၂၁ ရာစုအတွက် သင်ခန်းစာ ၂၁ ခု

ကမ္ဘာကျော်စာရေးဆရာ Yuval Noah Harari ၏ အရောင်းရဆုံးစာအုပ်စာရင်းဝင်

21 Lessons for the 21st စာအုပ်ကို ဘာသာပြန်ဆိုဖော်ပြပါသည်။

သင်ခန်းစာ (၅) အသိုက်အဝန်း

အွန်လိုင်းနှင့် အော့ဖ်လိုင်း

များမကြာမီနှစ်များအတွင်းက ဖေ့စ်ဘုတ်သည်အံ့အားသင့်ဖွယ်အောင်မြင်မှုရရှိခဲ့ပြီး လက်ရှိတွင်အွန်လိုင်း ဖေ့စ်ဘုတ်သုံးစွဲသူသန်း နှစ်ထောင်ကျော်ရှိသည်။ သို့သော်ဖေ့စ်ဘုတ်အနေနှင့်လူ့အသိုက်အဝန်းများ ပြန်လည်တည်ဆောက်ရန်ဆိုသည့်သူ၏ရည်မှန်းချက်အသစ်ကိုအကောင်အထည်ဖော်ရန်မူ အွန်လိုင်းနှင့် အွန်လိုင်းပြင်ပကမ္ဘာ (အော့ဖ်လိုင်း) နှစ်ခု  ရင်ကြားစေ့မရအောင်ကွာဟနေမှုကို ချိတ်ဆက်ပေးရန်လိုပေမည်။ လူအုပ်စုအသိုက်အဝန်းတစ်ခုကို အွန်လိုင်းတွင်စတင်စုစည်းပေါ်ပေါက်လာစေနိုင်သော်လည်း ယင်းအသိုက်အဝန်းအမှန်တကယ် စည်ပင်ဝပြောရန်မှာမူအွန်လိုင်းပြင်ပကမ္ဘာတွင်လည်း အခြေချ၊ အမြစ်တွယ်ရန်လိုအပ်ပါသည်။ တစ်ချိန်ချိန်တွင်နိုင်ငံတစ်နိုင်ငံမှ  အာဏာရှင်တစ်ယောက်ကသူ့နိုင်ငံတွင် ဖေ့စ်ဘုတ်ကိုပိတ်လိုက်ပါပြီ ဆိုကြပါစို့။ သို့တည်းမဟုတ် အင်တာနက်တစ်ခုလုံးကိုပိတ်လိုက်ပြီဆိုကြပါစို့။ အွန်လိုင်းတွင်စုစည်းထားသောအုပ်စုအသိုက်အဝန်းများအနေနှင့် အငွေ့ပျံပျောက်ကွယ်သွားမည်လော၊ သို့တည်းမဟုတ်ပြန်လည်စုစည်းကာတွန်းလှန်ကြမည်လော။ သူတို့အနေနှင့်အွန်လိုင်းဆက်သွယ်မှုမရှိဘဲ ဆန္ဒပြပွဲဖော်ဆောင်နိုင်ပါမည်လော။

အွန်လိုင်းအသိုက်အဝန်းများမှာအွန်လိုင်းပြင်ပကမ္ဘာတွင်လည်း  အသိုက်အဝန်းများဖြစ်လာစေရန်ကူညီကြောင်း ဇူကာဘတ်က၂၀၁၇  ဖေဖော်ဝါရီတွင် ထုတ်ပြန်သည့်ကြေညာချက်တစ်ခုတွင်ရှင်းပြခဲ့သည်။ ဤအချက်မှာ တစ်ခါတလေတော့မှန်မည်ပေါ့။ သို့သော်များသောအားဖြင့် အွန်လိုင်းသုံးစွဲခြင်းမှာအွန်လိုင်းပြင်ပကမ္ဘာတွင် နေထိုင်ခြင်းကိုထိခိုက်စေပြီး အွန်လိုင်းသုံးစွဲခြင်းနှင့်ပြင်ပကမ္ဘာတွင် နေထိုင်ခြင်းမှာသဘောသဘာဝအားဖြင့် ကွာခြားချက်ရှိပါသည်။ ပြင်ပကမ္ဘာရှိအသိုက်အဝန်းများ (Physical Communities) မှာအွန်လိုင်း အသိုက်အဝန်းများ (Virtual Communities)က မယှဉ်နိုင်သောလေးနက်မှုရှိပါသည်။ ထိုလေးနက်မှုမှာ အွန်လိုင်းအသိုက်အဝန်းများက အနည်းဆုံးအားဖြင့်မဝေးလှသော အနာဂတ်တွင်ယှဉ်နိုင်ဦးမည်မဟုတ်ပါ။ ကျွန်တော့်အနေနှင့်နေမကောင်းဖြစ်ပြီး အစ္စရေးရှိကျွန်တော့်အိမ်တွင်ပက်လက်လှန်နေရပါက  ကယ်လီဖိုးနီးယားပြည်နယ်ရှိကျွန်တော့် အွန်လိုင်းသူငယ်ချင်းများမှာ စကားတော့လှမ်းပြောနိုင်ပါမည်။ သို့သော် ဆန်ပြုတ် သို့မဟုတ် လက်ဖက်ရည်တော့လာတိုက်နိုင်မည်မဟုတ်ချေ။ 

လူသားများတွင်ခန္ဓာကိုယ်ရှိပါသည်။ ပြီးခဲ့သောရာစုနှစ်တွင်  နည်းပညာကကျွန်ုပ်တို့ကိုမိမိခန္ဓာကိုယ်မှ အဝေးသို့ရောက်အောင်လုပ်လာပါသည်။ ကျွန်ုပ်တို့အနေနှင့်ကျွန်ုပ်တို့ခံစားသိရှိနေသော အနံ့၊ ခံစား သိရှိနေသောအရသာကို အာရုံစိုက်နိုင်စွမ်းဆုံးရှုံးလာနေပါသည်။ ထိုသို့အာရုံပြုရမည့်အစား စမတ်ဖုန်းများ၊ ကွန်ပျူတာများကို ခေါင်းမဖော်စတမ်းသုံးနေကြပါသည်။ ကျွန်ုပ်တို့အနေနှင့် လမ်းထဲဘာဖြစ်နေသည်ဆိုတာ ထက် ဖေ့စ်ဘုတ်ထဲ၊ အင်တာနက်ထဲ ဘာဖြစ်နေသည်ကိုပိုပြီးစိတ်ဝင်စားနေကြပါသည်။ ဆွစ်ဇာလန်က ကျွန်တော့်တူကိုစကားလှမ်းပြောဖို့က  ကျွန်တော့်ယောက်ျားကိုမနက်စာစားရင်းစကားပြောဖို့ထက်ပိုလွယ်ပါ သည်။ ဘာလို့လဲဆိုတော့ကျွန်တော့်ယောက်ျားက ကျွန်တော့်ကိုမကြည့်ဘဲဖုန်းထိုင်ပွတ်နေသောကြောင့် ဖြစ်ပါသည်။

လွန်ခဲ့သောအတိတ်တုန်းက လူသားများမှာဤကဲ့သို့ သတိလက်လွတ်နေလို့မရပေ။ ရှေးခေတ် အမဲလိုက်လူသားများမှာ အမြဲတမ်းဂရုပြု၊ အာရုံစိုက်၍နေရသည်။ တောထဲတွင်မှိုရှာထွက်နေသည်ဆိုပါက  သူတို့အနေနှင့်မြေပြင်မှာထွက်နေသော မှိုဖြစ်နိုင်သည့်အဖုအလုံးကိုအာရုံစိုက်ရှာရသည်။ မြက်ခင်းပြင်ထဲမှ နည်းနည်းလေးလှုပ်လိုက်လျှင်ပင် မြွေများဖြစ်နေမလားလို့နားစိုက်ရသည်။ စားလို့ရသည့်မှိုတွေ့ပါကလည်း  သူတို့အနေနှင့်သေချာအာရုံစိုက်ပြီး အဆိပ်ရှိသည့်မျိုးရင်းနီးစပ်မှိုနှင့် မမှားအောင်ဂရုစိုက်ပြီးစားရသည်။ ယနေ့ခေတ်ကြွယ်ဝသည့် လူ့အဖွဲ့အစည်းများအနေနှင့်မူ ထိုကဲ့သို့သတိကြပ်ကြပ်ထားနေစရာမလိုပေ။  ဆူပါမားကက်ထဲတွင် မတ်ဆေ့ခ်ျပို့ရင်းကုန်တန်းတွေထဲလမ်းလျှောက်လို့ရသလို ကျန်းမာရေးအာဏာပိုင်များ စစ်ဆေးကြပ်မတ်ပြီးဖြစ်သည့်  ဟင်းလျာပေါင်းသောင်းခြောက်ထောင်ကိုဝယ်လို့ရသည်။ သို့သော်  ဘာဝယ်လာသည်ဖြစ်ပါစေ၊ ကျွန်ုပ်တို့အနေနှင့်တကယ့်အရသာကို  အာရုံစိုက်မခံစားဘဲ အီးမေးလ်စစ်ရင်းဖြစ်စေ၊ တီဗီကြည့်ရင်းဖြစ်စေ ဖန်သားမျက်နှာပြင်တစ်ခုခုကိုကြည့်ရင်း ခပ်သုတ်သုတ်သာ စားကောင်းစားကြမည်ဖြစ်လေသည်။

ဇူကာဘတ်က ဖေ့စ်ဘုတ်အနေနှင့် ‘စာဖတ်သူတို့၏တွေ့ကြုံခံစားရမှုကို အခြားသူများနှင့်မျှဝေပေးနိုင်စွမ်းကို တိုးတက်စေနိုင်သည့် နည်းလမ်းများကို ကောင်းသထက်ကောင်းအောင်ဆက်လက်ဆောင်ရွက်ရန်’ သန္နိဋ္ဌာန်ချထားသည်ဟု ဆိုလေသည်။ သို့သော်တကယ်တမ်းတွင်  လူများလိုအပ်နေသည်မှာမိမိ ကိုယ်တိုင်တွေ့ကြုံခံစားရမှုများကို မိမိနှင့်ပြန်လည်ဆက်စပ်နိုင်သည့် နည်းလမ်းကိရိယာများလိုအပ်ခြင်းဖြစ် သည်။ ‘အခြားသူများနှင့်မိမိတွေ့ကြုံခံစားရမှုများကိုမျှဝေခြင်း’ ဟုဆိုပြီး လူများအနေနှင့်အခြားသူများ ဘယ်လိုထင်သလဲဆိုသည့် အထင်အပေါ် မိမိဘယ်လိုခံစားရသလဲဆိုသည်ကိုအာရုံစိုက်လာရန် ဖေ့စ်ဘုတ်က  အားပေးနေခြင်းဖြစ်သည်။ တစ်ခုခုစိတ်ဝင်စားစရာကောင်းသည့်အဖြစ်တစ်ခုဖြစ်ပွားပါက ဖေ့စ်ဘုတ်သုံးစွဲသူများမှာမသိလိုက်မသိဘာသာပင်  သူတို့၏စမတ်ဖုန်းလေးကိုထုတ်ပြီး ဓာတ်ပုံရိုက် ဖေ့စ်ဘုတ်ပေါ်တင်ကာ လိုက်ခ် (Like) ထိုင်စောင့်နေသည့်အဖြစ်မျိုးရောက်လာသည်။  ထိုသို့ဖြစ်လာသောအခါ သူတို့အနေနှင့် မိမိဘယ်လိုခံစားရသလဲဆိုသည်ကို အာရုံမစိုက်တော့သလောက်ဖြစ်လာသည်။ ဖြစ်လာသည်မှာဖေ့စ်ဘုတ်ပေါ်မိမိတင်လိုက်သည့်အပေါ် သူများတွေဘယ်လိုတုံ့ပြန်သလဲဆိုသည့် တုံ့ပြန်မှုတွေက မိမိဘယ်လိုခံစားရတယ်ဆိုတာကိုတဖြည်းဖြည်းတိုးပြီး ဆုံးဖြတ်ပြဋ္ဌာန်းလာတာမျိုးဖြစ်သည်။

လူအများအနေနှင့်သူတို့၏ ခန္ဓာကိုယ်၊ အာရုံခံစားမှုများ၊ ထိတွေ့ကိုင်တွယ်လို့ရသည့် ပတ်ဝန်းကျင်မှ ကင်းကွာလာသောအခါ သီးခြားဖြစ်လာသလိုခံစားရပြီး ဘယ်ရောက်လို့ရောက်မှန်းမသိသည့်ခံစားချက်မျိုး ပိုပြီးကြုံလာရနိုင်သည်။ ပညာရှိကြီးများကထိုကဲ့သို့ သီးခြားဖြစ်လာသည့်ခံစားချက်ကိုဘာသာရေးနှင့် အမျိုးသားရေးစည်းလုံးမှုများ  ကျဆင်းလာသည့်အဖြစ်အပေါ်အပြစ်တင်ကြသည်။  သို့သော်တကယ်တမ်းတွင် မိမိခန္ဓာကိုယ်နှင့်ကင်းကွာလာသည့်အဖြစ်မှာ ပိုအရေးကြီးလေသည်။ လူသားများအနေနှင့် နှစ်သန်းပေါင်းများစွာ ဘာသာရေးများ၊ အမျိုးသားနိုင်ငံတော်များမရှိဘဲ နေထိုင်ခဲ့ကြလေသည်။  သို့ဖြစ်ရာ ၂၁ ရာစုတွင်လည်း ဒီဘာသာရေး၊ အမျိုးသားရေးများမရှိဘဲ  ပျော်ရွှင်စွာနေထိုင်ကောင်း နေထိုင်နိုင်မည် ဖြစ်လေသည်။ သို့သော် သူတို့အနေနှင့်သူတို့ခန္ဓာကိုယ်နှင့် ကင်းကွာနေရပါက ပျော်ရွှင်စွာနေထိုင်နိုင်မည် မဟုတ်ပေ။ စာဖတ်သူအနေနှင့်မိမိခန္ဓာကိုယ်နှင့် သက်တောင့်သက်သာရှိမနေပါက ကမ္ဘာကြီးတွင်နေရသည်မှာလည်း သက်တောင့်သက်သာ ဖြစ်နေမည်မဟုတ်ပေ။

ယခုထက်တိုင် ဖေ့စ်ဘုတ်ပိုင်သည့် စီးပွားရေးမော်ဒယ်လ်ပုံစံမှာ  လူအများကိုအွန်လိုင်းပေါ်တွင် အချိန်ပိုပို ပြီးနေအောင်အားပေးသည့်  ပုံစံမျိုးဖြစ်သည်။ လူအများအွန်လိုင်းပြင်ပကမ္ဘာ အော့ဖ်လိုင်းတွင် နေထိုင်လုပ်ဆောင်ရန်အချိန်နှင့်ခွန်အားနည်းသွားလျှင်နည်းသွားပါစေ အွန်လိုင်းကိုပိုသုံးရန် အားပေးခြင်းဖြစ်သည်။ လူအများအွန်လိုင်းကို အမှန်တကယ်လိုအပ်သည့်အခါမှသာသုံးစွဲစေပြီး ၎င်းတို့၏  ပတ်ဝန်းကျင်၊ ခန္ဓာကိုယ်နှင့် အာရုံခံစားမှုများကိုပိုအလေးပေးစေမည့် မော်ဒယ်လ်အသစ်မျိုးကို ဖေ့စ်ဘုတ်က ဖန်တီးနိုင်ပါမည်လော။  ထိုကဲ့သို့သောမော်ဒယ်လ်မျိုးကို ရှယ်ယာရှင်များကဘယ်လိုထင်ကြမည်နည်း။ (ထိုကဲ့သို့သော မော်ဒယ်လ်မျိုး၏ စံပုံစံကိုမကြာသေးမီက  ဂူဂယ်လ်ဝန်ထမ်းဟောင်းတစ်ဦးဖြစ်ပြီး နည်းပညာဆိုင်ရာ ဒဿနတွေးခေါ်ရှင်တစ်ဦးဖြစ်သူ ထရစ်စတန်ဟဲရစ်ကအကြံပြုတင်ပြခဲ့သည်။ သူက ဆိုရှယ်မီဒီယာသုံးစွဲမှုကို တိုင်းထွာစရာနည်းလမ်းအသစ်တစ်ခုအဖြစ်  ‘အချိန်ကုန်ရကျိုးနပ်မှု’ (time well spent) ကိုအဆိုပြုခဲ့သည်။)

အွန်လိုင်းဆက်ဆံနှီးနှောမှုများ၏ အားနည်းချက်များကလူမှုရေး တစ်ဖက်စွန်းနင်းရောက်လာမှု (SocialPolarization) ကိုဖြေရှင်းရန် ဇူကာဘတ်၏အဆိုပြုချက်ကိုလည်းယုတ်လျော့စေသည်။ လူအများကို  ချိတ်ဆက်ပေးပြီး မတူညီသောစဉ်းစားချက်များကို ဖော်ပြပေးရုံနှင့်လူမှုရေးကွာဟချက်များကို လျော့ပါးစေမည်မဟုတ်။ အဘယ့်ကြောင့်ဆိုသော် ‘လူအများကို ၎င်းတို့စဉ်းစားချက်နှင့်မတူညီသော အခြား ရှုထောင့်မှကြည့်သည့်ဆောင်းပါးများကိုပြခြင်းက တစ်ဖက်စောင်းနင်း ဖြစ်မှုကိုပိုဆိုးစေသည်။ အကြောင်းမှာ အခြားရှုထောင့်အမြင်များကို  တစိမ်းအမြင်များအဖြစ်ရှုမြင်စေသောကြောင့် ဖြစ်သည်’ ဟု ဇူကာဘတ် ပြောဆိုချက်မှာမှန်ကန်ပါသည်။ ဇူကာဘတ်ကအကြံပြုသည်မှာ ထိုသို့မတူညီသည့် အမြင်များပြမည့်အစား “လူတွေကိုတစ်ယောက်နဲ့တစ်ယောက် လူပုဂ္ဂိုလ်တစ်ဦးအဖြစ်အပြည့်အဝသိကျွမ်းလာစေဖို့ လိုအပ်ပါတယ်။  တစ်ဦးရဲ့ထင်မြင်ယူဆချက်ကိုပဲ အွန်လိုင်းမှာမြင်ရမယ့်အစား ဒီပုဂ္ဂိုလ်က ဘယ်လိုလူမျိုးဖြစ်တယ်ဆိုတာ သိလာခြင်းအားဖြင့် ဆွေးနွေးငြင်းခုံမှုတွေကိုတိုးတက်လာဖို့ အကောင်းဆုံးနည်းလမ်းတွေရလာမှာဖြစ်ပါတယ်။  လူတစ်ဦးနဲ့တစ်ဦးဒီလို အပြည့်အဝသိလာစေဖို့ဆိုတဲ့ကိစ္စကို ဆောင်ရွက်ဖို့အတွက် ဖေ့စ်ဘုတ်ကလွဲရင် ဘယ်သူမှမလုပ်နိုင်လောက်တဲ့  နေရာမျိုးမှာရှိနေပါတယ်။ ကျွန်တော်တို့အနေနဲ့လူတွေကို တစ်ဦးနဲ့တစ်ဦး တူညီနိုင်တဲ့ကိစ္စတွေဖြစ်တဲ့ အားကစားအသင်းတွေ၊ တီဗီအစီအစဉ်တွေ၊ ဝါသနာတွေမှာ ချိတ်ဆက်ပေးခြင်းအားဖြင့် ကျွန်တော်တို့ တစ်ယောက်နဲ့တစ်ယောက် သဘောမတူညီတဲ့ကိစ္စတွေမှာ ဆွေးနွေးဖို့ပိုပြီးလွယ်ကူလာစေမှာ ဖြစ်ပါတယ်” ဟု ဆိုပါသည်။

သို့သော်ငြားလည်း လူတစ်ဦးနှင့်တစ်ဦးမှာ လူပုဂ္ဂိုလ်တစ်ယောက်အနေနှင့် ‘အပြည့်အဝ’ သိဖို့ရန် အရမ်းခက်ခဲပါသည်။ ထိုသို့လုပ်ရန်မှာအချိန်အများကြီး ပေးရပါသည်။ ထို့အပြင်တစ်ဦးနှင့်တစ်ဦး ထိတွေ့ ဆက်ဆံဖို့လည်းလိုပါသည်။ ရှေ့ကဆိုခဲ့သလို ပျမ်းမျှဟိုမိုဆေးပီးယန်း  (ံHomo sapiens) တစ်ဦးအနေနှင့် လူပေါင်း ၁၅၀ ကျော်ထက်ပိုပြီးရင်းရင်းနှီးနှီးသိဖို့ရန် ဖြစ်နိုင်ချင်မှဖြစ်နိုင်မည်ဖြစ်သည်။ လူ့အသိုက်အဝန်းများ တည်ဆောက်ခြင်းမှာစံအားဖြင့် တစ်ခုလိုချင်လျှင်တစ်ခုစွန့်လွှတ်ရဆိုသည့် အခြေအနေမျိုး (zero-sum game) မဖြစ်သင့်ပေ။  လူသားတစ်ဦးအနေနှင့်တစ်ချိန်တည်းမှာပင် မတူညီသောအုပ်စုများတွင်  ပါဝင်နိုင်သည်။ ကံဆိုးသည်မှာလူသားတစ်ဦးနှင့်တစ်ဦး ရင်းရင်းနှီးနှီးဆက်ဆံနိုင်မှုမှာ တစ်ခုလိုချင်လျှင်တစ်ခုစွန့်လွှတ်ဆိုသည့် အခြေအနေမျိုးဖြစ်နိုင်သည်။ ကန့်သတ်ချက်အတိုင်းအတာတစ်ခုကို ကျော်လွန်လာလျှင်စာဖတ်သူအနေနှင့် အီရန် သို့မဟုတ် နိုင်ဂျီးရီးယားမှ အွန်လိုင်းသူငယ်ချင်းများကိုသိရန်အချိန်နှင့်အင်အားသုံးလိုက်ရသည့်အတွက် စာဖတ်သူ၏အိမ်နီးနားချင်းများကိုသိနိုင်စွမ်းကို ထိခိုက်သည်ဆိုတာမျိုး ဖြစ်နိုင်သည်။

အင်ဂျင်နီယာတစ်ဦးက လူအများအွန်လိုင်းတွင် ဝယ်ယူသည့်အချိန်ကို လျော့နည်းစေပြီး အွန်လိုင်းပြင်ပကမ္ဘာတွင် သူငယ်ချင်းများနှင့်အဓိပ္ပာယ်ရှိသည့် အလုပ်များလုပ်စေနိုင်သည့် နည်းလမ်းကိရိယာအသစ်မျိုးထွင်နိုင်ပြီဆိုပါက ဖေ့စ်ဘုတ်အတွက်အရေးကြီးသည့်စမ်းသပ်ချက်ဖြစ် လာမည်ဖြစ်သည်။ ဖေ့စ်ဘုတ်အနေနှင့်ထိုသို့သော နည်းလမ်းကိုလက်ခံကျင့်သုံးမည်လောသို့တည်းမဟုတ် ဖိနှိပ်ထားမည်လော။ ဖေ့စ်ဘုတ်အနေနှင့်ယုံယုံကြည်ကြည်ဖြင့် ခုန်ပျံကျော်လွှားမှုလုပ်ကာ ဘဏ္ဍာရေး အကျိုးစီးပွားများကိုဦးစားမပေးဘဲလူမှုရေးကိစ္စများကို ဦးစားပေးမည်လော။ ထိုကဲ့သို့ဦးစားပေးပြီး ဘဏ္ဍာရေး ချွတ်ခြုံကျမှုကိုလည်းရှောင်ရှားနိုင်ပါက အလွန်အရေးပါသောပြောင်းလဲမှုကြီးဖြစ်လာမည်ဖြစ်သည်။

လေးလပတ်ဘဏ္ဍာရေးအစီရင်ခံစာများထက် အွန်လိုင်းပြင်ပကမ္ဘာကို ပိုဂရုစိုက်ခြင်းကဖေ့စ်ဘုတ်၏ အခွန်မူဝါဒအပေါ်တွင်လည်း  သက်ရောက်မှုရှိမည်ဖြစ်သည်။ အမေဇွန်၊ ဂူဂယ်လ်၊ အက်ပဲလ်နှင့်  အခြားနည်းပညာကုမ္ပဏီကြီးများကဲ့သို့ပင် ဖေ့စ်ဘုတ်ကိုလည်းအခွန်တိမ်းရှောင်မှုရှိသည်ဟု ထပ်ခါတလဲလဲ စွပ်စွဲမှုများရှိသည်။ အွန်လိုင်းဆောင်ရွက်မှုများကို အခွန်ကောက်ခံရန်သဘောသဘာဝအားဖြင့်ကို  ခက်ခဲခြင်းများကြောင့် ဂလိုဘယ်ကော်ပိုရေးရှင်းကြီးများမှာ ဘဏ္ဍာရေး အစီရင်ခံစာများ ဖန်တီးရာတွင် နည်းမျိုးစုံဖြင့် ဉာဏ်နီဉာဏ်နက်ပွားကြခြင်းဖြစ်သည်။ လူအများမှာ အွန်လိုင်းပေါ်တွင်သာ အဓိကနေထိုင် ခြင်းဖြစ်ပြီး ၎င်းတို့၏အွန်လိုင်းတည်ရှိမှုအတွက် လိုအပ်သည့်နည်းပညာကိရိယာများ ပေးအပ်ထားသည်ဟု ယူဆပါကအွန်လိုင်းပြင်ပကမ္ဘာရှိအစိုးရများကို အခွန်မဆောင်ဘဲတိမ်းရှောင်နေသည်ဆိုလျှင်တောင်မှ  နည်းပညာကုမ္ပဏီကြီးများအနေနှင့် မိမိကိုယ်ကိုအကျိုးရှိသည့်လူမှုရေးဝန်ဆောင်မှုအဖြစ် မှတ်ယူနေနိုင်သည်။ သို့သော်လူသားများတွင်ခန္ဓာကိုယ်ရှိသေးပြီး သို့ဖြစ်သည့်အတွက်ကြောင့်လမ်းများ၊ ဆေးရုံများ၊  မိလ္လာစနစ်များ လိုအပ်သေးသည်ကို သတိရပါကအခွန်တိမ်းရှောင်သည်မှာတရားပါသည်ပြောဖို့ပိုခက်လာသည်။ အရေးကြီးဆုံး လူမှုရေးဝန်ဆောင်မှုများအတွက် ဘဏ္ဍာရေးအထောက်အပံ့ပေးရန်ကိုတော့လုပ်ဆောင်ပေးခြင်းမရှိဘဲ ဘယ်နည်းအားဖြင့် လူမှုအသိုက်အဝန်းများ၏အကျိုးကျေးဇူးများကို ချီးမွမ်းပြောဆိုနိုင်ပါမည်နည်း။

ဖေ့စ်ဘုတ်အနေနှင့်သူ့စီးပွားရေးမော်ဒယ်လ်ပုံစံကိုပြောင်းပြီး  အွန်လိုင်းပြင်ပတွင်နေထိုင်ရန်အားပေးသော အခွန်မူဝါဒကိုကျင့်သုံးကာ  ကမ္ဘာကြီးကိုပေါင်းစည်းစေပြီး တစ်ပြိုင်ထဲမှာလည်းအမြတ်ဆက်ရနိုင်သည့် နည်းလမ်းတွေ့ပါစေဟု ဆုတောင်းရုံသာတတ်နိုင်ပါသည်။ မည်သို့ပင်ဖြစ်စေ ကျွန်ုပ်တို့အနေနှင့်ဖေ့စ်ဘုတ်၏ ကမ္ဘာ့အသိုက်အဝန်းဖန်တီးရေးဆိုသည့် ရည်မှန်းချက်အမြင်နှင့်စပ်လျဉ်းပြီး ဖေ့စ်ဘုတ်အပေါ်လက်တွေ့ မကျသည့် မျှော်လင့်ချက်မျိုးလည်းမထားရှိသင့်ပေ။ သမိုင်းကိုပြန်ကြည့်လျှင် ကော်ပိုရေးရှင်းကြီးများမှာ လူမှုရေးနှင့်နိုင်ငံရေးတော်လှန်ရေးများအတွက် စံပြရှေ့ဆောင်များမဟုတ်ကြချေ။ တကယ့်တော်လှန်ရေးများမှာ  စပြီး သိပ်မကြာခင်ပင်ကော်ပိုရေးရှင်းများ၊ ယင်းတို့၏ ဝန်ထမ်းများ၊  ရှယ်ယာရှင်များမလိုလားသည့် စွန့်လွှတ်အနစ်နာခံမှုမျိုးတောင်းဆိုတတ်သည်။ ထို့ကြောင့်ပင်တော်လှန်ရေးလုပ်မည့် ပုဂ္ဂိုလ်များမှာ ဘုရားကျောင်းများ၊ နိုင်ငံရေးပါတီများ၊ စစ်တပ်များထူထောင်ခြင်းဖြစ်သည်။ အာရပ်ကမ္ဘာတွင်ဖြစ်ပွားခဲ့သည့် ဖေ့စ်ဘုတ်နှင့်တွစ်တာတော်လှန်ရေးဆိုသည့် တော်လှန်ရေးများမှာအွန်လိုင်းအသိုက်အဝန်းအုပ်စုများက မျှော်လင့်ချက်အပြည့်ဖြင့် စတင်ခဲ့ခြင်းဖြစ်သော်လည်း ရှုပ်ထွေးပွေလီလှသည့်အွန်လိုင်းပြင်ပကမ္ဘာသို့ ရောက်သွားသောအခါတွင်မူယင်းတော်လှန်ရေးများကို ဘာသာရေးအစွန်းရောက်များ၊ စစ်အာဏာရှင်အစိုးရများက ဦးဆောင်ကြခြင်း ဖြစ်ပါသည်။ ဖေ့စ်ဘုတ်အနေနှင့်ကမ္ဘာနှင့်ချီသောပြောင်းလဲ တော်လှန်ရေးကြီးစတင်ရန် ရည်မှန်းသည်ဆိုပါက အွန်လိုင်းနှင့်အွန်လိုင်းပြင်ပကမ္ဘာကိုဆက်စပ်သည့်အလုပ်ကို ယခုထက်ပို၍သေချာကောင်းမွန်စွာ ဆောင်ရွက်နိုင်ရန်လိုပေမည်။ ဖေ့စ်ဘုတ်နှင့်အခြားအွန်လိုင်းကုမ္ပဏီကြီး များမှာ လူသားများကို မျက်လုံးတစ်စုံ၊ နားရွက်တစ်စုံ၊ လက်ဆယ်ချောင်း၊  ဖုန်းတစ်လုံးနှင့် ခရစ်ဒစ်ကတ်သာပါသော အမြင်အကြားအာရုံနှစ်မျိုးထဲသာရှိသည့် သတ္တဝါများအဖြစ်မြင်လေ့ရှိကြသည်။ လူသားများကိုပေါင်းစည်းရန် အရေးကြီးသည့်ခြေလှမ်းမှာ လူသားများတွင်ခန္ဓာကိုယ်ရှိသည်ဆိုသည့်အချက်ကို နားလည်သဘောပေါက်လက်ခံရန် လိုအပ်ခြင်းဖြစ်သည်။

ဤကဲ့သို့ နားလည်သဘောပေါက်လက်ခံခြင်းတွင်လည်း သူ့အားနည်းချက်နှင့်သူရှိပါသည်။ အွန်လိုင်း အယ်လ်ဂိုရစ်သမ်များ၏အားနည်းချက်ကိုသဘောပေါက်ခြင်းက နည်းပညာကုမ္ပဏီကြီးများကိုသူတို့လက်တံ ပိုချဲ့ရန်သာ အားပေးကောင်းအားပေးနိုင်ပါသည်။ ဂူဂယ်လ် မျက်မှန် (Google  Glass) နှင့် ပိုကီမွန်ဂိုး (Pokemon Go) ကဲ့သို့သော ဂိမ်းများကအွန်လိုင်းနှင့်အွန်လိုင်းပြင်ပကမ္ဘာကွာခြားချက်ကို ဖျောက်ဖျက်ပြီး တစ်ခုတည်းသောတိုးမြှင့်ထားသည့်အရှိတရားလောက  (Single Augmented Reality ) အဖြစ်မြင်လာစေရန် ဖန်တီးခြင်းဖြစ်ပါသည်။ ပိုပြီးလေးနက်သောအဆင့်တွင် ဇီဝအာရုံခံကိရိယာများနှင့် ဦးနှောက်နှင့်ကွန်ပျူတာ တိုက်ရိုက်ချိတ်ဆက်သောနည်းစနစ်များက အီလက်ထရွန်နစ်စက်ကိရိယာများနှင့် သက်ရှိခန္ဓာကိုယ်အကြား ခြားနားချက်ကိုပါ ပျောက်ပျက်စေပြီးကျွန်ုပ်တို့၏အရေပြားအောက်ထိတိုက်ရိုက်ပင်  ဖောက်ထွင်းဝင်ရောက်လာနိုင်ရန်ရည်မှန်းခြင်းဖြစ်ပါသည်။  နည်းပညာကုမ္ပဏီကြီးများက လူသားခန္ဓာကိုယ်အကြောင်းနားလည်လက်ခံလာပြီဆိုရင်လည်း လက်ရှိကျွန်ုပ်တို့ မျက်လုံးများ၊ လက်ချောင်းများနှင့်ခရက်ဒစ်ကတ်ကို ဩဇာလွှမ်းမိုးဖို့ကြိုးစားသလိုမျိုး ကျွန်ုပ်တို့ခန္ဓာကိုယ်တစ်ခုလုံးကို  ဩဇာလွှမ်းမိုးဖို့ကြိုးစားကောင်းကြိုးစားလာနိုင်ပါသည်။ ကျွန်ုပ်တို့အနေနှင့်အွန်လိုင်းနှင့် အွန်လိုင်းပြင်ပကမ္ဘာကြားခြားနားနေသည့်နေ့များကို ပြန်ပြောင်းတမ်းတရပါသည်ဆိုသည့်အဖြစ်မျိုးလည်း ရောက်ကောင်းရောက်လာနိုင်ပါသည်။     

သီဟဝင့်အောင်

(ဆက်လက်ဖော်ပြပါမည်။)

         

 

 

You may also like...

Leave a Reply

Your email address will not be published. Required fields are marked *