရောနစ်နည်းပညာဖြင့် ပြုလုပ်ထားသည့်အချက်အလက်ကို ဖြန့်ချိခြင်း) ဖြင့် အမှုဖွင့်ထားပြီး ရဲစခန်းကကျပ် သိန်း ၁၀၀ ဖြင့် အာမခံပေးထားသည်။

အဆိုပါပုဒ်မသည် ထောင်ဒဏ်ငါးနှစ်အထိ ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရနိုင်ကြောင်း ပြဋ္ဌာန်းထားသည်။

ရဲတပ်ဖွဲ့သည့် Victoria အမှုကိုဖော်ထုတ်မှု တစ်လကျော်အထိကြာခဲ့သော်လည်း ပြည်သူများလက်ခံနိုင်ဖွယ်ရှိသည့်ဖော်ထုတ်မှုများကို မလုပ်နိုင်သေးဟုဝေဖန်ခံနေရသည်။ ယင်းအခြေအနေတွင် အမှုမှန်ပေါ်ပေါက်ရေး ကြိုးပမ်းနေသူတစ်ဦးကို ဖမ်းဆီးသဖြင့်လည်း ဝေဖန်မှုများဆက်လက်မြင့်တက်လာသည်။

“ဒီကိစ္စကို ဖော်ထုတ်တဲ့သူတွေကိုတောင် ပြန်ပြီးခြိမ်းခြောက်နေသလို ဖြစ်နေတယ်။ ရဲတပ်ဖွဲ့ဂုဏ်သိက္ခာ ညှိုးနွမ်းစေတယ်ဆိုပြီးတော့ အမှုဖွင့်ပေမယ့် ရဲတပ်ဖွဲ့ရဲ့လုပ်ရပ်တွေကလည်း ဂုဏ်သိက္ခာရှိဖို့လိုတာပေါ့” ဟု ကို အောင်ထိုက်မင်းက ပြောဆိုသည်။

 

အောင်ဖြိုးဦး

You may also like...

Leave a Reply

Your email address will not be published. Required fields are marked *