၂၀၂၀ အတွက် လူချွန်လူကောင်းတစ်စု

၂၀၂၀ ရွေးကောက်ပွဲသည် မြန်မာ့အကူးအပြောင်းတွင် အရေးပါသော လမ်းချိုးလမ်းကွေ့ဖြစ်သည့်အားလျော်စွာ ထိုအချိုးအကွေ့တွင် နိုင်ငံကို တွန်းနိုင်၊ ထမ်းနိုင်မည့်လူအင်အားများစွာ ပေါ်ထွက်ရန်လိုသည်။

ထို့ကြောင့် အာဏာရပါတီဖြစ်စေ၊ အာဏာလက်မဲ့ပါတီဖြစ်စေ၊ ဒေသတွင်းပါတီဖြစ်စေ နိုင်ငံရေးပါတီတိုင်း ၂၀၂၀ အတွက် လူချွန်လူကောင်းများ စုထားစေလိုသည်။ ၂၀၁၁ မှစတင်ပြီး ယခုထိ ရွေးကောက်ပွဲနှစ်ခုအပြီး လွှတ်တော်များ၏ အတွေ့အကြုံကိုကြည့်လျှင် ချွန်သည့်ကောင်းသည့် လွှတ်တော်ကိုယ်စားလှယ်များသည် လွှတ်တော်တွင်းတွင် မဲပေးသည့်မဲတစ်မဲမျှသာမကဘဲ အလုပ်ပြီးမြောက်အောင် လုပ်ဆောင်နိုင်သည့်၊ ဆိုင်ရာမဲဆန္ဒနယ်များ၏အကျိုးကို သယ်ပိုးနိုင်သူများဖြစ်သည်ကို တွေ့ရသည်။

ရွေးကောက်ပွဲဝင်မည့် ကိုယ်စားလှယ်အားလုံးသည် လူချွန်လူကောင်းဖြစ်နေပါက ရွေးကောက်ပွဲတွင် ‘ဘယ်သူနိုင်နိုင် မြန်မာနိုင်မည်’ ဖြစ်သည်။ လူချွန်လူကောင်း လွှတ်တော်ကိုယ်စားလှယ်များသည် အစိုးရအဖွဲ့ကိုလည်း ထိထိရောက်ရောက် ထိန်းညှိနိုင်မည်။

မဲဆန္ဒရှင်ပြည်သူများအနေနှင့်လည်း လူချွန်လူကောင်း လွှတ်တော်ကိုယ်စားလှယ်များ ပါဝင်နိုင်အောင် ကိုယ်အားပေးသည့် ပါတီအသီးသီးကို တွန်းအားပေးသင့်သည်။ ပါတီများသည် ကိုယ့်မဲဆန္ဒရှင်များ၏ဆန္ဒကို အလေးထားကြသည့်အတွက် မဲဆန္ဒရှင်တို့ကသာ တွန်းအားပေးလျှင် လူချွန်လူကောင်းများ ကိုယ်စားလှယ်လောင်းစာရင်းပေါက်လာလိမ့်မည်။

လွှတ်တော်ကိုယ်စားလှယ်များ လူချွန်လူကောင်းဖြစ်ရုံနှင့် မလုံလောက်သေးပါ။ အစိုးရအဖွဲ့သည် နိုင်ငံကို အုပ်ချုပ်ဦးဆောင်မည်ဖြစ်သည့်အတွက် အစိုးရအဖွဲ့တွင်း လူချွန်လူကောင်းများရောက်ရန် အလွန်အရေးကြီးသည်။ မြန်မာနိုင်ငံသည် ဒေသတွင်းနိုင်ငံများနှင့်ယှဉ်လျှင်ပင် နောက်ကျနေသည့်အတွက် ချွန်လည်းချွန်၊ ကောင်းလည်းကောင်းသည့် ဒေါင်ဒေါင်မြည်ပုဂ္ဂိုလ်တို့ အစိုးရအဖွဲ့တွင်းတွင် ဝင်ရောက်ဦးဆောင်မှသာ သူတစ်လှမ်း ကိုယ်ဆယ်လှမ်း လှမ်းနိုင်မည်။

အစိုးရအဖွဲ့ ဖွဲ့နိုင်မည် သို့မဟုတ် အစိုးရအဖွဲ့ဝင်နေရာရနိုင်သည်ဟု ကိုယ့်ကိုယ်ကိုယ်တွက်ထားသည့် ပါတီမှန်သမျှသည် အစိုးရအဖွဲ့ဝင်နေရာများအတွက် ယခုကတည်းက ကြိုတင်စနည်းနာ လေ့လာပြီး အဆင်သင့်လူစုပြင်ထားသင့်သည်။ သို့မှသာ နီးမှ ကြုံရာလူကောက်ခေါ်ပြီး အစိုးရဖွဲ့ရမည့်ဘေးမှ ကင်းဝေးမည်။

လူချွန်လူကောင်းများကို ဆိုင်ရာပါတီတို့က ရွေးကြပါ၊ လူချွန်လူကောင်းများကို ပြည်သူလူထုက ရွေးချယ်မဲပေးကြပါဟု The Voice Journal က တိုက်တွန်းလိုက်သည်။ 

အယ်ဒီတာ
၁.၈.၂၀၁၉

You may also like...

Leave a Reply

Your email address will not be published. Required fields are marked *