‘ခေါင်းဆောင်ကောင်း’ မှသည် ‘Institution ကောင်း’ သို့

နိုင်ငံတက်အောင် ခေါင်းဆောင်ကောင်းလိုသည်။ နိုင်ငံရေရှည်ကောင်းစေလိုလျှင် ‘Institution ကောင်း’ လိုသည်။

မြန်မာနိုင်ငံကို ထိပ်ဆုံးမှ ဦးဆောင်နေသည့် ဒေါ်အောင်ဆန်းစုကြည်ကို မေးခွန်းထုတ်သူများ ရှိမည်ဖြစ်သော်လည်း ခေါင်းဆောင်ကောင်းဟု သတ်မှတ်သူများလည်း အများအပြားရှိမည်ဖြစ်သည်။ ထိုအတိုင်းမှန်လျှင် မြန်မာနိုင်ငံ ကံဇာတာတက်ပြီ။ ခေါင်းဆောင်ကောင်း မြန်မာတွင် ရှားသည်မဟုတ်လား။ သို့သော် မြန်မာနိုင်ငံလျှောက်ရမည့် ခရီးလမ်းသည် ရှည်သေးသည်။ ခေါင်းဆောင်ကောင်း၏နေရာကို မည်သူဆက်ခံမည်နည်း။

မြန်မာနိုင်ငံသည် ဒီမိုကရေစီစနစ် ကျင့်သုံးနေသည့်အတွက် အာဏာရှင်နိုင်ငံများတွင်ကဲ့သို့ ခေါင်းဆောင်ကောင်းသည် သူ့ကိုဆက်ခံမည့်နောက် ခေါင်းဆောင်ကို လက်သပ်မွေး၊ ရွေး၍မရ။ ခေါင်းဆောင်ကောင်းကို Institution ကောင်းဖြစ်သည့် စနစ်ကောင်း၊ ဥပဒေကောင်း၊ လုပ်ထုံးလုပ်နည်းကောင်း၊ အဖွဲ့အစည်းကောင်းများက ဆက်ခံခြင်းသည် အသင့်လျော်ဆုံး။ မည်သူတက်တက် Institution ကောင်းများရှိနေလျှင် နိုင်ငံမှန်မှန်ကန်ကန်လည်ပတ်မည်။ ဒီမိုကရေစီနည်းကျမည်။ နည်းမှန်လမ်းမှန်ချမ်းသာအောင် ကြိုးစားနိုင်မည်။

Institution ကောင်းများကို မည်သူဆောက်မလဲ။ အခြားမရှိပါ။ ခေါင်းဆောင်ကောင်းမှလွဲပြီး ဆောက်ပေးမည့်သူမရှိ။

သို့သော် ခေါင်းဆောင်ကောင်းရုံနှင့် Institution ကောင်း အလိုလိုပေါ်လာမည်လား။ မသေချာပါ။ ကိုယ်တိုင် မင်းကောင်းမင်းမြတ်ဖြစ်သော်လည်း သူမျက်နှာလွှဲသည်နှင့် နိုင်ငံအစိတ်စိတ်ကွဲသွားသည့် မြန်မာမင်းများက ရာဇဝင်တွင် သက်သေ။ ထို့ကြောင့် ခေါင်းဆောင်ကောင်းရှိပြီဆိုကာ အေးမနေဘဲ ရခဲလှသော ခေါင်းဆောင်ကောင်း၏အားဖြင့် Institution များကို ဖိဆောက်သင့်သည်။

‘လူကိုကျော်လွန်သောအားများ Impersonal Forces သည် သမိုင်းကို ဖန်တီးသည်ဟု ပါမောက္ခဘ၀ကမြင်ခဲ့သော်လည်း ကိုယ်တိုင်ကြုံရသည့်အခါ ပုဂ္ဂိုလ်များ၏ သက်ရောက်ပြောင်းလဲနိုင်စွမ်းကို မြင်ရသည်’ ဟု နိုင်ငံတကာဆက်ဆံရေး ဂုရု၊ နာမည်ကျော် အမေရိကန်နိုင်ငံခြားရေးဝန်ကြီး ဟင်နရီ ကစ်ဆင်းဂျားက ပြောခဲ့ဖူးသည်။

‘ခေါင်းဆောင်ကောင်း’ မှသည် ‘Institution ကောင်းများ’ သို့ နောက်တစ်ဆင့် ခုန်စေလိုသည်။ 

 

အယ်ဒီတာ
၂၅.၇.၂၀၁၉

You may also like...

Leave a Reply

Your email address will not be published. Required fields are marked *