ဝန်ဇင်းအွန်လိုင်းစာအုပ် အရောင်းဆိုင်ကို ငါတို့စာပေစာအုပ်ထုတ်ဝေရေး တရားစွဲရန်စီစဉ်

ရန်ကုန်၊ ဩဂုတ် ၁

မူပိုင်ခွင့် ချိုးဖောက်သည်ဟုဆိုကာ ဝန်ဇင်း (Wunzinn) အွန်လိုင်းစာအုပ် အရောင်းဆိုင်ကို ငါတို့စာပေစာအုပ် ထုတ်ဝေရေးက တရားစွဲဆိုရန် ပြင်ဆင်နေကြောင်း ငါတို့စာပေ စာအုပ်ထုတ်ဝေရေးတည်ထောင်သူ ဦးစန်းမွန်အောင်က ပြောကြားသည်။

“အခုလောလောဆယ် Notice စာပို့ထားတယ်။ တစ်ပတ်အတွင်း ဖြေရှင်းပေါ့။ မဖြေရှင်းရင်တော့ တရားစွဲမှာပေါ့။ တရားစစွဲမယ့်အခါမှာ သုံးမယ့် ပုဒ်မတွေကတော့ ပြောလို့မရသေးဘူးပေါ့” ဟု ၎င်းကဆိုသည်။

မြန်မာနိုင်ငံတွင် မူပိုင်ခွင့်ဥပဒေသည် အတည်မပြုရသေးသဖြင့် တရားစွဲရာတွင် တည်ဆဲဥပဒေတစ်ခုခုကိုသုံးပြီး တရားစွဲမည်ဖြစ်ကြောင်း ဦးစန်းမွန်အောင် က ပြောဆိုသည်။

ဝန်ဇင်းသည် ငါတို့စာပေစာအုပ် ထုတ်ဝေရေးက ဘာသာပြန်ထုတ်ဝေခွင့် ဝယ်ယူထားသော မီရှဲလ်အိုဘားမား၏ Becoming (ဖြစ်တည်မှု) စာအုပ်ကို ဘာသာပြန်ထုတ်ဝေခွင့် ဝယ်ယူခြင်းမရှိဘဲ ဝန်ဇင်းအွန်လိုင်းစာအုပ်ဆိုင်၏ ဝက်ဘ်ဆိုက် တွင် အခမဲ့တင်ထားကြောင်း ၎င်းက ဆိုသည်။

ဘာသာပြန်ထုတ်ဝေမည်ဆိုပါက မူရင်းစာအုပ်၏ စာညွှန်းကို အပြည့်အစုံ ဖော်ပြရမည်ဖြစ်သော်လည်း ဝန်ဇင်းစာအုပ်တိုက်မှထုတ်ဝေသည့် ဖြစ်တည်မှုစာအုပ်တွင် အပြည့်အစုံ မဖော်ပြထားကြောင်း၊ စာအုပ်အဖုံးတွင် သုံးထားသည့် မီရှဲလ်အိုဘားမား၏ ဓာတ်ပုံကိုလည်း ပိုင်ရှင်၏ခွင့်ပြုချက်ကို ရယူခြင်းမရှိဘဲ အသုံးပြုထားကြောင်း ဦးစန်းမွန်အောင်က ဆိုသည်။

“မီရှဲလ်အိုးဘားမားက ဒီစာအုပ်အတွက်ရည်ရွယ်ပြီး ရိုက်ထားတဲ့ပုံကို အစ်ကိုတို့က ဘာမှမလုပ်ဘဲ သူတို့ပေးတဲ့အတိုင်းသုံးရမှာ။ ဝန်ဇင်းက ဆင်တူယိုးမှားလုပ်တဲ့အတွက် အစ်ကိုတို့ Brand Image လည်း ကျတယ်ဗျာ။ နစ်နာချက်က အစ်ကိုတို့က မစ်ရှဲလ်အိုဘားမားရဲ့ မူပိုင်ခွင့်ကို အကာအကွယ် မပေးနိုင်ဘူးဆိုရင် သူတို့က မြန်မာပြည်ကလူတွေနဲ့ လက်တွဲလုပ်တော့မှာ မဟုတ်ဘူး” ဟု ၎င်းကဆိုသည်။

ဝန်ဇင်းအွန်လိုင်းစာအုပ်ဆိုင်၏ မန်နေဂျာဖြစ်သူ ကိုသက်ဇော်ကမူ ငါတို့ စာပေစာအုပ်တိုက်က တရားစွဲဆိုမည်ဟု Notice စာပို့ထားသည်ကို ၎င်းအနေနှင့် မသိသေးကြောင်း ဩဂုတ်လ ၁ ရက်နေ့က ပြောဆိုသည်။

“နှစ်ဦးနှစ်ဖက်လည်း ထိပ်တိုက်ညှိနှိုင်းပြောဆိုတာတွေ ဘာမှမရှိသေးတဲ့အတွက် ကျွန်တော်တို့ကတော့ ဘာမှ မပြောနိုင်သေးပါဘူး” ဟု ၎င်းကဆိုသည်။

ဝန်ဇင်းအွန်လိုင်းစာအုပ်ဆိုင်၏ ဒါရိုက်တာ ကိုဝင်းလှိုင်ကမူ ငါတို့စာပေစာအုပ်တိုက်အတွက် ဦးဝင်းငြိမ်း ဘာသာပြန်နေသည့် Becoming စာအုပ်အား အခြားသူတစ်ဦးကို ဘာသာပြန်ခိုင်းကာ ဝန်ဇင်း၏ ဝက်ဘ်ဆိုက်တွင် တင်ပေးထားခြင်းမဟုတ်ကြောင်း ၎င်း၏ Facebook အကောင့် Let Yar တွင် ဇူလိုင်လ ၃၀ ရက်၌ ဖော်ပြသည်။

“အခု ဖြစ်သွားတာက Blinkist Website မှာ တင်ထားတဲ့ စာညွှန်း (အနှစ်ချုပ်) ကို ဆရာထင်မှူးဇော်သင်က ဘာသာပြန်ထားတာပါ။ ဆရာ (ဦးဝင်းငြိမ်း) ဘာသာပြန်နေတဲ့စာအုပ်ကို တစ်စုံတစ်ရာထိခိုက်စေလိုတဲ့ ဆန္ဒတော့ Wunzinn နဲ့ အတူ ဆရာထင်မှူးဇော်သင်အနေနဲ့လည်း လုံးဝမရှိခဲ့ပါဘူး” ဟု ရေးသားထားသည်။

ငါတို့စာပေစာအုပ်တိုက်က ဝန်ဇင်း အွန်လိုင်းစာအုပ်ဆိုင်ကို တရားစွဲဆိုမည်ဆိုသည့်ကိစ္စကို မည်သို့ဖြေရှင်းရန် စီစဉ်နေသည်ကို သိရှိရန် The Voice Journal က ကိုဝင်းလှိုင်ထံ ဆက်သွယ်မေးမြန်းခဲ့ရာ လတ်တလောတွင် မဖြေကြားလိုကြောင်း ပြောဆိုသည်။

ငါတို့စာပေ စာအုပ်တိုက်သည် Becoming စာအုပ် ဘာသာပြန်ထုတ်ဝေခွင့်ကို အမေရိကန်ပြည်ထောင်စု ပင်ဂွင်းစာအုပ်တိုက်မှတစ်ဆင့် ငါးနှစ်သက်တမ်းဖြင့် ဝယ်ယူထားပြီး စာအုပ်ရောင်းချငွေ၏ အမြတ်အစွန်းထဲမှ ရာခိုင်နှုန်းအချို့ကို ပေးရန် သဘောတူထားကြောင်း ငါတို့စာပေစာအုပ်ထုတ်ဝေရေးမှ သိရသည်။

ယင်းစာအုပ်ကို ဦးဝင်းငြိမ်းက ငါတို့စာပေစာအုပ်တိုက်အတွက် သာသာပြန်ပေးနေပြီး လာမည့် အောက်တိုဘာလတွင် ထုတ်ဝေနိုင်ရန် ရည်မှန်းထားကြောင်း ငါတို့စာပေ စာအုပ်ထုတ်ဝေရေးထံမှ သိရသည်။

ဝန်ဇင်းစာအုပ်အရောင်းဆိုင်က Becoming စာအုပ်ကို ဘာသာပြန်ထုတ်ဝေခွင့်မဝယ်ယူဘဲ ၎င်းတို့၏ အွန်လိုင်းဝက်ဘ်ဆိုက်တွင် တင်ထားသည့်ကိစ္စကို ပြန်ကြားရေးဝန်ကြီးဌာန၊ မြန်မာနိုင်ငံသတင်းမီဒီယာကောင်စီ၊ မြန်မာနိုင်ငံထုတ်ဝေသူနှင့် ဖြန့်ချိသူများအသင်း၊ Pen Myanmar နှင့် မြန်မာနိုင်ငံဘာသာပြန်ကွန်ရက်တို့ထံ ဇူလိုင်လ ၃၁ ရက်က အသိပေးအကြောင်းကြားထားကြောင်း ဦးစန်းမွန်အောင်က ပြောဆိုထားသည်။ 

You may also like...

Leave a Reply

Your email address will not be published. Required fields are marked *