ဘာသာပြန်စာပေအမြှင့် ပညာအမြင့် နိုင်ငံအမြင့်

မြန်မာ့ပညာရေးကို ဆွဲတင်ကြမည့်သူများ မျက်စိမှောက်နေသည့်နည်းလမ်းမှာ ဘာသာပြန်စာပေဖြစ်သည်။

ဘာသာပြန်စာပေသည် Formal Education သမားရိုးကျကျောင်းပညာရေး အပြင်ဘက်တွင်ရှိသော အလုပ်ခွင်ထဲမှသူများ စဉ်ဆက်မပြတ် ပညာရရေးအတွက် အရေးကြီးသည်။ အလုပ်ခွင်တွင်း ရောက်နေသူများသည် နယ်ပယ်အသီးသီးတွင် ဦးဆောင်ဆုံးဖြတ်ချက်ပေးနေသူများဖြစ်သည်။ ထိုသူများသည် ယနေ့မြန်မာ့ကံကြမ္မာကို အဆုံးအဖြတ်ပေးနေသူများဖြစ်ရာ သူတို့ ခေတ်မီအသိအမြင်ပညာများ အချိန်နှင့်အမျှ ဖြည့်ဆည်းနိုင်မှ မြန်မာသည် အရှိန်ပြင်းပြင်းဖြင့် ရှေ့ဆက်သွားနိုင်မည်။

တစ်ဖန် ခေါင်းဆောင်နေရာရောက်နေသူ သမားရိုးကျပညာရေးအပြင်ဘက်မှ ပုဂ္ဂိုလ်များသည် ကျောင်းသို့ပြန်ရန် အခက်အခဲများစွာရှိသည်။ သမားရိုးကျပညာရေးစနစ်ကောင်းအောင် ဆောင်ရွက်ချက်များသည် ထိုပညာရေးအတွင်း ပြန်မဝင်နိုင်သူများအတွက် အကျိုးခံစားရမှုနည်းသည်။ ဘာသာပြန်စာပေများ တိုးတက်ထွန်းကားမှသာ အိမ်ထောင်ဦးစီးများ၊ အစိုးရဝန်ထမ်းများ၊ နိုင်ငံရေးသမားများ၊ လယ်သမားကြီးများသည် ထိုစာပေများအကျိုးဖြင့် မှန်ကန်သောဆုံးဖြတ်ချက်များ ချနိုင်မည်။

အဘယ်ကြောင့် ဘာသာပြန်စာပေကို အဓိကထား ပြောနေရသနည်း။ ကမ္ဘာတွင် နေ့စဉ်နှင့်အမျှထွက်နေသော ပညာအသစ်တို့သည် အင်္ဂလိပ်ဘာသာနှင့်သာ အများစုထွက်သည်။ အင်္ဂလိပ်ဘာသာဖြင့်ထွက်သောစာများကို ယနေ့လူလတ်ပိုင်း၊ လူကြီးပိုင်း အများအပြား လက်လှမ်းမမီ။ ဘာသာပြန်နိုင်မှ အများစု လက်လှမ်းမီမည်။

ဘာသာပြန်စာပေများကို ပုဂ္ဂလိကနည်းနှင့် လှုပ်ရှားဆောင်ရွက်နေကြသော်လည်း အစိုးရကသာအားပေးလျှင် ယခုထက် ပိုတိုးတက်မည်။ ဘာသာပြန်စာပေအားကောင်းလျှင် ခေါင်းဆောင်နေရာရောက်သူများ အသိပညာ အချိန်နှင့်အမျှ တိုးတက်သည့်အတွက် သူတို့၏ ဆုံးဖြတ်ချက်များ အရည်အသွေး ချက်ချင်းတိုးတက်မည်။ ‘ခုစိုက် ခုစား’။

ဘာသာပြန်စာပေဆိုသည့်အတွက် စာအုပ်များဖြစ်ရမည်ဟုလည်း မဆိုလိုပါ။ Online ပေါ်တွင် ဖြန့်ဖြူးနိုင်သည့် Digital Content များလည်း ဖြစ်နိုင်သည်။

ဂျပန်၊ ထိုင်းကဲ့သို့ မြန်မာထက် များစွာဖွံ့ဖြိုးတိုးတက်သည့် နိုင်ငံများတွင် ကမ္ဘာကျော်စာစောင်များ၊ စာအုပ်များကို ထွက်သည်နှင့် ဘာသာပြန်ဖတ်ရှုနိုင်အောင် ဆောင်ရွက်ထားသည်ကိုကြည့်လျှင် ဘာသာပြန်စာပေ၏ ပညာရေးနှင့် နိုင်ငံကြီးပွားရေးပေါ် အကျိုးပြုနိုင်စွမ်းကို မြင်နိုင်သည်။

ဘာသာပြန်စာပေတိုးတက်ရေးအတွက် အသုံးစရိတ်သီးသန့်မရှိလျှင် ပညာရေးကို မြှင့်တင်သည့် စာပေဖြစ်သည့်အတွက် ပညာရေးအသုံးစရိတ်တွင်းမှ ယူသုံးသင့်သည်။

ဘာသာပြန်စာပေကို မြှင့်လျှင် ပညာမြင့်မည်၊ နိုင်ငံမြင့်မည်။ 

 

အယ်ဒီတာ
၁၈.၇.၂၀၁၉

You may also like...

Leave a Reply

Your email address will not be published. Required fields are marked *