ပြည်ပပြိုင်ဘက်များနှင့် အာမခံဈေးကွက်ခြေလှမ်းသစ်

အာမခံဈေးကွက်တံခါးအဖွင့်တွင် ပြည်ပကုမ္ပဏီများ၏ ခြေစွမ်းကို တွေ့မြင်ရတော့မည်ဖြစ်သည်။

၂၀၁၉ ခုနှစ် နှစ်ဆန်းပိုင်းက ပြည်ပအာမခံကုမ္ပဏီများကို ပြည်တွင်း၌ ဝင်ရောက်လုပ်ကိုင်ရန် ဖြေလျှော့ခဲ့ပြီး  ယခုအခါ မြန်မာနိုင်ငံတွင် အာမခံဝန်ဆောင်မှုလုပ်ကိုင်ခွင့် ရရှိမည့် ပြည်ပအာမခံကုမ္ပဏီများကို စီမံကိန်းနှင့် ဘဏ္ဍာရေးဝန်ကြီးဌာနက စိစစ်ထုတ်ပြန်လိုက်ပြီဖြစ်သည်။

နိုင်ငံခြားရင်းနှီးမြှုပ်နှံမှု ရာနှုန်းပြည့်ပိုင်ဆိုင်သည့် ပြည်ပအသက်အာမခံ ကုမ္ပဏီငါးခုကို ယခုနှစ် ဧပြီလတွင်  ထုတ်ပြန်ခဲ့ပြီး ပြည်တွင်း၊ ပြည်ပဖက်စပ် အသက်အာမခံနှင့် ဖက်စပ်အထွေထွေ အာမခံလုပ်ငန်းခြောက်ခုကိုလည်း ဇူလိုင်လ ၃၁ ရက်တွင် ထပ်မံထုတ်ပြန်လိုက်သည်။

အဆိုပါကုမ္ပဏီများသည် ပြည်တွင်း၌ အာမခံလုပ်ငန်းလုပ်ပိုင်ခွင့် အကဲဖြတ်စံချိန်စံညွှန်းများနှင့် ကိုက်ညီသော ကုမ္ပဏီများဖြစ်ပြီး သတ်မှတ်လိုင်စင်အကြိုလုပ်ငန်း ဆောင်ရွက်ပြီးစီးပါက အာမခံလုပ်ငန်းလုပ်ကိုင်ခွင့်လိုင်စင် ထုတ်ပေးသွားမည်ဖြစ်ကြောင်း ငွေရေးကြေးရေးကြီးကြပ် စစ်ဆေးရေးဦးစီးဌာန ညွှန်ကြားရေးမှူးဦးသန့်ဇင်က ပြောကြားသည်။ လုပ်ငန်းလိုင်စင်ရရှိပြီးပါက အာမခံဝန်ဆောင်မှု ပေးနိုင်မည်ဖြစ်သည်။

ဆယ်စုနှစ်ပေါင်းများစွာ အာမခံလုပ်ငန်းအတွေ့အကြုံရှိပြီး အဆင့်မြင့်နည်းပညာအသုံးပြုနိုင်သည့် နိုင်ငံတကာ  အာမခံကုမ္ပဏီကြီးများ ဝန်ဆောင်မှုစတင်မည်ဆိုပါက အရိုင်းဆန်ဆဲ မြန်မာ့အာမခံဈေးကွက်သည် မည်ကဲ့သို့ ပြောင်းလဲမည်နည်း။ မြန်မာနိုင်ငံ၏ အာမခံဈေးကွက်ပြိုင်ဆိုင်မှုက အဘယ်နည်း။

မြန်မာ့အာမခံဈေးကွက်တွင် အသက်အာမခံနှင့် အထွေထွေအာမခံဟူ၍  လုပ်ငန်းအမျိုးအစားနှစ်ခု ခွဲခြမ်းထားပြီး  နိုင်ငံခြားကုမ္ပဏီများကို ပုံစံနှစ်မျိုးဖြင့် လုပ်ကိုင်ခွင့်ပြုခြင်းဖြစ်သည်။ အသက်အာမခံတွင် ပြည်ပကုမ္ပဏီများကို ရာနှုန်းပြည့်ရင်းနှီးလုပ်ကိုင်ခွင့်ပြုပြီး စုစုပေါင်း ကုမ္ပဏီသုံးခု ရွေးချယ်ခွင့်ပြုမည်ဖြစ်သည်။

လက်ရှိတွင် နိုင်ငံခြားရင်းနှီးမြှုပ်နှံမှုရာနှုန်းပြည့်ပိုင်ဆိုင်သည့် အသက်အာမခံကုမ္ပဏီငါးခုကို ရွေးချယ်ထားပြီး ယင်းကုမ္ပဏီများထဲမှ သုံးခုကို လိုင်စင်ထုတ်ပေးသွားမည်ဖြစ်သည်။ ယင်းကုမ္ပဏီငါးခုမှာ  အမေရိကန်အခြေစိုက် AIA ၊ CHUBB ကုမ္ပဏီနှစ်ခုနှင့် ပြည်ပအာမခံကုမ္ပဏီကြီးများဖြစ်သည့် Dia-ichi ၊ Manufactures insurance ၊ Prudential Hong တို့ဖြစ်သည်။

ပြည်တွင်း၊ ပြည်ပဖက်စပ်လုပ်ကိုင်ခွင့်ကို ထိုင်းအခြေစိုက်အာမခံကုမ္ပဏီတစ်ခုနှင့် ဂျပန်ကုမ္ပဏီငါးခုတို့က ပြည်တွင်းအာမခံကုမ္ပဏီများနှင့် ပူးပေါင်းလုပ်ကိုင်မည်ဖြစ်ကြောင်း  စီမံကိန်းနှင့်ဘဏ္ဍာရေးဝန်ကြီးဌာနထံမှ သိရသည်။

ဧရာမြန်မာအာမခံနှင့် Sompo Japan Nipponkoa၊ ဂရင်းဂါးဒီယန်းနှင့် Tokio Marine and Nichido fire ကုမ္ပဏီ၊ အပြည်ပြည်ဆိုင်ရာကမ္ဘောဇ  အာမခံ (IKBZ) နှင့် Mitsui Sumitomo တို့သည် ဖက်စပ်ကုမ္ပဏီအဖြစ် အထွေထွေအာမခံလုပ်ငန်း လုပ်ကိုင်မည်ဖြစ်သည်။

Capital Life Insurance (မြို့တော်အသက်အာမခံ) နှင့် Taiyo Life ၊ CB အာမခံနှင့် Thai Life insurance ၊ ဂရင်းဂါးဒီယန်း (GGI)  နှင့် Nippon Life တို့သည် ဖက်စပ်ကုမ္ပဏီအဖြစ် အသက်အာမခံလုပ်ငန်း လုပ်ကိုင်မည်ဖြစ်သည်။ ဖက်စပ်လုပ်ငန်း ဆောက်ရွက်ရာတွင် ပြည်ပကုမ္ပဏီသည်  ရင်းနှီးမြှုပ်နှံမှုအချိုး ၃၅ ရာခိုင်နှုန်းအထိ ထည့်ဝင်နိုင်မည်ဖြစ်သည်။

“အခု ခြောက်ခုက ဆန္ဒ (ဖက်စပ်လုပ်ကိုင်ရန်) ရှိတဲ့ အကြောင်းတင်ပြတာ။ ဒါကို အစိုးရက လက်ခံပြီ။ လက်ခံပြီဆိုတာ သူတို့လိုင်စင်ထုတ်ပေးတော့မယ်ဆိုတဲ့  အဓိပ္ပာယ်တော့ သက်ရောက်ပါတယ်” ဟု ဂရင်းဂါးဒီးယန်းအာမခံကုမ္ပဏီ ဒုတိယဥက္ကဋ္ဌ ဦးဌေးပိုင်က ပြောကြားသည်။

ကုမ္ပဏီအမည် ရွေးချယ်ခြင်းအပါအဝင် သတ်မှတ်လိုင်စင်အကြိုလုပ်ငန်းစဉ် ပြီးစီးပါက အာမခံလုပ်ငန်းလိုင်စင်ရရှိမည်ဖြစ်ပြီး ယခုနှစ်အောက်တိုဘာလတွင်  အာမခံဝန်ဆောင်မှု ပေးနိုင်ဖွယ်ရှိကြောင်း  ၎င်းက မျှော်မှန်းသည်။ နိုင်ငံခြားအာမခံကုမ္ပဏီများသည် မြန်မာနိုင်ငံတွင် လုပ်ကိုင်ခွင့်ရရန် ၂၀၁၃ ခုနှစ်ကတည်းက စောင့်ဆိုင်းခဲ့ပြီး ၂၀၁၉ ခုနှစ်တွင် လုပ်ငန်းစတင်နိုင်ခြင်းဖြစ်သည်။

ယင်းသို့ နိုင်ငံခြားကုမ္ပဏီများ လုပ်ငန်းစတင်ခြင်းသည် မြန်မာပြည်သူတို့အတွက် နိုင်ငံခြားအာမခံဝန်ဆောင်မှုကို  နှစ်ပေါင်း ၆၇ နှစ်အတွင်း ရွေးချယ်ခွင့်ရခြင်းဖြစ်သည်။ အကြောင်းမှာ ၁၉၅၂ ခုနှစ် မှ ၂၀၁၃ ခုနှစ်အထိ မြန်မာ့အာမခံဈေးကွက်တွင် နိုင်ငံပိုင်စီးပွားရေးလုပ်ငန်း မြန်မာ့အာမခံလုပ်ငန်းက တစ်ပင်တိုင် လုပ်ကိုင်ခဲ့သည်။

သမ္မတဦးသိန်းစိန်လက်ထက်  ၂၀၁၃ ခုနှစ်တွင် ပြည်တွင်းပုဂ္ဂလိက အာမခံကုမ္ပဏီများကို ခွင့်ပြုခဲ့သော်လည်း  ပြည်ပကုမ္ပဏီများကို လုပ်ကိုင်ခွင့်မပြု ခဲ့ပေ။ နိုင်ငံခြားကုမ္ပဏီများကို အာမခံကိုယ်စားလှယ်ရုံးဖွင့်ခွင့်ပြုခဲ့ပြီး ဈေးကွက်လေ့လာခြင်းနှင့် အာမခံလုပ်ငန်းများ ပူးပေါင်းဆောင်ရွက်မှု စီမံချက်ရေးဆွဲခြင်းကို ခွင့်ပြုခဲ့သည်။ လက်ရှိအချိန်ထိ မြန်မာနိုင်ငံတွင် ကိုယ်စားလှယ်ရုံး ဖွင့်လှစ်ထားသည့် နိုင်ငံခြားအာမခံကုမ္ပဏီ ၃၃ ခု ရှိသည်။

“နိုင်ငံခြားကုမ္ပဏီတွေ ဝင်လာတာက ကောင်းတဲ့အကျိုးတွေက အများကြီးပါပဲ။ နည်းပညာတွေ မြင့်လာမယ်။ ငွေရေးကြေးရေး တောင့်တင်းလာမယ်။ Services (ဝန်ဆောင်မှု) တွေလည်း  ဒီထက်ပိုပြီး မြန်ဆန်လာမယ်” ဟု ဦးဌေးပိုင်က ပြောကြားသည်။

အာမခံဝန်ဆောင်မှုများကို ပြည်သူလူထုပိုမိုသိရှိရန် နိုင်ငံခြားအာမခံကုမ္ပဏီများက ဆောင်ရွက်ကြမည်ဖြစ်ပြီး အာမခံအကာအကွယ်ပျံ့နှံမှုလည်း တိုးတက်လာဖွယ်ရှိကြောင်း အာမခံလုပ်ငန်းရှင်များက သုံးသပ်ကြသည်။ ထို့အပြင် တီထွင်ဆန်းသစ်သည့် အာမခံမျိုးအစားများကို  ပရီမီယံကြေးသက်သာစွာ ဝယ်နိုင်မည်ဖြစ်ကြောင်း ၎င်းတို့က ဆိုသည်။

မြန်မာနိုင်ငံတွင် နိုင်ငံတော်ပိုင်  မြန်မာ့အာမခံလုပ်ငန်းအပါအဝင် ပြည်တွင်းပုဂ္ဂလိကအာမခံကုမ္ပဏီ ၁၂ ခုရှိပြီး ရောင်းချနေသည့် အသက်အာမခံနှင့် အထွေထွေအာမခံအမျိုးအစား အားလုံးပေါင်း ၃၆ ခု ကျော်သာရှိကြောင်း အာမခံဈေးကွက်အတွင်းမှ သိရသည်။

နိုင်ငံခြားကုမ္ပဏီများသည် အသက်အာမခံတစ်ခုကိုပင် အမျိုးအစားပေါင်း  ၁၀၀ ခန့်ရှိပြီး ခွဲစိတ်ဆရာဝန်များ၊ စာရေးဆရာများ၏ လက်ကိုအာမခံထားခြင်း၊  ဘောလုံးသမား၏ ခြေထောက်ကို အာမခံထားခြင်း အစရှိသည့် အာမခံအမျိုးအစားများကို ရောင်းချကြောင်း  Global World Insurance ကုမ္ပဏီ၏ ဒါရိုက်တာ  ဦးစိုးဝင်းသန့်က ပြောကြားသည်။

မြန်မာနိုင်ငံတွင် အာမခံအမျိုးအစားသစ်များ တီထွင်ရန် နည်းပညာအားနည်းပြီး အာမခံပရီမီယံကြေးနှုန်း ထားကို တွက်ချက်နိုင်သည့် အာမခံသင်္ချာပညာရှင်များပင် မရှိကြောင်း မြန်မာ့အာမခံလုပ်ငန်း ဦးဆောင်ညွှန်ကြားရေးမှူး  ဒေါက်တာစန္ဒာဦးက The Voice Journal သို့ ပြောဆိုထားသည်။

မြန်မာ့အာမခံလုပ်ငန်းက ယခုနှစ်တွင် အသစ်ရောင်းချသည့် လူထုအခြေပြု ကျန်းမာရေးစောင့်ရှောက်မှုအာမခံ၊  ပြင်းထန်သောရောဂါကုသမှုအာမခံနှင့် ကျန်းမာရေးအာမခံသုံးမျိုး  တီထွင်ရန် ဂျပန်နိုင်ငံအခြေစိုက် Taiyo Life Insurance ကုမ္ပဏီ၏ နည်းပညာအကူအညီကို ယူခဲ့ရသည်။

ပြည်ပအာမခံကုမ္ပဏီများ ဝင်ရောက်လာခြင်းကြောင့် အဆိုပါကုမ္ပဏီများထံ၏  နည်းပညာနှင့်အတွေ့အကြုံကို  ဖက်စပ်လုပ်ကိုင်မည့် ပြည်တွင်းကုမ္ပဏီများသည် လက်ခံရရှိမည်ဖြစ်သည်။

“အခွင့်အလမ်းအကောင်းဆုံးက ပြည်သူလူထုပဲ။ ပြည်သူလူထုကတော့ အာမခံအကာအကွယ်တွေ အများကြီး  ရသွားမယ်။ ကြိုက်တဲ့ Product ကို ကြိုက်တဲ့အာမခံကုမ္ပဏီက ရွေးချယ်နိုင်မယ်။ ဈေးနှုန်းအသက်သာဆုံး ကုမ္ပဏီကနေ အကောင်းဆုံးအကာအကွယ်ပေးမယ့် အာမခံအမျိုးအစားကို စိတ်ကြိုက်ရွေးချယ်နိုင်တဲ့အတွက် အခွင့်အလမ်းကောင်းတွေ အများကြီးရတယ်” ဟု  ဒေါက်တာဒေါ်စန္ဒာဦးက ပြောဆိုသည်။

မြန်မာနိုင်ငံသည် ကမ္ဘာတစ်ဝန်းတွင် အာမခံလုပ်ငန်းထိုးဖောက်ဝင်ရောက်မှု  အနည်းဆုံးနိုင်ငံတစ်ခုဖြစ်သဖြင့် အာမခံကုမ္ပဏီကြီးများအတွက် အခွင့်အလမ်းကောင်းများစွာရှိသည်။ မြန်မာနိုင်ငံတွင်  စုစုပေါင်းလူဦးရေ ၅၂ သန်းကျော်ရှိသည့်အနက် လူဦးရေနှစ်သန်းသာ အသက်အာမခံထားခြင်းကြောင့် လူဦးရေသန်း ၅၀ အတွက် အာမခံဝန်ဆောင်မှုပေးရန် ကျန်ရှိနေကြောင်း ၎င်းက ဆိုသည်။

မြန်မာနိုင်ငံ၏ အသက်အာမခံ ပရီမီယံဝင်ငွေသည် ပြည်တွင်းကုန်ထုတ်လုပ်မှု တန်ဖိုး (ဂျီဒီပီ) ၏ ၀ ဒသမ ၀၂ ရာခိုင်နှုန်း၊  အသက်မဟုတ်သော အခြားအာမခံပရီမီယံသည် ဂျီဒီပီ၏ ၀ ဒသမ ၀၉ ရာခိုင်နှုန်းသာရှိသဖြင့် လာအိုနိုင်ငံထက်ပင် နိမ့်ကျနေကြောင်း ငွေရေးကြေးရေးကြီးကြပ် စစ်ဆေးရေးဦးစီးဌာနထံမှ သိရသည်။

ပြည်ပကုမ္ပဏီများ၊ ဖက်စပ်ကုမ္ပဏီများ၏ ဈေးကွက်ထိုးဖောက်မှုအားကြောင့်  အာမခံထားရှိမည့်အသိဗဟုသုတ ပြည်သူလူထုကြားတွင် ပိုမိုပျံ့နှံ့လာမည်ဖြစ်ပြီး နောက်ဆယ်နှစ်အကြာတွင် မြန်မာလူဦးရေ၏ ၂၅ သန်းခန့်သည် အာမခံဝန်ဆောင်မှု အသုံးပြုလာနိုင်ကြောင်း အာမခံလုပ်ငန်းရှင်များက ခန့်မှန်းသည်။  သို့ဆိုလျှင် အာမခံပရီမီယံဝင်ငွေလည်း  တိုးတက်လာမည်ဖြစ်သည်။

လက်ရှိမြန်မာနိုင်ငံ၏ အာမခံဈေးကွက်တန်ဖိုးသည် ကျပ်ဘီလီယံ  ၁၆၀ မှ ၁၈၀ ခန့်သာရှိပြီး နောင်ဆယ်နှစ်တွင် ကျပ်ဘီလီယံ ၄၀၀၀ အထိ ရှိနိုင်သည်ဟု အာမခံလုပ်ငန်းအချို့က ခန့်မှန်းကြောင်း Global World Insurance ကုမ္ပဏီ၏ ဒါရိုက်တာဦးစိုးဝင်းသန့်က ပြောကြားသည်။

အနာဂါတ်အာမခံဈေးကွက်တွင် အခွင့်အလမ်းသစ်များ ပေါ်လာမည်ဖြစ်သကဲ့သို့ ဈေးကွက်ပြိုင်ဆိုင်မှုမှာလည်း  အထွတ်အထိပ်သို့ ရောက်ရှိလာမည်ဖြစ်သည်။ ပြင်းထန်သည့်ပြိုင်ဆိုင်မှုများကြားတွင် ပြည်တွင်းကုမ္ပဏီများသည် တစ်ဦးတည်းရပ်တည်ပါက ရေရှည်တွင် ယှဉ်ပြိုင်နိုင်စွမ်းရှိမည် မဟုတ်ကြောင်း  ၎င်းက ယူဆသည်။

“ပြည်တွင်းဈေးကွက်ကို တကယ်ပဲကျယ်ကျယ်ပြန့်ပြန့်  ဦးနိုင်တယ်လို့  ကိုယ့်ကိုယ်ကိုယ် ယုံကြည်တယ်ဆိုရင် တော့  Local တစ်ယောက်ထဲနေလည်း ရတယ်။  တချို့ကျတော့ ဘယ်လိုပဲနိုင်ငံခြား ကုမ္ပဏီ၊ ဖက်စပ်ကုမ္ပဏီပဲဖြစ်ဖြစ် ပြည်တွင်းကိုပဲ အားပေးမယ်ဆိုတဲ့သူတွေ အများကြီးရှိရင်တော့ ပြည်တွင်းကုမ္ပဏီက အဆင်ပြေမှာပေါ့” ဟု ၎င်းကဆိုသည်။

သို့သော် ပြည်တွင်းကုမ္ပဏီများသည် ကျွမ်းကျင်ဝန်ထမ်းနှင့် နည်းပညာတို့တွင် အလွန်အားနည်းသည်။ အာမခံလုပ်ငန်းအတွေ့အကြုံမှာလည်း ခြောက်နှစ်ခန့်သာ ရှိသေးသည်။ မြန်မာနိုင်ငံတွင် ဝင်ရောက်လာသည့် ကုမ္ပဏီကြီးများသည် အာမခံလုပ်ငန်းအတွေ့အကြုံ အနည်းဆုံး နှစ်ပေါင်း ၆၀ ခန့်ရှိသည့် ကုမ္ပဏီများ ဖြစ်သည်။

“နှစ်ပေါင်းများစွာဆိုတဲ့ အတွေ့အကြုံက ပိုက်ဆံနဲ့ဝယ်လို့မရဘူး။ အတွေ့အကြုံနဲ့ လာတဲ့လူတွေကို ရေရှည်ပြိုင်ဖို့ဆိုရင် (ပြည်တွင်းကုမ္ပဏီက) သူတို့နောက်မှာ၊ သူတို့အောက်မှာပဲ ရောက်နေမှာပေါ့” ဟု ၎င်းကထပ်လောင်းပြောဆိုသည်။

ထို့ကြောင့် ဖက်စပ်လုပ်ကိုင်ရန်  ပြည်တွင်းကုမ္ပဏီများသည် နိုင်ငံခြားမိတ်ဖက်ကုမ္ပဏီများကို ရှာဖွေနေကြသည်။ မြန်မာ့အာမခံလုပ်ငန်းသည်ပင်  ပြည်ပကုမ္ပဏီနှင့် ဖက်စပ်ဆောင်ရွက်ခွင့်ရရန် မြန်မာ့အာမခံလုပ်ငန်းဥပဒေကို  ပြင်ဆင်လျက်ရှိသည်။ ယခုနှစ်တွင် ဖက်စပ်ကုမ္ပဏီ ခြောက်ခုသာရှိသော်လည်း လာမည့်နှစ်တွင် အရေအတွက် ပိုများလာဖွယ်ရှိသည်။

မကြာမီတွင် လက်ရှိလုပ်ကိုင်ခွင့်ရရှိသည့် အာမခံကုမ္ပဏီများသည် ဝန်ဆောင်မှုပေးကြတော့မည် ဖြစ်သည်။  ထိုအာမခံဝန်ဆောင်မှုကို မြန်မာတို့စိတ်ကြိုက် ရွေးချယ်ခွင့်ရတော့မည်ဖြစ်ပြီး  အာဆီယံတွင် ဖွံ့ဖြိုးမှုအနိမ့်ဆုံး မြန်မာ့အာမခံဈေးကွက်လည်း ပိုမိုတောက်ပြောင်လာဖွယ်ရှိသည်။

အထူးသဖြင့် အသက်အာမခံလုပ်ငန်းသည် နိုင်ငံတကာထိပ်တန်း အာမခံကုမ္ပဏီများ ဝင်ရောက်လာမည်ဖြစ်ရာ ဖွံ့ဖြိုးတိုးတက်မှု မြန်ဆန်နိုင်ကြောင်း  ဦးဌေးပိုင်က ပြောကြားသည်။

အခြားတစ်ဖက်တွင်မူ အာမခံလုပ်ငန်းသည် တိုင်းပြည်စီးပွားရေးအခြေအနေနှင့် တိုက်ရိုက်ပတ်သက်သဖြင့် အခြေခံစားဝတ်နေရေး၊ စီးပွားရေးတိုးတက်လာမှသာ အာမခံဝန်ဆောင်မှုကို အသုံးပြုကြမည်ဖြစ်ကြောင်း ၎င်းကဆိုသည်။

မဖြစ်မနေထားရသည့် အာမခံအမျိုးအစားများ ရှိသော်လည်း အာမခံအမျိုးအစားအများစုမှာ ငွေပိုငွေလျှံရှိမှ သာ အသုံးပြုကြမည်ဖြစ်ရာ တဖြည်းဖြည်းချင်း တိုးတက်လာမည်မှာမူ မလွဲကြောင်း  ၎င်းကယခုလိုဆိုသည်။

“တိုးတက်မှုတော့ တဖြည်းဖြည်းရှိလာမှာပါ။ လူတွေစိတ်ဝင်စားလာအောင်  ကုမ္ပဏီတွေပေါင်းပြီးတော့ လုပ်ကြမှာပေါ့”

နိုင်လင်းအောင်

You may also like...

Leave a Reply

Your email address will not be published. Required fields are marked *