ပါတီနိုင်ငံရေးနှင့် နိုင်ငံရေးပါတီ

ပါတီနိုင်ငံရေးလုပ်တဲ့သူမှာ ဘက်အစွဲရှိတာ မဆန်းပါဘူး။ ပါတီနိုင်ငံရေးဆိုတာလည်း ဘက်နဲ့လုပ်ရတဲ့သဘာဝ ရှိတယ်မဟုတ်လား။ ဘက်ရှိမှ အရာတွင်သလို၊ ဘက်ရှိမှ ခရီးပေါက်တယ်လို့ ယူဆကြတဲ့သဘော ဖြစ်ပါတယ်။ ဒါပေမဲ့ ဘက်ဟာ အမြဲတမ်းလိုလို ရွေ့နေတတ်ပါတယ်။ အကောင်း၊ အဆိုး၊ အမှား၊ အမှန်တွေဟာ ရောထွေးနေတတ်တယ်။ ဒါပေမဲ့ ဘက်ကိုကြည့်တာထက်စာရင် မူကိုကြည့်တာ ပိုကောင်းလိမ့်မယ်ထင်တယ်။ ဒီပါတီဟာ ဘယ်ဘက်ကလဲဆိုတာထက် ဒီပါတီဟာ ဘယ်မူကို ကျင့်သုံးသလဲ။ ဘယ်မူအပေါ်မှာ အခြေခံသလဲဆိုတာကို လေ့လာတွက်ဆဖို့ လိုပါလိမ့်မယ်။

ဒီမိုကရေစီစနစ်ဟာ ရွေးကောက်ပွဲနဲ့ တွဲနေပါတယ်။ ရွေးကောက်ပွဲဟာ ပါတီတွေနဲ့ တွဲနေပါတယ်။ ပါတီစုံစနစ်မှာ ရွေးကောက်ပွဲတွေ ဝှဲချီးကျင်းပကြတယ်။ ရွေးကောက်ပွဲတွေမှာ အပြိုင်အဆိုင် မဲဆွယ်ကြတယ်။  စည်းရုံးကြတယ်။ ဒါပေမဲ့ ရွေးကောက်ပွဲဝင်တဲ့ ပါတီတိုင်းက မဲမရကြပါဘူး။ မဲရတိုင်းလည်း အာဏာမရကြပါဘူး။ မဲကို အုံလိုက်ကျင်းလိုက်၊ အပြတ်အသတ်နိုင်ပါမှ အာဏာရဖို့သေချာတယ်။ အဲသည်လိုမှ မဟုတ်ရင် ညွန့်ပေါင်းပုံသဏ္ဌာန်နဲ့ အာဏာတွေကို ခွဲဝေနေရတတ်တယ်။ ရံဖန်ရံခါလည်း ရွေးကောက်ပွဲကနေ အာဏာကော်ရစ်ဒါ ပလက်ဖောင်းပေါ်မှာ အိမ်ဖြည့်သဘောလောက်သာ ပါဝင်နိုင်လိမ့်မယ်။

ရွေးကောက်ပွဲမှာ အုံလိုက်ကျင်းလိုက် ထောက်ခံမဲတွေရဖို့  ဘယ်လိုအကြောင်းအချက်တွေက ပံ့ပိုးပါသလဲ။ နိုင်ငံရေးသိပ္ပံသမားတွေက ဒီမိုကရေစီရွေးကောက်ပွဲတွေမှာ ထောက်ခံမဲတွေရခြင်းအကြောင်း အချက်တွေကို ဖော်ထုတ်ထားပါတယ်။

ပါတီခေါင်းဆောင်

ပါတီခေါင်းဆောင်ဟာ ရွေးကောက်ပွဲမှာ မဲနိုင်ဖို့ အခရာကျပါတယ်။ လူထုဟာ ပါတီကို ကြည့်တယ်။ ပါတီခေါင်းဆောင်ကို ကြည့်တယ်။ ပါတီခေါင်းဆောင်ဟာ ပုဂ္ဂိုလ်ရေးဩဇာသိပ်ကြီးနေတဲ့ ခေါင်းဆောင်မျိုး  ဆိုရင် အဲဒီပါတီဟာ ပြည်သူရဲ့ထောက်ခံမဲရဖို့ သေချာတယ်။ သာမန်လူထုဟာ ပါတီရဲ့မူကို ကြည့်တာထက် ပါတီခေါင်းဆောင်ကို ပိုကြည့်တတ်ကြတယ်။ ပါတီခေါင်းဆောင်ရဲ့ ကိုယ်ရည်ကိုယ်သွေးကို ကြည့်ပြီး မဲပေး တတ်ကြတယ်။

ပါတီတွေဟာ ရွေးကောက်ပွဲမှာ မဲရဖို့ကြိုးစားရတယ်။ ဒါ့ကြောင့် ပါတီဝင်တွေဟာ ခေါင်းဆောင်ကို မွေးယူရတယ်။ ကိုယ့်ပါတီခေါင်းဆောင်က အားနည်းနေရင် ပါတီအပေါ် လူထုကြည်ညိုမှု ကျဆင်းနိုင်တယ်။ ပါတီခေါင်းဆောင်က လူထုကို ညှို့နိုင်မှ လူထုဟာ ပါတီကို မဲပေးချင်တယ်။ ပါတီခေါင်းဆောင်ရဲ့ ပုဂ္ဂိုလ်ရေး ဩဇာတိက္ကမဟာ ရွေးကောက်ပွဲမှာ အရေးကြီးတဲ့ အချက်ဖြစ်ပါတယ်။ ပါတီခေါင်းဆောင်မှာ ပုဂ္ဂိုလ်ရေး ဩဇာချို့တဲ့ရင် ရွေးကောက်ပွဲမှာ မဲဆွယ်ဖို့အခက်အခဲရှိနိုင်တယ်။ တချို့ …  ပါတီအင်စတီကျူးရှင်း အားကောင်းပေမယ့် ပါတီကတင်တဲ့ခေါင်းဆောင် အရွေးမှားလို့ ရွေးကောက်ပွဲမဲမရတာတွေလည်း ရှိတယ်။

သက်လုံ

ပါတီစုံစနစ်မှာ ရွေးကောက်ပွဲနီးရင် ပါတီတွေ အပြိုင်းအရိုင်း ပေါ်လာတတ်တာ ထုံးစံပါပဲ။ ဒီထုံးစံကို မြန်မာပြည်မှာ တွေ့နိုင်ပါတယ်။ ၁၉၉၀ ရွေးကောက်ပွဲကို ကြည့်ပါ။ ပါတီပေါင်း ၂၀၀ ကျော်၊ ၃၀၀ နီးပါး မှတ်ပုံ တင်ကြတာပါပဲ။ ၂၀၁၀ ရွေးကောက်ပွဲကိုလည်း ကြည့်ပါ။ ပါတီပေါင်း မြောက်မြားစွာ မှတ်ပုံတင်ဝင်ရောက်ယှဉ်ပြိုင်ကြတယ်။ ၂၀၁၅ အထွေထွေရွေးကောက်ပွဲကိုလည်း ကြည့်ပါ။ ပါတီပေါင်း ၁၀၀ နီးပါး မှတ်ပုံတင်ကြတယ်။ အခုလည်း လာမယ့် ၂၀၂၀ ရွေးကောက်ပွဲအတွက် တာဆူနေတဲ့ပါတီတွေ မြောက်မြားစွာ ရှိနေပါပြီ။

ပါတီတွေဟာ ရွေးကောက်ပွဲနီးရင် တာဆူနေတတ်ပြီး ရွေးကောက်ပွဲပြီးရင် ပြန်ငြိမ်သွားတာတွေ့ရပါတယ်။ ရွေးကောက်ပွဲကာလကျမှ  လှုပ်ရှားမှုရှိတဲ့ပါတီဟာ ရာသီပေါ်ပါတီဖြစ်နေတတ်ပါတယ်။ ရွေးကောက်ပွဲမှာ  ပါတီတွေအဖို့ မျှော်လင့်ချက်တွေရှိတယ်။ ရွေးကောက်ပွဲ ကြေညာတဲ့နေ့ဟာ မဲမရတဲ့ပါတီတွေ မျှော်လင့်ချက် မှေးမှိန်တဲ့နေ့ ဖြစ်နေပါတယ်။

– ပါတီတစ်ခုဟာ ဘယ်လောက်ဖြတ်သန်းခဲ့သလဲ။

– နိုင်ငံရေးခရီးကြမ်းမှာ ဘယ်လောက်အနစ်နာခံခဲ့သလဲ။

– အချိန်ဘယ်လောက်ကြာကြာ ပြည်သူလူထုရှေ့မှာ မားမားမတ်မတ်ရပ်ခဲ့သလဲ။

– နိုင်ငံရေးအထုအထောင်းဒဏ်ထဲက ဘယ်လောက်ရုန်းထနိုင်ခဲ့သလဲ။

– ပါတီကို ဘယ်လောက်ထိ ပါတီလားမြောက်အောင် ပျိုးထောင်နိုင်ခဲ့သလဲ။

ဒီပေတံတွေဟာ ပါတီအပေါ်မှာ လူထုကကြည့်တဲ့ နှုန်းစံတွေ ဖြစ်နိုင်ပါတယ်။ ရွေးကောက်ပွဲနီးမှ တစ်ပွဲထိုး ဇာတ်ထိုးကပြတဲ့ ပါတီကို ပြည်သူတွေက သိပါတယ်။ ပြည်သူတွေ နားလည်ပါတယ်။ ဒီလိုပါတီမျိုးဟာ  ပြည်သူ့ရဲ့ထောက်ခံမဲကို ရဖို့မလွယ်ပါဘူး။

နိုင်ငံရေးပါတီတစ်ရပ်ဟာ သက်လုံဘယ်လောက်ကောင်းတယ်ဆိုတာ ကြည့်ရပါမယ်။ ရွေးကောက်ပွဲဟာ ရာသီပေါ်ဖြစ်ပေမယ့် နိုင်ငံရေးအလုပ်ဟာ ရာသီပေါ်မဟုတ်ပါဘူး။ ရာသီကျမှ ထလုပ်ရတဲ့အလုပ် မဟုတ် ပါဘူး။ ဒါကို သိထားပြီး နိုင်ငံရေးပါတီတွေရဲ့ ကိုယ်ခံအားကို မြှင့်တင်နိုင်မယ်ဆိုရင် ပါတီစုံစနစ်ဟာ ပိုပြီး ပီပြင်လာလိမ့်မယ်လို့ ယူဆပါတယ်။

စည်းရုံးရေး အင်အား

ပါတီဟာ လူထုရဲ့ နောက်မြီးဆွဲလား။ သို့တည်းမဟုတ် လူထုရဲ့ ရှေ့ဆောင်လမ်းပြလား။ ပါတီတွေဟာ လူထုဆီက မဲကိုရချင်လို့ လူထုဆန္ဒတွေကို ထင်ဟပ်စေတဲ့အကြောင်းအရာတွေနဲ့ မဲဆွယ်တတ်ကြတယ်။  စည်းရုံးတတ်ကြတယ်။ နိုင်ငံရေးပါတီမှန်ရင် ရွေးကောက်ပွဲမှာ မဲနိုင်ဖို့လိုပါတယ်။ ဒါပေမဲ့ မဲနိုင်အောင် ဘယ်လို နည်းနာနဲ့ ဆွဲဆောင်စည်းရုံးသလဲဆိုတာ အရေးကြီးပါတယ်။

– ငွေရှိတဲ့ပါတီဟာ ငွေကို အားကိုးတတ်တယ်။

– အာဏာရှိတဲ့ပါတီဟာ အာဏာကို အားကိုးတတ်တယ်။

– ဩဇာရှိတဲ့ပါတီဟာ ဩဇာကို အားကိုးတတ်တယ်။

– လူမျိုးစုပါတီဟာ လူမျိုးစုကို အားကိုးတတ်တယ်။

– လူထုပါတီဟာ လူထုကို အားကိုးတတ်တယ်။

– လူများတဲ့ပါတီက လူအများစုကို အားကိုးတတ်တယ်။

ပါတီရဲ့အင်အားဟာ ဘယ်အပေါ်မှာ အခြေပြုနေသလဲဆိုတာ ဆန်းစစ်ဖို့လိုပါတယ်။ ပါတီရဲ့စည်းရုံးရေးဟာ ပါတီရဲ့မူအပေါ်မှာလည်း အခြေခံတယ်။ ပါတီခေါင်းဆောင်တွေရဲ့ ဩဇာ၊ ပုံရိပ်တွေအပေါ်မှာလည်း  အခြေခံတယ်။ ပါတီဝင်တွေအပေါ်မှာ စုဖွဲ့စုစည်းနိုင်တဲ့အခြေအနေပေါ်မှာလည်း မူတည်တယ်။ ဖြစ်တည်နေတဲ့ နိုင်ငံရေးအခြေအနေအပေါ် ဆက်စပ်ပြီး ကျင့်သုံးတဲ့ပါတီရဲ့ မဟာဗျူဟာအပေါ်မှာလည်း အခြေတည် နေပြန်တယ်။ ပါတီနဲ့ မီဒီယာတွေအကြား၊ အရပ်ဘက်အဖွဲ့အစည်းတွေ အကြား၊ ပါတီ-ပါတီချင်း ဆက်ဆံရေး အခြေအနေတွေအကြားမှာလည်း လွှမ်းမိုးသက်ရောက်နေပြန်တယ်။ ပါတီတွင်းမှာ ချမှတ်အသက်သွင်းထားတဲ့ ပီအာလို့ခေါ်တဲ့ လူထုဆက်ဆံရေးနည်းနာတွေကလည်း အရေးကြီးပါတယ်။ စည်းရုံးရေးအင်အား၊ စည်းရုံးရေးမဟာဗျူဟာနဲ့ ပါတီတွင်းခေါင်းဆောင်တွေရဲ့ ဩဇာတွေဟာ နိုင်ငံရေးအခြေအနေတွေနဲ့ အစပ် အဟပ်ညီကြရင် ပြိုင်သလောက် နိုင်ကြတာချည်းပါပဲ။

စုဖွဲ့နိုင်မှု စွမ်းရည်

ပါတီတွေမှာ လူများပြီး ပွဲမစည်တာတွေ ကြုံရပါလိမ့်မယ်။ “ငါးသိုင်းများပြီး ဟင်းဟုံ” နေတာတွေ ကြုံရပါလိမ့်တယ်။ တချို့ပါတီတွေလည်း ကိုယ်နဲ့နီးစပ်ရာလူတွေကို ဆွဲစုပြီး နိုင်ငံရေးဇာတ်ခင်းနေကြရတယ်။  ပါတီဟာ လူထုပါတီဖြစ်လာဖို့အတွက် စည်းရုံးရတယ်။ စုဖွဲ့ရတယ်။  လူထုပါတီဆိုတဲ့သဘောဟာ လူမျိုးစုံ၊ အတန်းအစားစုံ၊ အလွှာစုံဖြစ်တာမို့ အပေါက်အစပ်များနိုင်ပါတယ်။ အသံလည်း စုံနိုင်တယ်။ ပြဿနာလည်း  များနိုင်တယ်။ နိုင်ငံရေးဆိုတာက အများနဲ့စုဖွဲ့ပြီး လုပ်ရတဲ့သဘောဖြစ်လို့  လူများရင် ကြုံလာတတ်တဲ့ပြဿနာတွေကတော့ ရှိနေစမြဲဖြစ်ပါတယ်။

ပါတီတွေဟာ ကိုယ်ပါတီတွင်း လူများများရချင်လို့ ဘယ်သူဝင်လာလာပြီးရော မစိစစ်ဘဲ စည်းရုံးသိမ်းသွင်းတာတွေ ရှိတတ်ပါတယ်။ လက်ဝဲပါတီတွေကတော့ အဲသည်လိုမဟုတ်ပါ။ ကေဒါပါတီလို့ တိုက်ရိုက်သုံးရင် ပိုမှန်နိုင်ပါတယ်။ ကေဒါပါတီတွေဟာ ပါတီဝင်တွေကို စိစစ်တယ်။  အဆင့်ဆင့် ဆန်ခါတိုက်စစ်ထုတ်တယ်။ ဒီလိုနဲ့ အမာခံကေဒါအဆင့်ရောက်လာအောင် တဖြည်းဖြည်းမွေးယူတယ်။

ဒီလိုနဲ့ပါတီအင်အားကောင်းအောင် လုပ်ယူတတ်ကြတယ်။ ပါတီအပေါ် ယုံကြည်သက်ဝင်မှု၊ ပါတီမူဝါဒအပေါ် ယုံကြည်သက်ဝင်မှု၊ ပါတီအပေါ် သစ္စာရှိမှု၊ တစ်ဦးချင်းစွမ်းရည်ရှိမှု၊ စည်းရုံးနိုင်စွမ်း မြင့်မားမှုတွေကိုကြည့်ပြီး ပါတီကို တည်ဆောက်တယ်။ ပါတီတွင်း ချိတ်ဆက်လှုပ်ရှားမှုဟာ အရေးကြီးတယ်။ ဆက်သွယ်ရေးစွမ်းရည်ဟာ ပါတီကို ရေရှည်စကားပြောမယ့် အချက်ဖြစ်တယ်။ အချိတ်အဆက်ရှိရှိ၊ ထိထိမိမိ  ပူးပေါင်းလုပ်ဆောင်နိုင်မှုအပေါ် မူတည်ပြီး ပါတီရဲ့အင်အားဟာ ရွေးကောက်ပွဲရလဒ်တွေကို ဖန်တီးနိုင်တာဖြစ်ပါတယ်။

ရန်ပုံငွေ

စီးပွားရေးပဲလုပ်လုပ်၊ နိုင်ငံရေးပဲ လုပ်လုပ်၊ လူမှုရေးပဲ လုပ်လုပ်၊ အဖွဲ့အစည်းတိုင်း၊ လုပ်ငန်းတိုင်းမှာ ငွေကြေးလိုတယ်။ ဘဏ္ဍာငွေလိုတယ်။ ပါတီတစ်ခုဟာ ရန်ပုံငွေဟာ ဘယ်ကရှာသလဲ၊ ဘယ်ကရသလဲ၊ ဘယ်လို ရှာကြံသလဲ … ဆိုတာတွေက အရေးကြီးတယ်။ မသမာတဲ့နည်းလမ်းတွေနဲ့ ရှာမိရင် ပါတီဟာ ငါးပါးမက သံဃာစင်ပါ မှောက်တော့တာပဲ။ ဒါကို သတိထားဖို့လိုတယ်။ ဥပဒေတွင်းက လုပ်ပိုင်ခွင့်ရှိတဲ့ ရန်ပုံငွေ ရှာကြံနည်းတွေ ရှိပါတယ်။ ရန်ပုံငွေဟာ ပါတီတစ်ခုအတွက် အရေးကြီးတယ်။ ရွေးကောက်ပွဲမှာ ဖြန့်ကြက်နိုင်စွမ်းကို ရန်ပုံငွေ က ပြဋ္ဌာန်းစီရင်နိုင်တယ်။

ပါတီပိုင် စီးပွားရေးလုပ်ငန်းတွေ၊ ကုမ္ပဏီတွေ ထူထောင်လို့ရတယ်။ ရိုးရှင်းစွာ အလှူငွေကောက်ခံခွင့်ရှိတယ်။ ပါတီဝင်များထဲကနေ လစဉ်ကြေး၊ နှစ်စဉ်ကြေးတွေ ကောက်ခံနိုင်တယ်။ ပါတီရန်ပုံငွေ ဈေးရောင်းပွဲတွေ၊ စတိတ်ရှိုးပွဲတွေလုပ်ပြီး ရန်ပုံငွေရှာနိုင်တယ်။ ကိုယ့်ပါတီခေါင်းဆောင်က  နိုင်ငံတကာပုံရိပ်ရှိရင် အသုံးအဆောင်ပစ္စည်းတွေ၊ အနုလက်ရာတွေကို လေလံတင်ရောင်းချတာတွေရှိတယ်။ ပါတီအောက်မှာ ပရဟိတအသင်းတွေဖွဲ့ပြီး သွယ်ဝိုက်သောနည်းနဲ့ လူထုအကျိုးပြုလုပ်ငန်းတွေ လုပ်လို့ရတယ်။

ပါတီကြီးရင်ကြီးသလောက် ရန်ပုံငွေလိုအပ်ချက်ကလည်း မြင့်လာတယ်။ အာဏာရပါတီတွေဟာ ပါတီရန်ပုံငွေကို ပါတီဝင်အစိုးရအဖွဲ့ဝင်တွေရဲ့ အကြောင်းတရားနဲ့ ရန်ပုံငွေရှာကြံတာတွေ ရှိကြတယ်။  ဒါတွေဟာ ပါးပါးနပ်နပ်မလုပ်တတ်ရင် ခြစားမှု၊ အလွဲသုံးစားလုပ်မှုတွေ ဖြစ်သွားတတ်တာမို့ သတိထားရတယ်။ ရွေးကောက်ပွဲတွေမှာ ပြိုင်ဘက်ပါတီရဲ့ ထိုးနှက်ချက်မဖြစ်အောင် သတိထားလုပ်ဆောင်ကြရတယ်။

ပါတီနိုင်ငံရေးဟာ ရွေးကောက်ပွဲဒီမိုကရေစီနဲ့ ဆက်စပ်နေတာဖြစ်လို့ ပါတီတွေအားကောင်းသန်မာရေးဟာ အရေးကြီးတယ်။ ပါတီတွေမှာ  ပါဝင်တဲ့လူတွေရဲ့ စွမ်းဆောင်ရည်တွေ၊ ပါတီရဲ့ မူဝါဒ/အိုင်ဒီယော်လိုဂျီနဲ့  သူတို့ရဲ့နည်းဗျူဟာတွေဟာ ပါတီတွေရေရှည်ကြံ့ခိုင်သန်မာရေးအတွက် အရေးကြီးတဲ့ အကြောင်းအချက်တွေ ဖြစ်ပါတယ်။

ပါတီစုံဒီမိုကရေစီစနစ် ပီပြင်ခြင်း/မပီပြင်ခြင်းဟာ ပါတီတွေရဲ့ ကြံ့ခိုင်သန်မာမှုအပေါ်မှာ မူတည်နေတာဖြစ်ပါတယ်။ ရလာတဲ့နိုင်ငံရေး လွတ်လပ်မှုခွင့် (ဂွင်) ကို ကောင်းကောင်းအသုံးချနိုင်ဖို့ နိုင်ငံရေးပါတီတွေ ကြံ့ခိုင်သန်မာခြင်းဟာ အရေးကြီးကြောင်း ရေးသားတင်ပြလိုက်ရပါတယ်။

မင်းသေ့

ညနေ ၅း ၃၁

၂၀  ဇူလိုင်၊ ၂၀၁၉၊ ရန်ကုန်မြို့။

You may also like...

Leave a Reply

Your email address will not be published. Required fields are marked *