ဓမ္မစက်ဖြင့် မနိုင်တော့သည့် မဘသ

မဘသအတွက် ဓမ္မစက်ဖြင့် ဆောင်ရွက်ခြင်း တစ်ခန်းရပ်သွားပြီဖြစ်သည်။

အမျိုးဘာသာ စောင့်ရှောက်ရေး အဖွဲ့ (မဘသ) ကို အမည်ပြောင်းဖွဲ့စည်းထားသည့် ဗုဒ္ဓဓမ္မပရဟိတ ဖောင်ဒေးရှင်း၏ ဥက္ကဋ္ဌဆရာတော်နှင့် ဒုတိယဥက္ကဋ္ဌ ဆရာတော်တို့အပေါ် ဓမ္မစက်ဖြင့် ဆောင်ရွက်မည့် အခန်းကဏ္ဍပြီးဆုံးသွားပြီ ဖြစ်ကြောင်း သာသနာရေးနှင့် ယဉ်ကျေးမှု ဝန်ကြီးဌာနက ဇူလိုင်လ ၃၀ ရက်နေ့တွင် ထုတ်ပြန်လိုက်သည်။

ယင်းသို့ဆိုလျှင် အစိုးရနှင့် မဘသ အဖွဲ့တို့ ထိပ်တိုက်တွေ့တော့မည်လောဟု မေးခွန်းထွက်ပေါ်လာသည်။

မဟနနှင့် မဘသ

မဘသ၏ ဥက္ကဋ္ဌနှင့် ဒုတိယဥက္ကဋ္ဌ ဆရာတော်ကြီးနှစ်ပါးကို နိုင်ငံတော်သံဃာ မဟာနာယကအဖွဲ့ (မဟန) က ဇူလိုင်လ ၂၉ ရက်နေ့တွင် မရမ်းကုန်းမြို့နယ်ရှိ မဟာသံဃာ၊ နာယကကျောင်းတော်ကြီး၌ နောက်ဆုံးအကြိမ် ဩဝါဒပေးရန် မဟန အဖွဲ့က အကြောင်းကြားစာပေးပို့ခဲ့သည်။

ယင်းသို့ခေါ်သော်လည်း မဘသ အဖွဲ့ဗဟို၏ ဥက္ကဋ္ဌ အင်းစိန်မြို့နယ် ရွာမ ပရိယတ္တိစာသင်တိုက် ဦးဆောင် ဆရာတော် ဦးတိလောကဘိဝံသ ရောက်မလာဘဲ စာဖြင့်သာ အကြောင်းပြန်လိုက်သည်။ ဒုတိယ ဥက္ကဋ္ဌဖြစ်သည့် ဆရာတော် ဦးသီလက္ခန္ဓာဘိဝံသကမူ ရောက်ရှိလာခဲ့သည်။

သို့သော်လည်း အဓိက တာဝန်ရှိသည့် ဥက္ကဋ္ဌ ဆရာတော် မကြွလာသဖြင့် ဆုံးမဩဝါဒပေးမည့် အစီအစဉ်ကို မဟနက ဖျက်သိမ်းလိုက်သည်။

ဆရာတော် တိလောကဘိဝံသသည် ကျန်းမာရေးကြောင့် လာရောက်နိုင်ခြင်းမရှိကြောင်း ဒုတိယဥက္ကဋ္ဌ ဆရာတော်က မိန့်ကြားသည်။

ယင်းသို့ အစီအစဉ်ပျက်သွားပြီး နောက်တစ်ရက်တွင်ပင် နိုင်ငံတော်သံဃ မဟာနာယကအဖွဲ့ ၄၇ ပါးစုံညီ အစည်းအဝေးထိုင်ကာ ဆုံးဖြတ်လိုက်သည့် ဆုံးဖြတ်ချက်များ အပါအဝင် အချက်ခုနစ် ချက်ပါဝင်သည့် ထုတ်ပြန်ချက်ကို သာသနာရေးနှင့် ယဉ်ကျေးမှုဝန်ကြီးဌာနက ထုတ်ပြန်လိုက်ခြင်းဖြစ်သည်။

ဗုဒ္ဓဓမ္မပရဟိတ ဖောင်ဒေးရှင်းသည် တရားမဝင် ဖွဲ့စည်းထားသည့်အဖွဲ့သာ ဖြစ်သည်ဟု ထပ်မံ အတည်ပြုဆုံးဖြတ်ကြောင်း ပါဝင်သည်။ ယင်းအပြင် အဆိုပါ အဖွဲ့ဝင်အားလုံးသည် အဖွဲ့၏ အမည်ကို သုံး၍ မည်သည့်ကိစ္စမျှ မဆောင်ရွက်ရန်၊ မြန်မာနိုင်ငံအနှံ့အပြားတွင် စိုက်ထူထားသည့် အဖွဲ့၏ ဆိုင်းဘုတ်များကို ဆုံးဖြတ်သည့်နေ့မှ ၄၅ ရက်အတွင်း ဖြုတ်ရန်လည်း ပါဝင်သည်။

ယင်းအချက်များကို မလိုက်နာသူကို ရဟန်းပုဂ္ဂိုလ်ဖြစ်လျှင် သံဃာ့အဖွဲ့အစည်းဆိုင်ရာဥပဒေဖြင့် အရေးယူရန်၊ လူပုဂ္ဂိုလ်ဖြစ်လျှင် တည်ဆဲဥပဒေဖြင့် အရေးယူရန်တို့လည်း ပါဝင်သည်။

အထက်ပါဆုံးဖြတ်ချက်များမှာ ၂၀၁၈ ခုနှစ်တွင် မဟနက ဆုံးဖြတ်ချက်ကို ထပ်မံအတည်ပြုဆုံးဖြတ်လိုက်ခြင်း ဖြစ်သည်။ ယခုတစ်ကြိမ်ဆုံးဖြတ်ရာတွင် အသစ်တိုးလာသည့် သက်ရောက်မှု ကြီးမားလာနိုင်သော အချက်တစ်ချက်လည်း ပါဝင်လာသည်။

ယင်းမှာ မဘသ ဥက္ကဋ္ဌ ဆရာတော်နှင့် ဒုတိယဥက္ကဋ္ဌ ဆရာတော်တို့ကို ဓမ္မစက်ဖြင့် ဆောင်ရွက်မည့် အခန်းကဏ္ဍပြီးဆုံးသွားပြီဆိုသည့် အချက်ဖြစ်သည်။ ထိုအချက်ကပင် မဘသ၏ ရှေ့ဆက်မည့် ခရီးသည် စိတ်ဝင်စားဖွယ်ရာ ကောင်းလာခဲ့သည်။

ဓမ္မစက်ဖြင့် ဆောင်ရွက်ရမည့် အခန်းကဏ္ဍပြီးဆုံးသွားခြင်းကြောင့် အာဏာစက်ဖြင့် ဆောင်ရွက်လာနိုင်မည်လောဆိုသည့် မေးခွန်လည်းရှိလာသည်။

ယင်းအပေါ် မှတ်ချက်မပေးလိုကြောင်း သာသနာရေးနှင့် ယဉ်ကျေးမှုဝန်ကြီးဌာန ပြောရေးဆိုခွင့်ရှိသူ ဦးအောင်ဆန်းဝင်းက ပြောဆိုသည်။

“ကျွန်တော်တို့ မှတ်ချက်ပေးဖို့ မရှိပါဘူး။ ထုတ်ပြန်ထားတဲ့ အတိုင်းပါပဲ” ဟု ၎င်းက ဆိုသည်။

မဘသ အဖွဲ့သည့် ၂၀၁၈ နှစ်ကတည်း မဟနထုတ်ပြန်ချက်များကို လိုက်နာခြင်း မရှိဘဲ မဘသအဖွဲ့ တစ်နည်းအားဖြင့် အမျိုးဘာသာသာသနာစောက်ရှောက်ရေး ဗုဒ္ဓဓမ္မပရဟိတဖောင်ဒေးရှင်းအမည်ဖြင့် လုပ်ငန်းများကို ဆက်လက်လုပ်ဆောင် ခဲ့ပြီး ယခုနှစ် ဇွန်လ ၁၆ ရက် နှင့် ၁၇ ရက် နေ့ကပင် မဘသနှစ်ပတ်လည် စုံညီအစည်းအဝေးပွဲကိုပင် ကျင်းပခဲ့သေးသည်။

အမျိုးသမီးမဝင်ရ ကန့်သတ်ထားသည့် အောက်စက်တော်ရာကို နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဝင်ရောက်သည့်အပေါ် ကန့်ကွက်ကြောင်း၊ နိုင်ငံတွင်း မွေးဖွားသည့် ကလေးတိုင်းကို မွေးဖွားခြင်းမှတ်ပုံတင် လက်မှတ်ထုတ်ပေးရမည်ဆိုသည့် ဥပဒေသည် လူမျိုးခြား၊ နိုင်ငံခြား ကလေးငယ်များကိုပါ တရားဝင်အသိအမှတ်ပြုရာ ရောက်သဖြင့် ဆန့်ကျင်ကြောင်း မဘသက အဆိုပါ အစည်းအဝေးတွင် ထုတ်ပြန်ခဲ့သည်။

ထို့အပြင် ဧည့်စာရင်း ဥပဒေ၊ နောက်ယောင်ခံ စောင့်ကြည့်ရေး ဥပဒေ၊ အရေးပေါ် စီမံချက်ဥပဒေများကို ပယ်ဖျက် ခြင်း ဆရာတော် ဦးဝီရသူ ပြောဆိုချက်များသည် ဖရုသဝါစာ (ကြမ်းတမ်းသည့် စကားပြောဆိုခြင်း) ဖြစ်ပါက ဓမ္မစက်နှင့် ဦးစွာဆုံးမရမည့်အစား ရာဇသတ်ကြီး ဥပဒေပုဒ်မ ၁၂၄ (က) ဖြင့် အမှုဖွင့်သည့် အတွက် ကန့်ကွက်ကြောင်း စသည့် အချက်များကိုလည်း ထည့်သွင်းထုတ်ပြန်ခဲ့သည်။

အဆိုပါထုတ်ပြန်ချက်ကို ဝေဖန်စွပ်စွဲမှုများရှိခဲ့သည့်အပေါ် ဆရာတော် ဦးတိလောကဘိဝံသက မဟနသို့ အကြောင်းပြန်စာတွင် ထည့်သွင်းရှင်းလင်းထားသည်။

“တိုင်းပြည်နှင့် လူမျိုးဘာသာ၊ သာသနာကို ပျက်စီးအောင် ပြုလုပ်နေသည့် လုပ်ရပ်နှင့် ပါဝင်လုပ်ဆောင်သူများကို ဆန္ဒမဲ မပေးခြင်း အပါအဝင် တရားနှင့် အညီရသည့်နည်းဖြင့် တွန်းလှန်ဖယ်ရှားကြပါဟု ရဟန်းနှင့် ပြည်သူများကို တိုက်တွန်းလိုက်ပါသည်” ဟု ယင်းစာတွင် ထည့်သွင်းရေးသားထားသည်။

ထို့အပြင် မဟနအဖွဲ့ဝင် ဆရာတော်အချို့သည် ၂၀၁၇ ခုနှစ်က တွေ့ဆုံရာတွင် ၎င်းအပေါ် စော်စော်ကားကား ပြောဆိုဆက်ဆံကာ ပညာရှင်များဆွေးနွေးသည့် ပုံစံမျိုးမဟုတ်ဘဲ ဘုရင်ပုံစံ ဆွေးနွေးသည့် ပုံစံမျိုးဖြစ်၍ ထိုအဖြစ်မျိုးကြုံရပါက မဟနတစ်ဖွဲ့လုံးအပေါ် သိက္ခာကျစရာ ဖြစ်လာနိုင်သဖြင့် စာဖြင့်ပင် အကြောင်းပြန်ရခြင်းဖြစ်ကြောင်း ရေးသားထားသည်။

မဘသနှင့် အစိုးရ

မဟနနှင့် မဘသတို့ဆက်ဆံရေးမှာ တစ်ခန်းရပ်ခဲ့ပြီ။

အစိုးရအနေနှင့် ပြီးခဲ့သည့် ၂၀၁၈ ခုနှစ်တွင် မဟနထုတ်ပြန်ချက်များအပေါ် လိုက်နာမှုမရှိသည့် မဘသအပေါ် ထိထိရောက်ရောက် အရေးယူခြင်းမျိုး မရှိခဲ့ပေ။ ယခုအကြိမ်တွင် ဓမ္မစက် အခန်းကဏ္ဍကုန်ဆုံးပြီဆိုသဖြင့် မဘသလုပ်ဆောင်ချက်များကို အာဏာစက်ဖြင့် အစိုးရက အရေးယူလျှင် အစိုးရနှင့် မဘသ ထိပ်တိုက်တွေ့ ဆုံလာနိုင်သည့် အခြေအနေပင်။

အစိုးရသည် မဘသနှင့် ထိပ်တိုက်တွေ့သည့် လမ်းကို မရွေးချယ်ဘဲ တိုင်ပင်ညှိနှိုင်း၍ရပါက ညှိနှိုင်းသည့် နည်းလမ်းကို လုပ်ဆောင်သင့်ကြောင်း မဘသအဖွဲ့ဝင်ဟောင်း ဆရာတော် ဦးအကုင်္ရက မိန့်ကြားသည်။ ဦးအကုင်္ရသည် အမျိုးဘာသာသာသနာလုပ်ငန်းများကို ဆက်လက်လုပ်ကိုင်နေသော်လည်း မဘသအဖွဲ့ လက်အောက်တွင် မဟုတ်တော့ပေ။

“ထိပ်တိုက် မတွေ့ဘဲ ညှိနှိုင်းလုပ်ဆောင်မယ်ဆိုရင်တော့ ကောင်းတာပေါ့။ ကိုယ့်တိုင်းပြည်က တိုးတက်နေတဲ့ နိုင်ငံတွေထက် ခြေလှမ်းတစ်ရာလောက်လှမ်းမှ တော်ကာကျမဲ့ အခြေအနေမှာ ဒီလိုမျိုး ဖြစ်နေရင် တိုင်းပြည်အလားအလာ မကောင်းဘူးပေါ့။ မဖြစ်သင့်ဘူး။ မဖြစ်စေချင်ဘူး” ဟု ဆရာတော်က မိန့်ကြားသည်။

လက်ရှိ အမျိုးဘာသာသာသနာစောင့်ရှောက်ရေးလုပ်ဆောင်နေသူ အချို့တွင် နိုင်ငံတော်အစိုးရကို ဆန့်ကျင်နေသည့် လုပ်ရပ်များလည်းရှိနေကြောင်း ဝေဖန်ပြောဆိုမှုများလည်းရှိသည်။ ယင်းသို့ဆိုလျှင် မဘသသည် အမျိုးဘာသာ သာသနာစောင့်ရှောက်ရေးအပြင် နိုင်ငံရေးကိုပါ ဝင်ရောက်ပါဝင်နေသည့် သဘောပင်။

“အမျိုးဘာသာသာသနာစောင့်ရှောက်ရေးကို လုပ်ဆောင်တဲ့အပိုင်းမှာ အချို့ပုဂ္ဂိုလ်တွေအနေနဲ့ ရောထွေးမှု  အပိုင်းတွေ ရှိတာပေါ့။ အဲဒီအပေါ်မှာ အခုအာဏာရအစိုးရကလည်း အမြင်မှားတာတွေ ရှိတယ်။ အဲဒီအပေါ်မှာ နှိပ်ကွပ်တဲ့ အပိုင်းတွေ ရှိတာပေါ့” ဟု ဦးအင်္ကုရက ပြောဆိုသည်။

အစိုးရသည် မဘသအဖွဲ့နှင့် ထိပ်တိုက်တွေ့ဆုံမည့် လမ်းကို မရွေးဘဲ ညှိနှိုင်းသည့် လမ်းကို ရွေးချယ်သင့်ကြောင်း မိန့်ကြားသည့် နောက်ထပ် ဆရာတော်တစ်ပါးမှာ မကွေးကျောင်းဆရာတော် ဦးပါမောက္ခပင် ဖြစ်သည်။ ၂၁၀၅ ခုနှစ် ရွေးကောက်ပွဲကာလများတွင် မဘသက ပါတီတစ်ခု အနိုင်ရရှိရေးအတွက် မြို့နယ်များတွင် ဟောပြောသည်ဟုဆိုကာ ယင်းအဖွဲ့က နုတ်ထွက်ထားသူဖြစ်သည်။

မဘသအဖွဲ့အစည်းအပြစ်ကျူးလွန်ပါလျှင် အစိုးရက အာဏာစက်ဖြင့်လုပ်နိုင်သော်လည်း နိုင်ငံတွင်း မလိုလားအပ်သည့် ပြဿနာများ ဖြစ်လာနိုင်ကြောင်း၊ ထို့အပြင် သပိတ်မှောက်သည့်အထိ ဖြစ်လာနိုင်ကြောင်း ဆရာတော်က ဆက်လက်မိန့်ကြားသည်။

“နိုင်ငံအတွင်း ဆူပူမှုတွေ ဖြစ်လာနိုင်တယ်။ နိုင်ငံတော်အစိုးလည်း ဖြစ်လာမယ့် အကျိုးဆက်ကို ခံရနိုင်တယ်။ ၂၀၂၀ ရွေးကောက်ပွဲမှာတောင် အာဏာရထားတဲ့ အစိုးရအနေနဲ့ အနိုင်ရဖို့ ခက်ခဲသွားနိုင်တယ်” ဟု ဆရာတော်က မိန့်ကြားသည်။

အစိုးရနှင့် မဘသအဖွဲ့ ထိပ်တိုက်တွေ့ဆုံ၍ မလိုလားအပ်သည့် ပဋိပက္ခများ ဖြစ်ပွားလာသည့်အချိန်တွင် လက်လုပ်လက်စား အောက်ခြေပြည်သူများသည် အများဆုံးထိခိုက်နစ်နာစေလာမည်ဖြစ်ကြောင်း ဥပဒေအကြံပေး ဦးခင်မောင်မြင့်က ပြောဆိုသည်။

“ထိပ်တိုက်တွေ့ကြပြီဆိုရင် ရဟန်းတွေက ဝိနည်းတွေရှိတဲ့အတွက် အများကြီး ပါမလာနိုင်ဘူး။ သူတို့ (ရဟန်း) တွေ နောက်က ပြည်သူလူထုတွေပါ လာနိုင်တယ်။ လက်ရှိအခြေအနေက အလွန်အရေးကြီးနေပြီ” ဟု ၎င်းက ဆိုသည်။

ဆူပူမှု၊ ပဋိပက္ခများအထိ ဖြစ်ပွားလာ၍ ရဲတပ်ဖွဲ့နှင့် တပ်မတော်တို့က ဝင်ရောက်ထိန်းသိမ်းရလျှင် နိုင်ငံ၏ တည်ငြိမ်အေးချမ်းမှုကို ထိခိုက်ပျက်စီးနိုင်ကြောင်း ဦးခင်မောင်မြင့်က သုံးသပ်သည်။

အာဏာစက်သုံးတော့မလား

မဘသ လုပ်ဆောင်ချက်များနှင့် ပတ်သက်ပြီး အစိုးရက အရေးယူမည်ဟု ပြောကြားခဲ့သည်မှာ ပြီးခဲ့သည့်နှစ် ဇူလိုင်လကတည်းက ဖြစ်သော်လည်း ထိထိရောက်ရောက်အရေးယူခဲ့ခြင်း မရှိသေးပေ။ ယခု တစ်ကြိမ်တွင်လည်း အရေးယူနိုင်မည်လောဟု မေးခွန်းထုတ်သူများရှိသည်။

သာသနာရေးနှင့် ယဉ်ကျေးမှုဝန်ကြီးဌာနက အရေးယူမည်ဟု ပြောဆိုမှုများရှိသော်လည်း ထိထိရောက်ရောက် အရေးယူခြင်း မရှိသေးကြောင်း ဥပဒေအကြံပေး ဦးခင်မောင်မြင့်က ပြောဆိုသည်။

ထို့အပြင် မဘသ အမည်ပြောင်းဖွဲ့စည်းထားသည့် ဖောင်ဒေးရှင်းက လက်ရှိအစိုးရကို ဆန့်ကျင်ဖြုတ်ချရန် လုပ်ဆောင်နေသည့် လုပ်ဆောင်ချက်အချို့ကိုလည်း လက်မခံနိုင်ကြောင်း ၎င်းက ဆိုသည်။

“နိုင်ငံရဲ့တည်ငြိမ်နေတဲ့ အခြေအနေတွေ၊ နိုင်ငံဖွံ့ဖြိုးတိုးတက်ဖို့တွေကို ထည့်မစဉ်းစားဘဲ အမျိုးဘာသာ၊ သာသနာစောင့်ရှောက်ရေးကနေ တည်ဆဲအစိုးရကို ဖြုတ်ချရေးဆိုတာဟာ နိုင်ငံရေးအဖွဲ့ အစည်းတစ်ရပ်ရပ်၊ အခြားအဖွဲ့အစည်းတစ်ရပ်ရပ်ရဲ့ ဩဇာခံလွှမ်းမိုးခံအဖြစ်ကို ရောက်သွားပြီး နိုင်ငံအတွက် အကျိုးမရှိတဲ့ ရည်ရွယ်ချက်တွေလို့ မြင်တယ်” ဟု ၎င်းက ဆိုသည်။

ယင်းကဲ့သို့ ပြုမှုဆောင်ရွက်ခြင်းသည် မဘသ၏ ရည်ရွယ်ချက်ဖြစ်သည့် အမျိုးဘာသာသာသနာစောင့်ရှောက်ခြင်း မဟုတ်ဘဲ အမျိုးဘာသာသာသနာအပြင် နိုင်ငံရေးကိုပါ ဖျက်ဆီးမှုများဖြစ်နိုင်ကြောင်း ဦးခင်မောင်မြင့်က ပြောဆိုသည်။

မဘသ အဖွဲ့နှင့် အာဏာရအစိုးရ ဇာတ်လမ်းသည် ယခုမှ စတင်ခြင်းမျိုး မဟုတ်ဘဲ အာဏာရ အစိုးရတက်လာပြီးခါစ ဖြစ်သည့် ၂၀၁၆ ခုနှစ် ဇူလိုင်လတွင် ရန်ကုန်တိုင်းဝန်ကြီးချုပ်ဦးဖြိုးမင်းသိန်းက မဘသ မလိုအပ်ကြောင်း စင်ကာပူနိုင်ငံခရီးစဉ်တွင် ပြောဆိုခဲ့ရာမှ ပိုမိုးဆိုးရွားခဲ့သည်။

အမျိုးဘာသာ၊ သာသနာစောင့်ရှောက်ရေးအဖွဲ့ (မဘသ) ကို ၂၀၁၃ ခုနှစ် ဇွန်လအတွင်းက ဖွဲ့စည်းခဲ့ခြင်းဖြစ်ပြီး ၂၀၁၅ ခုနှစ် ရွေးကောက်ပွဲတွင် ကြံ့ခိုင်ရေးပါတီ အနိုင်ရရှိရေးအတွက် လှုံ့ဆော်ခဲ့သည်ဟုဆိုကာ ဝေဖန်မှုများလည်း မြင့်တက်ခဲ့သည်။

အစိုးရအနေနှင့် မဘသက ပြစ်မှုကျူးလွန်ပါက ထိထိရောက်ရောက် အရေးယူသင့်ကြောင်း လူငယ်အရေးလှုပ်ရှားဆောင်ရွက်နေသူ မသဉ္ဇာရွှန်းလဲ့ရည်က ပြောကြားသည်။

“တရားတဲ့အကျင့်နဲ့ မတရားတဲ့ အကျင့်တွေမှာ မတရားတဲ့အကျင့်ကို မတိုက်ခိုက်ဘူးဆိုရင် ပိုပြီးတော့ ထိခိုက် နစ်နာမှုတွေ ဖြစ်လာနိုင်တယ်။ မတရားတာကို ပြင်ရမယ်၊ တိုက်ခိုက်ရမယ်” ဟု ၎င်းက ပြောဆိုသည်။

လက်ရှိအချိန်တွင် နိုင်ငံတိုးတက်ရေးနှင့် ဒီမိုကရေစီဖော်ဆောင်ရေးလုပ်ငန်းများကို လုပ်ကိုင်နေရချိန်တွင် ဘာသာရေး ဂိုဏ်းဂဏကွဲကာ ပဋိပက္ခဖြစ်လာမည်ဆိုလျှင် နိုင်ငံအတွက်စိုးရိမ်စရာလည်း ဖြစ်နေသည်။ ယင်းအချက်သည် အစိုးရအတွက် အကျပ်ရိုက်စေမည်လော။ အစိုးရအနေနှင့် ပါးပါးနပ်နပ်ဖြေရှင်းရန်လည်း လိုအပ်နေသည်။

“လာမယ့်ရွေးကောက်ပွဲကလည်း နီးလာပြီဖြစ်တဲ့အတွက် ပဋိပက္ခတွေ ဒီထက်မဖြစ်လာအောင် ထိန်းသိမ်း ဆောင်ရွက်မလား၊ ဘာသာရေးကနေ နိုင်ငံရေးအသွင်ပြောင်းပြီး တည်ဆဲအစိုးရကို ဆန့်ကျင်ဖို့အထိ လှုံ့ဆော်စည်းရုံးလာတာကို ဒီအတိုင်းမထားဘဲ ထိထိရောက်ရောက် အရေးယူမလားဆိုတာကို စောင့်ကြည့်ရမှာပေါ့”ဟု ဥပဒေအကြံပေး ဦးခင်မောင်မြင့်က ပြောဆိုသည်။

အောင်ဖြိုးဦး

You may also like...

Leave a Reply

Your email address will not be published. Required fields are marked *