ဖွဲ့စည်းပုံပြင်ရေး ပူးပေါင်းကော်မတီအစီရင်ခံစာပါ အကြံပြုချက် ၁၀ ချက်မှာ အခြေခံဥပဒေကို ဥပဒေနှင့်အညီ ပြင်ရန်သာအကြံပြုထားခြင်းဟု ကြံ့ခိုင်ရေးပါတီကြေညာ

ရန်ကုန်၊ ဇူလိုင် ၁၅

၂၀၀၈ ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီအစီရင်ခံစာတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ အကြံပြုချက် ၁၀ ချက်ပါဝင်သော်လည်း အဆိုပါအကြံပြုချက်များမှာ ဖွဲ့စည်းပုံအခြေခံဥပဒေကို အခန်း(၁၂) ဖွဲ့စည်းပုံအခြေခံဥပဒေပြင်ဆင်ရေး နည်းလမ်းများအတိုင်း ပြင်ဆင်ရန်သာဖြစ်ကြောင်း ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီက ဇူလိုင်လ ၁၅ ရက်တွင် ကြေညာသည်။

ဇူလိုင်လ ၁၅ ရက်ကပြုလုပ်သည့် ပြည်ထောင်စုလွှတ်တော်အစည်းအဝေးတွင် ဖွဲ့စည်းပုံအခြေခံဥပဒေ ပြင်ဆင်ရေးပူးပေါင်းကော်မတီက ဖွဲ့စည်းပုံပြင်ဆင်ရေးအစီရင်ခံစာတစ်ရပ်ကို တင်သွင်းခဲ့ပြီး ယင်းအစီရင်ခံ စာတွင် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၏ အကြံပြုချက် ၁၀ ချက်ကို ထည့်သွင်း ဖော်ပြထားခြင်း ဖြစ်သည်။

အဆိုပါအစီရင်ခံစာတွင် ကြံ့ခိုင်ရေးပါတီသည် အခြေခံဥပဒေ အခန်း(၅)အုပ်ချုပ်ရေးကဏ္ဍအတွက် ၈ ချက်၊ အခန်း(၆) တရားစီရင်ရေးကဏ္ဍအတွက် တစ်ချက်၊နှင့် အခန်း (၉) ရွေးကောက်တင်မြှောက်ခြင်းကဏ္ဍအတွက် တစ်ချက် စုစုပေါင်း ၁၀ ချက် အကြံပြုထားကြောင်း ဖော်ပြထားသည်။

ကြံ့ခိုင်ရေးပါတီ ဗဟိုအလုပ်အမှုဆောင် ဒေါက်တာနန္ဒာလှမြင့်ကမူ ကြံ့ခိုင်ရေးပါတီသည် ဖွဲ့စည်းပုံအခြေခံဥပဒေပြင်ဆင်ရေးပူးပေါင်းကော်မတီ(၄၅ ဦးကော်မတီ)စတင်ဖွဲ့စည်းစဉ်ကပင် အခြေခံဥပဒေနှင့်မညီသောကြောင့် ကန့်ကွက်သော်လည်း ပြည်ထောင်စုလွှတ်တော်က အဆိုပါကော်မတီကို အတည်ပြုသည့်အခါတွင်မူ လွှတ်တော်၏ဆုံးဖြတ်ချက်ကို လေးစားသောအားဖြင့် ပါဝင်ခဲ့ခြင်းသာဖြစ်ကြောင်း The Voice Journal သို့ မှတ်ချက်ပြုသည်။

“၄၅ ဦးကော်မတီကို ကျွန်တော်တို့က ကန့်ကွက်ထားတာဖြစ်တဲ့အတွက် အဲဒီအပေါ်မှာ ဝင်ရောက်ဆွေးနွေးထားတာ လုံးဝမရှိဘူး။ဒါက ကျွန်တော်တို့ရဲ့ မူဝါဒပဲ”ဟု ၎င်းကဆိုသည်။

တပ်မတော်သည်လည်း အဆိုပါသဘောဖြင့်သာ ဖွဲ့စည်းပုံအခြေခံဥပဒေပြင်ဆင်ရေးပူးပေါင်းကော်မတီတွင် အဖွဲ့ဝင်အဖြစ်ပါဝင်ခဲ့ပြီး အကြံပြုခဲ့ခြင်းမရှိကြောင်း ဖွဲ့စည်းပုံအခြေခံဥပဒေပြင်ဆင်ရေးပူးပေါင်းကော်မတီ အတွင်းရေးမှူး အမျိုးသားလွှတ်တော်ကိုယ်စားလှယ် ဒေါက်တာမြတ်ဉာဏစိုးက ပြည်ထောင်စုလွှတ်တော်တွင် ပြောကြားသည်။

ပြည်ထောင်စုလွှတ်တော်သို့ ဇူလိုင်လ ၁၅ ရက်က တင်ပြခဲ့သော ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီအစီရင်ခံစာကို လွှတ်တော်က ဆွေးနွေးအတည်ပြုပြီးနောက် ယင်းကော်မတီသည် ဖွဲ့စည်းပုံအခြေခံဥပဒေပြင်ဆင်ရေးဥပဒေမူကြမ်းတစ်ရပ်ကို ဆက်လက်ရေးဆွဲရမည်ဖြစ်ကြောင်း အဆိုပါကော်မတီ၏ သဘောထားမှတ်ချက်အစီရင်ခံစာ အပိုဒ် ၂၅ တွင် ဖော်ပြထားသည်။

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီက အစီရင်ခံစာ အပိုဒ် ၂၅ ဖော်ပြချက်သည်လည်း အခြေခံဥပဒေပြဌာန်းချက်နှင့်ကိုက်ညီမှုမရှိကြောင်း၊ ၎င်းတို့ပါတီသည် အခြေခံဥပဒေ အခန်း (၁၂) အခြေခံဥပဒေပြင်ဆင်ရေးနည်းလမ်းများအတိုင်းသာ ဆက်လက်ဆောင်ရွက်သွားမည်ဖြစ်ကြောင်း ကြေညာသည်။

You may also like...

Leave a Reply

Your email address will not be published. Required fields are marked *