ရွေးကောက်ပွဲနီးလာသည်နှင့်အမျှ ခေါင်းအေးအေးထားရမည့် Player ကြီးများ

မြန်မာ့ဒီမိုကရေစီတည်ဆောက်ရေးတွင် လမ်းဆုံလမ်းခွကြီးဖြစ်သည့် ၂၀၂၀ရွေးကောက်ပွဲ တဖြည်းဖြည်းနီးကပ်လာသည်နှင့်အမျှ အဓိကကျသော နိုင်ငံရေး Player များသည် ခေါင်းအေးအေးထားရန် ပိုပြီးအရေးကြီးလာပြီ။

ရွေးကောက်ပွဲတို့သည် သူများမကောင်းကြောင်း ကိုယ်ကောင်းကြောင်း ပြောဆိုမဲဆွယ်ရသည့်ကာလဖြစ်သည့်အတွက် အမေရိကန်ပြည်ထောင်စုကဲ့သို့ ဒီမိုကရေစီကျင့်သားရပြီးသား နိုင်ငံများတွင်ပင်လျင် Us and Them ခေါ် သူ့လူ ကိုယ့်လူခွဲပြီး ရန်မီးပွားသည့်ကာလဖြစ်သည်။ မြန်မာနိုင်ငံကဲ့သို့ ရွေးကောက်ပွဲများနှင့် ထိတွေ့စ၊ နိုင်ငံတွင်း အကွဲအပြဲများသည့် နိုင်ငံမျိုးတွင်မူ ရွေးကောက်ပွဲများသည် စနက်တံပြုတ်လုလု ဗုံးများနှင့် တူနေသည်။ ရွေးကောက်ပွဲနီးလာချိန်တွင် နိုင်ငံရေးအာဏာကို အချိန်ကာလအတန်ကြာဆုပ်ကိုင်ခဲ့သည့် တပ်မတော်က နောက်ပြန်ဆုတ်ကာ အတိုက်အခံအဖြစ် ရာစုနှစ်လေးပုံတစ်ပုံကြာ ရုန်းကန်ခဲ့သည့် NLD ပါတီနှင့် အစိုးရအဖွဲ့တွင်းတွင် လက်တွဲအလုပ်လုပ်ကိုင်နေချိန် လေးနှစ်သာရှိသေးရာ အတိမ်းအစောင်းမခံသည့်အခြေအနေတွင်ရှိဆဲ။ လက်တွဲအလုပ်လုပ်ရင်း ယုံကြည်မှုမြင့်လာလျှင် နိုင်ငံအတွက် များစွာကောင်းသွားနိုင်သည့် မျှော်လင့်ချက်ရှိနေသလို လက်တွဲကြည့်မှ ပိုမတည့်ဖြစ်လျှင် ပြုပြင်ပြောင်းလဲရေး ခရီးပေါက်မည်မဟုတ်။

၂၀၂၀ နီးလာချိန်သည် ၂၀၁၇ ရခိုင်အရေးကြောင့် ဖြစ်ပေါ်လာသော နိုင်ငံတကာဖိအားကြီးလာချိန်နှင့်လည်း တိုက်ဆိုင်နေသည့်အတွက် နဂိုကတည်းက ပြည်တွင်းတွင်ဖိအားများနေသော နိုင်ငံရေး Player ကြီးများအကြား လက်တွဲလုပ်ကိုင်ရာတွင် အခက်တွေ့နိုင်သလို ပိုမိုညှိနှိုင်းရန်လည်း လိုလာသည်။

ပြည်တွင်းလက်နက်ကိုင် ပဋိပက္ခသည်လည်း ရခိုင်ပြည်နယ်အတွင်း အသစ်ပေါ်ပေါက်လာသလို နိုင်ငံအနှံ့အပြားတွင် အညိုရောင်နယ်မြေများ ကျယ်ပြန့်လာကာ ပြင်ဦးလွင်ကဲ့သို့နေရာကိုပင် အတိုက်ခိုက်ခံရသည့်အတွက် နိုင်ငံကိုစီမံခန့်ခွဲနေသော NLD အစိုးရနှင့် နိုင်ငံ့လုံခြုံရေးကို တာဝန်ယူထားရသည့် တပ်မတော်တို့အပေါ် ဖိအားကြီးများ ထပ်မံကျရောက်လာသည်။

လက်ရှိအာဏာရပါတီ NLD သည် ၂၀၂၀ တွင် ပြန်နိုင်မှ လက်ရှိ သူဦးဆောင်နေသည့် ပြုပြင်ပြောင်းလဲရေးကို ဆက်အကောင်အထည်ဖော်နိုင်မည်ဖြစ်ရာ နိုင်ချင်စိတ်အလွန်ပြင်းနေသည်။ တပ်မတော်၏ အနာဂတ်အခန်းကဏ္ဍကိုလည်း ၂၀၂၀ က ဆုံးဖြတ်မည်ဖြစ်ရာ တပ်မတော်သည်လည်း ၂၀၂၀ ကို သဲကြီးမဲကြီး စောင့်ကြည့်နေသည်။ နိုင်ငံရေး Player ကြီး နှစ်ဦးလုံး စိတ်ပူပင်တကြီးနှင့် ၂၀၂၀ ကို ချဉ်းကပ်ကြချိန်တွင် အထက်တွင်ပြောခဲ့သော ပြည်တွင်းပြည်ပအရေးကြီးများ၏ ဖိအားများသည် လျော့သည်ထက် တိုးလာဖို့ များသည်။ စိတ်ပူပင်မှုများလျှင် အလောတကြီး လုပ်မိတတ်သည်။

မြန်မာနိုင်ငံ၏ ကံကြမ္မာသည် နိုင်ငံရေး Player ကြီး နှစ်ဦးဖြစ်သည့် အစိုးရနှင့် တပ်မတော်ပေါ် မူတည်နေရာ ဧရာမဖိအားများနှင့် ရင်ဆိုင်နေရသော်လည်း ခေါင်းအေးအေးထားသင့်သည့်အကြောင်း မိကျောင်းမင်းရေခင်းပြ ရေးသားလိုက်ရပါသည်။ 

 

အယ်ဒီတာ
၁၅.၈.၂၀၁၉

You may also like...

Leave a Reply

Your email address will not be published. Required fields are marked *